Mataayi 11
11
ɄYohani ʉMwofughi isuungʼha avavʉlanɨsɨvua vaake kwa Yesu
(Lʉʉka 7:18-35)
1ɄYesu ye amalile kʉkʉvavʉʉla avavʉlanɨsɨvua vaake kɨjigho na vavɨlɨ sino vanoghiile kuvomba, akavʉʉka pala, akalʉta mʉ makaaja agha kɨghavo ɨkya Galilaya kupʉlɨsia na kuvʉlanɨsia avaanhu ɨlɨsio lya Ngʉlʉve.
2ɄYohani alyadindilue mʉ ndinde. Ye alɨ mʉ ndinde, akapʉlɨka imbombo sino ʉKɨlɨsite akava ivomba. Pe akasuungʼha avavʉlanɨsɨvua vaake 3vamposie ʉYesu kuuti, “Ʉve veeve Kɨlɨsite jʉno avavɨli valyavɨlile kuuti ilikwisa? Nave naveeve tʉhʉvɨlaghe ʉjʉnge?” 4ɄYesu akavamʉla akati, “Mʉlʉte mʉmʼbʉʉle ʉYohani sooni sino mʉsivwene na kupʉlɨka. 5Avabofu vilola, avalema amaghʉlʉ vighenda, avanya bʉʉba vivalala, avanya mapʉle vipʉlɨka, avafue visyʉka. Kange, avakotofu vipʉlɨsɨvua ɨMhola ɨNofu.#11:5 Imbombo sino ʉYesu ijova mʉ kadebe aka, se sino silyavɨlilue kuuti se ivombagha ʉKɨlɨsite, kwekʉti ʉMesiya (Yesaya 26:19; 29:18-19; 35:5-6; 61:1). 6Afunyilue ʉmuunhu jʉno ɨkʉnyɨtɨka ʉne kɨsila nganighani.”
7Avavʉlanɨsɨvua va Yohani ye vavʉkile, ʉYesu akatengʉla kʉkʉlɨvʉʉla ɨlɨpʉgha lɨla imhola isa Yohani akati, “Mʉkalʉtile kʉ lɨhaka kulola ɨkɨki? Mwahʉvɨlagha kʉkʉmwagha ʉmuunhu jʉno ikeela kwɨtɨka ndavʉle ɨlɨtete lɨno likeela kʉdepa nɨ mhepo? Jeeje! 8Pe mʉkalʉtile kulola ʉmuunhu jʉno alɨ ndaani? Asi, mʉkalʉtile kulola ʉmuunhu jʉno afwalile amenda agha ndalama nyinga? Pʉlɨkɨsia, avaanhu vano vifwala amenda agha ndalama nyinga vikukala mʉ nyumba isa vatwa. 9Lɨno, pe mʉkalʉtile kulola ʉmuunhu jʉno alɨ ndaani? Mʉkalʉtile kʉkʉmʉlola ʉmʼbɨli? Se seene! Nɨkʉvavʉʉla kuuti, ʉjuo namʼbɨli lwene, looli ʉjuo mʼbaha kukila ʉmʼbɨli. 10Ʉjuo ghwe jʉno imhola saake silembilue mʉ Malembe aMɨmɨke kuuti,
‘Lolagha, nɨkʉnsuungʼha ʉnyamhola ghwango akʉlongolele.
Ʉjuo ghwe ɨkʉkʉlɨngʼhanɨkɨsyagha ɨsɨla jaako.’#Malaki 3:1
11“Kyangʼhaani nɨkʉvavʉʉla kuuti, kʉ vaanhu vooni naaghelile kuvoneka ʉmuunhu ʉmʼbaha kukila ʉYohani ʉMwofughi. Neke jʉno nʼdebe mʉ Vʉtwa vwa kʉkyanya, mʼbaha kukila ʉYohani. 12Kuhʉma ifighono fino ʉYohani ʉMwofughi ipʉlɨsia kuhanga kufika ʉmʉsyʉghʉ, ʉVʉtwa vwa kʉkyanya vulondua kʉ ngʉfu. Vano valɨ ni ngʉfu, ve vano vighela pikwingila mʉ Vʉtwa ʉvuo. 13Avavɨli vooni ni ndaghɨlo sa Moose filʉngɨka sino silivoneka kufika ʉnsiki ʉghwa Yohani. 14Lɨno, nave mukwɨtɨka ʉvʉvɨli vwave, ʉYohani ghwe Eliya jʉla jʉno alyajovilue kuuti ikwisa. 15Ʉnya kʉpʉlɨka, apʉlɨkaghe.
