Mbombo sa Vasungʼhua 2
2
ɄMhepo ʉMwɨmɨke ɨkʉvisila avɨtɨki
1Ɨkɨghono ɨkya Pentekositi#2:1 Pentekositi: Kɨlyale kɨkulukulu kɨno aVayahudi vakavombagha pano vapetile na kuvʉsia ifiinu mʉ maghʉnda. Ɨkɨkulukulu kɨkavombekagha ɨkɨghono ɨkya fijigho fihaano kuhʉma kusila ɨPasaka (Similisio sa Ndaghɨlo 16:9-12). Mʉ lʉfingo ʉlʉpia ɨkɨghono ɨkio kɨvɨkilue kukʉmbʉka kukwika kwa Mhepo ʉMwɨmɨke (Mbombo sa Vasungʼhua 2:1-4). ye kɨfikile, avaanhu vooni vano valyamwɨtiike ʉYesu, valyakongʼhanile mʉ nyumba jɨmonga. 2Ye vikalile mula, nakalɨngi lɨkapʉlɨkɨka ɨlɨsio kuhʉma kʉkyanya hwene mhepo mbaha jigugula. Ɨlɨsio ɨlio lɨkakwɨla mʉ nyumba jooni. 3Pe vakafivona ifiinu hwene ndape sa mwoto sipalasiine, sikavisila avaanhu vooni vano pwevalyale pala. 4Avaanhu vooni vakʉpɨla ʉMhepo ʉMwɨmɨke, nʉjʉnge akatengʉla kujova ɨnjovele ɨjɨngɨ, ndavʉle ʉMhepo ʉMwɨmɨke vʉle akavapeliile kujova.
5Ʉnsiki ʉghuo, kʉ Yelusalemu kwevalyale aVayahudi vano vakamwɨmɨkagha ʉNgʉlʉve. Avaanhu avuo valyahʉmile mʉ ɨɨsi nyinga.#2:5 Valyahʉmile mʉ ɨɨsi nyinga: Ʉnsiki ghʉla aVayahudi vinga valyapalasiine mʉ ɨɨsi isingi nyinga. 6Ye vapʉliike ɨlɨsio ɨlio, avaanhu vinga vakakongʼhaana pa nyumba jɨla. Vakakenyemʉka kyongo ʉlwakʉva nʉjʉnge akava ipʉlɨka ɨnjovele jaake jʉjuo, jijovua na vɨtɨki vala. 7Avaanhu va lɨpʉgha lɨla vakava videgha kyongo, vakaposaniagha vakatisagha, “Asi, avaanhu vooni ava vano vijova, naVagalilaya? 8Lɨno lwandaani sino vijova, ʉsue tupʉlɨka nʉjʉnge mʉ njovele jaake ɨja kʉholua? 9Apa, pwevale avaanhu vano vahʉmile mʉ ɨɨsi ɨja Vapaliti, nɨ ja Vamedi, nɨ ja Vaelami na mʉ ɨɨsi ɨja Mesopotamia. Avange vahʉmile mʉ kɨghavo#2:9 Kɨghavo, je ɨɨsi jɨno akalongosyagha ʉntwa ʉnʼdebe jʉno akavombagha mʉ vʉtavʉlɨlua vwa ntwa ʉmʼbaha ʉKaisali. Ɨmba kʉ Vʉghanʉle vwa Masio aMahesia. ɨkya Yudea, ɨkya Kapadokia, ɨkya Ponto, ɨkya Asia, 10nɨ kya Pamfilia, na vaanhu ava mʉ ɨɨsi ɨja Fuligia, na mʉ ɨɨsi ɨja Misili. Avange vahʉmile imbale isa ɨɨsi ɨja Libia sino sili piipi nɨ lɨkaaja ɨlya Kileene, avange vahʉmile mʉ lɨkaaja ɨlya Looma. 11Mʉ avuo mwevale aVayahudi na vange vano vahʉmile mʉ ɨɨsi isingi, vano vivɨngɨlɨla ʉlwɨtɨko lwitu ʉlwa Kɨyahudi, pwevale aVakilete na Valabu. Lola, ʉsue tweni tʉkʉvapʉlɨka vijova injovele siitu, vikʉmʉghinia ʉNgʉlʉve kʉ mbombo imbaha sino avombile!”
12Avaanhu vooni vala vakava videgha na kuuva ni nganighani, viposania viiti, “Inongua isi kwekʉti kɨki?” 13Neke avange mʉ veene vakatengʉla kʉkʉvabenapʉla avɨtɨki vala, vakajova vakati, “Avaanhu ava vaghalile.”
