Jɛnɛsis 2
2
1Na so PAPA GƆD tek mek di wanol wɔl, ɛvin ɛn ath ɛn ɔl wetin de insay de. 2Bay di tɛm we di de we mek sɛvin rich, PAPA GƆD bin dɔn dɔn ɔl wetin i bin de du, so i blo da de de. 3I blɛs da sem de de ɛn mek am oli, bikɔs bifo da de de bin kam, i bin dɔn dɔn ɔl wetin i gɛt fɔ du, ɛn na da de de i blo. 4Na so PAPA GƆD tek mek di wanol wɔl; ɛvin ɛn ath ɛn ɔl wetin de insay de.
Aw PAPA GƆD Mek Di Fɔs Man Ɛn Uman
We PAPA GƆD dɔn mek ɛvin ɛn ath dɔn, 5plant dɛn nɔ bin de na grɔn, ɛn sid sɛf nɔ bin bigin bɔs yet. Natin nɔ bin de gro na di grɔn bikɔs PAPA GƆD nɔ bin mek ren bigin kam yet, ɛn nɔbɔdi nɔ bin de yet fɔ dig di grɔn; 6bɔt wata bin de kɔmɔt ɔnda di grɔn ɛn mek ɔl di grɔn sok.
7PAPA GƆD tek sɔm pan di dɔti na grɔn ɛn mek mɔtalman; i blo insay in nos dɛn mɔtalman gɛt layf.
8Dɛn PAPA GƆD mek wan fam#2:8 Fam Na ples we kin gɛt watasay, tik dɛn kin de de ɛn animal dɛnsɛf kin de de. na Idɛn we de na di ist ɛn put di man we i bin dɔn mek de. 9I mek fayn fayn tik dɛn gro de we gɛt gud frut fɔ it. Wan tik bin de midul di fam we nem “Layf tik.” Dɛn igen, wan ɔda tik bin de de we nem “Sɛns tik.” 10Wan big riva bin de flo ɛn wata di fam; ɛn i bin sheb to fo riva dɛn wɛn i kɔmɔt na di fam. 11Di fɔs riva nem Pishɔn; in bin pas insay di kɔntri Avila usay gold de. 12Piɔ gold bin de de, wit fayn pafyum ɛn miniral ston dɛm. 13Di sɛkɛn riva nem Giɔn; insɛf pas insay di kɔntri Kush. 14Di tɔd riva in nem Taygris, we de to di ist we yu kɔmɔt Ashɔ, ɛn di riva we mek fo na Riva Yufretis.
15PAPA GƆD bin put di man we i mek na di fam na Idɛn, fɔ mek i go tek kia ɔf am ɛn wok de. 16I tɛl am se, “Yu kin it di frut dɛn pan ɛni tik na di fam, 17bɔt yu nɔ fɔ it pan di “Sɛns tik,” bikɔs if yu it pan am, da sem de de, yu go day.”
18Naw PAPA GƆD se, “I nɔ gud fɔ mek di man in wangren de. A go mek sɔmbɔdi we dɛn tu go de, fɔ ɛp am.” 19PAPA GƆD bin dɔn tek sɔm dɔti na grɔn mek ɔl dɛn animal ɛn ɔl dɛn bɔd. Dɛn i briŋ dɛn kam to di man fɔ si uskayn nem i go gi dɛm; ɛni nem we i gi dɛm, na da nem de lɛf pan dɛm. Na so dɛn ɔl tek gɛt dɛn nem. 20So di man bin gi dɛn ɔl nem; bɔt nɔn pan dɛm nɔ bin fit fɔ de wit di man fɔ ɛp am.
21So PAPA GƆD mek di man slip dip dip wan. We i de slip, i pul wan pan di man in ribs nain sayd ɛn lɔk di ples bak. 22I tek di ribs we i pul na di man in sayd mek wan uman. Wɛn i briŋ am kam to di man, 23di man se,
“E, i dɔn bi. Dis na mi kayn,
dis na bon we kɔmɔt pan mi yon bon,
ɛn flɛsh we kɔmɔt pan mi yon flɛsh. I nem ‘Uman’ bikɔs, na pat pan man dɛn tek mek am”
24Na fɔ dis mek man go lɛf in mama ɛn papa ɛn go de wit in wɛf, ɛn dɛn tu go bi wan.
25Di man ɛn di uman bin de nekɛd, bɔt dɛn nɔ bin de shem.
Actualmente seleccionado:
Jɛnɛsis 2: KRIO13
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Krio Bible © The Bible Society of Sierra Leone, 2013.