Mataayi 20
20
Ɨkɨhwanɨkɨsio ɨkya vavombi mʉ mʉghʉnda ghwa sabibu
1“ɄVʉtwa vwa kʉkyanya vʉlɨ ndavʉle ʉmuunhu ʉnya mʉghʉnda, jʉno alyalavile fiijo kulʉta kulonda avaanhu ava kʉvomba ɨmbombo mʉ mʉghʉnda ghwake ʉghwa sabibu. 2Ye avavwene, akɨtɨngʼhana navo kʉkʉvahomba ʉlʉhombo ʉlwa kɨghono kɨmo nʉjʉnge ɨdinali, pe akavasuungʼha kʉ mʉghʉnda ghwake.
3“Akavalɨlo aka vʉtatu palwakɨlo, akahʉma kange, akavaagha avange valɨ pa lɨghʉlɨlo, vasila mbombo. 4Akavavʉʉla akati, ‘Na jʉmue lʉtagha kuvomba ɨmbombo kʉ mʉghʉnda ghwango ʉghwa sabibu, ʉne kyanɨkʉvahomba mweni ʉlʉhombo lʉno lʉnoghiile.’ 5Voope vakalʉta. Ɨlɨjʉva ye lɨlɨ pa mutu, akavalɨlo aka ntanda, kange ye lɨsyetwike, akavalɨlo aka budikalʉbale, akalʉta kange kʉ lɨghʉlɨlo, akavaagha avange, voope akavasuungʼha kʉ mʉghʉnda ghwake ʉghwa sabibu.
6“Ye vwilile, akavalɨlo aka kɨjigho na kamo, akahʉma kange, akavaagha avange vɨmile pa lɨghʉlɨlo. Akavaposia akati, ‘Kɨki mwɨmile apa ɨkɨghono kyoni kɨsila mbombo?’ 7Aveene vakamwamʉla vakati, ‘Ʉlwakʉva nakwale ʉmuunhu jʉno atʉpeliile ɨmbombo.’ Ʉmwene akavavʉʉla akati, ‘Na jʉmue lʉtagha kuvomba ɨmbombo kʉ mʉghʉnda ghwango ʉghwa sabibu.’
8“Ɨlɨjʉva ye litetemela, ʉnya mʉghʉnda jʉla akamʼbʉʉla ʉmwɨmɨlɨ ghwa mbombo jaake akati, ‘Vakemeele avavomba mbombo vooni, ʉvahombe ʉlʉhombo lwave. Pano ʉkʉvahomba, ʉtengʉle avavombi vano vaveele visile ʉlwa vʉsililo na kumalɨkɨsia avavombi vano vaveele va kwanda kufika.’
9“Pe avavombi vano valisile pakɨvwilile, akavalɨlo aka kɨjigho na kamo vakiisa, vakahombua nʉjʉnge ɨdinali. 10Avavombi vano vaale va kwanda ye vilʉta kwa jʉno ɨkʉvahomba, vakahʉvɨɨla kuhombua nyinga kukila avange. Neke voope vakahombua nʉjʉnge ɨdinali jɨmo jɨno lwale lʉhombo lwa kɨghono kɨmo. 11Ye vʉpiile ʉlʉhombo lwave, vakatengʉla pikungʼulasia kwa nya mʉghʉnda, 12viiti, ‘Avaanhu avuo vavombile ɨmbombo akavalɨlo kamo keene, lwandaani ʉtʉpeliile ʉlʉhombo lʉno lʉlɨngʼhiine na veene? Ongo ʉsue tʉvombile ɨmbombo nʉ lʉpumuko ʉlʉkome nʉ lʉjʉva ɨmwisi jooni.’
13“Ʉnya mʉghʉnda jʉla akamwamʉla jʉmonga mʉ vavombi vala akati, ‘Nyalʉkolo, nanɨkʉsyovelengʼhinie nambe kʉkʉkʉhɨjɨla kɨmonga. Natʉveele twɨtɨngʼhiine ɨdinali jɨmo? 14Ʉpɨla ʉlʉhombo lwako, vʉʉka ʉlʉtaghe! Ʉne nɨlamwile kʉkʉmhomba ʉmuunhu ʉjʉ ʉghwa vʉsililo ʉlʉhombo lʉno lʉlɨngʼhiine nʉ lʉhombo lwako. 15Asi, nalukwɨtɨkɨsɨvua kuvomba ndavʉle nighanile vwɨmɨla ɨkyʉma kyango? Ʉlɨ nɨ kɨvini vwɨmɨla ʉvʉkoola vwango?’ ” 16ɄYesu akajova kange akati, “Fye enendɨɨkɨ, ava vʉsililo valaava va kwanda, ava kwanda valaava va vʉsililo.”#20:16 Ava vʉsililo valaava va kwanda, ava kwanda valaava va vʉsililo, kwekʉti vano vivoneka navanoghiile lɨno vilivoneka vanoghiile, vano vivoneka vanoghiile lɨno vilivoneka navanoghiile.
ɄYesu ijova ʉlwa vʉtatu kufua na kusyʉka kwa mwene
(Malɨka 10:32-34; Lʉʉka 18:31-34)
17ɄYesu ye alɨ mʉ sɨla ilʉta kʉ Yelusalemu, akavakemeela palʉbale avavʉlanɨsɨvua vaake kɨjigho na vavɨlɨ, akavavʉʉla akati, 18“Lolagha, tulʉta kʉ Yelusalemu, ʉkuo ne Mwana ghwa Muunhu nilʉta kukwohelua kʉ vavaha va vatekesi na kʉ vavʉlanɨsi va ndaghɨlo. Aveene kyavikʉhɨgha kuuti nɨbudue. 19Kange, kyavikʉnhwala kʉ vaanhu vano naVayahudi kuuti vanyovelele, vangʼhope ni mijeledi na kʉkʉngʼhomelela pa kɨkovekano. Neke ɨkɨghono ɨkya vʉtatu, nisyʉka.”
