San Mateo 3
3
(Mr. 1:1-8; Lc. 3:1-9, 15-17; Jn. 1:19-28)
1Tiampqui candza Juany Bautist lo yiubiz ni ná nez Judea catɨɨchbɨ xtiidx Dios, 2ax guniib:
—Gulyialaaz pur de xtuldtɨ te pur abdzɨngax guelrnabee xte Dios.
3Pur Juanréniy bcuaa profet Isaías chi guniib:
Ríeny rsee tuby ni rbɨxtia nez lo yiubiz rut quɨt tu rbezti ax rniib:
“Gulganzaac nez xte Xtadnɨ Dios.
Gulxal tuby nezldí.”
4Cun guichlady camey gucchuu xab Juany, chiy tuby cinturon guidy bllii láanbɨ. Ne púrzi guxady cun dzɨny ni nuu nez lo guiix bquiinbɨ. 5Ax de bniety Jerusalén cun irate de bniety Judea ne irate de bniety ni rbez gax nez Jordán bdiiadeb güecuadiagdeb ni rnii Juany. 6Chiy chi bxubdulddeb de xtulddeb ax btiubnis Juany laadeb lo gueeu Jordánqui.
7Per chi guná Juany dec zieny de fariseu cun de saduceu bdzɨndeb par itiubnisbɨ laadeb, ax raipbɨ laadeb:
—¡Xípalza zecpacza de béeld vivtɨ! ¿Tú gudixtee lot par ldát lo castiguroo ni abdzɨngax? 8Gulbány zacru par yíany dec guldípactɨ rialaaztɨ pur de xtuldtɨ, 9ne quɨt izubyaatit laat iniit, “Dunnɨ ziopnɨ lo xfamily to Abraham”, te pur nare rniia laat axt de guiaré zelee gún Dios de xfamily to Abraham. 10Ne de bniety ni quɨt nabány xnez Dios zec ni riáld, azeddzɨny dxi ni gunnény laadeb zec ni runné de bniety tuby yag chi aquɨtru rca frut loni ax rtiuudebni par chaaicquini. 11Rguixtiia lot nare rtiubnisa laat cun nis zec tuby seny dec abialaaztɨ pur de xtuldtɨ. Per ni gueed después de nare, laany itiubnisny laat cun Spíritu Sant ne cun bal. Ne laany mazru napny guelrnabee que nare, ax niclɨ lo xcurachny quɨt riáldtia ixaicquia pur ni mazru sacny que naa. 12Ne zec chi ría trigu ziy gúnny cun bniety. De bniety ni nabány xnez Dios siáldny laadeb lo guelrnabee xtenny, chiy de bniety ni quɨt nabány xnez Dios ax siáldny laadeb lo bal ni quɨt chúuti dxi yiuu.
(Mr. 1:9-11; Lc. 3:21-22)
13Jesús bdiiany nez Galilea par güeny ruu gueeu Jordán rut zuguaa Juany par itiubnisbɨ laany. 14Per gulo quɨt rcaaztib itiubnisbɨ laany, raipbɨ laany:
—Laabiuy riáld itiubnisbiu nare, gati naretia itiubnisa laabiu.
15Chiy raipy Jesús laab:
—Bsaan su chagac ziy, te pur mazru güen idxannɨ irate zec ni rnabee Dios.
Chiyru guzigueld Juany btiubnis laany. 16Chi gulull btiubnisbɨ Jesús, deni bdiiany lo nisqui, tuisquɨ bllal llayabaa, ax gunány zedyiat Spíritu Sant xte Dios zec tuby palom axtquɨ quiany. 17Chiy bíeny rsee ni gunii desdɨ llayabaa:
—Laabɨy llingaana ni quesentiand rcaaza ne ni quesentiandza rzaclaaznía.
Actualmente seleccionado:
San Mateo 3: zab
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1995, Wycliffe Bible Translators, Inc. All rights reserved.