PIANPATNAK 7
7
Tuihautung
1Noah lakah Topa in, “Na innkua hawng uhin timbaw sungah tum un; leihummi hempoh lak pen nangmah pa khat bek hi thumanmi hi ci. 2Ngamsa thiang eihpha namkimin, nam khatah kop salih ten hunpihin; mahnaven a thiangtho ngawlmi ngamsa cu nam khatah a nu le pa kop khat ten bek la in hi. 3Vano vang a namkimin, nam khatah kop salih tenin la in hi. Hi cu leihumah cihah lehtu hi haw tuk hi. 4Ni salih nungten leihumah sun sawm li le zan sawm li sung nguahzutik tung a, ka bawlsa a nungmi hempoh siatsuah khawng tung,” tin ti hi. 5Topa i thupiakmi bangkekin Noah in bawl khawng hi.
6Tuihautung a pat ten Noah cu kum za luk hi. 7Noah cu a zi, a capate le a zi haw tuah tuihau tungnak pen himdam tukin timbaw sungah tum haw hi.#Mt 24:38-39; Lk 17:27; 8Ngamsa le vano a thiang hihen, a thiang ngawl hihen a namkimin, a nu le pa, pa khat ten, 9Pathian i thupiaknak bangin Noah tuah timbaw sungah tum haw hi. 10Ni salih nungten leihumah tuihau tung hi.
11Noah cu kum za luk a kim nung, ha nihnak ni sawm le salih ni-in, leinuai a, tuipi cu mun hempoh pen put cengcung haw a, van tukvelh hempoh hongin, nguah cu a leihin, leihsuk hi.#2Pet 3:6; 12Leihumah sun sawm li le zan sawm li sung cawl ngawlin nguahzu hi. 13Mah ni-in, Noah le a zi, a capa pa thum Shem, Ham, Jafet le a zi haw cu timbaw sungah tum haw hi. 14Amuhte tuah langkhatin inn ngulh nganhing hihen, ngamsa hihen, a vak thei mi hempoh le vano namkim khum tum haw hi. 15Nganhing a namkim, a nu le pa tenin, Noah tuah timbaw sungah Pathian i thupiakmi bangin tum haw hi. 16Noah a tum ceng ten Topa in kong cu khak hi.
17Ni sawm li sung tuihau a tun nungten tui cu tam dedeuhin, a timbaw haw cu tui in langtotik hi. 18Tui cu thuk dedeuhin, tui humah timbaw cu langto hi. 19Tui cu thuk dedeuhin, mual a sangbel vang khuh khawng hi. 20Mah hum pen tui cu muallek humah pi sawm nih le pi nga tingto hi. 21Leihumah a nungmi hempoh mihing hihen, ngamsa le vano hihen, nganhing lungsivai tianin thi khawng haw hi. 22Leihumah nunnak nei hempoh thi khawng haw hi. 23Leihumah a vak thei mi hempoh, mihing, ngamsa le vano a neubel tianin, Topa in thitik khawng hi. Siatsuah ngawlmi cu Noah le amah tuah timbaw sungah a ummi bek hi haw hi. 24Tui cu leihumah ni za le sawm nga sung kiam ngawlin um hi.
Actualmente seleccionado:
PIANPATNAK 7: NBF1
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ngawm Bible © Bible Society of Myanmar, 2014.