Malɨka 8
8
ɄYesu ilɨsia avaanhu imbilima ine
(Mataayi 15:32-39)
1Ɨkɨghono ɨkɨngɨ, ɨlɨpʉgha lya vaanhu lɨkakongʼhaana kange. Avaanhu avuo ye vikalile nʉ Yesu ifighono fitatu, vakava vasila kyakʉlia. Pepano ʉYesu akavakemeela avavʉlanɨsɨvua vaake akati, 2“Nɨkʉvavonela ɨkɨsa avaanhu ava, ʉlwakʉva vikalile nuune ifighono fitatu, lɨno vasila kyakʉlia. 3Nɨngavatavʉle kuuti vavujaghe kɨsila kʉlia, kyavitenga mʉ sɨla, kange vamonga vihʉma kʉtali.”
4Avavʉlanɨsɨvua vaake vakati, “Ghihʉma kʉʉghi amakate pa lʉnyika apa pavʉsila kɨmonga, neke vakwɨle avaanhu vooni ava!” 5ɄYesu akavaposia akati, “Mʉlɨ na makate ghalɨngi?” Vakamwamʉla vakati, “Ghalɨ lekelalʉbale.”
6Pepano ʉYesu akavavʉʉla avaanhu kuuti vikale paasi. Akatoola amakate ghala lekelalʉbale, akahongesia kwa Ngʉlʉve. Akamenyʉlania, pe akava ɨkʉvapeela avavʉlanɨsɨvua vaake, neke voope vakava vikʉvaghavɨla avaanhu vooni. 7Kange, vaale nʉ tʉsamaki tʉdebe. ɄYesu akatʉfuunya, akavavʉʉla avavʉlanɨsɨvua vaake kuuti, twope vavaghavɨle avaanhu.
8Avaanhu vakalia, vakikuta. Avavʉlanɨsɨvua vakakongʼhania ifisighasi, fikamema indɨɨlo lekelalʉbale. 9Avaanhu vano valyaliile valyale imbilima ine ndɨɨkɨ. ɄYesu akavahwesia, 10akavʉʉka, akapanda ɨngalava#8:10 Ɨngalava: Ɨmba ɨlɨsio Ngalava kʉ Vʉghanʉle vwa Masio aMahesia. palɨkɨmo na vavʉlanɨsɨvua vaake, akalʉta imbale isa kʉ Dalumanuta.
AVafalisayi vilonda ʉYesu ahʉfie ɨkɨvalɨlo
(Mataayi 12:38-42; 16:1-4)
11Ye vafikile ʉkuo, aVafalisayi vakamʉlʉtɨla ʉYesu, vakatengʉla kʉkʉmposia kʉkʉmʉghela kuuti, avahʉfie ɨkɨvalɨlo kɨno kivonia kuuti asungʼhilue nʉ Ngʉlʉve. 12ɄYesu akasukunala, pe akajova akati, “Kɨki avaanhu va kɨsina ɨkɨ vilonda ɨkɨvalɨlo? Kyangʼhaani nɨkʉvavʉʉla, nakɨlapelua ɨkɨvalɨlo.” 13Akavaleka, akapanda kange ɨngalava, akatengʉla kulovoka mʉ lɨsʉmbe ilʉta ɨmwambo ɨjɨngɨ.
Ɨkɨlʉle ɨkya Vafalisayi nɨ kya ntwa ʉHelode
(Mataayi 16:5-12)
14Ye vilovoka, avavʉlanɨsɨvua vaake vakasyemua kutoola amakate, looli mweghʉlyale ʉnkate ghʉmo mʉ ngalava. 15ɄYesu akavapavɨla akati, “Nɨkʉvavʉʉla kuuti, mughelaghe nɨ kɨlʉle#8:15 Kɨlʉle: Kɨɨnu kya kʉpandɨkɨsia amakate. Mʉ lʉkɨndɨ ʉlʉ, ɨlɨsio ɨlio kwekʉti imbombo imbiivi isa Vafalisayi ni sa Helode. ɨkya Vafalisayi nɨ kya ntwa ʉHelode.” 16Avavʉlanɨsɨvua vaake vakatengʉla piposania veene viiti, “ɄYesu ijova enendɨɨkɨ, ʉlwakʉva tʉlɨ vasila makate.”
17ɄYesu akasikagʉla sino vakava vijova, akati, “Kɨki mukanɨngʼhana jʉmue mwiti mʉlɨ vasila makate? Mʉjiighe namʉkʉlʉtangʼhania! Kɨki namʉlɨ vangʉfi kukwɨtɨka mʉ moojo ghiinu? 18Mʉlɨ na maaso, neke namulola? Kange, mʉlɨ ni mbulughutu, neke namupʉlɨka? Namukʉmbʉka, 19ʉnsiki ghʉla ye nimenyʉlania amakate ghahaano, vakalia avaanhu imbilima ihaano, mʉkakongʼhania ifisighasi indɨɨlo ilɨngi?” Vakati, “Indɨɨlo kɨjigho ni vɨlɨ.”
20“Nambe ye nimenyʉlania amakate lekelalʉbale, vakalia avaanhu imbilima ine, mʉkakongʼhania ifisighasi indɨɨlo ilɨngi?” Vakati, “Lekelalʉbale.” 21Akavaposia akati, “Mʉjiighe namʉkʉlʉtangʼhania?”
