Rkaa̱ 21
21
Bi̱ tsꞌén akóyá Kjisoo̱ kjo̱a̱a̱ to̱nchji̱e̱e̱
(Markoo̱ 12:41-44)
1Kjisoo̱ askotsijee̱n xota̱ cho̱n xi indyiá to̱nchji̱e̱e̱ ngi̱ya koxa̱ to̱nchji̱e̱e̱. 2Kó ti̱ kamábe ngo xota̱chjo̱on kꞌán xi je kꞌien xi̱ꞌii̱n xi indyiá ngi̱ya koxa̱ to̱nchji̱e̱e̱ jó ndí to̱n xi chiboa chjií. 3Kó Kjisoo̱, bi̱ katsoó xota̱ tsi̱ꞌe̱:
–Ja̱koxi̱ ni xi xiánjnúꞌun nga kui xota̱chjo̱on kꞌaán, tsie ngase katsjá ta̱bo̱a̱jiín ngayeje xota̱ xi ngasee̱. 4Ngatꞌa̱ ngayeje xota̱ xi ngasee̱, to̱n xi ꞌbongii̱ xí indyiá, ta̱nga kui xota̱chjo̱on, indyiá ngayeje to̱n xi skji̱ni̱e̱ ko̱jo xi kꞌuiní nga kꞌuijñá nga̱sondie.
Bi̱ tsꞌén katsóyà Kjisoo̱ kjo̱a̱a̱ nga ku̱i̱xo̱ndò na̱ngo̱xi̱i̱
(Matioo̱ 24:1-2; Markoo̱ 13:1-2)
5Kó tjín xotaa̱ xi tsíchji̱a̱ kjo̱a̱a̱ na̱ngo̱xi̱i̱, nga achichí ndi̱jo̱ tsjakon tjiín ko̱jo nga chji̱e̱ xi katsjá xotaa̱ xi kiniꞌánchonnii̱, ta̱nga Kjisoo̱ bi̱ katsó:
6–Kjo̱a̱a̱ ngayeje ni xi ndyi̱yajnú kꞌi̱e̱e̱, kjo̱chó ni̱xtjin nga ku̱i̱xo̱ndò ngayejee̱, kó ngaskande nde ngo ndi̱jo̱ kꞌuíndojín xi sꞌi̱ńdosoón xkjín.
Bi̱ tsꞌén katsóyà Kjisoo̱ kjo̱a̱a̱ chi̱bo̱a̱ xi sꞌi̱jña ngindiee̱ nga kju̱i̱e̱ nga̱sondiee̱
(Matioo̱ 24:3-28; Markoo̱ 13:3-23)
7Kó bi̱ kiꞌmií Kjisoo̱:
–Mostro̱, kjiꞌání nga ka̱ma kui nii̱. Kó mí chi̱bo̱a̱ xi sꞌi̱jña ngije ma ka̱ma kui nii̱.
8Kósꞌe̱ Kjisoo̱, bi̱ katsó:
–Tsitsíjenjnúu̱ nga jmíjín xi kꞌo̱ṉcha̱jojnú, ngatꞌa̱ achichí má xota̱ xi kjo̱e̱ꞌe ngajona xi bi̱ ka̱tso̱: “Án boá xi Kristoo̱”, ko̱jo bi̱ ka̱tso̱: “Jè kjimatiña ni̱xtjii̱n”, ta̱nga nga kuijín xi mongíntjíngíjnú. 9Kó kjiꞌanga ko̱nda̱ꞌyájnú nga je kjima kjo̱a̱xchán, ngije tjíbixkán, ngata̱ ndakonjínmájnú, ngatꞌa̱ chjiéngá tjón kui nii̱ ka̱ma, ta̱nga jmí tsi tsá kju̱i̱e̱ nga̱sondiee̱.
10Kósꞌe̱ bi̱ katsó ngase:
–Na̱xi̱ńdaá skjánjo̱ xkjín, ko̱jo já ree̱ skjánjo̱ xkjín, 11kó kꞌuié kjo̱a̱ndi̱ko̱n xí ꞌniú, kjín to̱ko̱ya ngi̱ndie kꞌuié kjindiá ko̱jo chiꞌin, achichí ni xi ko̱nda̱kón kꞌuié, kó a xi̱xi̱ yiꞌi chi̱bo̱a̱ xi kꞌuié ndiꞌakꞌajmii̱.
