Mark 13
13
Achineki Kütsave nikeu eno Ashekha Ghuloki Michipuqo
1Jisü no achineki lono ipeche kelo, pa khopemiqo dolo milakhi no pa vilo ishi pi, “Julo, akükütsüu! Kiutoi keu jukighilepu tuqo kea! Hiye kiutoi keu jukighilepu kiqo kea!”
2Jisü no khochile, “Nongu ye aki kuloghi hipaqo kümtsü ithulu ani kema? Hilehi atu lakhimu lakhi shou bepekile ngomove nani eno kümtsü tuleqhive nani.”
3Jisü no achineki ghüngü lo Olive Naghuto lo iqa akelo, Peter, James, John eno Andrew noqo no lomo shi pa vilo iniju, 4“Thime hipaqo ye kughou no shikupu nani kea? Eno hipaqo kümtsü shikupu nikeu michipu ye kiu kea?”
5Jisü no panongu vilo pi: “Khuu pelomu nongu pishiqhive pemo nike jukuto alo. 6Kutomo no, ‘Ni ye pa ke,’ ipi no I je lono ighi püzü kutomo pishiqhive nani. 7Kughou nongu no aghükishi sütsa chilu eno aghüshi ani ipikeu uyewu sütsa chiluni keno msà kevilo. Hipaqo ye shikupu moayesa nani, ikemu ashekha ghuloki ye ighini aphike. 8Shiye lakhi no shiye lakhi mjochile ipeghi nani, eno kükaphu lakhi no kükaphu lakhi mjochile ipeghi nani. Tile a-a kutomo lo ayeghi küghüthaqo eno püqümiye ighi nani. Hipaqo ye apunu küsǜ huthu akeu paphi ke.
9“Nongu ye nolikhi nongu khekuto amoayesae. Nongu pesü no-a lo mijetsümiqo u lo sǘve no synagogqo lono nongu heqhi nani. Eno I je ghenguno nongu ye angh eno kükamiqo zülo puthugho no panongu lau I shepe shi nani. 10Eno atsakiviu pesü atüghishi shiyeqo kümtsü lau kütsüve paghi moayesae. 11Kugho-kughomu nongu küghaluve no atsa kükügha-a lo süghi kelo, kiu pi nani keno azüu no amlosa kevilo. Ado tipau lo O lolo müzüsütsü keu likhi pilo, kughengu tiye nono pi anike kumoe, ikemu Aghungu Kimthe no pi anike.
12“Athiküzüu no athiküzüu thechu shive no pìthíve nani, eno titoi apù no anu lau shi nani. Anuliqo no panongu pù-aza mjochile nani eno panoqo pìthíve nani. 13I ghenguno kümtsü no nongu mithi nani, ikemu khuno no ashekha kutólo mutotoi puthugho aghíni keno xaluve nani.
14“Kughou nongu no ‘aphikümqhüpu khikhi küghüküghaleive pe cheni keno’#13:14 Dan 9:27; 11:31; 12:11 tipau no ngomo kepu-a lo puthugho aghí keu ithuluni keno (phi akeu hu no hi vethalulo) Judea lo akemiqo pelo naghutoqo lo pove pelo. 15Aki kütsüqa lo akemi khumu aki lo anhemgha ikhi phelu niye aqhou iqighi kepu kumoe. 16Alu lo akemi khumu idewo panonguw ubephi luwu kepu kumoe. 17Atsala tipaqo lo totimi mishí akemi ngò azá angapini akemiqo ghenguno kiutoi akümsapu kea! 18Süsü tsalà lono hipau shipemo nike inikhu alo, 19hipau tüqhüdo lo aghime kitikhi anani, eno tiye Alhou no ayeghiqha lhophe ke lono ishi kutólo titoi ighi mphi keu—eno ighi nikeu lomu titoi akiniù ighimo nikeu ke.
20“Tsalá Ampeu no atsala tipaqo kughukhove moaye, timi khumu xüluni chemoe, ikemu pa no khunoqo kisheluvea keno, tipaqo je lono atsala tipaqo ye kughukhove nani. 21Tipau süchedo lo tsalá khiuala no O vilo, ‘Julo, Messiah hi chenie!’ momu, ‘Pa ye hu cheni!’ ipi aghí namu ti pülü kevilo. 22Kughengu kichileu messiahqo ngo kichileu tungkupumiqo no pishiqhi niye ipeghi püzü akümzapu eno amichipu kümlà kijè shi nani, eno tsalá shikulupu shi aye, kisheluve kemiqo ghí pishiqhi niye shi nani. 23Ikehu nongu likhi nongu khekuto alo; I no thowkha ashe-azü shi nongu vilo pive anie.
24“Ikemu aghime kitikhi tsalà hipaqo thiu paikhavi lono,
“ ‘khetsünhe no züchiyive nani,
eno aqhi no pa küvü tsümove nani;
25ayepuqo no atsütsǘ lono ikiqive nani,
eno atsütsǘ lo akeu jeli kümtsü süküghütha nani.’#13:25 Isa 13:10; 34:4
26“Atüqhüdo tipau lo timiqo no khüngküsü lono Timi Nu no aküka kijè eno ajekipi lono chekeu ithulu nani. 27Eno pa no paw kungumiqo puwu no ayeghi cheku bidí lono pa no kisheluve kemiqo hekütsü nani, eno tiye ayeghi ashekha lono ashekha kutólo kisheluve kemiqo hekütsü nani.
28“Mububo lono akükütsü hipau shikalulo: Kughou aloka lo apishe ipeghive püzü tipau nipa no miní ipeghiveni keno, nongu no tiye mütsü tsalà chea ipi ithive cheni. 29Tihutoi, kughou nongu no hipaqo kümtsü ithuluni keno, ashekha tsalà kupunúvea eno tiye ahukikha lo ighivea kepi ithilo. 30Kuchou no I no nongu vilo pìní, hipaqo kümtsü mütsümishei shikupumo ke thaqhülo hipau tiqheli ye kühave keu shimo nani. 31Atsütsǘ eno ayeghi ye hauve nani, ikemu I tsa ye khilemu hauvemo nani.
Atsala eno Asüchedo Mthae
32“Ikemu atsala momu ayì kihedo ghili ye khunomu mthae, kungugha lo kungumiqo ke kumo no Anu ghí mthae ikemu Apù likhi no ithi anie. 33Kutokupui khealo! Kutokughoi shilo! Nongu ye kughou no ado tipau ighi nani keno mtha ke. 34Hiye timi lakhi no kicheghüzü lo wuve niye pa qemiqo lakhi-khi lau akümlà pichebeve keu toi ke, eno ahukikha lo akeu vilo jukuto alo ipikeu toi ke.
35“Aki mpeu ye avelau no keo, zübumta lono keo, momu awudu no igha ke lono keo, momu tsükuthou no ideighi nani keno nongu ye mtha ke ghenguno jukuto alo. 36Tsalá pa no zülile no ighive aye, pa pelo nono zü aghí keu phulu pe kevilo. 37I no nongu vilo kiu piani keno ni ye kümtsü vilo piani: ‘Jukuto alo!’ ”
Actualmente seleccionado:
Mark 13: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.