Lúkasɛ 17
17
Bɔbɛ́á na nɛniasɛnana
(Mat 18.6-7, 21-22; Mə́l 9.42)
1Yə́susu a ná báyɛ́á bɔkɔ́nɛna lɛ́na a sɛ́á: «Manya má bɛkɔa má ŋɔ bá bikúílí biəŋí ɔmá bɛndɔ bá sɔ́ ŋɔ kɔtɔ ɔ bɔbɛ́á ɔkɛa. Mba, yatɛ́ ɛmɔ́kɛ́ ɛlɔ́áyɛ́ wɔ́ɔwɔ ɔwá a ndɔ bɔsɔ́kɔ́ nyɛkɛna ɔ bɔbɛ́á! 2Tɔ óso ukətiə náana ɔwá, yɛ́ lɛa muɛsɛ ɛlɔ́áyɛ́ ayɛ́ ɔwá bá wɛɛ́ya muɔkɔ mɔŋɛ́ŋa ɔ́lɔ́kɔ́kɛ́na ɔ ɛmɛna, bá wɛɛ́ya əmbínə ɔ nɔmɔ́ nuúmə́, yáyɛ́ná ɔ wɛ́ɛ́yɛ́ ɔ mɔtɛ́tɛ́á ɔ ukuəsiə ɔ bɔbɛ́á. 3Nɔ́ bɛ́tátáká muɛsɛ!»
«Ábá wawɔ́á mukúlə́kulə a ndɔ bɔbɛ́á kɛa, kɛ́kɛ́lákɛ́ná wɛɛ́ya, ábá a ná sə́hə́kíníə́, niasɛ́ná wɛɛ́ya. 4Ábá a ndɔ aŋɔ́á bɔbɛ́á kɛa bikúílí bɛ́lɛ́ndɔ́lɔ́mɔnɔ ɔ buɔsɛ́, a ndáhíáná ɔwáwɔ ɔ ndalɛ́na ɔ ikúílí tɛ́á a sɛ́á: “Mɛ lɛa na isə́hísə́hí”, ɔ ŋɔ wɛɛ́ya niasɛna.»
(Mat 17.20)
5Basɔ́másɔma bá ná Isə́lúkú lɛná bá sɛ́á: «Kɔndɛ́ná bəsú ilumininə.» 6Isə́lúkú a sɛ́á: «Ábá nɔ óso ɔbáá na ilumininə ɛ́sɛ́á mɔsámá wɔ́ hɛlɔa, nɔ ŋɔ óso ɔ bɔ́ɔbɔ bɔlɛ́á ɔlɛna nɔ sɛ́á: “Tɔbá yə́wúə́ mɛkaŋá háha, káka bɛ́nɛ́má ɔ nɔmɔ́”, bɔ́ ŋɔ bənú ɔ́kɛ́na.»
Bɔsɔ́ma bɔ́ mɔnyɛna
7«Ɛ́yánɛ́ ɔ uwə́nú ətíə́, ábá a lɛa na mɔnyɛna ɔwá a ndɔ ɛtɔbɔtɔ́bɔ́ kulə, ataná, a ndɔ bilúkə́ tə́tə́niə, ikúílí mɔnyɛna a nɔ́ kətilə́ ɔ bɛtɔbɔtɔ́bɔ́, a wɛɛ́ya lɛna a sɛ́á: “Sɔ́nɔ́ tɔfá ɔ ndətuə́nə ɔ ɛtáka.” 8A ŋɔ wɛɛ́ya lɛna ɔbánɔ́ a sɛ́á: “Tábɔ́nákɛ́ná mɛaŋɔ́á bɔ́labɔ́nɛ́á, bɛ́háá bɛlɛŋa bɛɛsɛ ɔ́ mɛaŋɔ́á áfɛ́na, mɛ́ nɛ́áká, mɛ́ nyákɛ́na; əlimə yɛ nɔ́yɛ́ mbá ɔ́ tíkə́ ákána ɔ ɔnɛ́á na ɔnyɛ́na.” 9A sa hɔ́ánána ɔ wayɛ́á mɔnyɛna ɔ mohóloniə uhíə́nini bɔkɔasɛ́á, a ná kɛ́áká yatɛ́ ɔyɛ́á a ná wɛɛ́ya manɛ́na. 10Yɛ́ lɛa bɔkɔa bɔ́mɔtɛ́ ɛlɔ́áyɛ́ ənú tɔ́na, ikúílí nɔ ná bikimə kɛ́áka ɔbɛ́á Huɛlɛ́ a ndɔ bənú manɛna, nɔ́ láá nɔ sɛ́á, tɔ báka ɔbánɔ́ bɔnyɛna bá ndəmə: “Tɔ́ kɛ́áka ɔbánɔ́ yatɛ́ ɔyɛ́á tɔ ná hɔ́ánána ɔkɛa.”»
