Luka 3
3
İoan Vaatizedicinin nasaadı
1Padişah Tiveriy Kesarın onbeşinci çorbacılık yılında Pontiy Pilat kullanıcıydı İudeyada. İrod Galileyanın kullanıcısıydı. Filip, İrodun kardaşı, kullanıcıydı İtureya hem Trahonit erlerindä. Lisaniy kullanıcıydı Avilini erlerindä.
2Annan hem Kayafa baş popazdılar. O vakıt Allah lafetti İoana, Zahariyanın ooluna, angısı yaşardı çollukta.
3İoan gitti İordan suyun dolay erlerinä, nasaat ederäk, ani insan lääzım dönsün günahlarından Allaha hem vaatiz olsun, ki baaşlanmak edensin.
4Bu oldu, nicä yazılıydı prorok İsayanın kiyadında: «Baaranın sesi çol erdä işidiler: „Saabiyä yolu hazırlayın, yolcaazları uzladın.
5Herbir oyuk doldurulsun, üüseklik alçaldılsın, iiri yollar uzladılsın hem çukurlu yollar düzledilsin.
6Hepsi insan annasın Allahtan kurtulmayı“».
7İoan danıştı insannara, angıları gelärdi, vaatiz olsunnar, onnara deyip: «Yılan yavruları, kim üüretti sizi, kaçasınız Allahın gelär üfkesindän?
8Yapınız yakışıklı meyva, görünsün, ani döndünüz Allaha günahlarınızdan, da boşuna düşünmeyin, deyip: „Bizim bobamız – Avraam“, zerä söleerim sizä, ani Allah bu taşlardan var nasıl yapsın uşak Avraama.
9Artık nacak fidanın kökündä saplı durêr. Herbir fidan, ani getirmeer ii meyva, kesilecek da ateşä atılacek».
10İnsannar sorardılar: «E biz ne yapalım?»
11O cuvap etti: «Kimdä var iki ruba, paylaşsın onunnan, kimdä hiç yok, hep ölä yapsın o da, kimdä imeelik var».
12Geldi harççılar, vaatiz olsunnar deyni, da sordular: «Üüredici, biz ne yapalım?»
13O cuvap etti: «İstämeyin taa zeedä harç ondan kaarä, ne sizä sımarlanmış».
14Askerlerdän kimisi sordular: «E biz ne yapalım?» O cuvap etti: «Kimseydän bişey almayın korkutmaklan, kimseyi yalan laflarlan kabaatlandırmayın, şükür olun ödeenizä».
15İnsan, çünkü beklärdi, gelsin Hristos, hepsi düşünärdi İoan için: «Acaba, O diil mi Hristos?»
16İoan cuvap etti hepsinä: «Bän sizi suylan vaatiz ederim, ama benim ardıma geler O, Kim taa kaavi bendän. Bän diilim yakışıklı çözmää Onun ayak kaplarının tasmalarını. O sizi Ayoz Duhlan hem ateşlän vaatiz edecek.
17Onun elindä kürek, O paklayacek tınazını. Boodayı toplayacek ambara, ama plävayı yakacek süünmäz ateştä».
İoan kapanda
18Butürlü nasaat edärdi İoan İi Haberi hem verärdi çok başka nasaatlar da.
19İoan takazaladı İrod beyi o beterä, ani o aldı kendinä kendi kardaşının Filipin karısını, İrodiadayı, hem hepsi başka kötü işleri için dä.
20Bunun için İrod kapadı İoanı zındana.
İisus vaatiz olêr
21Hepsi insandan sora İisus da vaatiz oldu. O dua edärkän, açıldı gök,
22Ayoz Duh indi, görünär guguş teni gibi, Onun üstünä. Göktän işidildi bir ses, ani dedi: «Sänsin Benim sevgili Oolum, Sendä Benim isleeliim».
İisusun senselesi
23Açan İisus çeketti insanı üüretmää, O bir otuz yaşındaydı. Nicä insan sayardı, O İosifin oolu, İlinin oolu,
24Matfatın oolu, Leviyin oolu, Melhiyin oolu, Yannayın oolu, İosifin oolu,
25Mattafiyanın oolu, Amosun oolu, Naumun oolu, Esliyin oolu, Naggeyin oolu,
26Maafın oolu, Mattafiyanın oolu, Semeyin oolu, İosihin oolu, İodanın oolu,
27İoananın oolu, Risanın oolu, Zorovavelin oolu, Salafiilin oolu, Niriyin oolu,
28Melhiyin oolu, Addiyin oolu, Kosamın oolu, Elmadamın oolu, İrin oolu,
29İisusun oolu, Eliezerin oolu, İorimin oolu, Matfatın oolu, Leviyin oolu,
30Simeonun oolu, İudanın oolu, İosifin oolu, İonamın oolu, Eliakimin oolu,
31Meleanın oolu, Mennanın oolu, Mattafanın oolu, Nafanın oolu, Davidin oolu.
32İesseyin oolu, Ovidin oolu, Voozun oolu, Salanın oolu, Naassonun oolu.
33Aminadavın oolu, Adminin oolu, Arniyin oolu, Esromun oolu, Faresin oolu, İudanın oolu,
34İakovun oolu, İsaakın oolu, Avraamın oolu, Faranın oolu, Nahorun oolu,
35Seruhun oolu, Ragavın oolu, Falekin oolu, Everin oolu, Salanın oolu,
36Kainanın oolu, Arfaksadın oolu, Simin oolu, Noyun oolu, Lamehın oolu,
37Mafusalanın oolu, Enohun oolu, İaretin oolu, Maleleilin oolu, Kainanın oolu,
38Enosun oolu, Sifin oolu, Adamın oolu, Allahın oolu.
Actualmente seleccionado:
Luka 3: GagNTL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Bіblіyayı çevіrän İnstіtut, Moskva, 2006