Malɨka 5
5
ɄYesu ɨkʉnsosia ʉmuunhu ʉnya mapepo
(Mataayi 8:28-34; Lʉʉka 8:26-39)
1ɄYesu na vavʉlanɨsɨvua vaake vakafika ɨmwambo ɨjɨngɨ ɨja lɨsʉmbe ɨlya Galilaya, mʉ ɨɨsi ɨja Vagelasi. 2Ye ikile mʉ ngalava, ʉnsiki ghʉghuo akatangʼhana nʉ muunhu jʉmonga ʉnya lɨpepo ɨlɨlamafu ahʉmile kʉ mbiipa. 3Ʉmuunhu ʉjuo akikalagha kʉ mbiipa. Nakwealyale ʉnya kʉnkola na kʉkʉnʼdindila nambe kʉkʉnkʉnga ni nyololo, ʉlwakʉva alyale ni ngʉfu kyongo. 4Kekinga akapinywagha ni nyololo amaghʉlʉ na mavoko, neke ʉmwene akadumulaniagha, nakwealyale ʉghwa kʉmʉlefia. 5Jaatu pakɨlo na pamwisi akikalagha kʉ mbiipa na kʉ fidunda, ʉkuo kwe kʉno akakolagha na kukutematema na mavue.
6Ye amʼbwene ʉYesu kuhʉma kʉ vʉtali, akankɨmbɨlɨla na kufughama pa mwene. 7-8ɄYesu akati, “Ghwe lɨpepo lɨlamafu ʉve! Hʉma mwa muunhu ʉjʉ!” Pe ʉnya lɨpepo akakoola fiijo akati, “Ghwe Yesu, Mwana ghwa Ngʉlʉve ʉMʼbaha ghwa fyoni, tʉlɨ vʉki nuuve? Nɨkʉkʉsʉʉma mʉ lɨtavua lya Ngʉlʉve ʉleke pikʉmhumusia.”
9ɄYesu akamposia akati, “Ɨlɨtavua lyako veeve veeni?” Ʉmwene akati, “Ɨlɨtavua lyango neene Legioni,#5:9 Legioni: Mʉ vʉtwa vwa Kɨlooma ɨkɨpʉgha kya vasikali imbilima ntanda kɨkatambʉlwagha Legioni (ɨlɨ lɨsio lya Kɨlatini). kwekʉti tʉlɨ vinga.” 10Neke ɨlɨpepo ɨlɨlamafu lɨkampelepesia ʉYesu kuuti, aleke pikʉghadaga mʉ ɨɨsi jɨla.
11Ʉnsiki ʉghuo pa kɨdunda pwelɨlyale ɨlɨpʉgha lya ngʉbe, lidɨmua. 12Amapepo ghala ghakampelepesia ghakati, “Tusʉʉma ʉtʉtwale mʉ ngʉbe sila, ʉmuo mwe twingile.” 13ɄYesu akaghatavʉla, amapepo amalamafu ghala ghakahʉma mwa muunhu ghakingila mʉ ngʉbe. Neke ɨlɨpʉgha ɨlya ngʉbe imbilima ivɨlɨ lɨkiika lʉvɨlo, lɨkaselembʉkɨla mʉ lɨsʉmbe, ingʉbe sooni sikafua.
14Avadɨɨmi va ngʉbe vakakɨmbɨla lʉvɨlo vakalʉta mʉ lɨkaaja na mʉ fikaaja ifidebe ifya mʉlʉbale, vakapanga sooni sino vasivwene. Pepano avaanhu vakalʉta kulola sino sivombiike. 15Ye vafikile kwa Yesu, vakamwagha ʉmuunhu jʉla jʉno aava na mapepo ikalile, afwalile vʉnofu, alɨ nʉ lʉhala lwoni, pe vakoghopa. 16Avaanhu vano valyasivwene sino sivombiike, vakavapangɨla avange vʉle ʉYesu aghadagile amapepo nɨ mhola ja ngʉbe. 17Vakatengʉla kʉkʉmpelepesia ʉYesu kuuti, avʉʉke mʉ ɨɨsi jaave.
18ɄYesu ye ikwingila mʉ ngalava, ʉmuunhu jʉno ghadagilue amapepo mwa mwene akati, “Nisʉʉma tʉlʉtaniaghe kwoni kʉno ghulʉta.” 19ɄYesu akankaana akati, “Lʉtagha kʉ kaaja na kʉ vanyalʉkolo vaako, ʉkavavʉʉle sooni sino ʉMʉtwa akʉvombiile na vʉle akʉsʉngʉkiile.” 20Pepano ʉmuunhu jʉla akavʉʉka pala, akatengʉla kupʉlɨsia mʉ makaaja gha Dekapoli.#5:20 Dekapoli, kwekʉti ɨɨsi jɨno jɨlɨ na makaaja kɨjigho. Aghuo ghaale makaaja ghano vakikalagha avaanhu vano naVayahudi. Akolekagha sooni sino ʉYesu amʼbombiile. Imhola isio sikava kɨdegho kʉ vaanhu vooni.