Yə́susu a nɔ́ niómo nɛ́ bɛndɔ bə́mínú niŋəsiə
11Yə́susu a ka bá ɔ ɔwákaka ɔ Yəlúsalɛma a tɔ́mbákɛna ɔ ɔmbándá wɔ́ misí ətíə́ yɛ Kalɛ́lɛa na Samália. 12Ɛnaka á báá ɔ ufíə́kinə ɔ bɔ́mɔtɛ́ bɔnɔŋɔ, niómo nɛ́ bɛndɔ bə́mínú bá ná ndásá ɔ ɔwayɛ́ nɛnyáná, bá ná tɛ́nɛ́má hata na wɛɛ́ya. 13Bá ná botólíə́ ɔ uyə́mə mɔŋɛ́ŋa bá sɛ́á: «Á Yə́susu, á Muinə́niə, tɔ́kɔ́lɛ, wə́ə́ bəsú mɛɛ́lɔ.» 14Ikúílí a ná bəə́bu yámá, a ná bəə́bu lɛ́na a sɛ́á: «Nɔ́ kə́bínə́níə́ ɔ bətitiəmahánɛna.» Ikúílí bá ná báá ɔ ɔwákaka, bá ná niŋə. 15Ɛnaka wɔmɔtɛ́ ɔ uwəbú ətíə́, á bɛ́bɔ́ŋɔ́ ɔwá a ná niŋə́, a ná tilə́ na əlimə, a ná botólíə́ á Huɛlɛ́ ɔ tuúmə uhíə́niniə na nióni nɛŋɛ́ŋa. 16A ná ká Yə́susu kɔ́ɛ́na ɔ makɔlɔ́, busíə́ lúmə́tɔ́ ɔ misí, a ná wɛɛ́ya mohóloniə híə́níníə́. Mɔ́táyɛ́ mɔndɔ a ka báá wa Samália. 17Yə́susu a ná ɛtambá ɛ́tá a sɛ́á: «Tátá bəə́bu niómo bá ná niŋə́ əə́? Mba, hə́níə́ bááyɛ́ ibo bá lɛ́á əə́? 18Ata ɔmɔtɛ́ ɔ uwəbú ətíə́ a sá bílúmíniə ɔndahíáná á Huɛlɛ́ ɔ mohóloniə uhíə́niniə ɔ́maná ɔ́ yɛ́ɛyɛ ɛsalasala!» 19Yə́susu a ná Mɔsamália lɛ́na a sɛ́á: «Hɔalɛ́na káka, ɛ́sɛ́á ɔ ná lumínínə, Huɛlɛ́ a ná aŋɔ́á núə́kə́níə́.»
Nɛndahíáná nɛ́ Mɔná wa mɔndɔ
(Mat 24.23-28, 37-41)
20Bɛfalísia bá ná Yə́susu batá bá sɛ́á: «Ɔ́ uyə́níə́ ikúílí Nɛmanɛna nɛ́ Huɛlɛ́ nɛ́ ŋɔ ndafámá əə́?» A sɛ́á: «Nɛmanɛna nɛ́ Huɛlɛ́ nɛ sɔ́ ŋɔ húlə ɛ́sɛ́á bɔɔ́la ɔbɔ́á bɔ́ ndɔ sinənə. 21Bá sɔ́ ŋɔ laa bá sɛ́á: “Nɛ́ lɛa háha, ataná nɛ́ lɛa hə́ə́ní.” Ɔ taká, ɔ́ Nɛmanɛna nɛ́ Huɛlɛ́ nɛ́ɛnɛ háha ɔ uwənú ətíə́.» 22A ná bɔkɔ́nɛna lɛ́na a sɛ́á: «Ikúílí yɛ́ lɛa ɔ ɔsákɔna ɔyɛ́á nɔ ŋɔ siəkə usinə ata hinó hímotí hɛ́ Mɔná wa mɔndɔ, mba, nɔ sá wɛɛ́ya yama.» 23Bɛndɔ bá ŋɔ bənú lakɛna bá sɛ́á: «A lɛa hə́ə́ní ataná, a lɛa háha.» Nɔ lɛ ákáná umə́, nɔ lɛ tibínə́níə́ umə́. 24Ɔ taká, ɛ́sɛ́á abáka ɛmɔanyama yɛ́ fámálana həmə́tu, yɛ́ bɛátɛ bikimə bɛ́ ɔmbáŋá numəkiə, nɔ́yɛ́ á hinó hɛ́ Mɔná wa mɔndɔ hɛ́ ŋɔ bámɛnɛna. 25Mba ɔ busíə́ bɔ́ ikúílí, a ná hɔ́ánána ɔ məsə́kə usinə mɔŋɛ́ŋa, bɛndɔ bá yɛ́ɛyɛ ɛhanyɛ bá ŋɔ wɛɛ́ya omboko.