16“Asi, nɨhwanɨkɨsie nɨ kɨki avaanhu ava kɨsina ɨkɨ? Vahwaniine na vaana vano vineena kʉ lɨghʉlɨlo, neke vikʉvavʉʉla avajanave viiti, 17‘Tʉvakʉviile ifilongilongi ifya lʉkeelo, namʉsejile! Tʉvɨmbiile ʉlwɨmbo ʉlwa lʉsukunalo, namʉlɨlile!’ 18Fye lʉlɨvuo na jʉmue! ɄYohani alisile, naalisagha nambe kunyua, avaanhu vakati, ‘Alɨ nɨ lɨpepo.’ 19Neke ʉne ne Mwana ghwa Muunhu nisile, nilia na kunyua, aveene viiti, ‘Ʉjʉ nyamwojo, mʉghaasi! Kange, mmanyaani ghwa vasongesia songo, na vahosi!’ Neke ʉvʉkagʉsi vwa Ngʉlʉve, vuvoneka vwa kyangʼhaani mʉ mbombo saake.”
Ʉlʉpumuko ʉlwa makaaja ghano ghikʉnkaana ʉYesu
(Lʉʉka 10:13-15)
20Pepano ʉYesu akatengʉla pikʉghadalɨkɨla amakaaja muno akavombile ifidegho finga, ʉlwakʉva avaanhu mʉ makaaja aghuo navalyalatile inyɨvi saave. Akavavʉʉla akati, 21“Ɨga mwe vaanhu va lɨkaaja lya Kolasini! Ɨga mwe vaanhu va lɨkaaja ɨlya Betisaida! Ʉlwakʉva ifidegho fino nɨvombile kʉlyʉmue, fyale fivombeke kʉ lɨkaaja ɨlya Tiilo nɨ lya Sidoni,#11:21 Kolasini nɨ Betisaida ghalyale makaaja gha Vayahudi. Avaanhu va mʉ makaaja aghuo valyale vikuvona kuuti vagholofu kukila avaanhu ava makaaja aghange ndavʉle agha Tiilo nɨ Sidoni ghano ghaale gha vaanhu vano naVayahudi. avaanhu mʉ makaaja aghuo ngale valyalatile. Vale vifwala amagunila na kupakala ɨlɨpembo kuhʉfia ʉlʉlaato lwave. 22Lɨno nɨkʉvavʉʉla kuuti, ɨkɨghono ɨkya vʉhɨghi ʉlʉpumuko lwinu luliiva lʉkome, kukila ʉlwa vaanhu ava kʉ Tiilo na kʉ Sidoni.
23“Na jʉmue mwe vaanhu mʉ lɨkaaja lya Kapelenaumu, mukuvona kuuti mulifika kʉkyanya kwa Ngʉlʉve? Jeeje, nafye luliiva! Looli ilikʉvataagha paasi kʉvʉfue. Ʉlwakʉva ifidegho fino fivombiike kʉlyʉmue fyale fivombeke kʉ Sodoma,#11:23 Sodoma: Ɨlɨ lɨlyale lɨkaaja lɨno ʉNgʉlʉve alyalɨtipwile vwɨmɨla inyɨvi isa vaanhu vaake (Vʉtengʉlɨlo 19:24-29). ɨlɨkaaja ɨlio ngale kwelɨlɨ nambe ʉmʉsyʉghʉ. 24Lɨno nɨkʉvavʉʉla kuuti, ɨkɨghono ɨkya vʉhɨghi ʉlʉpumuko lwinu luliiva lʉkome kukila ʉlwa lɨkaaja ɨlya Sodoma.”
ɄYesu ɨkʉvapeela avaanhu ʉlʉpʉʉmo
(Lʉʉka 10:21-22)
25Ʉnsiki ʉghuo ʉYesu akajova akati, “Ghwe Nhaata, ghwe jʉno ʉtemile kʉkyanya na paasi nɨkʉkʉhongesia, ʉlwakʉva imhola isi ʉvafisile avɨmbi na vakagʉsi, neke ʉvahʉfisie avaanhu vano vikujisia hwene vaana vadebe. 26Eena Nhaata, ʉlwakʉva ʉluo lwe lʉno ʉkeliile.
27“ɄNhaata ghwango anhavʉliile fyoni. Neke nakwale jʉno ankagwile ʉMwana, looli jʉ Nhaata mwene. Kange, nakwale jʉno ankagwile ʉNhaata, looli ʉMwana, nʉ muunhu ghweni jʉno ʉMwana ilonda kʉkʉmhʉfia.
28“Mwisaghe kʉlyʉne mweni mwe vano mupumusivua na kulemua na masigho gha ndaghɨlo, ʉne nɨkʉvapeela kupʉʉma. 29Mʉkʉndaghe kulongosivua nuune, ndavʉle ingʼombe vʉle silongosivua nɨ lɨjoki. Mʉmanyɨlaghe kʉlyʉne, ʉlwakʉva ʉne nɨlɨ nkoola kange nɨlɨ nʉ lujisio. Apuo pe muuva nʉ lʉtengaano mʉ moojo ghiinu. 30Ɨlɨjoki lyango nalilemasia, kange ʉnsigho ghwango mpepe.”
Actualmente seleccionado:
Mataayi 11: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.