Mataayi 17
17
ɄYesu ikwandʉka
(Malɨka 9:2-13; Lʉʉka 9:28-36)
1Ifighono ntanda ye fikilile, ʉYesu akavatoola ʉPeteli, ʉYakovo nʉ Yohani ʉnnuuna. Akalʉta navoope kʉ kɨdunda ɨkɨtali, vakijekela. 2Ye valɨ pala, ʉYesu akandʉka pamaaso ghaave. Kʉ maaso akava ivalatɨka hwene lɨjʉva nagha menda ghaake ghakava mavalafu fiijo hwene lʉmuli. 3Ʉnsiki ghʉghuo, vakasetʉka avavɨli avalongosi ʉMoose nʉ Eliya, vijova nʉ Yesu. 4Pe ʉPeteli akamʼbʉʉla ʉYesu akati, “Ghwe Mʉtwa, lʉnono ʉsue tukalaghe bahaapa! Nave ʉkeliile, nijenga ifyeve fitatu. Kɨmo kɨɨve kyako, kɨmonga kya Moose, ɨkɨngɨ kɨɨve kya Eliya.”
5ɄPeteli ye ajiighe ijova, lolagha, ɨlɨfunde lɨno livalatɨka lɨkiisa, lɨkavakupikila. Pe lɨkapʉlɨkɨka ɨlɨsio kuhʉma mʉ lɨfunde liiti, “Ʉjʉ ghwe Mwanango ʉmʉghanɨke ghwango jʉno nɨnkeliile, mʉmpʉlɨkɨsyaghe ʉmwene!” 6Avavʉlanɨsɨvua vala ye vapʉliike isio, vakoghopa kyongo, vakakupama. 7ɄYesu akaveela pa veene, akavabasia, akavavʉʉla akati, “Ɨma, mʉleke pikwoghopa!” 8Ye vikwinamʉka, vilola, navakamwagha ʉmuunhu ʉjʉnge, looli jʉ Yesu mwene. 9Ye valɨ mʉ kɨdunda vikwika, ʉYesu akavavʉʉla akati, “Namʉngampangɨlaghe muunhu sino mʉsivwene, kuhanga ʉnsiki ghʉno ʉne ne Mwana ghwa Muunhu nisyʉka kuhʉma kʉ vafue.”
10Avavʉlanɨsɨvua vaake vakamposia vakati, “Ongo avavʉlanɨsi va ndaghɨlo sa Moose viiti, aliisa taasi ʉEliya, ʉKɨlɨsite ye akyale kukwisa?” 11ɄYesu akavamʉla akati, “Se seene, aliisa taasi ʉEliya, kuuti anosie sooni. 12Neke nɨkʉvavʉʉla niiti, ʉEliya alisile, avaanhu navakankagwile, vakamʼbombela sino vakighanile aveene. Enendɨɨkɨ, na jʉʉne ne Mwana ghwa Muunhu fye kyavikʉmhumusia.” 13Pepano avavʉlanɨsɨvua vala vakalʉtangʼhania kuuti, ʉYesu aveele ijova imhola sa Yohani ʉMwofughi.
ɄYesu ɨkʉnsosia ʉnsoleka ʉnya lɨpepo
(Malɨka 9:14-29; Lʉʉka 9:37-43a)
14ɄYesu na vavʉlanɨsɨvua vaake ye vagomwike pa lɨpʉgha lɨla, ʉmuunhu jʉmonga akalʉta pa Yesu, akafughama, 15akamʼbʉʉla akati, “Ghwe Mʉtwa, nisʉʉma ʉsʉngʉkɨle, ʉmwanango alɨ nɨ kɨvafi, kɨkʉmpumusia kyongo, ʉlwakʉva kekinga kɨkʉmʉghwɨsia pa mwoto na mʉ malenga. 16Namʉleeta kʉ vavʉlanɨsɨvua vaako kuuti vansosie, vakunua.”
17ɄYesu akavavʉʉla akati, “Mwe kɨsina ɨkɨsila lwɨtɨko, ɨkɨsina ɨkɨnya nyiiho imbiivi! Nikalile numue ʉnsiki ghwoni ʉghʉ, mʉkyale kʉkʉnhangʼhania? Nikale ndaani numue? Mʉleete kʉlyʉne kʉno!” 18Ye vantwalile, ʉYesu akalɨdalɨkɨla ɨlɨpepo mwa nsoleka jʉla, ɨlɨpepo lɨla lɨkahʉma. Ʉnsiki ghʉghuo ʉnsoleka jʉla akasooka.