26«Yatɛ́ ɔyɛ́á yɛ́ ná bɛ́tɔ́mbáká ɔ ikúílí yɛ́ Nówa, nɔ́yɛ́ yɛ́ ŋɔ bɛ́tɔ́mbáka hɔ́ánánátɔ́ ɔ tunó tɔ́ Mɔná wa mɔndɔ. 27Bɛndɔ bá ka báá bá ndɔ nɛ́á, bá nyákɛna, bá bəəndú bɛ́lɛakɛna, bá baná lónokiə ɔkafámáká ɔ hinó ɔhɛ́á Nówa a ná fínə́ ɔ isóyí yɛŋɛ́ŋa: Əlimə yɛ nɔ́yɛ́, mulumə wɔ́ ná fɛndáka, bəkimə tɔ́na bá ná wə́kúnə. 28Nɔ́yɛ́ yɛ́ ná báá tɔ́na ɛ́sɛ́á ikúílí yɛ́ Lóto, bɛndɔ bá lɛ nɛ́áka, bá lɛ nyákɛna, bá lɛ ɔ́ndɔ́kɔ, bá lɛ sɛmaka, bá lɛ falabaka. 29Mba, ɔ buɔsɛ́ ɔbɔ́á Lóto a ná fámá ɔ Sótomo, Huɛlɛ́ a ná hiwə hɛŋɛ́ŋa kuəsíə́ na məŋə́ má kɔnjɔ́kɔ́tɔ, hɛ́ ná bááyɛ́ bɛndɔ bəkimə nímə́síə́. 30Nɔ́yɛ́ yɛ́ ŋɔ báá bɔkɔa bɔ́mɔtɛ́ hɔ́ánánátɔ́ ɔ buɔsɛ́ ɔbɔ́á Mɔná wa mɔndɔ a ŋɔ fámálana.»
31«Ɔ bɔ́táyɛ́ buɔsɛ́, wɛ́ɛ́yɛ́ ɔwá a ŋɔ báá ɔ muanda ɔmbáŋá, a sa ndə́túkínə ɔ ɔwáyɛ́ bɛɛ́la ufə́miə ɔ miímə. Hɔ́ánánátɔ́, wɛ́ɛ́yɛ́ ɔwá a ŋɔ báá ɔ bɛtɔbɔtɔ́bɔ́, a sa ndáhíáná ɔ ɔwayɛ́ ɔmbɛ́la. 32Nɔ́ muəndú wa Lóto bɛ́kɔ́lɔ́mɔ́na. 33Wɛ́ɛ́yɛ́ ɔwá a ŋɔ siəkə ɔ ɔwayɛ́ buɔmɔ́ unuəniə, a ŋɔ bɔɛ́ta nyúə́kiə, wɛ́ɛ́yɛ́ tɔ́na ɔwá a ŋɔ bɔ́áyɛ́á buɔmɔ́ nyúə́kiə, a ŋɔ bɔɛ́ta nuəkəniə. 34Ɛ́ɛ! Mɛ ndɔ bənú nɔ́yɛ́ lɛna, ɔ bɔ́táyɛ́ bulúə́, bɛndɔ báfandɛ́ bá ŋɔ báá ɔ bɔaná bɔ́mɔtɛ́, bá ŋɔ ɛta ɔmɔtɛ́, bá wɛ́ɛ́yɛ́ tikə. 35Bəəndú báfandɛ́ bá ŋɔ báá iŋgində́ ɔ ɛmbásáká ɔwɔkɔ, bá ŋɔ ɛta ɔmɔtɛ́, bá wɛ́ɛ́yɛ́ tikə. [36Balɛ́mɛndɔ́ báfandɛ́ bá ŋɔ báá ɔ ɛtɔbɔtɔ́bɔ́ ɛ́mɔtɛ́, bá ŋɔ ɛta ɔmɔtɛ́, bá wɛ́ɛ́yɛ́ tikə].» 37Bɔkɔ́nɛna bá ná Yə́susu batá bá sɛ́á: «Á Isə́lúkú, hə́níə́ nɔ́yɛ́ yɛ́ ŋɔ bɛ́tɔ́mbáka əə́?» A ná bəə́bu bíhíə́níníə́ a sɛ́á: «Ɔ ɛbɔ́ka ɔyɛ́á ɛkɔɔ́lɛa yɛ́ ŋɔ bámɛnɛna, ɔmɔ́tɔ́yɛ́ biombí bɛ́ ŋɔ kɔtakana.»
Actualmente seleccionado:
Lúkasɛ 17: tvu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2019, CABTAL