Marko 12
12
Lembabola pi Podho mir Ulok ku Jutipodhone
(Mt 21:33-46; Lk 20:9-19)
1 #
Isa 5:1, 2 Man emaku yero igi ku lembabola kumae, Ng’atu moko pidho podho mir ulok, epidho arara de i kume, ekunyo vur ma jubiyo ie nying ulok de, man egomo odtra, e emie ni sumba ba jutipodho, en ke ecidho i ng’om mange. 2Ka kacekne tundo eoro jamiru ba jutipodho, kara egam kum nying ulok moko m’i podho mir ulok ba jutipodho. 3E gigame, gifode de, giketho edok mananu. 4Man eoro jamiru mange kendo i bang’gi; e gitong’o lero i wie, man gitime rac dit. 5Man eoro mange; e ginege: ku mange de dupa; moko gifodo, moko ke ginego anega. 6Udong’ ng’atu acel i bang’e, en e wode ma jamer: eore macen i bang’gi, ewacu kumae, Gibijwigri ni woda. 7Ento jutipodho maeno giwacu i kindgi gigi kumae, Maeni jacampacu; wubin, wanegue, kara camupacu dong’ iwa. 8E gimake, ginege de, man gibaye woko kud i podho mir ulok. 9Ka kumeno rwoth ma won podho mir ulok bitimo ang’o? ebibino ebinyotho jutipodho, man ebimio podho mir ulok ni jumange. 10#Zab 118:22, 23Fodi wusomo lembagora pa Mungu maeni ngo ma kumae,
Kidi ma jugomot gikwero,
Kidine judwoke ni wi gui;
11Maeni ai ba Rwoth,
Man en e gin ma wang’u ijo i wang’wa?
12E giyenyo gimake; ere gilworo udul dhanu; kum ging’eyo nia ebolo lembene i kumgi: e giweke, man gicidho.
Mio Ajok ni Kaisari
(Mt 22:15-22; Lk 20:20-26)
13Man gioro jumoko ma kind Jufarisayo ku m’i kind Juherodiano de i bang’e, kara gimake i wec. 14E ka giwok, giwacu ire kumae, Japonji, wang’eyo nia in i andha, man ipara pi ng’atu moko ngo; kum ineno dhanu ni wang’gi ngo, ento andha’ iponjo yo pa Mungu: Cik uyio ya jumi ajok ni Kaisari, kadi ku jumi? 15Wami, kadi ku wami? Ento en, m’eng’eyo ambili migi, ewacu igi kumae, Wumulo ia nedi? wukel denarius i bang’a, anen. 16E gikele. Man epenjogi kumae, Meni ayi ng’a ku ramblembene de? Giwacu ire kumae, Pa Kaisari. 17Yesu wacu igi kumae, Wumi ni Kaisari gin ma pa Kaisari, ni Mungu de gin ma pa Mungu. E igi wang’ lii i kume.
Penji pi Cer
(Mt 22:23-33; Lk 20:27-40)
18 #
Tic 23:8
Man Jusadukayo, ma giwacu nia cer umbe, gibino i bang’e; gipenje, giwacu kumae, 19#Poi 25:5Japonji, Musa goro iwa kumae, Tek ng’atu moko umin utho, ma cege ke dong’, m’eweko nyithindho de ngo, ya umin udong’ ulag dhakune, enyol kodhidhanu de ni umin mire. 20Nwang’u utumego abiro nuti: ma kwong’ane gamu dhaku, etho de m’eweko kodhi ngo; 21mir arionde lage, de etho, m’eweko kodhi ngo i ng’eye; mir adege de kumeca: 22gin abiro de giweko kodhi ngo. Yo ng’eigi ceke dhaku de tho. 23I cer ebidong’ bedo ci ng’a i kindgi? kum ebedo dhaku migi gin abiro. 24Yesu wacu igi kumae, En e kum lembe nini ngo nia wukieri, kum wung’eyo lembagora pa Mungu ngo, kadi tego pa Mungu de? 25Kum ka gibicer ku kind ju m’utho, gigambri ngo, jumio de ngo ya jugam; ento gibedo va malaika m’i polo. 26#Ai 3:6Ento pi ju m’utho, ma nia gicer; fodi wusomo ngo i kitabu pa Musa, i ka m’uyere pi Yen m’udinyo, maram Mungu weco ko i bang’e, ewacu kumae, An a Mungu pa Ibrahim, man Mungu pa Isak, man Mungu pa Yakobo? 27En e Mungu mi ju m’utho ngo, ento mi ju ma kwo: wukier dit.
