YOHANA 1
1
Likhuva Lileranga Vulamu
1Shivala nishishili khuloongwa, Likhuva liali nililiho; yali na Nyasaye, khandi yali khuli Nyasaye. 2Khurula muliraanga Likhuva liali na Nyasaye. 3Shia shindu shiosi shialoongwa khuvirila muye; shindu shivulakhuho khali shilala shialoongwa vuchila ye khuvaho. 4Likhuva nalio liali shirula shiu vulamu, ma vulamu vwenovo nu vulerela vandu vu mu shivala vulavu. 5Vulavu vwakhanga mu shisuundi; navutswa shisuundi shivula tsingulu tsiu khukuura vulavu.
6Nyasaye yaruma murumwa wewe, walaangwangwa Yohana. 7Neye witsa navoolela vandu makhuva khulondokhana khu vulavu, khu voosi nikanyalikha vasuuvili khuvirila mu likhuva. 8Ye mwene shiyali vulavu tawe; navutswa yitsa khuhaana vushiahidi khulondokhana khu vulavu. 9Yuvu navwo vwali vulavu vwatoto -- vulavu vwitsanga mu shivala khwashila shia mundu wosi.
10Likhuva liali mu shivala; khali niiva Nyasaye yalomba shivala khuvirila muye, navutswa vandu vu mu shivala shivali vamumanya tawe. 11Yitsa mwene mu shivala shieshie; navutswa vandu veve mwene vamwambakhana khumwinjilitsa. 12Navutswa valala khuvo vamwinjilitsa, nivasuuvila muye. Yavaha vunyali vu khuva vaana va Nyasaye; 13Shikali vitsa khuva vaana va Nyasaye khuvirila mulivulwa liu mmbili, nakhwo khuvoola, khuvirila mulivulwa khuli vaana vu mundu musatsa tawe; navutswa Nyasaye mwene neye wali Tata wavo.
14Likhuva liakwa mundu, namenya na khutsi. Yitsula tsimbavasi nende katoto. Khwalola vukhumi vwevwe, vukhumi vwa yali nanyoli khuli Mwana mutelwa warula khu Tata.
15Yohana yalomoloma makhuva khulondokhana khuye. Yilwatsa navoola, “Uyu neye wa nalomoloma makhuva khulondokhana khuye, lwa navoola, ‘Mundu uliitsa khwitsa inyuma wanje, neye uli nu vunyali vunyishi khumbira, shichila yaliho nishili khwivulwa.’ ”
16Khulwa yako, khuvirila khu tsimbavasi tsietsie tsinyishi, wakhukasitsa khutsi voosi; khandi akhukasitsanga shia litukhu. 17Nyasaye yahaana Malako khuvirila khu Musa; navutswa tsimbavasi nende katoto kalolekha khuvirila mu Yesu Kristo. 18Mundu avulakhuho walola Nyasaye. Navutswa, Mwana wewe mutelwa, uli khuli Nyasaye khandi uli khuluveka lwa Tata, wamulomba khumanyikhana.
Lilwatsa lia Yohana Mubatisi
(Mat 3:1-12; Mk 1:1-8; Luka 3:1-18)
19Vimilili va Vayahudi mu Yerusalemi varuma vasalisi valala nende vandu vu lwivulu lwa Levi khu Yohana, khumureeva, “Uli viina?”
20Yohana shiyali wambakhana khuvachipa tawe; navutswa yalomoloma havulavu vulahi vwene, navoola, “Shindi Masiha tawe.”
21Vamureeva, “Unyala khuva uli viina? Unyala khuva uli Eliya?” Yohana yachipa, “Shindi Eliya tawe.” Vareeva khandi, “Unyala khuva uli Muprofeti?” Yohana yachipa, “Shindi muprofeti tawe.”
22Nalwo lwa vamureeva, “Khuvoolele uli viina? Khuhe shia khutsia khuchipa vandu vakhuruma. Ni shina shiunyala khuvoolakhu khulondokhana khu yivi mwene?”
23Yohana yachipa narumishila makhuva ku Muprofeti Isaya yali niyavoola,
“Ninzi mwoyo ku mundu ulaanjililanga mu shiangalangwi,
‘Lunjishitsi injila yu Mwami alondelakhu!’ ”
24Varumwa va Vafarisayo vali nivaruma, 25vareeva Yohana, “Niiva shiuli Masiha inoho Eliya inoho Muprofeti tawe, shichila shina ubatisanga vandu?”
26Yohana yachipa, “Mbatisanga na matsi; navutswa mundu mulala wusinjile mu munyi wa mwakorwa. 27Ye neye witsanga inyuma wanje, khandi mbulakhu vunyali vukhumuvoholola vilaaro vievie.”
28Yaka koosi kikholekha mu litaala lia Betsania khuluveka luli ivukwi wu Muchela kwa Yorodani, wa Yohana yabatisanga vandu.
