MÁFIYU 3
3
Ngala ngói Nguya Wo Mɔ́i Njɔú í ndéni
(Máa 1:1-8; Lúu 3:1-18; Njɔú 1:19-28)
1Táingi ná h̃u Nguya Wó Mɔ́i Njɔú i vái áá Ngala ngói le ngaalaí h̃u, í Judíya lataí h̃u. 2I ɣɛi áá ɣɛ́ ta, “A volú yáfe wú háá ỹɔítii mba bɔw̃álale Ngalángi w̃ásandai áá vá ɣɛ́ma nuu kpɛ́lɛɛ mááh̃u h̃umbuwa i folóa ma.” 3Njɔú í ɣɛ́i lá Ngalá ndaa háá lé mɔ́i Aisáya í ɣɛ́i áá yɛ́pɛ kɔwɔ́ato mba wɔ́lɔ ná í ɣɛ́i ta,
“Nuu tá lɔɔ woo ngúla ngaalaí h̃u, íwaa ɣɛ́ ta,
‘A peleí ɣɛ́ kíli batɛ́ Ndemɔí hááw̃a,
wú pɔɔná mbɛ.’ ”
4Njɔú gúlai bátɛngɔ i ɣɛi lá ngáá suwa walái ta taá tóli ngáá nyɔ́ɔ́mai, ngi bélengi. Ná vólu, suwa gɔlɔ́ wálimbai lɔ ɔ́ɔ́ ngili liih̃ú. Ndaa ỹɛ́ɛ́niitii ti ɣɛ́i ngáá foolíaitii ɛ́ɣɛ kɔiŋ ngúlɔi. 5Nungáá ti gúlani taa walái ná h̃u taá tóli ngáá Jɛlúsɛl̃ɛ ɛ́ɣɛ Jɔ́ɔ́dɛ Yɛí góóɣaka w̃áitii, í báha nɔ́ɔ naá Judíya lataí h̃uu kpɛ́lɛɛ mba, tí vá Njɔú yéle. 6Tí gáheni ngáá ti háá ỹɔítii lííwaa wála, aáva í nguyaí wói ngáá ti ye Jɔ́ɔ́dɛ Yɛí h̃u.
7Kɛ́ ná í Júsuai sítii taa ɣɛ́ ti w̃a Falósiai kpih̃íw̃aa lɔ́ni ɛ́ɣɛ Júsuai sítii taa ɣɛ́ ti w̃a Sájusiai táá vá ngelé nguyaí háaw̃a, kɛ i ɣɛa ti w̃a, “Wɛ́i wú ngáá kaaliá, ele lɔ í ɣɛ́ngɔ wú w̃a wáá hómbo wú w̃aavéla faa bámai wa Ngalá ngáá vá ndamá faa ỹɔ́u yélai ma? 8Wú lúva veléitii ti ɣɛ náá pele w̃a sí áá ngákɛ ngáá nungáitii ngáá wú vólu yáfenga wú háá ỹɔítii mba. 9Ná vólu, a waa gísiya ngáá wáá w̃aavéla maa háá bamaí wa sífaa nɔ́ɔ́ wú ngáá Lébilah̃au laala lengaa. Ngí tɔ́ɔ́ỹai le wú w̃á, Ngalá ngáá hómbo í kɔ́tui sítiini pote ngáá ndengáá Lébilah̃au yɛ. 10Ngalángi gɔ́sɔngi ɣɛ́ kíli gulangɔ́ɔ́ lé ngáá koonɔ́ngi sí áá ɣɛ́ ngulúitii ti hápeitii mba náa tevé fááw̃a. Nguluí fíli pá ngi wá pánda ɛ́i ɣɛ́ héini ngá, taá tevé mba tí pilí ngɔmbuí ya. 11Ngáá nguyaí wó ngáá wú ye ngáá njɛí kɛinɔɔ́ nga ngí ɣɛ́ kpál̃au ngáá kɛ wú vólu yáfenga wú háá ỹɔítii mba. Kɛ́ nuí áá vá vaamá ná ní ndá hái áá gúla su, ngakpángɔɔ lé í lɔ́ve mbá. Aa nguyaí wó ngáá wú ye ngáá Hɛ́ɛ́ma Ỹínangi ɛ́ɣɛ ngɔmbuí. Ngáá kúlaɣɛi p̃ɛ́ɛ́ ngáá nuu ngáá lí ngáá ngi gɔ́ɔ́vai. 12Ngi gɔ́sɔ mbaalévendai ɣɛ kíli gulangɔ́ɔ́ lé ngáá nuí sí áá ngí wíítii yatɛ́ mba tevé sɔ́wɔi w̃a. Aa ngi wíítii kpɛ́lɛɛ pu ngi wótai h̃u, aáva ná áá ngandíɣa í kpɛkpɛlɛ, aa wíítii gɛ́hɛi yandɔ́ɔ́lɔ ngí wótai h̃u, í wííti gaangí w̃ɔ́ ngáá ngɔmbuí sí ɛ́i há kúnafɔ.”
Nguya Wo Mɔ́i Njɔú i Jísu wuyaní
(Máa 1:9-11; Lúu 3:21-22)
13Naa laa lówah̃u nɔ́ɔ, Jísu i vaaní áá híɣe Galéli lataí h̃u áá vá Jɔ́ɔ́dɛ Yɛí la ngáá Njɔú í ngúyai wó lá. 14Kɛ́ Njɔú ɣɛ́i loí í kɛ́ ngáá háwu Jísu í gi mái w̃aalóvi faí sí h̃u, faalɔ, i ɣɛi Jísu w̃a, “Kule lɔ má nyá ɣéle ngí ngúyai w̃aahɔ́lɔ ngáá í ye, yá ɣéle yí vá ngéle ná hááw̃a?”
15Kɛ́ Jísu i ngoo yápoteni, i ɣɛi ma, “Bɛlɛ́ sí í ɣɛ́ h̃íí náa nɛ́nɛ, kɛinɔɔ́ sítii kái kái Ngalá ngi ndéngɔ ngáá mú tí ɣɛ, mú tí ɣɛ.” Faalɔ, Njɔú bɛ́lɛ i luw̃ái náa.
16Ná nɔɔ́ léi Jísu í ngúyai w̃ááhɔlɔni, i gulaí náa njɛ́i wu. Ngamá nɔ́ɔ, kɛ ngeleí laa í wónga, í Ngalángi Hɛ́ɛ́ma Ỹínangi lɔ áá yéi ngáá í héi ma, i ɣɛi gulaí ngáá poovóó kɛ kíli. 17Ná naa í ɣɛ́i kpɛ́ɛ́, kɛ ngoo tá í gulangá ngelegóóh̃u, ngoí ná va i ɣɛi ngáá sí, “Sí lɔ́ í ngáá ní H̃íỹɛndou Loí, ndóngɔ lá. Aá lɔ́ ndíílɛingɔ tɔ́ fááw̃a.”
Actualmente seleccionado:
MÁFIYU 3: KNNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bandi New Testament © Bible Society in Liberia, 2000