12Ta̱nga ngindiee̱ nga bo̱a̱ ka̱ma, tjón mára ku̱i̱yotjíngíjnú ko̱jo ko̱ndo̱bo̱a̱jnú, kó si̱ꞌankꞌasꞌienjnú ngi̱ya tsja ngito̱ko̱o̱ ndiꞌa nínga ndokjo̱a̱ eén Néná, ko̱jo ko̱na̱ngísꞌiénjnú ndo̱bo̱a̱yà, kó kongínjo̱jnú ngindyi̱ko̱n re ko̱jo xtitjón ta̱ngatꞌanii̱ jaꞌénna. 13Kó kui nii̱ xi ka̱ma si̱ꞌankjiénjnú nga ko̱ndókjo̱a̱jnú kjo̱a̱a̱ an. 14Tꞌíjñájnúu̱ ini̱ma̱jnú nga si̱ꞌankjójínjnú kjo̱a̱a̱ mí ni xi kꞌuínjnú nga ko̱ꞌna̱xiéꞌájnú yojojnú, 15ngatꞌa̱ ti̱ ánní xi tsja an én ko̱jo kjo̱a̱kjínkón, kó kui eén nde ngojín kondra̱jnú xi sa̱ꞌiín. 16Ngaskande xi xchájnú, ko̱jo ntsꞌiejnú, ko̱jo xingi̱jnú, ko̱jo amingo̱jnú sa̱ꞌínkꞌasꞌienjnú, kó tjín jún xi si̱ꞌankꞌiénjnú, 17kó ngayeje xotaa̱ sa̱ꞌínchꞌójnú ta̱ngatꞌanii̱ jaꞌénna. 18Ta̱nga nde ngojín tsja̱tokójnú xi xcha̱ja. 19ꞌNiú ti̱ndyiàjnú tsi̱ꞌe̱ nga kjo̱tjoꞌajnú.
20Ta̱nga kjiꞌanga xcha̱jnú nga na̱xi̱ńdáꞌniú Jerusale̱n je jaꞌatjiyajoo̱n jájún, ja̱ jè yàjnú nga je jachó ni̱xtjin nga je si̱ꞌankjie. 21Kósꞌe̱ kjiꞌá boá nga kui xota̱ xi síndo Jundea̱ ngatanga ngi̱jin kꞌijñá jàn, kó xi síndo ngi̱ya na̱xi̱ńdaá, ngatjatjo, kó xi ngi̱jin kꞌijñá jàn síndo, ngata̱ ꞌbosꞌienjín na̱xi̱ńdaá. 22Ngatꞌa̱ ni̱xtjin nga ka̱mangojo boá kui ni̱xtjii̱n, tsi̱ꞌe̱ nga kjo̱tjosón ngayeje ni xi je kjitꞌa xo̱jo̱o̱n. 23¡Ni̱ma̱ xò ndí ínchjín xí ndí ndyi̱yaꞌa, ko̱jo xi ndí ndyi̱tsꞌènxchá kuí ni̱xtjin xi̱ꞌba̱! Ngatꞌa̱ achichí kjo̱a̱ni̱ma̱ kꞌuié kuí tꞌanangii̱, kó kjo̱a̱xcha̱án Néná kꞌo̱kanieé kui xota̱ na̱xi̱ńdaá. 24Kó tjín xí ki̱cha̱ si̱ꞌankꞌienni, kó tjín xí kongínjo̱ꞌniú ngayeje na̱xi̱ńdá, kó xota̱ xi jundío̱jiín tsja̱nié tsja̱fe na̱xi̱ńdáꞌniú Jerusale̱n, ngaskande nga kjo̱tjosón ni̱xtjii̱n kui xotaa̱.
