Etatelu 3
3
Uhedia wa Untu
1Ului#3:1 Eny. 12:9; 20:2. akaleki nyama tshe ya la kete yakatungi Latuyalaka Unyashungu lukesu. Ndi akambula umuntu ati: Ukundi, Unyashungu kunyutela ati: Tanyolekaki elua wʼetamba tshe weli lʼekambo kene? 2Ku umuntu akakaluya ului diui ati: Shu mbeyaka nde elua wʼetamba weli lʼekambo. 3Keli Unyashungu akatokokomiya ati: Tanyolekaki nduku ulua uma lʼutamba weli lʼatei wʼekambo, kuyanga munanda, nyutukuvo. 4Ku ului akatela umuntu ati: Yaa! nyu hanyuvo mete. 5Paka ne dia Unyashungu mbeyaka ati: Lushi layunyole, ashu anyu wayudiho, ku nyayuyala uku dimi Unyashungu, nyayeya akambu wʼololo ndu akambu wa kolo. 6Umuntu akenyi ati: Utamba one ololo nde, ndu dimena lu ashu, ndu kawo dia nfudia yimba. Okone ndi akakohola ulua, akali, akasha umendi. Ku ndu umendi akali. 7Ashu awo wakadiho. Vo wakeyi vati: Etakataka mbesu. Vo wakose akatshi wʼetamba wa fingu, wakayatelela afunga. 8Ku vo wakuki lohokoso la Latuyalaka Unyashungu lamʼakandetetaka lʼekambo la dikolo. Ku pami la wadendi wakahimbi ndjashe lʼatei wʼetamba, ne dia ndi atukuwaena.
9Latuyalaka Unyashungu aketi Adama, akawumbula ati: Lendʼeye na? 10Ndi akûkaluya diui ati: Dimi lakuki lohokoso laye lʼekambo, ku lakuki woma, ne dia laki utakataka, diako mbushamimi. 11Ndi akawumbula ati: Akakutedi ati: Utakataka mbeye? Undi, we akali ulua wʼutamba wakamakusike? 12Ku Adama akûkaluya diui ati: Umuntu lakayambisha dia ndjala la mi kakambishawo, diako mbakamali. 13Latuyalaka Unyashungu akambula umuntu ati: Na dikambu diutsheye ne na? Umuntu akûkaluya diui ati: Ului kakampimbi,#3:13 2 Kor. 11:3; 1 Tim. 2:14. diako mbakamali. 14Latuyalaka Unyashungu akatela ului ati: Uma lu dikambu diakayatshi ne, mbambuyudjama mananu kuleki dungalunga tshe la nyama tshe ya lʼukunda. We ayuyakutulaka lu dikundju; ayolekaka ditshu nshi ya lumu laye tshe. 15Dimi layudja luhetshu lʼasaye la umuntu,#3:15 Eny. 12:17. ndu lʼasa tukanula taye la tukanula tandi. Ndi ayukokomolaka lʼote, ku we ayûlumataka lu etshindji. 16Ndi akatela umuntu ati: Dimi layukufudiyaka asui lu nshi yaye ya diemi, ndu yʼeutelu kaye kʼona. We ayutaka ana la lono. Utema aye ayekamaka paka le umeye, la ndi ayukulela. 17Ku ndi akatela Adama ati: Kete yambudjama mananu dikambu diaye, ne dia we aketawo diui dia wadeye, ndu akali utamba wakamanyusike nti: Tanyolekaki. Uma lu pa kayuyolekaka mbu ya nde nshi tshe ya lumu laye. 18We ayolekaka tumbatumba uma lʼekambo, keli atende la ahangulakoi wayutumbaka lu kete dikambu diaye.#3:18 Heb. 6:8. 19Uma lʼulimu a ntumba diangasa lʼelundji kaye mbayuyukundjaka mbu ya nde, edja ndu we ambukalula lu kete, ne dia uma loko mbakayosama. We eko ditshu, okone we ayukalula utsha lu ditshu. 20Ku Adama akole wadendi lukumbu ati: Eva (kitshimudi ati: Lumu), ne dia ndi aki nyangu antu tshe weli la lumu. 21Latuyalaka Unyashungu akatshela Adama la wadendi eloto wa dikuhu. Ku ndi akalotsha.
22Latuyalaka Unyashungu akati ati: Untu one ambuyala uku otoi asu lu ewu kʼakambu wʼololo la kʼakambu wa kolo. Kakiane tûshimbi, ndi atukusimbula lunya dia nkohola ulua wʼutamba a lumu,#3:22 Eny. 22:14. la ndi nde, la ntshikala la lumu pundju. 23Okone Latuyalaka Unyashungu akashanya Adama uma lʼekambo ka Edena dia ndi nkamba Kete uma lene akandosama. 24Osoku mbakandatshanya untu. Ku ndi akakitsha ondjelo wetawo vati: Okeruba, ndu yombo ya lumbi yakasikisoka lu leke lʼehutwelu ka unya lʼekambo ka Edena, dia nama mbuka kʼutsha lʼutamba a lumu.
Actualmente seleccionado:
Etatelu 3: TLL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
La Bible en Otetela © Allianee Biblique de la Republique Democratique du Congo, 1991