Shimeme shi Likondi shia Nyasaye
29Litukhu lialondakhu, Yohana yalola Yesu niyitsanga himbi ha yali nali, navoola, “Loli, Shimeme shi Likondi shia Nyasaye, arulitsaho vwoni vwa vandu voosi mu shivala! 30Uyu neye wa nalomoloma makhuva khulondokhana khuye, lwa navoola, ‘Mundu witsanga inyuma wanje, ali ni tsingulu tsinyishi khumbira, shichila yaliho nishili khwivulwa.’ 31Inzi mwene nali namukorwa, navutswa niitsa nimbatisanga na matsi, khu amanyikhane khu Israeli.”
32Yohana yahaana vushiahidi yuvu, “Nalola Roho niyikhanga khurula mwikulu khuli shituti nayeela khuye. 33Inzi mwene khali nali namukorwa; navutswa Nyasaye, wanduma mbatisi na matsi, yambolela, ‘Mundu ulola Roho niyikhanga khuye khandi nayeelakhu, neye mundu ubatisanga na Roho Mutakatifu.’ 34Mali khulola khandi mbananga vushiahidi khu munyi ndi neye Mwana wa Nyasaye.”
Veechi va Yesu Vukhuraanga
35Litukhu lialondakhu, Yohana yali nasinjile hawenaho khandi na veechi vavili khu veechi veve. 36Lwa yalola Yesu nachendaho, yavoola, “Loli, shimeme shi Likondi shia Nyasaye!”
37Lwa veechi vavili venavo vahulila navoolanga ndio, valonda Yesu. 38Yesu yishevukha, nalola vamulondanga, navareeva, “Ni shina shia mukhavanga?” Vamuchipa, “Rabbi, (kavoolanga Mwechitsi) ni hena ha wumenyanga?”
39Yesu yavavoolela, “Hambi mulole.” Vasimukha nivatsia khulola havundu wa yamenyanga; nivamenya naye khulitukhu lienelo, shichila tsiali nitsili tsisaa likhomi tsiu khulukolovo.
40Mulala khu veechi vavili venavo wali niyahulila makhuva ka Yohana yalomoloma, namulonda, yalaangwangwa Andereya, amwavo wa Simoni Petro. 41Andereya yasimukha natsia khukhava vwangu amwavo wewe Simoni, namuvoolela, “Khunyoli Masiha” (kavoolanga “Kristo”). 42Andereya yavukula Simoni namuhila khu Yesu.
Yesu yamuheenza navoola, “Lira liolio ni Simoni mwana wa Yohana, navutswa utsitsanga khulaangwa Kefa, kavoolanga Petro.”#1:42 Petro: Livoolanga khandi “Lwanda.”
Yesu Yalaanga Filipu nende Natsanieli Vamulonde
43Litukhu lialondakhu, Yesu yakanakana khutsia mu lusomo lwa Galilaya. Yakana na Filipu namuvoolela “Nonda!” 44(Filipu yali naruli mu litaala lia Betsesaida, wa Andereya nende Petro vamenyanga.) 45Filipu yanyola Natsanieli namuvoolela, “Khunyoli woyo wa Musa yahandika makhuva khulondokhanakhu mu shitabu shia Malako; khandi wa vaprofeti vahandika khandi makhuva khulondokhanakhu. Ye neye Yesu mwana wa Yosefu, khurula mu litaala lia Nazareti.”
46Natsanieli yareeva, “Toto, shindu shilahi shinyala khurula mu litaala lia Nazareti?” Filipu yamuvoolela, “Hamba ulole.”
47Lwa Yesu yalola Natsanieli niyitsanga himbi ha yali nali, yalomoloma makhuva khulondokhana khuye, navoola, “Uyu neye Muisraeli watoto; vuvehi vuvulakhu muye!”
48Natsanieli yamureeva “Wamanya munjila shina?” Yesu yamuvoolela, “Nakhulola yivi Filipu nuli hasi wu musala ku mukhuyu, nishili khukhulaanga.”
49Natsanieli yamuvoolela khandi, “Mwechitsi, uli Mwana wa Nyasaye! Uli Mwami wa Israeli!”
50Yesu yavoola, “Unyala khuva usuuvili, lwa khuvoolele ndi khuloli nuli hasi wu musala ku mukhuyu? Uliitsa khulola vindu vindi vikali khuvira vienevo!” 51Yesu yavavoolela, “Muvoolelanga katoto ndi muliitsa khulola likulu nilikushi, khandi tsinjelosi tsia Nyasaye ni tsitsitsanga ikulu khandi nitsikhanga hasi khu Mwana wu Mundu.”
Actualmente seleccionado:
YOHANA 1: LLLCATHOLIC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© The Bible Society of Kenya, 2013