Mbombo sa Vasungʼhua 5
5
ɄAnania nʉ Safila
1Kwealyale ʉmuunhu jʉmonga jʉno akatambʉlwagha Anania. ɄAnania nʉ nʼdala ghwake ʉSafila voope vakaghʉsia ʉmʉghʉnda ghwave. 2Indalama sino vakavile, ʉAnania akaghava simonga siive saave. Najʉ nʼdala ghwake alyakagwile ʉluo. Neke isingi akatwala kʉ vasungʼhua.
3Neke ʉPeteli akamposia akati, “Anania! Kɨki ʉmwɨtiike ʉSetano akʉlongosie kujova ʉvʉdesi kwa Mhepo ʉMwɨmɨke? Indalama sino ʉkavile, simonga ʉfisile! 4Ye ʉkyale kughʉsia ʉmʉghʉnda, ghʉkaale ghwako. Nambe ye ʉghʉsisie, indalama sino ghwʉpiile siveele mʉ vʉlamʉsi vwako. Lɨno, kɨki ʉlamwile mʉ mwojo ghwako kuvomba enendɨɨkɨ? Nʉnsyangile muunhu, looli ʉnsyangile ʉNgʉlʉve!”
5ɄAnania ye apʉliike amasio aghuo, akaghua na kufua pala pala. Avaanhu vooni vano valyapʉliike ɨmhola ɨjio, lʉkavakola ʉlʉdwesi. 6Pe vakiisa avasoleka, vakaghʉniengelela ʉmʼbɨlɨ ghʉla nʉ mwenda, vakalʉta kusyɨla.
7Ye ghʉkilile ʉnsiki ʉghwa fivalɨlo fitatu ndɨɨkɨ kuhʉma ifua ʉAnania, ghwope ʉnʼdala ghwake akingila mʉ nyumba jɨla, kɨsila kʉkagʉla sino sihʉmiile. 8ɄPeteli akamposia akati, “Mbʉʉle, indalama sino mwaghʉsia ʉmʉghʉnda se sisiisi?” Akamʉla akati, “Lweli, se sisisio!” 9Pepano ʉPeteli akamʼbʉʉla akati, “Kɨki mwɨtɨngʼhiine nʉ mʉghoosi ghwako kʉkʉmʉghela ʉMhepo ghwa Mʉtwa ʉNgʉlʉve? Lolagha, avaanhu vano vahʉmile kʉkʉnsyɨla ʉmʉghoosi ghwako, vaghende pa mʉlyango apuo, na jʉʉve vitoola ʉmʼbɨlɨ ghwako, vilʉta kʉkʉkʉsyɨla!” 10Pala pala, ʉSafila akaghua pa maghʉlʉ gha Peteli, akafua. Avasoleka vala ye vikwingila, vakavona ʉSafila afwile. Pe vakamhʉmia kʉnji, vakansyɨla piipi nʉ mʉghoosi ghwake. 11Ʉlʉdwesi lʉkavavona avɨtɨki vooni palɨkɨmo na vaanhu vooni vano valyasipʉliike isio.
Avasungʼhua vivomba ifidegho
12Avasungʼhua va Yesu vakava vivomba ifidegho ni fivalɨlo finga kʉ vaanhu mʉ ngʉfu sa Ngʉlʉve. Avɨtɨki vooni vakakongʼhanagha palɨkɨmo mʉ lʉvɨɨka ʉlwa nyumba ɨnyɨmɨke ɨja kufunyila, pa Lʉgono ʉlwa Solomoni. 13Avaanhu vano navalyamwɨtiike ʉYesu, vakavaghiniagha fiijo avɨtɨki, neke aveene vakoghopagha kuhangɨlanɨla navo. 14Palɨkɨmo nʉluo, avaanhu vinga valyamwɨtiike ʉMʉtwa ʉYesu, avakɨnhaata na vakɨjʉʉva. Mʉ ʉluo avɨtɨki vakava vifikwongelela.
15Lɨno, vwɨmɨla ifidegho fino avasungʼhua vakavombagha, avaanhu vakavatwalagha avatamu mʉ masevo na kʉkʉvaghonia mʉ fitala na mʉ fiteefu. Vakavombagha ʉluo kuuti ʉPeteli pano ikila, ʉmwɨghɨɨghɨ ghwake ghʉvafikilaghe vamonga kuuti vasooke. 16Avaanhu vinga kuhʉma mʉ fikaaja fino fyale piipi nɨ lɨkaaja ɨlya Yelusalemu, vakakongʼhanagha mʉ lɨkaaja ɨlio. Vakavatwalagha avatamu, na vano valyale na mapepo amalamafu, neke vooni vakasokagha.
