JAN 1
1
Kayoʔo kí ma krɛʔɛ hɛnwyee
1Sanni Nyɛʔɛlɛ lí bi drunya hanri we, ŋa pé na yeri Kayoʔo ge wi dá bo wa kɔ. Wi dá bo wa Nyɛʔɛlɛ ní le mà po Nyɛʔɛlɛ. 2Ee, ŋa pé na yeri Kayoʔo ge wi dá bo wa Nyɛʔɛlɛ ní le, sanni lí bi drunya hanri we. 3Nyɛʔɛlɛ à li yrɛbɛ pì bɛfu hanri wiì fanŋa ni. Li ìn dà yraʔa kà hanri wi kruʔu na. 4Nyuwyeʔe ki dá bo wiì ni. Ki nyuwyeʔe àʔa po kpɛnmɛ hɛɛn ma be. 5Ki kpɛnmɛ miì fanna, à mi na pari wa yeblimi ni me. Di yeblimi mi ìn gban bì mi tôn.
6Nyɛʔɛlɛ li dá naŋa wà tun, à pe noo yeri Jan.#1:6 ma wèle wa Mat 3:1; Mar 1:4; Luk 3:1-2 ni wè.
7Wɔ̀ɔ pan bì baa ki kpɛnmɛ mi kayoro jari de, jango hɛɛn pè bɛfu pe gbàn pe pà kpɛnmɛ na wi kayoro fanŋa ni ge. 8Di wiì tapolo ban wi dá bo ki kpɛnmɛ me. Ali wiì wi dá ban jango bì ba ki kpɛnmɛ miì kayoro jari. 9Mí nyɛ kpɛnjɛnmɛ mi ma mi dá ban naʔa drunya ni we mà na hɛɛn pè bɛfu pari.
10Ŋa pé na yeri Kayoʔo ge wi dá bo naʔa drunya ni we. Wiì fanŋa ni, Nyɛʔɛlɛ li dá drunya hanri we. Kiì nì kì bɛfu ní, drunya hɛɛn pe ìn bɔɔ cɛn adi. 11Wi dá ban naʔa wi klo tala ni, ɛɛn di, wi klo woo pe ìn bɔɔ co kmaʔa. 12Di bee pé moo co kmaʔa mâ pa wí na ge, wí ma sye kan pé ma, pe krɛ̀ʔɛ̀ Nyɛʔɛlɛ pii.
13Ki woo pe ìn grɛʔɛ Nyɛʔɛlɛ pii bì yala wre ní nɛ pa pe hîn wà he wí na po hɛnwyee pyɔ ge nabii fanŋa ban. Di Nyɛʔɛlɛ liì ma pe krɛʔɛ li pii.
14Ŋa pé na yeri Kayoʔo ge, wi da bâ grɛʔɛ hɛnwyee mà bâ glɛn naʔa wo ni. Wɔ̀ɔ po nyìŋì Nyɛʔɛlɛ li haʔama nì me mà po kanyɛmɛ fɔlɔ ceŋge. À wo wi kmara nya, da Pyɔ nigbe wí ma ta wi To Nyɛʔɛlɛ ma le.
15Jan wi dáa wi kayoʔo nyu ge mà naʔa taʔara mà yo: «Mi dá bo na ŋa kayoʔo nyu mâ yo wí na pan wa na kruʔu ma ge, wiì wi ŋa we. Wí ma kpɔʔɔ mà toro mì na we, mɛjɛn, sanni pé bi na he ge, wi dá bo wa kɔ.
16Wò bɛfu à wo wò tama ta wa wi kmara fafaʔa ni de mà haʔama ta ma mí na pa mì na ge. 17Mɛjɛn Nyɛʔɛlɛ li dá li furu kayoro kan de wo ma Mowisi wi fanŋa ni ge. Di haʔama nì, ní kanyɛmɛ nì pí na taʔa Jesu Krisi wiì fanŋa ni.
18Hɛn wɛ̀ ìn je glú bì Nyɛʔɛlɛ nya le. Di li pyɔ nigbe, ŋa wí nyɛ Nyɛʔɛlɛ mâ po wa To Nyɛʔɛlɛ tanla le su ge, wiì wi wí ma Nyɛʔɛlɛ li kayoro yo má tì fligi wo kan ge.»