Bi̱ ka̱ma ni̱xtjin nga kjo̱e̱ꞌe nginí ndií nda̱ xi̱ꞌii̱n
(Matioo̱ 24:29-35,42-44; Markoo̱ 13:24-37)
25Kósꞌe̱ tjín chi̱bo̱a̱ xi kꞌuieé tsꞌueé, ko̱jo saá, ko̱jo ńñoo, kó kꞌi̱e̱ tꞌanangii̱ boa ka̱maa̱ ngayeje xotaa̱, ta̱ bi̱ ta̱ ka̱maa̱ nga kjo̱ni̱e̱ ko̱jo nga xcha̱ ngaꞌniuú ndáchíkoón, 26xotaa̱ ngaskande ko̱yayà má nga stsa̱kjonní kjo̱a̱a̱ ni chꞌo xi ka̱ma nga̱sondiee̱, ngatꞌa̱ kjo̱tsiè yeje ngaꞌniú xí tjín ndiꞌakꞌajmi jàn. 27Kósꞌe̱ kjiꞌá boá nga xcha̱ ndií nda̱ xi̱ꞌii̱n, nga ngo ṉdi̱ kji̱ndi̱bájinni, kó achichí ngaꞌniú kꞌuieé, ko̱jo tsie kjo̱a̱jee̱ kjindibájo̱. 28Kjiꞌanga ku̱i̱ꞌítsꞌi̱yani nga ka̱ma ngayeje kui nii̱, ti̱ndyiondajnú, kó chjanínkꞌájnú kje̱njnú, ngatꞌa̱ kjo̱a̱ꞌnaxiéꞌájnú je tikón tiña.
29Kjisoo̱ ti̱ katsóyaà ingo énkjín xi bi̱ tsó:
–Tsitsíjenjnúu̱ yá xí boajaá toꞌingoo̱, ko̱jo yá xí ngasee̱, 30kjiꞌanga ya nga fotjoo̱ xka̱, ti̱ júnní xi je yàjnú nga je tikón tiña cho̱ndoboaá. 31Ti̱ bo̱a̱ ti̱ tsꞌén jún, ngije xcha̱jnú nga kjima kui nii̱, ja̱ jè yàjnú nga ni̱xtjin nga ko̱tíxoma Néná je tikón tiña.
32Ja̱koxi̱ ni xi xiánjnúꞌun jún nga kji̱e̱ ko̱yàjín xota̱ xi síndo ngotꞌe̱ tsi tjónjín kjo̱tjosón kui nii̱. 33Ndiꞌakꞌajmii̱ ko̱jo tꞌanangii̱ kjo̱a̱ꞌa, ta̱nga énna kjo̱a̱ꞌatiyàjín.
34Chónjnúu̱ yojojnú, kó ngata̱ ꞌbíjinjínjnú ini̱ma̱jnú, kjo̱a̱xki̱ꞌaá, ko̱jo kjo̱a̱chꞌi̱i̱, ko̱jo ni nga̱sondiee̱, ngatꞌa̱ tsi ta̱ bi̱ má tji̱e̱n kjo̱chó kui ni̱xtjii̱n, 35ngatꞌa̱ bo̱a̱ ka̱ma xikó maá ngo chja̱ya̱ xi kꞌuijñaá ngayeje xota̱ xi síndo tꞌanangii̱. 36Ti̱ndyionda síkijíjnú, kó ndókjo̱a̱jnúu̱ Néná, tsi̱ꞌe̱ nga kjo̱tjoꞌajnú yojojnú kjo̱a̱a̱ ngayeje ni xi sꞌe̱ ka̱maa̱, ko̱jo tsi̱ꞌe̱ nga ki̱a̱ kjóchójnú ngindyi̱ko̱n ndií nda̱ xi̱ꞌii̱n.
37Xki̱ nga ni̱xtjii̱n akóyá Kjisoo̱ ndi̱tsen na̱ngo̱xi̱i̱, kó nga jñoó kijí nínga tikón tji̱ngi̱ nínga tjín yáꞌoliboo̱. 38Kó ngayeje xota̱ na̱xi̱ńdaá, xki̱ nga ta̱jño̱ó jachó ndi̱tsen na̱ngo̱xi̱i̱ nga kijíntꞌieé ni xi tsíchji̱a̱ Kjisoo̱.
Actualmente seleccionado:
Rkaa̱ 21: MAIX
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014