Matius 7
7
Hiwa Yo Naei Bekore Hului Okoloijae
(Luk. 6:37-38, 41-42)
1“Weyae hiwa yo naei bekore hului okoloijae, waei bekore hului ranayeisite bele. 2Rabuhine ban, hiwa yo naei bekore hului kolamae, nebei wanen mbai waei bekore hului ranayeisite. Hiwa yo naei rambunde hului kolamae wanen nebei sului mbai ware mokonayete. 3Rahe londe waka baekele wali na beko reufire mo a eleyae nebeibe waei wali naeise weyae ereiboi! Nda hului mbai waka baeke na ijokona kerende mo ereyae, waei ijoko einya o male aheukokere weyae isian nekeyae! 4Naendae wanen lon mae waka baekere wanae, ‘Mei, wa ijokona keren don reyae roufe,’ nebeibe waei ijokona o male bae na hibi mo honoimeyele? 5Weyae u bee-beere koyae kiyae! Na bemere waei ijokore aheukokete o malebe weinye. Wa ijoko yoloneukonde mo, nebeisa waka baekele ijokona keren weyae rowele.
Allah Naei Rambun Wahei-Waheise Isaei Hebaen
6“Allah Naei ako faeuko rambun foi sele moi sele nau buna mutiara wanen mae yeuboke. Nebei ako faeuko obo yoku u mekai wanen ro miyaere ehuweijae. Obo mutiara ranne nendon oro aleikoyate wanen mae nebei yo yae Allah naei ako faeukore a beko elenate. Yoku benaibonde ware akenayeikote waei uwa fo bee-bee raungayeikote wanen mae neyae ware a yae horonayete.
Allahre Rambun Riyennehimbe Na Mekai
(Luk. 11:9-13)
7“Mai kenare kaube rambun inyengkomberena, na hibi mo riyennele. Mayae ereibo rambunde hubayengkomberena, na hibi mo baembe. Me kaba-kaba bonnelena, romau mare raungembombe. 8Rabuhine ban nde yae riyende kiyaere yennele. Nde yae baende kiyae, hubainyekonde. Nde yae me kaba-kaba bonde kiyae, romau raungembonde.
9“Ako nde mai nolona nekele na kelu feufe riyewoungebe ruka yae ikeunge, 10nane merau kare riyewoungebe rami yae ikeunge? 11Mayae beko bele neban bele yo maisaei nekaube ma kelu omi riyayembere foi bele moi bele rambun yeyaumi. Na kaban sele mai Arai surgane nekele Kiyae foi bele moi bele rambun Nare riyeyainye yore yeyeumi.
12“Me naei u naeise mai kenare kaube huluinye ro miyae mokonayemberena, nebei sului mbai hiwa yore mokommile. Musale walora wali heere foloukoke homo bele, Allahle yenjo kayaayo naei homo bele, nebei a na no niyae.
Wali Kayaa Hebemale Naei A Usaei
(Luk. 13:24)
13“Raei a elalere hakoyate romau melaera enayembonde nibi kikira orate wanen. Wali nibi hi kiyae kaeu mau molaimiboke na romau kaban. Romau kikira eweufinde. Rabuhine ban, romau kaban bele nibi kaeu mau bele bekore eke nibi, ro miyae helen sele nebei nibira hakaikoke ate. 14Nebeibe romau melae bele nibi kiki bele nebei wali henare ate nibi niyae. Ro miyae na hangka hele nebei nibi aisubayekoke.
O Ha Na Ani
(Luk. 6:43-44)
15“Ame-amere yanate yenjo kayaayore kayaa hebembe. Mai bokore domba wanen kena nime haba menatebe, serigala wanen hangkei sele. 16Na u mekai wa mekai kelenatera mayae nebei yore rommibombe. Ro yae miyae yae isa bele nora anggur ani ohokoiboi. Nane wanen fonom bele kaiwa bele nora ara ani ohokoiboi sului. 17O rimi-rimina ani foi mokonde. O beko na ani beko mokonde. 18Na hului ban sele o rimi-rimi kiyae ani bekore omokoi sului, nane merau o beko kiyae ani foise omokoi sului. 19O ha ani foise omokoi yo, kahenate i tanne hainyate. 20Nebei sului mbai ame-ame yae yanate yenjo kayaayo na u mekai wa mekai kelaetera mo mayae rommibombe.
Allah Naei Holona Ro Miyae Hele
(Luk. 13:25-27)
21“Ro miyae nde yae Tuhan mae kaenensele aerene mo raei me kelee u keleene nekate yo holone eyeisi. Naeinya hesele nde yae Maeko surgane nekele Kiyae kenare kole huluinye mokonde kiyae na hului enensinde. 22Huba mokoikoi ya mendene, ro miyae helen sele Rare ungaisele, ‘Tuhan, meyae ro miyaere Waei ro yae kelewammile, buloo walobore Waei ro yae hukewammile, nane merau rambun emere-emere Waei ro yae mokowandebe ya!’ 23Nebei hee Reyae na yaka yae ufemile, ‘Reyae mare onaemale. Mayae bekore nebande mokoyaube yo, Raei bokora felande yae eme!’
Imae Haete Ro Bee
(Luk. 6:47-49)
24“Nebei aerene ro miyae nde yae Raeinya a faeu elalere borole na hibi me yae u yae mokoimeyele kiyae, nebei kiyae isaei hebaen bele ma yae uwa haraungeboke kiyae na imae ruka ranne heuboke wanen mae ahunebokale. 25Ya woke molowole, bumae meke nane merau alu boye elaekei sele raweuboke. Nebei imae nekeunge nebeibe ebuleisai, rabuhine ban nebei imae ruka ranne heubokene. 26Ro miyae nde yae raei a elalere borolere me ban u banna, nebei kiyae onei handai ro na imae ifau ranne heuboke wanen mae ahunebokale. 27Ya woke molowole, bumae meke, alu boye elaekei sele rawewole, nebei imae nekeunge buleufake, na beko hele yeuboke.
Yesus Elae Bele Kelewoumi
28“Yesus nebei a usaei yoni-yoni weumikoke baeufoke heera, nebei ro helen miyae helen borowate yo Na isaei hebaen ma kelewoumilere fa yae bowate. 29Rabuhine ban Na mekai kelewoumilere hului kolowainye Allah one hengko bele kiteungeboke wanen keleumi, Musale walora wali heere foloukoke are isaeyaeikoke yo yae kelaeimi wanen ban.”
Actualmente seleccionado:
Matius 7: setDBL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2020, Wycliffe Bible Translators, Inc. All rights reserved.