GÉNESIS 3
3
Adanpish Evapish Diosta mana cazushcami
1Mandaj Taita Dios rurashca tucui animalcunamanta yalli yachajca culebrami carca. Paimi huarmitaca:
–¿Cancunataca Taita Diostajchu, cai huertapi tiyaj yuracunamantaca ama micunguichij nirca?– nishpa tapurca.
2Chaimi chai huarmica culebrataca:
–Huertapi tiyaj yuracunapi p'ucushca granocunataca micui tucunchijmi. 3Ashtahuanpish Taita Diosca: Cancuna ama huañungapajca, huerta chaupipi tiyaj yurapi p'ucushcataca amataj micunguichij, amataj tuparinguichijllapishchu nircami– nishpami cutichirca.
4Chaimi culebraca, huarmitaca:
–Cancunaca mana huañunguichijchu. 5Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan– nircami.
6Chai yurapi p'ucushca granoca micunapaj alli cashcata, paipaj ñahuipica sumaj cashcata, chai yuramanta micushpaca yachaj tucunapaj alli cashcata ricushpami chai yurapi p'ucushcata japishpa micurca. Paipaj cusamanpish carajpimi, paipish paipaj huarmi shinallataj micurca. 7Ña micujpica, ishquindijpajtaj ñahuicuna pascarijpimi, paicunaca lluchulla cashcata yacharcacuna. Chaimi higo yura p'angacunata japishpa sirashpa ñaupaj ladota taparircacuna.
8Chai q'uipami Mandaj Taita Diostaca huairajlla punllapi huertapi puricujta uyarca. Chaimi Adanpish, paipaj huarmipish Mandaj Taita Diospi ama ricuringapaj chai huertallapitaj yuracuna chaupipi miticurcacuna. 9Ashtahuanpish Mandaj Taita Diosca Adantaca:
–¿Maipitaj cangui?– nishpami cayarca.
10Chaimi paica:
–Huertapi can puricujta uyashpami, lluchulla cashcamanta manchashpa miticurcani– nirca.
11Shina nijpimi Taita Diosca:
–Can lluchulla cashcataca ¿pitaj huillarcari? ¿Ñuca ama micungui nishca yuramantachu micurcangui?– nishpa tapurca.
12Chaimi Adanca:
–Ñucaman can cushca huarmimi, huerta chaupipi tiyaj yurapi p'ucushcata cujpi micurcani– nirca.
13Chaimi Mandaj Taita Diosca Evataca:
–¿Imatataj rurashcanguichu imamí?– nijpi Evaca:
–Culebra umajpimari micurcani– nirca.
14Mandaj Taita Diosca culebrataca:
–Chai mana allita rurashcamanta canca tucui animalcunamanta yalli mana alli nishcami cangui.
Huijsallahuanmi llucashpa puringui.
Tucui causaipimi allpata micushpa causangui.
15Cunanca canhuan, huarmihuanca p'iñanacuipimi churani.
Cambaj huahua huahuacunahuanpish, huarmipaj huahua huahuacunahuanpish p'iñanacuipimi churani.
Huarmipaj huahua huahuapurami cantaca umapi sarunga.
Canca chaqui talonllapimi chugrichingui– nirca.
16Huarmitapish cashnami nirca:
–Chichu cajpipish jatun nanaihuan canatami mirachini.
Huachanatapish yallitaj nanaihuanmi huachangui.
Chashna cashpapish canca cusahuan canatatajmi munangui.
Paimi cantaca mandanga– nircami.
17C'aritapish cashnami nirca:
–Cambaj huarmi nishcata cazushcamanta, ñuca amataj micungui nishca yuramanta micushcamantaca, cunanca chai cambaj mana allimantaca allpapish mana alli nishcami saquirin.
Cambaj tucui causaipimi allpapi shaicujta trabajashpa micungui.
18Can tarpushca granocunaca casha yuracunahuan, casha q'uihuacunahuanmi huiñanga.
Chashna p'ucushcatami micungui.
19Allpaman tigrangacamaca canca jumbijta trabajashpami micungui.
Canca allpamanta japishpa rurashcami cangui.
Ñutu allpallamantataj cashcamantaca ñutu allpallatajmi tucungui– nircami.
20Adanca paipaj huarmitaca, tucui cai pachapi causajcunapaj mama cana cashcamanta Evatami shutichirca. 21Mandaj Taita Diosca Adanpajpish, paipaj huarmipajpish animalpaj caratami churanata rurashpa churachirca. 22Chaipimi Mandaj Taita Diosca: “Runaca ñucanchij shinami tucushca. Allitapish mana allitapish yachajmi tucushca. Cunanca paipaj maquita chutashpa causaita cuj yuramantapish micushpa huiñaita causaj tucuchunca mana saquinachu canchij” nirca.
23Mandaj Taita Diosca, Edén llajtapi caj huertamanta llujshichishpami, paita rurashca allpallapitaj trabajashpa causachun churarca. 24Runata llujshichishpaca querubincunatami cuidachun churarca. Nina lunyashpa tucui ladoman muyucuj shuj espadatapishmi churarca. Chaicunataca causaita cuj yuraman rina ñanta pi ama yaicuchun cuidachunmi churarca. Chai huertaca Edén llajta inti llujshin ladomanmi carca.
Actualmente seleccionado:
GÉNESIS 3: QCHI04
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Quichua Chimborazo Bible Revision 2010 © United Bible Societies, 2010.