Mark 4
4
Apitikiveu Holetsa
1Itaghi Jisü ye ayizükucho mükü lo kütsü ae. Jisü süho pesü kumqo akemi aqokitikhi no ighono kutomo kehu Jisü ye ayizükucho lo ashuka lakhi akeu lo ikuve no tilehi iqave, eno timiqo kümtsü no ayizükucho phivilo azü mükü lo ngoe. 2Pano aholetsa lono thime kutomo panongu kütsüe. Pa no ishi panongu vilo pi: 3“Inilo! Alukichimi lakhi no apitì ve niye wue. 4Pa no apitì vesü akelo, hami no alaphe lo vesülu, ikelo aghauqo no ighino tipaqo mighive. 5Hami no aghüma chilomo keu atusaye yeghi lo vesülu. Aghüma ilalei keu ghenguno apitì hu ye paikhavi thuwu ipeghive. 6Ikemu kughou khetsünhe no müka ipeghive keno, abò tipaqo ye akuhu thonhei quilomo kehu phuqhive eno kimghoive. 7Apitì hami ye asahuli dolo ikiqi ilove, aghibo tipaqo ye thuwu ipeghi kemu asahu no ghüsüve kehu athi pithímove. 8Tishimu apitì hami ye aghüma kivi lo ikiqi ilolu. Apitì tipaqo no thuwu ipeghi püzü athi kutomo pithílu, hami no shighi, hami no lhotsügho eno hami no aqhe ishi küghüsü pithílue.”
9Tisheno Jisü no pi, “Khunoqo no chilu nishi ani keno panoqo pelo chilu pelo.”
10Kughou pa likhi akeno, panongu Chighikini eno kütami pa phivilo akemiqo no aholetsaqo vehu iniju. 11Jisü no panongu vilo pi, “Alhou kükaphuw tuqhou ye nongu tsüvae. Ikemu khalau akemiqo ghengu ye thowkha kümtsü aholetsaqo lono piani 12tishianguno,
“ ‘Panongu ye juanamu khilemu vethamla nani,
eno chilu anamu khilemu vethamla nani;
tishimo aye, panongu ye xaideghi püzü akipimí qhivetsü luvi ke!’#4:12 Isa 6:9,10”
13Tisheno Jisü no panongu vilo pi, “Nongu ye aholetsa hipau vethamla keshea? Tishiaye kíshi no nongu ye aholetsa kütau vethaluni kea? 14Alukichiu hu no Alhou tsa vesü. 15Timi khami ye alaphe lo apitì ikiqi iku keu toi Alhou tsa vesü ke. Ikemu panongu no Alhou tsa chiluve kemtsa, Satan no ighino Alhou tsa panongu lolo vesü püakeu ikhipe wuve cheni. 16Kütami khami ye atusaye yeghi shou apitì vesü keu toi Alhou tsa chilukhavi alokivishi ikhilu cheni. 17Ikemu panongu ye akuhu qüsümo kehu, panongu ye ado ikhonhei likhi xü cheni. Kughou atsakiviu ghenguno aküpüna eno pishi-puju keu ighini keno, panongu ye paikhavi ikiqive cheni. 18Tishimu kütami khami ye asahuli dolo apitì ikiqi ilove keu toi Alhou tsa chilu cheni; 19ikemu hipau küxü lo mloküsaqo, aküakini pishikiqhi eno kütau thime jeli mine keu no ighino Alhou tsa küpühalu eno tino athi pithí mülave pe chekeu kiqi ke. 20Kütami khamiqo ye aghüma kivi lo apitì ilolu keu toi Alhou tsa chilu eno ikhilu no athi kupukuno shi pithí cheni—eno vesü keu lono hami no shighi, hami no lhotsügho eno hami no aqhe ishi küghüsü pithílu cheni.”