Kayoʔo ga Jan wí ma jari ge
19Nyiŋi ga na, Jerusalɛmu kàʔà Juwifiyee pe lagwɔɔ pe dá sraʔá farafɛɛ pèè ní, ní Lefi kluʔu woo pèè tun wa Jan ma we jango pe yɔɔ yùgú hɛn ŋa wi wí ni ge, ga wi dá yo pé ma nyiŋi ga na pe da gâ no wí na ge, kí ga: 20Jan wɔ̀ɔ kí yo màʔa fligi pé kan kmaʔa ceŋge mà yo: «Mì ban Nyɛʔɛlɛ li wofràa we.» Wi ìn ki hra pe na. 21À poo po: «Ná kiì ban, han wi má ni? Eli wi má ni yo?» Jan wɔ̀ɔ yo: «Ayo. Wiì ban na ní.» À poo po nɛ: «Nyɛʔɛlɛ li leyoo wi má ni yo, ŋa wó na hanni ge?» Wɔ̀ɔ yo: «Ayo.»#1:21 ma wèle wa Lado 18:15,18; Mal 3:23 ni wè.
22Ki nyiŋi na, à poo po: «Han wi má ni si? Maʔa yo wo ma, jango wo yaʔa yo bee ma pe dí wo tun ge. Dee di, má na nyaʔa nyu mo tapolo ma namyɛlɛ na le?» 23Wɔ̀ɔ Esayi kayoʔo yo pe kân mà yo: «Ŋa wí na wi àkpolo wa le wa sinbriʔi ni ge mâ yo: Ye wò fɔlɔ wi kloʔò sin ge, wiì ŋa mì nì we.»#1:23 ma wèle wa Esa 40:3 ni wè.
24 Farisiyee pèè dá bo wa ki tunbee ni be. 25Ki nyiŋi na, ki woo à poo yugu mà yo: «Nàʔa po mòò mɛ în nyɛ Nyɛʔɛlɛ li wofràa, ná kiì ban, Eli, kana Nyɛʔɛlɛ li leyoo ge, nyaʔa ma kan má na hɛɛn batise ge?» 26Jan wɔ̀ɔ pé po: «Mí na hɛɛn batise nyumu ní. Di naŋa wà nyɛ wa ye ni, ye ìn joo cɛn kpɛn.
27Wí na pan wa na kruʔu ma ge. Di wí ma toro domi na we. Mi ìn bi gban bì wi sabara maʔaŋaa haʔala ge.»
28Ki woʔo ga ki dá hanri Betani kàʔà tanla wa Jurudɛn lɔʔɔ namyɛʔɛ gegee na ge, be deʔe ga na Jan wi dáa hɛɛn batise ge.
Jesu wí nyɛ Nyɛʔɛlɛ li Mbaple
29Ki kpɛntoʔo na ge, Jan wɔ̀ɔ Jesu nya wí na pan wì krugu, wɔ̀ɔ yo: «Yè wèlé, Nyɛʔɛlɛ li Mbaple lí la lí na pan wa. Liì li lí nyɛ drunya hɛɛn pe kapere ti laʔafɔlɔ we.
30Mi dá ŋa kayoʔo yo ye ma mâ yo ‹wí na pan wa na kruʔu ma ge, wiì wi ŋa we. Wí ma kpɔʔɔ mà toro mì na we. Mɛjɛn, sanni pé bi na he ge, wi dá bo wa kɔ.› 31Mì tapolo, mi ìn dɔ̀ɔ cɛn wí nyɛ pomo ma na ge. Di mi dá ban mà báa hɛɛn batise nyumu ní, jango Israyɛli woo poo cɛn.»
32Ki kruʔu ma, Jan wɔ̀ɔ kayoʔo kà haʔa wa nɛ mà yo: «Mi dá Nyɛʔɛlɛ li Nyìli nya lí ma jɛ wa namuru ni de. À li trigi mà pan nɛ pa kòtolo nyɛ le, mà bâ glɛn wí na. 33Mi ìn dɔ̀ɔ cɛn. Di Nyɛʔɛlɛ, la lí ma na tun mâ yo bì baa hɛɛn batise nyumu ní ge, liì li li daʔá yo ná ma mâ yo: ‹Nà ma gá Nyɛʔɛlɛ li Nyìli nya lí na trigi na pan bí ba glɛn ŋa na ge, paʔa bo wiì wi. Ki woo wiì wi wí bi baa hɛɛn batise Nyɛʔɛlɛ li Nyìli ní ge.› 34Mi fanna, à mi ki woʔo nya ma ki kayoʔo yo ge mà yo: Ki woo ŋa we wí nyɛ Nyɛʔɛlɛ li Pyɔ.»