ɄYesu ɨkʉnsosia ʉmʼbofu amaaso kʉ Betisaida
22ɄYesu na vavʉlanɨsɨvua vaake vakafika kʉ Betisaida, pepano avaanhu vakamʉletela ʉmuunhu ʉmʼbofu amaaso, vakampelepesia amwabasie, neke asooke. 23ɄYesu akankola ʉlʉvoko ʉmʼbofu jʉla, akahʉma naghwope mʉ kɨkaaja kɨla. Akamfunyila amati mʉ maaso, neke akavɨɨka amavoko ghaake pa mwene, akamposia akati, “Ʉkʉkyagha kɨmonga?” 24Ʉmʼbofu jʉla akalola akati, “Nɨkʉvaagha avaanhu, neke vivoneka hwene mapiki ghighenda!”
25ɄYesu akagomokela kuvɨɨka amavoko ghaake pa maaso gha mʼbofu. Ʉmʼbofu jʉla akakangasia kulola. Amaaso ghaake ghakasooka, akava ilola vʉnofu ifiinu fyoni. 26ɄYesu ye ɨkʉntavʉla avujaghe, akati, “Ʉlekaghe kugomoka kʉ Betisaida.”
ɄPeteli ijova kuuti ʉYesu ghwe Kɨlɨsite
(Mataayi 16:13-20; Lʉʉka 9:18-21)
27ɄYesu na vavʉlanɨsɨvua vaake, vakavʉʉka vilʉta mʉ fikaaja fino filyale piipi nɨ lɨkaaja lya Kaisalia-Filipi. Ye valɨ mʉ sɨla, akavaposia akati, “Avaanhu viiti ʉne neene veeni?” 28Vakamwamʉla vakati, “Vamo viiti veeve Yohani ʉMwofughi, vamonga viiti veeve mʼbɨli ʉEliya, avange viiti veeve ʉmo mʉ vavɨli avalongosi.” 29Akavaposia akati, “Ʉmue mwiti neene veeni?” ɄPeteli akamwamʉla akati, “Ʉve veeve Kɨlɨsite.”#8:29 Kɨlɨsite: Lɨtavua mʉ njovele ɨja Kɨyunaani, mʉ Kɨebulania viiti, Mesiya, amatavua agha kwekʉti, jʉno apakilue amafuta (ɨmikue). Ɨmba kʉ Vʉghanʉle vwa Masio aMahesia. 30ɄYesu akavavʉʉla kuuti, navangamʼbʉlaghe muunhu ɨmhola ɨjɨ.
ɄYesu ijova ɨmhola ɨja kʉfua na kusyʉka kwa mwene
(Mataayi 16:21-28; Lʉʉka 9:22-27)
31Pepano akatengʉla kʉkʉvavʉlanɨsia avavʉlanɨsɨvua vaake kuuti, “Lʉnoghiile ʉne ne Mwana ghwa Muunhu kuuva ni mhumuko nyinga na kukanua na vagojo na vavaha va vatekesi na vavʉlanɨsi va ndaghɨlo#8:31 Vagojo na vavaha va vatekesi na vavʉlanɨsi va ndaghɨlo: Ava ve valongosi va Vayahudi mʉ mbombo sooni. Ɨmba ɨlɨsio Kɨpʉgha kya valongosi kʉ Vʉghanʉle vwa Masio aMahesia. na kubudua, neke ɨkɨghono ɨkya vʉtatu nisyʉka.” 32ɄYesu akajova amasio aghuo kɨsila kʉfisa. Pepano ʉPeteli akalʉta naghwope palʉbale, akatengʉla kʉkʉnʼdalɨkɨla kuuti, isio nasingamwaghe. 33Apuo ʉYesu akasyetʉka, akavalola avavʉlanɨsɨvua vaake, pe akanʼdalɨkɨla ʉPeteli akati, “Vʉʉka apa ghwe Setano ʉve, amasaaghe ghaako nagha Ngʉlʉve, ʉlwene masaaghe gha vaanhu.”
Ʉvʉsyefu ʉvwa kʉkava ʉvwʉmi
34ɄYesu akakemeela ɨlɨpʉgha ɨlya vaanhu na vavʉlanɨsɨvua vaake, akavavʉʉla akati, “Ʉmuunhu jʉno ilonda kʉkʉmbɨngɨlɨla ʉne, avʉleke ʉvughane vwake, itavʉle ambɨngɨlɨlaghe nambe kʉʉve kwe kʉfua. 35Ʉlwakʉva ʉmuunhu jʉno ilonda kupoka ʉvwʉmi vwake, ʉjuo ikwambʉsia, looli jʉno ikwambʉsia ʉvwʉmi vwake vwɨmɨla ʉne nɨ Mhola ɨNofu, ʉjuo ɨkʉvʉpoka. 36Lɨno, ʉmuunhu ndepoonu ivʉmbʉlɨla kɨki kuuva nʉ vʉmofu vwoni ʉvwa ɨɨsi, neke ambʉsie ʉvwʉmi vwake? 37Nambe ʉmuunhu ahʉmie kɨki apyanɨsie pa vwʉmi vwake? 38Ʉmuunhu ghweni angangʼhaane ʉne ni mbʉlanɨsio sango pa vaanhu va kɨsina ɨkɨ ɨkɨhosi, kɨno nakɨkʉmʼbɨkɨla mwojo ʉNgʉlʉve, na jʉʉne ne Mwana ghwa Muunhu, nɨlaava nikwisa mʉ vʉvaha vwa Nhaata palɨkɨmo na vanyamhola avɨmɨke, nɨlankaana ʉmuunhu ʉjuo.”
Actualmente seleccionado:
Malɨka 8: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.