Akibepu lo Akulu
21Jisü no panongu vilo pi, “Nongu ye akulu pesü alì qholo momu alipa qholo sǘve cheni keshea? Tishini ke züqhu akibepu lo be cheni ke kumo keshea? 22Kughengu küsüpe püakeu lakhimu pephe-piyemo keu shimo nani eno nhape püakeu lakhimu lhaphemo keu shimo nani. 23Chilu nishi kemi aghí aye chilu pelo.”
24Jisü no pikibe ghi pi, “Nongu no kiu chilu ani keno tsaqüi kümsüjulo. Nono kütami shou kiu qhemi mighibeni keno titoi Alhou no tipau qhemi momu tinguno alau ghí O shou mighibe nani ke! 25Khuno no ani keno, alau tsüküpha nani; khuno no küha keno, kitila akeu ghí pano lau no ikhisüwuve tsü nani.”
Apitì Thuwu keu Holestsa
26Jisü no hi ghí pi, “Alhou kükaphu ye hitoi ke. Timi lakhi no ayeghi lo apitì vesüe. 27Pa ye kíshi keu keno ithi chemo kemu putho-pucho pa no züa na ithu anamu apitì ye thuwuve cheni. 28Pa likhi pa kutoshi no aghüma no athì kughulhove tsü cheni—atüghishi anika lhoipeghi cheni, tisheno amzü eno tipau shelo amzü lono aghipe woipeghive cheni. 29Aghipe no nimzüyive kemtsa, ghile do tovea kehu timi no ayevǘ pesü aghì tipau ghove cheni.”
Aghane thi Holetsa
30Itaghi Jisü no pi, “Alhou kükaphu ye kiutoi ipini kea, momu tipau lhe nike ghenguno kiu holetsa peithani kea? 31Tiye ayeghi lo apitìqo kümtsü dolo aghulou aghane thi lakhi toi ke. 32Ikemu kughou tipau yisüni keno, tino aghutu lo atsüniqo kümtsü nguno akijeu shi thuwu ipeghi cheni, eno alokaqo no kijè shive püzü tipau kichiqho lo aghauqo no apüsü pesü chenie.”
33Jisü no aholetsa kimihi keu kutomo pesü panongu no vethakulupu qhemi lono pitsüe. 34Pa ye aholetsa sümo kelo ye panongu vilo kiu tsamu pimoe. Ikemu kughou pa no pa likhi pa khopemiqo gholo akeno, pa no thowkha kümtsü lhepe pivetsüe.
Jisü no Pasapagha Ghasüve
35Tipani avela shive kelo, Jisü no pa khopemiqo vilo ishi pi, “Ningu ayizükucho hukuku küdau wuni nolo.” 36Ike akhopemiqo no aqokitikhi qhive püzü Jisü no ngo akeu shuka lono aqoshi wuve. Tilehi ashuka kütauqo ghí pa gholo cheke. 37Ashuka lo che kelo muqhumüzai keu pasapagha lakhi ighi püzü ashuka küzüpholuve kepu toive, eno tisheno azü fukucho keu no ashuka chhive nike toive. 38Jisü ye ashuka athiu akütsü kümkhüpu-a shou bepe züae. Akhopemiqo no pa küdaputhu püzü pa vilo ishi pi, “Akükütsüu, ningu ye pütsüqhive niye shiva püzü no ye amlosamo keshea?”
39Pa no ithuve püzü amlhü lomipi eno azü fukucho akeu vilo ishi pi, “Inaqhoivelo! Iqünheive lo!” Ikelo amlhü no iqüghai ngove eno thowkha shishe iqünheive.
40Jisü no pa khopemiqo vilo pi, “Nongu ye kushiye ighono msà ani kea? Nongu ye aküpülü küha aphi keshea?”
41Panongu ye akichiqhive no lakhi no lakhi vilo ishi iniju, “Hiye khiu kea? Amlhü eno azü fukucho kutólo pa gholu anie!”
Actualmente seleccionado:
Mark 4: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.