Luka 1
1
Ne işittik diri şaatlardan
1Çoyu başladı yazmaa annatmak oluşlar için, ani geçtilär bizim aramızda,
2nicä etiştirdilär bizä baştan o insannar, ani gördülär hepsini hem angıları şindi oldular Allahın Sözünün nasaatçıları.
3Bän dä esapladım, hepsini islää aaraştırdıktan sora, hatırlı Feofil, sıravardır yazayım sana hepsini, nicä oldu,
4ki sän biläsin o işin aslısını, ani üürendin.
İoanın duuması için haber
5İudeyada, padişah İrodun vakıdında, vardı bir popaz, adı Zahariya, Aviyanın sırasından. Onun karısı Aronun kızlarındandı, adı Elisaveta.
6İkisi dä Allahın önündä dooru insannardılar. Bir lekesiz bilä tamannardılar hepsi Allahın sımarladıklarını hem sıralarını.
7Uşak onnarda yoktu, zerä Elisaveta gebä kalmardı, hem ikisi dä, Zahariya hem Elisaveta, yaşlı insannardı.
8Bir sıra, açan Zahariya izmet edärdi Allahın önündä onun izmetçilii sırasında,
9attılar çetelä popazların alışmaklarına görä, da ona düştü, günnüklesin Allahın Ayoz binası içindä.
10Günnüklemäk vakıdında çok insan dua edärdi dışarda.
11Ozaman Zahariyaya gösterildi Allahın bir angili. O durardı günnük altarın saa tarafında.
12Açan Zahariya gördü onu, ürktü. Bir büük korku bastı onu.
13Angil dedi ona: «Zahariya, korkma, zerä senin duan seslenmiş oldu. Senin karın Elisaveta duuduracek sana bir ool, angısının adını koyacan İoan.
14O sana olacek şennik hem sevinmäk. Çok insan sevinecek onun duuması için.
15O Allahın önündä olacek bir büük adam. İçmeyecek şarap hem başka sersem edän içkileri. Taa duumaktan o dolu olacek Ayoz Duhlan.
16Çoyunu İzraildän o döndürecek onnarın Saabi Allahına.
17O Allahın önündä gezecek İliyanın kuvedinnän hem duhunnan, çevirsin deyni bobaların üreklerini uşaklarına hem o kanırıklı neetlileri doorulaa. O hazırlayacek insanı Saabinin gelmesi için».
18Zahariya dedi angilä: «Nedän bän tanıyacam bunu? Zerä bän ihtärım, karım da yaşlı».
19Angil cuvap etti: «Bän, Gavriil, durêrım Allahın karşısında, yollanılmışım, ki lafedeyim seninnän da getireyim bu ii haberi sana.
20Sän lafedämeyecän hem dilsiz kalacan o günä kadar, bu olunca, zerä inanmadın benim sözlerimi, ani vakıt geldiynän, hepsi ölä olacek».
21İnsan, ani beklärdi Zahariyayı, şaşardı, neçin çok oyalanêr Ayoz bina içindä.
22Açan çıktı dışarı, lafedämärdi. Onnar annadılar, ani Ayoz bina içindä o gördü bir görünmäk. Zahariya onnara nışannan gösterärdi, zerä lafedämärdi.
23Açan izmet günneri tamannandı, Zahariya geldi evä.
24Bu günnerdä Elisaveta gebä kaldı da beş ay saklandı, zerä deyärdi:
25«Saabi bitki-bitkiyä esap aldı da yaptı, ki çıkayım insanın aazından hem kötü laflarından».
İisusun duuması için haber
26Altıncı ayda, angil Gavriil yollanmış oldu Allahtan Galileyanın bir kasabasına, adı Nazaret.
27Geldi bir kıza, angısı yavkluydu İosiflän, bir adamnan, Davidin senselesindän. Bu kızın adı Mariya.
28Angil geldi ona da dedi: «Usluluk sana, Allahtan iivergi edenän kız, Saabi seninnän. /İisözlenmişsin sän karıların arasında!/»
29Mariya bu laflardan şaştı da düşünmeyä vardı. O sorardı kendi-kendinä, ne annaması var bu selämin?
30Angil dedi: «Korkma, Mariya, sän edendin iivergi Allahtan.
31Gebä kalacan da duuduracan bir Ool, Angısının adını koyacan İisus.
32O olacek bir büük Adam. Onun adını koyaceklar „Pek üüsek Allahın Oolu“. Saabi Allah verecek Ona Onun Bobasının, Davidin, çorbacılıını.
33O divecinä padişahlık edecek İakovun evindä. Onun padişahlıının sonu olmayacek».
34Mariya sordu angilä: «Nesoy bu var nasıl olsun, açan bän bilmeerim, nedir koca?»
35Angil cuvap etti: «Ayoz Duh konacek sana. Pek üüsek Allahın gölgesi seni gölgeleyecek. O, Kim sendän duuacek, adlanacek ayoz, Allahın Oolu.
36Senin hısımın Elisaveta artık yaşlı, ama gebä kaldı. O da duuduracek bir ool. Ona hepsi deyärdi uşaksız, ama artık altı ay, nicä gebä kaldı.
37Allahın bir dä sözü yok nasıl kuvetsiz kalsın».