Jesu wí ma wi ploʔofɛkplɛɛ yeri be
35Ki kpɛntoʔo na ge, Jan wi dá bo wa yerehaʔa wi ploʔofɛɛ pèè syɛn ní. 36Nyiŋi ga na Jesu wi da báa doro ge, Jan wɔ̀ɔ noo wele mà gâ yo: «Yè wèlé, Nyɛʔɛlɛ li mbaple liì li la le.» 37Jan wi ploʔofɛɛ syɛn pe gâ ga loʔo wi dá yo ge, à pe pa Jesu na we na sye wì krugu. 38Jesu wi gâ wa mâ krɛʔɛ mâ wele, wɔ̀ɔ pé nya pé na pan wì krugu. Wɔ̀ɔ pé po: «Yé na nyaʔa ca?» À poo po: «Hrabi, má na kori hanbe?» Hrabi ki na po pé yo “Krɛʔɛfɔlɔ”. 39Jesu wɔ̀ɔ pé po: «Ye pan wo kɛri wa. Nàʔa po ban, pa ye yà na deʔe cɛn ge.» Yaa kí na cɛn bì gɔ. Pe yâ no wa wi trigihaʔa na ge, à pe ko wa wi ní mà wlɛʔɛ ki tɔ kɔ ge.
40Ki hɛɛn syɛn bee pe dá Jan wi kayoro loʔo de mâ pa Jesu na ná sye wì krugu ge, pe dáa wà yeri Andre. Wɔ̀ɔ po Simo Pyɛri wi conlo. 41Ki kruʔu ma, wɔ̀ɔ fyala mà yáa wi lɛ Simo ca we kpɛn. Wi gaâ wi nya ge, wɔ̀ɔ wí po: «Wó ma Nyɛʔɛlɛ li wofràa nya we.» Ki na po pé yo “Krisi” we. 42Wɔ̀ɔ Simo co we mà kɛri wí ni Jesu krugu we. Pe yâ no wa ge, Jesu wɔ̀ɔ wi wele mòo po: «Pé na ma yeri Simo, ŋa Jan pyɔ we. Di pé bi da ma yeri Sefasi.» Ki na po pé yo “ŋglɛnʔɛ”.
Jesu wí ma Filipe yeri we, ní Nataniyɛli nì
43Ki kpɛntoʔo na ge, Jesu wɔ̀ɔ yo wí bi gɛri Galile klo ni. Wɔ̀ɔ yâ flin Filipe nì we, mòo po: «Ta ban ma ba bo na ploʔofɔlɔ.» 44Filipe wi dá bo Bɛtisayida kàʔà woo, ali Andre nì, Pyɛri nì, pe dá jɛ wa ban kpo. 45Filipe wi gaâ Nataniyɛli nya we, wɔ̀ɔ wí po: «Wó ma naŋa ŋa nya Mowisi wi dá wi kayoʔo nyoŋo ge wa Nyɛʔɛlɛ li furu sɛbɛ ni we. Nyɛʔɛlɛ leyoo fanna pe dá wi kayoʔo nyoŋo ge kpo wa pe sɛbɛɛ ni be. Ŋa pé na yeri Jesu, Nasarɛti kàʔà woo we mâ po Josɛfu pyɔ we wiì wi.» 46Nataniyɛli wɔ̀ɔ wí po: «Akmaʔa pà kà bí gban bì nyini wa Nasarɛti kàʔà ni ge yo?» Filipe wɔ̀ɔ wí po: «Wò kɛ, woo sye. Ma yɔɔ nya mà yɛ.»
47Jesu wi gâ Nataniyɛli nya wí na pan wa, wɔ̀ɔ yo: «Ki woo ŋa wí nyɛ Israyɛli woo kanyɛmɛ na, mɛjɛn woò nyɛ hɛnlefaʔa.» 48Nataniyɛli wɔ̀ɔ wí po: «Má maʔa po mɛlɛ mâ na cɛn ge?» Jesu wɔ̀ɔ wí po: «Sanni Filipe wí bi ma yeri ge, mi di má nya wa fige tiʔi lara ni de.» 49Nataniyɛli wɔ̀ɔ wí po: «Krɛʔɛfɔlɔ, mo má nyɛ Nyɛʔɛlɛ li Pyɔ mà po Israyɛli woo pe masa naŋa.» 50Jesu wɔ̀ɔ wí po: «Pa mi gâ ma po mi di má nya wa fige tiʔi lara ni, kiì ma ma kan á ma pa banmɛ ge yo? Má bi ba kaʔa kèè nya ke kpondo ke toro la na le.» 51Jesu wɔ̀ɔ wí po nɛ: «Mí biʔi yo ye kan, kanyɛmɛ na, yé bi ba nyɛʔɛlɛ nya li nyɛ̀ʔɛ́ pa ye Nyɛʔɛlɛ li mlɛŋɛyee nya pee luru pee drìgí Hɛn Pyɔ na we.»#1:51 ma wèle wa Hli 28:12 ni wè.
Actualmente seleccionado:
JAN 1: NLK10
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Society of Côte d'Ivoire