Matius 2
2
Naufa Mekate Kolo Yo
1Yesus Betlehem yone hongkate hee Herodes Ondofolore Yudea kanine nekewole. Nebei hee findelau mehinin mewalore isaei hebaen bele yo naufa Yerusalem yore mewate 2hinaimimeke, “Makeinye Yahudi naei Ondofolo manemfana hongkate? Maere kelemebo! Na findelau naufe reufine meuyakauboke eranneboke. Mana meyae nebei kiyaere eise molomandere baeimeyannele.”
3Ondofolo Herodes nane merau Yerusalemna ro miyae nebei a nanemene borowate hee na kena u isasa alalo kowate. 4Ondofolo Herodes ukeumile Yahudi naei imam yun-jun bele, Musale walora wali heere foloukoke are isaeyaeiboke kelaeimi yo bele nanemene arileumihike mo hineumi, “Allah yae oro umaufe heraweungeboke Wali Ondofolo makeinye hononatere?”
5Nebei yo wainye, “Betlehem yone Yudea kanine. Nebeinye hononate yae Allah yae Na yendo kayaalo walora Betlehem naeise nda a moloukoke,
6‘Mayae Betlehem yona ro miyae
Yahuda kani honolene nekaube.
Wa yo yan na hele melae,
nebeibe Yahuda kanina Ondofolo holo erayete weyae melae ban.
Rabuhine ban, wa yo ei yan eisa Ondofolo mbai menjakambonde,
Raei ro miyae Israelre Neyae mende,
obo yoku domba kayaalo nebei domba naei be yun be yebae hebate wanen mae,
nebei ro miyae naei be yun be yebaere mensebende.’ ”#2:6 Mikha 5:2
7Nebei findelau mehinin mewalore isaei hebaen bele naufa mekate yore Ondofolo Herodes maleu-maleu wae arileumihike wa, nebei findelau meujakauboke hee hinewoumine isaeyaeinyeboke. 8Nebeisa Ondofolo Herodes naufa mekate yore Betlehem yore enatere ukeumi mo a heraweumi, “Embe, nebei fa hongkate anuwau foi yae hinengkombe. Hubayengkombena bembombe mensewembe, rangkele yae erele, nebei fare be erensinende ei eremolonde.”
9Ondofolo Herodeslena a boraiboke heera, oro molaiboke Betlehem yore ewate. Nibi nolone ewate yae findelau nau reufine erekainyele kiyae bere holo yae nebei fa nekewole anuwau ranne yauboke. 10Nebei isaei bele hebaen bele yo benen findelaufe erekainyelene, rei mai sele kowate. 11Nebei imaene ayeuboke nebei Fa melae nenake Mariale nekewote hubayaeikoke, uwa are nihaeinyehike ei molowainye. Na run kangke wewe molaimiboke, na hili era akau era foi sele yarowate, nebei Fare kolowainye. Nebei rambun nda niyae: mas, kemenyan, mur. 12Ondofolo Herodesle bokore ebeiboi ei naeise Allah ime walora a hun raumihike. Nebeinye nda yo na yore yande nibi hira baeiboke ewate.
Mesir Kanire Hakaikoke Ekate
13Naufa mekate yo kulun ukate ewate hee yae, Allahle malaikat benen Yusufre imene uwa yakaungeboke weunge, “Ondofolo Herodes nebei fa baennekonde hombondere merau raungehike. Nebeinye anyu, Fa melae nenakele bele yaweimibo hakangkombe Mesir kanire embe. Nebei kanine mo nekembe, benen bembombe naeise ware a ufete.”
14Yusuf aunguke, Fa melae nenakele bele yaweumiboke, nebei reniai mo kulun ukate Mesir kanire ewate. 15Mesir kanine mo nekewate Herodes hereke hee yae bukaiboke Israel kanire mewate. Nda rambun bewate walora Allah yae Na yendo kayaalo Hoseale walora homone moloukoke huluinye yeuboke. Nebei a nda mekai moloukoke, “Mesir kanira Raei Kelu kaenerengkonde.”#2:15 Hosea 11:1
Herodes Ukeumi Fa-Fare Howate
16Ondofolo Herodes isaeyeuboke naufa mekate isaei bele hebaen bele yo nare ame-amebe baeinyekokene ikele hele kowole. Nebeinye felayore ukeumi, “Betlehem yore embe, naufa mekate yo rainyehike ralo yakama hului beera onde ane kelu fa-fa nemene hongkombe.” 17Nda rambun bewate walora Allahle yendo kayaalo Yeremia yae Israel kani naeise homone moloukoke huluinye yeuboke. Nebei a nda mekai moloukoke,
18“Rime kali ayan buyan bole, Rama yora borande.
Yahudi naei yobe Israel na miyae Rahel naei orona mena na fa-fa aerene rimele.
Kena foi mokainye an,
rabuhine ban na fa-fa nundate aerene.”#2:18 Yeremia 31:15
Mesir Kanira Nazaret Yore Bukaiboke
19Mesir kanine nekewate Ondofolo Herodes hereke mo, Allahle malaikat benen Yusufre imene uwa yakaungeboke weunge, 20“Anyu, Fa melae nenakele bele yaweimibo, kulun wembe Israel kanire eme! Rabuhine ban nebei Fare baewainyele honaibondere merau kolowainye yo ninae heraiboke.”
21Yusuf aunguke, Fa melae nenake bele yaweumiboke, kulun ukate Israel kanire ewate. 22Yudea kanine Arkelaus naeko Herodesle a bulure Ondofolore ranaijeke a boroubokene Yusuf buhae hokoungeboke nebei kanire ei. Imene Allah yae keleungeboke huluinye, Yusuf naei Galilea kanire ekate. 23Nebei kanire ekate, yo mbai na ro Nazaret, nebei yone ekainyekewate. Allahle yendo kayaalo Yeremia yae Yesusle are moloukoke na hului yeuboke. Nebei a nda mekai moloukoke, “Nare Nazaret yona ro yae enainyeronde.”#2:23 Yeremia 31:15
Actualmente seleccionado:
Matius 2: setDBL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2020, Wycliffe Bible Translators, Inc. All rights reserved.