LUKA 1
1
1Avandu vanyingi vamali kokora kuli vanyara kong'oda amakuva gi ivindu viekoleka hagati hiitu. 2Vang'oda ivindu via kwavolerwa na yavo avaari avaloli va moni na moni vi vindu yivio kutura mulitanga, kandi avilwaazi vi likuva yilio. 3Inzi kandi O, Wuluyali Zeofilo, mali mulihenzeriza ligali nokolohiza vindu yivi viosi kutura mulitanga, na galoleki ndi, ni vulahi ku inzi ngong'odere vindu viosi kuli viveeye. 4Ngoli ndio kunangwa uduuki kumanya agiligali gi ivindu viosi via wigizwa.
Lilaandizwa lie liivulwa lia Yohana Mubatizi
5Mu madiku ga Herodi yaali Mwami Munene wi Vuyuda, yaali ho musaalisi mulala walangwa Zakaria, kutura ku avinyumba yu musaalisi Abija. Mukali weve yalangwa Sabeti; yaali mulala ku avakaana vi kisukururwi chu Musaalisi Haruni. 6Vosi vaali avalungi imbiri wa Nyasaye, kandi vaatia ligali nokolonda malago na makuva gu Mwami vugira imbara. 7Navuzwa sivali numwana mba, Sabeti yaali umugumba, kandi vosi vaali vahindira ligali.
8Lidiku lilala Zakaria yaali naakoraa miyinzi ju vusaalisi imbiri wa Nyasaye mu Litembeli kuli lilohiza lia vuli lidiku lialange. 9Yatovolwa nikura kuli mwima gwu vusaalisi, kwingira mu Litembeli liu Mwami, asambe kimuli ku vwali. 10Kiduma kenene chavandu vaali ni vasaala ichova ing'inga yukusaamba kimuli.
11Engelosi wu Mwami yaloleka kuye nasingiyi ku mukono mulungi gwu vwali, olovega lwi kimuli chasambirwa. 12Lwa Zakaria yamulola, yahenda mwoyo kandi naatia ligali. 13Navuzwa engelosi yamuvolera, “Utatia mba, Zakaria, kigira Nyasaye ahuliyi lisaala liilio. Mukali woovo Sabeti alakwivulira mwana muyaayi, na ulamugulika Yohana. 14Ulakave nuvusangali kandi nuvuyanzi, na avandu vanyingi valakasangala ku liivulwa lilie. 15Alakave munene imbiri wu Mwami. Si alinwa iwaini anoho amalwa mba, naye aliizula Roho Mutakatifu kutura munda mwa mama weve. 16Aliranyia avanyingi ku avandu va Isiraeli ku Mwami Nyasaye wavo. 17Alimiira imbiri wu Mwami weve nu mwoyo kandi ni zinguru kuli ziu muporofeti Elija. Alakahambanyie avababa na avana vaavo kandi; alalomba avibaali na avatatiizaa Nyasaye vaganagane kuli avalungi vaganagana; alaketegekiziri Mwami avandu veve.”
18Zakaria yateeva Engelosi, “Inzi ndamanya ndi amakuva yaga? Inzi mbeeye musakulu na mukali wange yakeera.”
19Engelosi yamutivulira, “Inzi mbeeye Gabirieli usingiraa imbiri wa Nyasaye; na ndumiywi komoloma na ivi, kandi ngoletere makuva malahi yaga. 20Hulira, ulava idimbidi, kandi siulamoloma mba, kuduuka lwayaga galakekoleke, kigira siwasuuvira makuva gange ivi siulamoloma mba kuduuka lwa malago gaange gali twekizwa.”
21Avandu valindilira Zakaria, nivagenya ku lilindagilira lilie mu Litembeli. 22Lwa yatura ichova, siyaali anyala komoloma navo mba. Vamanya ndi aloli malola mu Litembeli. Navuzwa yagelagela vuzwa makono ma namenya naveeye idimbidi.
