Mark 11
11
Jisü no Jerusalem lo Akükau shi Ighi
1Panongu no Jerusalem kupunúve no Olive Naghuto lo Bethphage ngò Bethany lo ighi kelo, Jisü no pa khopemi kini puwu 2ghi pama vilo pi, “Nokujo züu aphu akeu lo wulo eno nokujo no ilo kelo timi khunomu iku mphi keu khurhati lakhi tile tshüpe püaghi keu ithulu nani. Ti kuqho püzü hilau saighi lo. 3Khuala no nokujo vilo, ‘Kushiye ti kuqho ani kea?’ ipi iniju aye, ‘Ampeu no hi avehupu shi ani eno kushuwa kumo lo hilehi tsüchile puwove nani,’ ipi lo.”
4Pama no wu kelo khurhati ahukikha lo tshüpe alaghila khalau aghí keu ithulu. Pama no ti kuqho akelo, 5timi khami tile puthugho akemi no, “Nokujo ye kushiye khurhati kuqho ani kea?” ipi iniju. 6Pama no Jisü no pilo pikeu toi khochileve, ikelo timiqo no panoqo pelo wuve pe. 7Kughou pama no khurhati Jisü lau saighi no panonguw ubephiqo pesü khurhati shou vebe pe qhi keno Jisü no tipau shou iqae. 8Ikelo timi kutomo no panonguw ubephiqo pesü alà lo qhatsü, eno khami no asübo lono asǜ lokaqo miché pesü alaghi lo qhatsüe. 9Azüu eno athiu pa pape chekemiqo no ishi igha che,
“Hosanna!”#11:9 Hebrew tsa kiqi lo, “Xalu!” tipau kiqi ye sheqhe keu sheshu; ajò 10 lo ghi ani
“Khuu no Ampeu je lono cheni keno pa ye akümghau ke!”#11:9 Leshe 118:25,26
10“Ningu papù David kükaphu chekeu ye akümghau ke!”
“Kungugha lo akiqheu Lhou sheqhelo!”
11Jisü no Jerusalem lo iloghi eno achineki khala lo wu. Eno pa no hokümxa kümtsü ju, ikemu tsüzüve kehu pa no akhopemi Chighikini sasü Bethany lo wuve.
Jisü no Mububo Ghusho eno Achineki Khala Shikimthe
12Tishiwo thoghiu panongu ye Bethany qhive no wuche kelo Jisü ye müzüthive. 13Putou no pishipuwo mububo anipa minibobo shi aghí keu ithulu, ikehu pa no axathi lakhimu pithí ani keo mokeno ju niye wue. Ikemu mubuthiqo pithí keu ghuloki kumo kehu kughou pa no tile ighi keno lakhimu pithí aghimo eno anipaqo likhi aghí keu ithulue. 14Ikelo pa no asübo vilo pi, “Timi khuu pelomu akiniù O xathi chupemove peniu.” Pa no piakeu akhopemiqo no ti chiluve.
15Jerusalem tolu kelo, Jisü no achineki khala lo ilo, eno tilehi küqhü-kili shi akemiqo haphe thuve. Pa no pisa kili akemi eno miqhedu je akemiqow akibepu eno alakhüqo kümtsü tukulove tsüe, 16eno khuu pelomu achineki khala lo kilhikishi shipemo nike lakhave. 17Eno panoqo kütsü ghi, pa no ishi pi, “Kuchoyesü lo, ‘I ki ye shiye kümtsü ghenguno akighini ki ipi ku nani,’ ipi yèpüani ke kumo keshea?#11:17 Isa 56:7 Ikemu nongu no hipau pesü süxakuchumiqo küghütshü-a lakhi kughulhove tsüae.”#11:17 Jere 7:11
18Achinetomi eno ayeza kükütsümiqo ye ti chilu kelo Jisü pìthíve nikeu laghi phuthuve. Kughengu aqokitikhi kümtsü no pa kükütsü ini pesü akümzave kehu panongu ye Jisü msàve.
19Kughou avela shive keno Jisü ngò pa khopemiqo ye mishighüna qhive no wuve.
20Inaqhe shive no panongu ye wuche kelo, panongu no mububo hu ye akuhu kutólo thizümüive aghí keu panongu no ithulu. 21Peter no kümsüchilelu no Jisü vilo pi, “Rabbi,#11:21 Ampeu momu akükütsüu ipi akeu kiqi julo! Nono ghushove keu mububo hu ye thizümüivae!”
22Jisü no khochile, “Alhou lau aküpülü alo. 23Kuchou no I no nongu vilo pìní, tsalá khuala no pano mlo lo lipimo no panongu no kiu pive keno tishi nani kepi pülü püzü naghuto hipau vilo, ‘Wulo, O likhi O pesü azüghi lo vesüve lo,’ ipi aye panoqo ghenguno tishive tsü nani. 24Tighenguno I no nongu vilo pìní, nongu no akighini lono kiu-kiumu khu kelo tipau ithuluvea kepi pülülo, eno tipau hu nonguw shiluve nani. 25Eno kughou nongu no puthugho püzü akighini shini keno, tsalá nono khuala lau akipimí aghí aye, panoqo kipimí qhive tsülo, tishianguno nongu Papù kungugha lo akeu hu no nongu xinéqo pevetsü nani ke. 26Ikemu nongu no kütami xiné pevetsümo aye, nongu Papù kungugha lo küau ghi nongu xinéqo pevetsümo nani.”#11:26 Kaku hami lo ye ajò hipau ye Mt 6:15 lo akeu athoshi peitha cheni.
Jisü Kükagha Iniju keu
27Panongu ye itaghi Jerusalem lo ighi, eno Jisü no achineki khala lo alà cheche kelo, achinetomi, ayeza kükütsümi eno kichimiqo pa lau ighi. 28Panongu no pa vilo iniju, “No ye kiu kükagha pesü thime hipaqo shi ani eno khuu no kükagha hipau O tsü kea?”
29Jisü no khochile, “I no nongu vilo thime lakhi inijuni. I khochile lo, eno I no kiu kükagha pesü hipaqo shi cheni keno nongu vilo pìní. 30I vilo pilo, John no baptiz shi chekeu ye kungugha lono keo timi lau no ighi keu kea?”
31Panongu likhi panongu dolo küptsaju ghi ishi piae, “Tsalá ningu no, ‘Kungugha lono,’ ipi aye pa no ishi pìní cheni, ‘Tishiaye nongu ye kushiye pa pülümo kea?’ 32Ikemu ningu no, ‘Timi lau no ighi ipini keno’…” (Panongu ye timiqo msàve, kughengu kümtsü no John ye mütsümishei no tungkupu lakhi kepi kihi acheke.)
33Ike panongu no ishi Jisü khochile, “Ningu ye mthae,” ipive.
Ikelo Jisü no pi, “Ni ghi nongu vilo ni ye kiu kükagha lono hipaqo shi ani keno pimoe.”
Actualmente seleccionado:
Mark 11: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.