Avasungʼhua vipumusivua
17Pepano ʉntekesi ʉmʼbaha na vajaake vooni, vano valyale va kɨpʉgha ɨkya Vasadukayi vakava nɨ kɨvini kʉ vasungʼhua va Yesu. 18Pe vakavakola avasungʼhua vala na kʉkʉvadindila mʉ ndinde. 19Neke pakɨlo, ʉnyamhola ghwa Mʉtwa ʉNgʉlʉve akadindula inyiighi isa ndinde, akavahʉmia kʉnji. Pe akavavʉʉla akati, 20“Lʉtagha mʉ nyumba ɨnyɨmɨke ɨja kufunyila, mʉkavavʉʉle avaanhu amasio ghooni agha vwʉmi ʉvwa kʉvʉsila kʉsila.” 21Avasungʼhua vala ye vapʉliike amasio aghuo, vakalavɨla mʉ nyumba ɨnyɨmɨke ɨja kufunyila, vakatengʉla pivʉlanɨsia avaanhu.
Ʉnsiki ghʉghuo ʉntekesi ʉmʼbaha palɨkɨmo na vajaake, vakakongʼhania ɨkɨpʉgha ɨkya valongosi va Vayahudi. Pe vakasuungʼha avasikali avaloleleli#5:21 Vasikali avaloleleli: Ava vaale valoleleli va nyumba ɨnyɨmɨke ɨja kufunyila jɨno jaale kʉ Yelusalemu. Ɨmba kʉ Vʉghanʉle vwa Masio aMahesia. valʉte mʉ ndinde, vakavaleete avasungʼhua va Yesu. 22Neke avasikali avaloleleli vala ye vingiile mula, vakavona avasungʼhua namwevale. Pe vakagomoka kʉ valongosi vakavavʉʉla 23vakati, “Ye tʉfikile pa ndinde, tʉvwene amalyango ghooni madinde nava vasikali vɨmile pa malyango vilolelela. Neke ye tʉdindwile amalyango ghooni na kukwingila mʉnkate, natʉmwaghile nambe muunhu!” 24Ʉmʉlongosi ghwa vasikali va nyumba ɨnyɨmɨke ɨja kufunyila palɨkɨmo na vavaha va vatekesi ye vapʉliike ɨmhola ɨjio, vakahangajɨka kyongo mʉ moojo ghaave, vakiposania vakati, “Pe kyaluuva ndaani ɨnongua ɨjɨ!”
25Pe akiisa ʉmuunhu jʉmonga, akavavʉʉla akati, “Lolagha, avaanhu vala vano mwavadindila mʉ ndinde, valɨ mʉ nyumba ɨnyɨmɨke ɨja kufunyila vivʉlanɨsia avaanhu!” 26Pepano ʉmʉlongosi jʉla ʉghwa vasikali palɨkɨmo na vasikali avaloleleli, vakalʉta mʉ nyumba ɨnyɨmɨke ɨja kufunyila kʉkʉvatoola avasungʼhua vala. Neke ye vikʉvatwala, vakavatetesyagha, ʉlwakʉva valyale vikwoghopa kuuti avaanhu kyavikʉvatova na mavue.
27Ye vafikile, vakavɨmia avasungʼhua vala pavʉlongolo pa kɨpʉgha kya valongosi va Vayahudi. Pe ʉntekesi ʉmʼbaha akavaposia 28akati, “Asi, natʉkavakanile kuuti namʉngavʉlanɨsyaghe nambe padebe imhola sa muunhu ʉjuo? Lɨno, ʉmue mʉkwɨsisie imbʉlanɨsio siinu mʉ lɨkaaja lyoni ɨlya Yelusalemu, kange mulonda kʉkʉtʉpɨɨka ʉsue vwɨmɨla ʉvʉfue vwa muunhu ʉjuo!”