23Lwa yamala madiku geege guvutumiki mu Litembeli yirana yengo weve. 24Inyima wa madiku yago, mukali weve, Sabeti yavereka. Yivisa munyumba ku mieli jitano navoora; 25“Kalunu Mwami amali kumanyia zimbavasi zizie ku inzi. Anduliziyi zisoni ziambezaa nazio imbiri wa vandu.”
Lilaandizwa lie liivulwa lia Yeso
26Mu mweli gwa sita Sabeti naveeye ninda, engelosi Gabirieli yatumwa na Nyasaye kuzia Nazareti, lidaala lia Galilaya. 27Yaali na makuva ku mukaana mugima, uwalangwa Maria, uwaali niyateevwa koleetwa nu mundu mulala uwalangwa Josefu, wi kisukululwi cha Daudi. 28Engelosi yazia kuye namuvolera, “Mirembe Maria! Ivi ugasiziywi ni zimbavasi zinyingi! Mwami aveeye harara na ivi.”
29Navuzwa lwa Maria yahulira amakuva yaga, yaahenda mwoyo ligali ku makuva geege, naganagana mumwoyo ichi licheliza yili livoora! 30Engelosi yamuvolera, “Utatia mba, Maria, kigira Nyasaye akovereye zimbavasi. 31Henza! Ivi ulavereka na ulivuula mwana muyaayi na ulamugulika, Yeso. 32Alakave Munene kandi alakalangwe, Muyaayi wa Nyasaye Oveeye igulu Ligali. Mwami Nyasaye alakamukole alave Mwami kuli guuga weve Daudi. 33Alakamiihi ku avandu va Isiraeli mihiga ni mihiga, Uvwami vwivwe sivulakave nekeheri mba.”
34Maria yateeva engelosi, “Yaga galanyalika ndi, kigira inzi mbeeye mugima?”
35Engelosi yamutivulira, “Roho Mutakatifu alaza ku ivi, kandi zinguru zia Nyasaye oveeye igulu Ligali zilakukinga kuli kiriri. Kulwayago mwana wa ulivuula alakalangwe Mutakatifu, Mwana wa Nyasaye. 36Umanye kali Sabeti mwiko woovo, umali kovereka mwana muyaayi mu vokeere vwivwe. Yigu nu mweli gwigwe gwa sita, wa vandu valanga mugumba. 37Kigira ku Nyasaye, si keveeye ho kindu ikitanyalikaa mba.”
38Maria yavoola, “Henza inzi mbeeye mutumikiri wu Mwami. Gave ku inzi kuli aga ovooye.” Kunangwa engelosi yatura kuye.
Maria Yageniha Sabeti
39Ku ing'inga yeyo, Maria yetegeka, nalomba logendo kuzia vwangu mu lidaala lilala liveeye muvigulu vie Vuyuda. 40Yingira munyumba ya Zakaria, nacheliza Sabeti. 41Lwa Sabeti yahulira licheliza lia Maria, mwana yakina nuvuyanzi munda mwimwe. Sabeti yizula Roho Mutakatifu, 42na yahanzuka numwoyo munene, “ Ivi ugasiziywi ligali hagati ha vakali vosi, kandi agasizwi umwana wa ivi ulivuula! 43Inzi nivwaha kali mama wu Mwami wange yaaze ku inzi? 44Kigira lwa mbuliyi mwoyo gwi licheliza liilio, mwana akini munda mwange nuvuyanzi. 45Oveeye nuvugasu ivi uwa suuvira ndi, agu Mwami yakuvoolera galadukizwa!”
Lwimbu lwi lizominya lia Maria
46Maria yavoola,
“Mwoyo gwange gwizominyaa Mwami.
47Kandi mwoyo gwange gusangali kigira nu Nyasaye, Muhonyi wange.
48Kigira wizulizi Iiiva liu vwegehizi vwange.
Mukaana Mutumikiri weve!
Kigira kutura kalunu amakura ga avandu vosi galananga, vuyanzi.
49Kigira Nyasaye Wizingulu angoleeye vindu vinene;
lieta lilie liveeye litakatifu.
50Zimbavasi zizie ziveeye ku makura namakura,
ku avandu vahaana luyali kuye.
