Luke 7
7
Aqhe Shou Zatsüu Küpülü
1Kughou Jisü no hipaqo vehu pesü timi khunoqo no inia keno tipaqo vilo pitave kethiu, pa ye Capernaum#7:1 Capernaum ye Israel ahuu küdau aphu lakhi. Jisü ghuloki lo hiye lhidikishi-a lakhi ke. Hilehi xüküami akichiù no Akhakükhami. lo wuve. 2Tilehi aqhe shou zatsüu lakhi qeu khuu pa mpeu no ighono akughupu shi kimiyeche keno pa ye thiveni keshi sǜ ae. 3Akijeu no Jisü ghili chilu no Jewmi kichimi khami pelo Jisü vilo ighi püzü pa qeu shipivi tsü penike iniju puwu. 4Kughou panongu no Jisü lau ighi keno panongu no tsükhomo pa qhüiniju ghi pi, “Timi hipau ye O kukuphu ithulu küzüpu shi anie, 5kughengu pa ye ni shiye kimiye cheni eno ningu ghenguno Synagog ki shitsüe.” 6Ike Jisü no panongu gholo wu.
Pa no aki kupunú che kelo aqhe shou zatsüu no aküsàmiqo hape Jisü vilo hitoi pipe nike puwu, “Ampeu, O ghime kevilo! O pelo I ki sheqho lo iloghi penike aküzüpu kumoe, 7Ni ampi no O lau ighi nikeu ghí aküzüpu kumoe. Ikemu nono azah tsüve aye I qeu ye viluve nanie. 8Kughengu ni ghí kükagha qholo ani eno I qhou ghüshimiqo anie. I no ghüshimi lakhi vilo, ‘wulo,’ ipi aye pa no wucheni; eno I no, ‘Ighilo,’ ipi aye pa no ighi cheni. I no I qeu vilo, ‘Hipau shilo,’ ipi aye pa no shi cheni.”
9Kughou hi chilu keno Jisü no pa jupe akichiqhive eno pa no pa pape chekemi aqokitikhi küdau tsüghǜ idewo panongu vilo pi, “I no nongu vilo pìní, ni ye Israel lomu aküpülü kuloghi hitoi kemi phu müla aphie.” 10Ikelo timi khunoqo hapuwu keno tipaqo no akijeu ki lo ideighi kelo aqeu hu ye vive aghí keu ithulu.
Jisü no Chimemi nu Xüputhu
11Tipathiu ado kushuwa kumo lo Jisü no Nain#7:11 Nain ipikeu a-a hipau ye Tabor Naghuto lono apéu küdau mile kini iphi kelo ani. Jisü no Bible lo timi küthü xüputhukeqo dolo hino atüghiu, kütau xüputhu kemi ye Jairus nonga eno Lazarus pama ke. ipikeu mishiphu lo wu, eno pa khopemiqo ngò timi kutomo pa gholo wue. 12Pa no mishiphu khagho kupunú ighi kelo chimemi lakhi, li nu lakhi likhi akeu hu thive no khapesü ipeche. Eno mishiphu lo timi kutomo no achimeu gholo che. 13Kughou Ampeu no li ithulu keno, pa mlo lo li kimiyeqhiyi keu no chhitoive no pa no pi, “Qa kevilo.”
14Tisheno pa no wu püzü panongu no khape chekeu kumobo bue, ikelo akumo khape chekemiqo no inaqhoi puthughove. Jisü no pi: “Apumio! I no O vilo piani, ithuvelo!” 15Thive keu timi hu no ithu iqa no atsa pithuve, ikelo Jisü no pa pesü pazá lau saighi tsü.
16Panongu kümtsü shithüghüive no Alhou sheqhe ghi pi: “Tungkupu kijè lakhi ningu gholo ipeghivae, Alhou ye paw timi kuphu nike ighi anie.” 17Judea qha eno tipau ghakhu hokümxa kümtsü lo Jisü ghili hipau veküpha wove.
Jisü eno John Baptiz Kishiu
18John khopemiqo no hipaqo vehu kümtsü pesü pa vilo pi. John no pa khopemi kini ku püzü 19pa no Ampeu vilo, “No ye ighi niye#7:19 Israelmiqo ye “Messiah” ipikeu khe ache (tiye tungkupumiqo no inahuu no piqhipepüa keu) eno Messiah hipau vechewo no inami no panongu qhasü pe akeu lono xapheve nani ipi pülü che. akeu hu keo, ningu ye kütami huqhe aghílo pi kea?” ipi iniju penike pama puwu.
20Kughou pama no Jisü lau ighi keno pama no pi, “John Baptiz kishiu no ishi iniju penike ningu puwue, ‘No ye ighi niye akeu hu keo, ningu ye kütami huqhe aghílo pi kea?’ ”
21Tipau tüqhüdo lo Jisü no aküsǜ jeli, küsükinimi eno tüghaküsa ghawu akeqo kutomo shipivi tsü, eno anhethi kighichemi kutomo pelo ithuluve pe. 22Tisheno pa no John ghini-kishimiqo vilo khochile ghi pi: “John lau idechile wo püzü nongu no kiu chilu eno ithulu keno pesü pa vilo pilo: Anhethi kighichemi no ithulu ani, apukhu kinitave kemi no alachelu ani, apügha kupumiqo shikimtheve ani, akìní kughupomi no chilu ani, kithimi xüputhuve ani, eno tsakiviu pesü athokhami lau asheshu anie.#7:22 Isa 35:5-6; 61:1 23Khukhumu I ju pesü lipimo kemi kümghae.”