29ɄPeteli na vasungʼhua avange vakamʉla vakati, “Tʉnoghiile kʉkʉmpʉlɨka ʉNgʉlʉve, kukila kʉkʉmpʉlɨka ʉmuunhu! 30Poope nambe mʉlyamʼbudile ʉYesu pano mʉlyankomeliile pa kɨkovekano, ʉNgʉlʉve ʉghwa vakʉʉlʉ viitu akansyʉsia. 31Akamwɨmɨka kuuti ateme palɨkɨmo nʉ mwene,#5:31 Ateme palɨkɨmo nʉ mwene: Mʉ Kɨyunaani lɨlembilue, amʼbɨɨke ʉlʉvoko lwake ʉlwa kʉndio. aave Mʉlongosi kange aave Mpoki, kuuti avatange aVaisilaeli valaate na kupyanɨlua inyɨvi saave. 32Ʉsue tʉlɨ volesi va mhola isio sooni, kange najʉ Mhepo ʉMwɨmɨke jʉno ʉNgʉlʉve avapeliile vano vikʉmpʉlɨka, ghwope ikwoleka isio.”
33Avalongosi vala ye vapʉliike amasio aghuo, vakakalala kyongo, pe vakalondagha kuuti vabudue. 34Neke mʉ kɨpʉgha kya valongosi vala mwealyale ʉMfalisayi#5:34 ɄMfalisayi: Ɨmba ɨlɨsio Vafalisayi kʉ Vʉghanʉle vwa Masio aMahesia. jʉmonga jʉno akatambʉlwagha Gamalieli. Ʉjuo alyale mʼbʉlanɨsi ghwa ndaghɨlo, kange avaanhu vooni vakamwoghopagha. Ʉmuunhu ʉjʉ akɨɨma pa vʉhɨghi pala na kʉkʉvavʉʉla kuuti vavahʉmie avasungʼhua taasi kʉ nsiki nʼdebe. 35Pe akavavʉʉla avalongosi avajaake akati, “Ʉmue mwe Vaisilaeli, sino mulonda pikʉvavomba avaanhu ava, mʉsaaghe vʉnono. 36Mukʉmbʉka kuuti ʉnsiki ghʉmonga alyahʉmiile ʉmuunhu jʉno akatambʉlwagha Teuda. Ʉmuunhu ʉjuo akivɨkagha kuuti ʉmwene muunhu mʼbaha, neke avaanhu filʉndo fine ndɨɨkɨ vakamʼbɨngɨlɨlagha. Pambele akabudua, neke avaanhu vooni vano valyale vikʉmʼbɨngɨlɨla vakapalasana, nasi mbombo saave sooni sikafua. 37Kange, ʉnsiki ye vivalua avaanhu, akahʉmɨla ʉYuuda kuhʉma kʉ Galilaya. Alyakongʼhanisie avaanhu na kʉkʉvalongosia kuuva vagalʉsi, ghwope akabudua, avavɨngɨlɨli vaake vooni vakapalasana. 38Lɨno nɨkʉvavʉʉla kuuti, mʉleke pikʉvahɨgha avaanhu ava, mʉvaleke valʉtaghe. Ʉlwakʉva nave imbombo sino vivomba sihʉmile kwa muunhu, navangafike poonu, 39looli nave sa Ngʉlʉve namʉngaghele kʉkʉvasigha. Mʉlolaghe vʉnono, ndepoonu muvona mulua nʉ Ngʉlʉve.”
40ɄGamalieli ye ajovile amasio aghuo, avalongosi vala vakakʉnda. Pe vakavakemeela avasungʼhua vala, vakalamʉla vakopue ni mijeledi, vakavavʉʉla kuuti navangavʉlanɨsyaghe kange imhola sa Yesu. Pe vakavaleka valʉtaghe.
41Avasungʼhua vala vakahʉma pa vʉhɨghi vahovwike, ʉlwakʉva vakivwene kuuti, ʉNgʉlʉve akeliile vabenapʉlue vwɨmɨla ʉMʉtwa ʉYesu. 42Neke navakavʉhɨɨla kuvʉlanɨsia na kupʉlɨsia ɨMhola ɨNofu kuuti ʉYesu ghwe Kɨlɨsite.#5:42 Kɨlɨsite: Lɨtavua mʉ njovele ɨja Kɨyunaani, mʉ Kɨebulania viiti, Mesiya, amatavua agha kwekʉti, jʉno apakilue amafuta (ɨmikue). Ɨmba kʉ Vʉghanʉle vwa Masio aMahesia. Jaatu vakavombagha isio mʉ nyumba ɨnyɨmɨke ɨja kufunyila na mʉ nyumba isa vɨtɨki.
Actualmente seleccionado:
Mbombo sa Vasungʼhua 5: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.