51Akoli vindu vie zinguru nu mukono gwigwe:
Usalanyi avigingiri mu zing'anagani zie mioyo jaavo.
52Waguluyi avami vizingulu kutura ku zindeve ziavo ziu vwami;
navuzwa onenehizi avakeekeke.
53Wigutizi avinzara ni vindu vilahi,
O, uvukungi avatugi amakono vugira kindu.
54Vaduukiza lilagana lia yalagana na vaguuga;
kandi umali kuza kokonya mutumikiri weve Isiraeli.
55Umali kwizuliza kumanyia zimbavasi,
ku Aburahamu ni visukululwi vivie mihiga ni mihiga!”
56Maria yamenya na Sabeti ku ing'inga iduuka imieli jivaga, ma ni yirana yengo wavo.
Liivulwa lia Yohana Mubatizi
57Ing'inga ya Sabeti yu kwivura yaduuka; ni yivula mwana muyaayi. 58Lwa avatende na aviiko veve vahulira ndi Mwami umukoleye zimbavasi zinene, vasangala harara naye.
59Maku lidiku lia munane, vaza kokeva mwana, ni venya ku mugulika Zakaria; lieta lia baba weve. 60Navuzwa mama weve yavoola, “Awa! Alalaangwa Yohana.”
61Vamutivulira, “Simuveeye nu mwiko ulangwa lieta yili mba?” 62Kunangwa vagelera baba weve amakono ni vamuteeva lieta liagulika mwana weve.
63Naye yateeva kibao cho kong'oda ku, yang'oda: “Lieta lilie ni Yohana.” Vosi vagenya. 64Ahene yaho munwa gwa Zakaria gwigulika nululimi lwilwe lwanguha manaamolomaa nakuminya Nyasaye. 65Uvuti vwali ku avatende vosi, na makuva yaga galandizwa mu kivala choosi chu muvigulu Ivuyuda. 66Vosi avahulira yaga, vaganagana mu mioyo jaavo ni vavoola, “Mwana uyu aliva mundu wa lugano ki?” Kigira agiligali gaveeye havulavu ndi zinguru ziu Mwami ziali kuye.
Ovoporofeti vwa Zakaria
67Zakaria, baba wu mwana, yizula Roho Mutakatifu na yaporofeta, navoora:
68“Agasizwi Mwami Nyasaye wa Isiraeli,
kigira umali kogeniha kandi ohonyi avandu veve.
69Okoheeye muhonyi wi zinguru kutura mukisukululwi cha Daudi mutumikiri weve.
70Kuli yalaga kale kuvitira mu vaporofeti veve vatakatifu
71ndi alakohonyia kutura ku avasigu viitu,
kandi kutura kuzinguru zia yavo vosi avadunyira kunyi.
72Yavoola alaveera avaguuga viitu zimbavasi
nukwizuliza lilagana lilie litakatifu.
73Liesuuha lia yisuhira Aburahamu guuga wiitu,
liveeye ndi alakuha kuduuki kohonywa,
74kokosola kutura ku avasigu viitu,
kuduuki kumutumikira vugira vuti,
75kunangwa kuduuki kuva avatakatifu kandi avalungi imbiri weve,
mu madiku goosi gi livamwoyo lietu.
76“Ivi, mwana wange, ulalangwa muporofeti wa Nyasaye Oveeye igulu Ligali.
Ulazia imbiri wu Mwami kumulombera zinzira zizie.
77Kulandizira avandu veve ndi,
valahonywa kandi valasamifwa vwoni vwavo.
78Nyasaye wiitu aveeye wi zimbavasi kandi umulahi.
Alalomba vulavu vwovohonyi vwake ku kunyi kutura mwigulu.
79Vong'ereng'ane ku yavo vosi avamenyaa mu kisundi kenene chi chiriri chilikuza;
kwimilira virenge vietu munzira yi mirembe.”
80Mwana yaviruka, nanyoora zinguru mu Roho. Yamenya mwigendanyama kuduuka ing'inga ya yaloleka ku avandu va Isiraeli.
Actualmente seleccionado:
LUKA 1: LOGOOLI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©Bible Society of Kenya, 2019