Lembang’ola ma Dwong’
(Mt 22:34-40)
28Ng’atu acel ma kind jugorcik ubino, ewinjo gibepenjri i kindgi, eng’eyo de nia eloko igi lembe dre, e epenje kumae, Lembang’ola makani ma ma kwong’a ceke? 29#Poi 6:4, 5Yesu loko lembe kmnae, Ma kwong’ane ende, Wuwinji, E Israel; Rwoth Mungu mwa, en e Rwoth acel: 30man imar Rwoth Mungu peri kud adundeni ceke, ku ng’eyong’ec peri ceke de, ku pidoii ceke de, man ku tegoni ceke de. 31#Law 19:18Mir arionde ke e, Imar wedu calu in giri. Lembang’ola mange mbe ma dit ma sagu maeni. 32#Poi 4:35Jagorcik uwacu ire kumae, Andha, Japonji, iwacu dre nia en e acel: man mange mbe ndhu en: 33#Hos 6:6man mare kud adunde ceke, ku ng’eyong’ec ceke de, man ku tego ceke, man maru wadijo calu jogijo, esagu giramia m’awang’a ma bo ceke ku lam bende. 34#Lk 10:25-28E ka Yesu neno nia edwoko lembe ku rieko, ewacu ire kumae, In i bor ungo ku ker pa Mungu. Y o ng’ei maeno ng’atu moko mbe ma cwinye tek m’epenje ko ku penji moko.
Penji pi Wod Daudi
(Mt 22:41-46; Lk 20:41-44)
35Yesu loko lembe ewacu kumae, kan eponjo i hekalu, Jugorcik giwacu nenedi nia Kristu en e wod Daudi? 36#Zab 110:1Daudi en ewacu kumae, ku Tipo Maleng’,
Rwoth uwacu ni Rwoth para kumae,
Jany yo ku cinga ma yor acwic,
Ram aketh ko jukwoji ni kom mi tiendi.
37Daudi en elwong’e Rwoth; e kan ebedo wode nenedi? E dhanu ma sai giwinje ku mutoro.
Yesu Kwero Kuratim mi Jugorcik
(Mt 23:1-36; Lk 11:37-54; Lk 20:45-47)
38Man eyero kumae, i ponji pare, Wukuru ni jugorcik, ma gimaru wotho ku kendi ma lor lor, ku bedo ku moth ma i katali de, 39ku bedo wi kom ma sagu wadi i kacokri, ku ka ma sagu wagi i agba: 40gi ju ma gicamu udi mi mon ma coggi tho, ni abombi migi de girwo ku rwo ma bor; joni gibinwang’u lembapoka ma dit m’usagu.
Giramia pa Dhaku ma Cware Tho
(Lk 21:1-4)
41Man ebedo piny vut kakanpiny, man eneno rama udul dhanu gibolo ko sente i kakanpinyne: dupa de ma gi julonyo gibolo lwar i ie. 42Nie dhaku ma cware tho ma jacan ubino ebolo sente ario i ie, ma romo gwilo acel. 43Man elwong’o julubne i bang’e ewacu igi kumae, Andha awacu iwu kumae, Dhaku maeni ma cware tho ma jacan ebolo ma sagu ma dhanu ceke gibolo i kakanpiny: 44kum gin ceke gibolo i ie kum sagri migi; ento en kum canpiny pare ebolo i ie ceke m’ebedo ko, ma en e ceke m’etungre kudo.
Actualmente seleccionado:
Marko 12: AB1970
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The Holy Bible In Alur (Lur), Revised Orthography © United Bible Societies, 1970.