38Ozaman Mariya dedi: «Saabi, bän senin çıraan, olsun Senin sözünä görä!» Da angil gitti ondan.
Mariya geler Elisavetaya
39Mariya birazdana kalktı da alatlan gitti bayırlardakı kasabaya, ani İudanın erlerindeydi.
40Girdi Zahariyanın evinä da selämnedi Elisavetayı.
41Açan Elisaveta işitti Mariyanın kutlamasını, onda birdän tepindi uşak. Elisaveta doldu Ayoz Duhlan.
42Elisaveta baardı büük seslän: «İisözlenmişsin sän karıların arasında hem iisözlenmiş senin Uşaan, angısını sän taşıyêrsın!
43Nasıl bän kazandım bölä ikram, ki bana gelsin benim Saabinin anası?
44Nicä işittim senin sesini kutlamakta, tepindi uşak sevinmektän içimdä.
45Ne mutluysun sän, ani inandın Saabinin sözünü, zerä Saabi ne adêêr, onu tamannêêr».
46Mariya dedi: «Bän bütün ürektän metinneerim Saabiyi.
47Sevinir duhum Allahta, benim Kurtarıcımda.
48Zerä Allah esap aldı Onun çıraan aşaadan halını. Büündän ötää hepsi senselelär mutlulayaceklar beni.
49Çünkü Çokkudretli yaptı büük işlär benim için, Onun adı ayozdur.
50Onun acıyannıı kaplêêr boydan-boya Ondan korkan insanı.
51O gösterdi kuvedini Kendi elinnän da bozdu hodulların düşünmeklerini.
52Devirdi o kaavileri çorbacılık skemnelerindän da kaldırdı aşaa haldan insanı.
53Aaç olannarı O doyurdu iiliklän, ama zengin olannarı salverdi, gitsinnär boş ellän.
54O Kendi izmetkerinä, İzrailä, yardıma geldi. O bir sıra bilä unutmêêr acımaa,
55nicä adadı bizim dedelerimizä, Avraama hem onun senselesinä divecinä».
56Mariya kaldı Elisavetaylan üç ayın dolayında, sora döndü geeri evä.
İoan Vaatizedicinin duuması
57Açan geldi vakıdı duudursun, Elisaveta duudurdu bir ool.
58Komuşular hem hısımnar işittilär, ani Saabi büük hayır baaşladı Elisavetaya, onuştan hepsi onunnan bilä sevindilär.
59Sekizinci günü geldilär uşaa kesiklik yapmaa. İstedilär adını koymaa Zahariya, nicä bobasının adı.
60Ama anası onnara dedi: «Olmaz, onun adı İoan olacek».
61«Kimseydä sizin hısımnardan yok butürlü ad», – cuvap etti onnar.
62Yaptılar nışan ellerinnän bobasına, ki annasınnar, nesoy uşaan adını koysunnar.
63Zahariya istedi bir parça taftacık da yazdı bölä: «Onun adı İoan olacek». Hepsi şaştılar.
64Hemen çözüldü onun dili, da başladı lafetmää hem Allahı metinnemää.
65O bayırlı İudeyanın erlerindä hepsi komuşuları bir korku bastı. Dolayda hepsi insan bunun için lafedärdi.
66Hepsi, kim dä işidärdi bunu, düşünmää varıp, deyärdi: «Acaba, bu uşak kim olacek?» Hakına, ani Allahın eli onun üstündeydi.
Zahariyanın prorokluu
67Uşaan bobası, Zahariya, doldu Ayoz Duhlan da prorokluk etti:
68«İisözlenmiş olsun İzrailin Saabi Allahı, Angısı geldi yardıma Kendi insanına da kurtardı onnarı.
69Kaldırdı bizä bir kaavi Kurtarıcı Kendi izmetkerin, Davidin, evindän,
70nicä haberlediydi evel vakıttan ayoz proroklarınnan.
71Adadı, ani kurtaracek bizi duşmannardan hem kincilerin ellerindän.
72Butakım, Allah gösterer Kendi acıyannıını bizim bobalarımız için, unutmêêr ayoz baalantısını
73hem eminnän adamasını, ani verdi bizim bobamıza Avraama.
74O adadı, ani bizi kurtaracek duşmannardan da yapacek, ki izmet edelim Ona korkusuz,
75kabaatsızlıkta hem ayozlukta bütün bizim yaşamamızda.
76Ama sän, evlat, adlanacan Pek üüsek Allahtan prorok, zerä gidecän Saabinin önü sora, ki Onun için yol hazırlayasın.
77Sän insana haberleyecän kurtulmak hem günahlardan baaşlamak.
78Allahımız, dolu sevgiylän hem acıyannıklan, yukardan yollayacek bizä kurtulmak, benzär dan erinin şafkına,
79ki aydınnatsın onnara, kim bulunêr karannıkta hem ölüm gölgesindä, doorutsun bizi usluluk yoluna».
80Uşak büüyärdi, kaavilenärdi duhlan. Yaşadı çol erlerindä o günä kadar, açan çıktı İzrail halkının karşısına.
Actualmente seleccionado:
Luka 1: GagNTL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Bіblіyayı çevіrän İnstіtut, Moskva, 2006