24John ghini-kishimiqo no wove kethiu Jisü no aqokitikhi vilo John ghili pithu: “Nongu ye küghünamokeu-a lo kiu ju niye wu kea? Amlhü no ayeghübo fukini akeu ju niye wu keshea? 25Tishimo aye nongu ye kiu ju niye wu kea? Tiphimini kivi pepu kemi ju niye wu keshea? Moe, khunoqo no amekusho tiphimini pepu no nibonilei shi xü cheni keno panongu ye kükakiqo lo acheni. 26Ikemu nongu ye kiu ju niye wu kea? Tungkupuu keshea? Iyei, I no nongu vilo piani, pa ye tungkupumi nguno akijeu ke. 27Kuchoyesü lo pa ghili ishi yèpüani:#7:27 Jisü ghuloki lo Kuchoyesü ipikeu hiye Puloshoqhi aqau ghili piani.
“ ‘I no O züu no I ghinikishiu puwu nani,
pa no O züu no wu no O laghi ghepe qhitsü nani!’#7:27 Mala 3:1
28I no nongu vilo piani, totimi no punú kemiqo dolo khunomu John nguno akijeu kühae; ikemu Alhou kükaphu lo khuu no aghulou keno pa ye John nguno akijeu ke.”
29Timiqo kümtsü eno zame küqhami kutólo kughou Jisü tsa chilu keno panongu no Alhou no shikeu ye achipi ipi ikhilue, kughengu panongu ghí John no baptiz shitsü ke. 30Ikemu Phariseemi ngò ayeza lo shitsamiqo ye panongu ghenguno Alhou kimiji akeu milive, kughengu panongu ye John no baptiz shimo no ake.
31Jisü no kibe ghi pi, “Ni ye kiu pesü hipau tiqheli lo timiqo kimghi tsüní kea? Panongu ye kiu paphi kea? 32Panongu ye alhikishi-a lo itimiqo no iqa no lakhi no lakhi vilo igha ishi piakeu toi ke:
“ ‘Ningu no nongu ghenguno fulili küighatsüe,
ikemu nongu no ilhemoe.
Ningu no akumo qho kelo le phetsüe,
ikemu nongu no qamoe.’
33Kughengu John Baptiz kishiu ighi kelo pa ye asho chumoe momu atsaizü shomoe, ikemu nongu no, ‘pa ye tüghaküsa ani,’ ipi. 34Timi Nu no ighino chu eno sho kelo nongu no, ‘Timi hipau ye minhemüzai eno shokümzümi eno zame küqhami ngò axinemiqo küsàmi,’ ipi ke. 35Ikemu alokütsü ye akümlà lono kimichive tsü cheni.”
Axinemi Totimi Lakhi no Jisü Nukishe
36Phariseemi lakhi no pa gholo avelau ghulhu chu penike Jisü kusü, ikelo Jisü no pa ki lo wu no aghulhu lipa lo ngo ae. 37Mishiphu tipau lo axiné küxü lo xüache kemi totimi lakhi no Jisü ye Phariseemi ki lo chuqu-kusho shi ani ipi chilu kelo li no axokütsüngü thazü Alabaster abohu kichhi pesü ighi. 38Li no Jisü thiu ighino pa pukhuphi lo qa püzü li nhezü no Jisü pukhu pütsáve ghi ae. Tisheno li no li kütsüsa pesü Jisü pukhu isü tsü, apukhu lo müma tsü eno axokütsüngü lepuku tsüe.
39Kughou Jisü kusü keu Phariseemi hu no ti ithulu keno pa likhi pa vilo ishi pia, “Timi hipau no tungkupumi lakhi ke aye pa ye totimi pa bu akeu ye khuu eno kiutoi kemi eno li ye axinemi lakhi kepi ithi kepue.”
40Jisü no pa khochile ghi pi, “Simon, ni ye O vilo kiuala pi kepu anie.”
Pa no khochile, “Akükütsüu, I vilo pilo.”
41Tile Jisü no pi, “Timi kini no pisa püná chekemi lakhi lau api puae. Lakhi no denarii#7:41 Denarii ye akümlamíw atsala lakhi jume 500 eno lakhi no denarii 50 lochile kepu shiae. 42Pama khiumu lochilelu kepu pisa küha no ae, tighenguno pisa püná chekeu no pama piagha qhikhavetsüe. Tishiaye pama khikhiu no alau pa kimiye nani kea?”
43Simon no khochile pi, “I no kümsüju kelo api-agha akichiù qhivetsü keu no shi aghí nanie.”
Jisü no pi, “No ye achipi shi kimchiluvae.”
44Tisheno pa no atotiu küdau tsüghǜ ighino Simon vilo pi: “No ye totimi hipau ithulu anima? I no O ki lo iloghi kelo no ye azü pesü I pukhu qhükepumu I tsümoe, ikemu li ye li nhezü pesü I pukhu qhuvetsüa eno li sà pesü tipaqo isüve tsüae. 45No ye I mümamoe, ikemu li ye I no iloghi ke lono I pukhu müma keu tave mphie. 46No ye thazü pesü I kütsü nu tsümoe, ikemu li ye axokütsüngü pesü I pukhu nutsüe. 47Tighenguno I no O vilo pìní, li no kikimiye kijè pephe-piye ketoi li xiné kutomo akeu qhive tsüa. Ikemu khuno lau akipimí kitila likhi qhivetsü akeno kikimiye kitila likhi ke.”
48Jisü no li vilo pi, “O xinéqo qhivetsüae.”
49Kütami tile ngo akemiqo no panongu dolo ishi pia, “Hiye khuu keno axiné thotsü pevetsülu kea?”
50Jisü no totimi vilo pi, “O küpülü no O xaluvae, aloino wolo.”
Actualmente seleccionado:
Luke 7: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.