Ʉlʉsʉʉmo lwa ngʼina ghwa Yakovo nʉ Yohani
(Malɨka 10:35-45)
20Pepano ʉnʼdala ghwa Sebedaayi akalʉta kwa Yesu palɨkɨmo na vanaake, ʉYakovo nʉ Yohani. Ye afikile akafughama pa mwene, akansʉʉma lʉmonga. 21ɄYesu akamposia akati, “Ghulonda nɨkʉvombele kɨki?” Ʉmwene akamwamʉla akati, “Nisʉʉma ʉvɨtɨkɨsie avanango ava vavɨlɨ, kuuti mʉ Vʉtwa vwako jʉmonga ikale ʉlʉbale lwako ʉlwa kʉndio, ʉjʉnge ʉlʉbale lwako ʉlwa kʉngʼhɨghɨ.”#20:21 Jʉmonga ikale ʉlʉbale lwako ʉlwa kʉndio, ʉjʉnge ʉlʉbale lwako ʉlwa kʉngʼhɨghɨ: Apa, ʉlʉbale ʉlwa kʉndio na kʉngʼhɨghɨ kwekʉti kuuva nʉ vʉtavʉlɨlua ʉvwa kuuva ntangɨli ghwa ntwa mʉ vʉtwa vwake. 22ɄYesu akamʉla akati, “Namʉkagwile lʉno musʉʉma. Asi, ndepoonu mutavwile kupumuka ʉlʉpumuko lʉno nipumuka?”#20:22 Kupumuka ʉlʉpumuko lʉno nipumuka: Mʉ Kɨyunaani lɨlembilue, Ndepoonu munywela ɨkɨkombe kɨno ninywela ʉne? Vakamwamʉla vakati, “Tutavwile!” 23ɄYesu akavavʉʉla akati, “Lweli kyamupumuka ʉlʉpumuko lʉno nilʉta pipumuka, neke ɨmhola ja kukala ʉlʉbale lwango ʉlwa kʉndio nambe ʉlwa kʉngʼhɨghɨ navʉtavʉlɨlua vwango. Looli ʉNhaata ghwango ghwe jʉno alavapeela vano avalɨngʼhanɨkisie ngʼhaani.”
24Avavʉlanɨsɨvua avange vala kɨjigho ye vapʉliike isio, vakavakalalɨla avanamuunhu vala, ʉYakovo nʉ Yohani. 25Pepano ʉYesu akavakemeela vooni palɨkɨmo, akavavʉʉla akati, “Mʉkagwile kuuti avatwa va ɨɨsi vitema avaanhu vaave ni ngʉfu. Kange, vihʉfia ingʉfu isa vʉtavʉlɨlua vwave kʉ vavanda, neke vavakʉndaghe mʉ sooni. 26Neke kʉlyʉmue nafye lʉngavisaghe. Looli ʉmuunhu ghweni jʉno ilonda kuuva mʼbaha mʉlyʉmue, avisaghe mʼbombi ghwinu. 27Kange, ʉmuunhu jʉno ilonda kuuva mʉlongosi, avisaghe nkami#20:27 Nkami, kwekʉti ʉmuunhu jʉno ivomba ɨmbombo kwa ntwa ghwake kɨsila kʉhombua kɨmonga. ghwinu. 28Nɨvavʉlile isio, ʉlwakʉva na jʉʉne ne Mwana ghwa Muunhu nanɨlisile kuvombelua, looli nɨlisile kʉkʉvavombela avange na kuhʉmia ʉvwʉmi vwango kuuti nɨvavange vinga.”
ɄYesu ɨkʉvasosia avabofu vavɨlɨ
(Malɨka 10:46-52; Lʉʉka 18:35-43)
29ɄYesu na vavʉlanɨsɨvua vaake vakalʉta mʉ lɨkaaja ɨlya Yeliko. Ye vivʉʉka mʉ lɨkaaja lɨla, ɨlɨpʉgha ɨlya vaanhu lɨkava lɨkʉmʼbɨngɨlɨla. 30Lolagha, avabofu amaaso vavɨlɨ valikalile mʉlʉbale mʉ sɨla, ye vapʉliike kuuti ʉYesu ikila ɨsɨla jɨla, vakakemeela fiijo vakati, “Ghwe Mʉtwa, ghwe Mwana ghwa Davɨdi, ʉtʉsʉngʉkɨle!” 31Ɨlɨpʉgha lɨla lɨkavadalɨkɨla kuuti vajike kɨmihe, neke aveene vakaghina kukemeela fiijo, viiti, “Ghwe Mʉtwa, Mwana ghwa Davɨdi, ʉtʉsʉngʉkɨle!” 32Pepano ʉYesu akɨɨma, akavakemeela avabofu vala, akavaposia akati, “Mulonda nɨvavombele kɨki?” 33Aveene vakamwamʉla vakati, “Ghwe Mʉtwa, tulonda amaaso ghiitu, ghalolaghe!” 34ɄYesu akavavonela ɨkɨsa, akavabasia amaaso ghaave. Nakalɨngi, amaaso ghakasooka, vakatengʉla kulola kange, pe vakamʼbɨngɨlɨla ʉYesu.
Actualmente seleccionado:
Mataayi 20: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.