ɄYesu ɨkʉnsosia ʉmʉkɨjʉʉva na kʉkʉnsyʉsia ʉmhɨnja
(Mataayi 9:18-26; Lʉʉka 8:40-56)
21ɄYesu na vavʉlanɨsɨvua vaake vakagomoka kange nɨ ngalava ɨmwambo ɨjɨngɨ ɨja lɨsʉmbe. Avaanhu ɨlɨpʉgha vakakongʼhaana kwa Yesu, pe ʉmwene akava mʉlʉbale mʉ lɨsʉmbe. 22Akiisa ʉmuunhu jʉmonga ʉmʼbaha ghwa sinagogi, ɨlɨtavua lyake ghwe Yailo. Ye amʼbwene ʉYesu, akafughama pa maghʉlʉ ghaake, 23akampelepesia akati, “Ʉmwalɨvango ʉnʼdebe ghukova. Sivuo ghwise ʉvɨɨke ʉlʉvoko pa mwene kuuti asooke, aave mwʉmi.” 24ɄYesu akavʉʉka palɨkɨmo nʉ Yailo. Avaanhu vinga vakaghendagha nʉ Yesu kʉmo vikʉmpitapita.
25Mʉ lɨpʉgha lɨla mwealyale ʉmʉkɨjʉʉva jʉmonga jʉno alyale nɨ nhamu ɨja kʉhʉma ɨdanda. Ɨnhamu ɨjio jɨlyampumwisie amaaka kɨjigho na ghavɨlɨ. 26Alyapumwike kyongo kʉ vaghanga vinga. Alyataghile nakɨ kyʉma kyake kyoni mʉ vaghanga, neke naakasooka nambe padebe, looli, ɨnhamu jaake jɨkava jifikwongelela. 27-28Ʉmʉkɨjʉʉva ʉjʉ alyapʉliike ɨmhola ja Yesu, akatengʉla kupipita mʉ lɨpʉgha kʉmo isaagha kuuti, “Nɨngabasie ghʉ mwenda ghwake, nisooka.” Ye afikile kʉnsana kwa Yesu, akabasia ʉmwenda ghwake. 29Pala pala, ɨdanda jɨkavʉhɨɨla pihʉma, akivona mʉ mʼbɨlɨ ghwake asokile ɨnhamu jɨla.
30Ʉnsiki ghʉghuo ʉYesu akivona mʉ mʼbɨlɨ ghwake sihʉmile ingʉfu isa kʉnsosia ʉmuunhu, akasyetʉka, akaposia akati, “Ghwe veeni jʉno abasisie ʉmwenda ghwango?” 31Avavʉlanɨsɨvua vaake vakamwamʉla vakati, “Ʉvavwene avaanhu ndavʉle vikʉkʉpita, neke kange ghwiti, ‘Ghwe veeni jʉno anyabasisie?’ ” 32Ʉmwene ʉYesu akafilolesyagha, kuuti ankagʉle jʉno amwabasisie. 33Ʉmʉkɨjʉʉva jʉla ye alʉtangʼhinie lʉno lʉmʼbwene, akalʉta ikwoghopa na kutetema,#5:33 Akalʉta ikwoghopa na kutetema: Ʉmuunhu ʉjʉ akoghopagha ʉlwakʉva mʉ nyiiho saave, ʉmuunhu ghweni ʉnya nhamu ɨja kʉhʉma ɨdanda vakatisagha mʉlamafu, naalyanoghiile kukwabasia nambe kuhasɨngʼhana na vange (Valeevi 15:25-33). akafughama pa maghʉlʉ gha Yesu, akoleka sooni sino sivombiike. 34ɄYesu akamʼbʉʉla akati, “Mwalɨvango, ʉsokile vwɨmɨla ʉlwɨtɨko lwako, ʉlʉtaghe nʉ lʉtengaano, ɨnhamu jaako jɨsokile lwoni.”
35ɄYesu ye alɨ pijova isio, vakiisa avaanhu kuhʉma kʉ kaaja kwa Yailo ʉmʼbaha ghwa sinagogi, vakamʼbʉʉla ʉYailo vakati, “Sivuo, ʉleke pikʉnʼgasia ʉMʼbʉlanɨsi, ʉmwalɨvo afwile.” 36ɄYesu ye apʉliike ɨmhola ɨjio, naakavɨkɨla mwojo, akankangasia ʉmʼbaha ghwa sinagogi akati, “Ʉleke pikwoghopa, ʉlwene ghwɨtɨkaghe.” 37ɄYesu akavakaana avange kulʉtania, looli akantoola ʉPeteli, ʉYakovo nʉ Yohani ʉnnuuna ghwa Yakovo, vakavʉʉka vilʉta kʉ kaaja kwa mʼbaha ghwa sinagogi.
38Ye vafikile, vakavona avaanhu vamemile vilɨla nʉ lʉsukunalo ʉlʉkome. 39ɄYesu akingila mʉ nyumba akati, “Kɨki mulɨla kyongo? Ʉmhɨnja ʉjʉ naafwile, aghoneliile.” 40Avaanhu vala vakanseka kyongo.
Ʉmwene akavavʉʉla avaanhu vooni kuuti vahʉme kʉnji. Akavatoola avapaafi na vavʉlanɨsɨvua vala vatatu akingila muno mweghʉle ʉmfimba. 41Akankola ʉlʉvoko akati, “Talita kumi,” kwekʉti, “Ghwe mhɨnja ʉve nɨkʉkʉvʉʉla ɨma!” 42Ʉnsiki ghʉghuo ʉmhɨnja jʉla akɨɨma na kughenda. Ʉmhɨnja ʉjuo alyale na maaka kɨjigho na ghavɨlɨ. Avaanhu vala vakadegha kyongo! 43ɄYesu akavakaana akati, “Namʉngamʼbʉlaghe nambe muunhu ɨmhola ɨjɨ.” Akavavʉʉla kuuti vampeele ɨkyakʉlia.
Actualmente seleccionado:
Malɨka 5: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.