19Pepano avavʉlanɨsɨvua vala vakalʉta pa Yesu, vakijekela, vakamposia vakati, “Ongo ʉsue tʉveele tʉkunilue kʉkʉlɨdaga ɨlɨpepo lɨla?” 20Ʉmwene akavamʉla akati, “Mʉkunilue, ʉlwakʉva mwaghilue ʉlwɨtɨko! Kyangʼhaani nɨkʉvavʉʉla, mwale mʉʉve nʉ lwɨtɨko nambe ʉlʉdebe ndavʉle akaveju akadebe fiijo, mwale mʉkʉkɨvʉʉla ɨkɨdunda ɨkɨ kuuti, ‘Vʉʉka apa, ʉlʉte pala,’ kyope kyale kivʉʉka. Mʉ ʉluo nakwekɨlɨ ɨkɨɨnu kɨno ndepoonu kɨkʉvatola kuvomba. 21Neke ɨlɨpepo ndavʉle ɨlɨ, namʉngaghele kudaga kɨsila kufuunya kwa Ngʉlʉve na kuvʉhɨɨla kulia mʉlwa kufuunya.”#17:21 Akadebe aka namwekale mʉ fitabu fimonga ifikʉʉlʉ.
ɄYesu ijova kange ɨmhola ɨja kʉfua kwa mwene
(Malɨka 9:30-32; Lʉʉka 9:43b-45)
22ɄYesu ye alɨ palɨkɨmo na vavʉlanɨsɨvua vaake kʉ Galilaya, akavavʉʉla akati, “Ʉne ne Mwana ghwa Muunhu nitapivɨkua mʉ mavoko gha vaanhu, 23vano kyavikʉmbuda, neke ɨkɨghono ɨkya vʉtatu, nisyʉka.” Avavʉlanɨsɨvua vaake ye vapʉliike isio, vakasukunala kyongo.
Ɨsongo ɨja nyumba ɨnyɨmɨke ɨja kufunyila
24ɄYesu na vavʉlanɨsɨvua vaake vakafika kʉ Kapelenaumu. Ye valɨ ʉkuo, avasongesia songo ava nyumba ɨnyɨmɨke ɨja kufunyila, vakiisa kwa Peteli, vakamposia vakati, “Asi, ʉmʼbʉlanɨsi ghwinu naisonga ɨsongo ɨja nyumba ɨnyɨmɨke ɨja kufunyila?”#17:24 Ɨsongo ɨja nyumba ɨnyɨmɨke ɨja kufunyila, kwekʉti ʉMʉyahudi ghweni ʉmʉkɨnhaata ʉnya maaka fijigho fivɨlɨ nambe kukila, alyanoghiile amaaka ghooni kusonga ɨsongo ɨja kʉvombela mʉ nyumba ɨja kufunyila. Indalama isio silyalɨngʼhiine nʉ lʉhombo ʉlwa kʉvomba ɨmbombo fighono fivɨlɨ (Kuhʉma 30:13-16; 2 Mhola sa Masiki 24:9-14; Nehemia 10:32). 25ɄPeteli akavamʉla akati, “Isonga.” ɄPeteli akingila mʉ nyumba muno mwale ʉYesu. Neke ʉPeteli ye naajovile lʉmonga, ʉYesu akamposia akati, “Ghuvona ndaani Simoni? Avatwa va mʉ ɨɨsi visongesia ɨsongo kwani? Visongesia kʉ vavanda vaave, visongesia kʉ vagheesi?” 26ɄPeteli akamʉla akati, “Vikʉvasongesia avagheesi.” ɄYesu akamʼbʉʉla akati, “Nave fye lʉlɨvuo, pe avavanda vaave navilondua kusonga ɨsongo. 27Neke ʉlwakʉva natulonda kʉkʉvakʉvasia avaanhu ava, ʉlʉte kʉ lɨsʉmbe, ʉtosie ɨndovano mʉ lɨsʉmbe, ʉlove isamaki. Ɨsamaki jɨno kyaghutala kulova, ngʼamʉla ʉmʉlomo ghwake, ʉkʉjaagha ɨndalama. Ʉtoole ɨndalama ɨjio, neke ʉlʉte ʉsonge ɨsongo ɨjango nɨ jaako.”
Actualmente seleccionado:
Mataayi 17: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.