ɄPeteli ilʉvʉlania vwɨmɨla ʉMhepo ʉMwɨmɨke
14Pe ʉPeteli akɨɨma palɨkɨmo na vasungʼhua avange vala kɨjigho na jʉmo, akatengʉla kʉkʉlɨvʉʉla ɨlɨpʉgha lɨla, akajova fiijo akati, “Mwe Vayahudi vajango, na jʉmue mweni mwe vano mukukala mʉ Yelusalemu, mʉmhʉlɨkɨsie vʉnofu nɨvoleke sino sihʉmiile. 15Ʉmue musaagha kuuti avaanhu ava vaghalile, jeeje, navaghalile, ʉlwakʉva ʉnsiki ʉghʉ lwakɨlo, kavalɨlo ka vʉtatu! 16Lɨno, isi se sino ʉNgʉlʉve alyajovile kukilila kwa mʼbɨli ʉYoeli kuuti,
17‘Mʉ fighono ifya vʉsililo,
nilikʉvapeela avaanhu vooni ʉMhepo ghwango.
Avaswambiinu na valɨviinu vilipʉlɨsyagha ɨmhola
kuhʉma kʉlyʉne,
avaana viinu avadɨɨmi nilikʉvapeela inyivonelo,
voope avagoyo viinu nilikʉvapeela injosi.
18Mʉ fighono ifio na vavombi vango,
avakɨnhaata na vakɨjʉʉva,
nilikʉvapeela ʉMhepo ghwango,
kuuti voope vapʉlɨsyaghe ɨmhola kuhʉma kʉlyʉne.
19Nilivomba ifidegho kʉkyanya,
ni fivalɨlo mʉ ɨɨsi muno.
Kwejiliiva ɨdanda nʉ mwoto,
nɨ lyosi linga lisukagha.
20Ɨlɨjʉva lilihambʉka kuuva ngʼhiisi,
naghʉ mwesi ghuliiva mʉlangali hwene danda.
Isio sooni silivombeka
ye kɨkyale kufika ɨkɨghono ɨkɨvaha ɨkya Mʉtwa ʉNgʉlʉve.
21Neke luliiva, ʉmuunhu ghweni jʉno ɨkʉnsʉʉma
na kʉkʉmhʉvɨɨla ʉMʉtwa, ipokua.’ ”#Yoeli 2:28-32
22ɄPeteli akafijovagha akatisagha, “Ʉmue mwe vakɨnhaata Vaisilaeli, mʉpʉlɨkɨsie amasio agha! ɄNgʉlʉve akavahʉfisie ʉmue kuuti ivomba ɨmbombo kukilila ʉYesu ʉMʉnasaleti. Ʉmue mʉkagwile kuuti, mwa Yesu ʉjuo avombile ifidegho ni fivalɨlo fino fili papinga pakate palyʉmue. 23ɄNgʉlʉve alyakagwile kuhʉma mʼbʉkʉʉlʉ sino silihʉmɨla. Lɨno ndavʉle alyataviike, akantavʉla ʉYesu ʉjuo iise kʉlyʉmue. Ʉmue mʉkamʼbuda pano mʉkamʼbɨɨka mʉ mavoko gha vaanhu avaviivi,#2:23 Vaanhu avaviivi: Apa vijovua avaanhu vano navakavɨngɨlɨlagha indaghɨlo isa Moose, kwekʉti avaanhu vano navaale Vayahudi. avuo vakankomelela pa kɨkovekano. 24Neke ʉNgʉlʉve akamwavʉla mʉ lʉpumuko ʉlwa vʉfue, akansyʉsia kuhʉma kʉ vafue, ʉlwakʉva ʉvʉfue navwale ni ngʉfu isa kʉjigha sinkoleliile. 25Ʉntwa ʉDavɨdi alyajovile isi vwɨmɨla ʉYesu kuuti,
‘Ʉne nɨkava nɨkʉmwagha ʉMʉtwa ʉNgʉlʉve
kuuti alɨ nuune ifighono fyoni.
Ʉlwakʉva ʉmwene alɨ palɨkɨmo nuune,
nakwekɨlɨ ɨkya kʉnyoghofia.
26Pe ʉmwojo ghwango ghʉkahovoka,
kange nɨkalulutila nʉ lʉkeelo.
Ʉmʼbɨlɨ ghwango ghwope ghʉlɨ nʉ lʉhʉvɨɨlo ʉlwa vwʉmi,
27ʉlwakʉva ʉve nʉngandeke kʉvʉfue,
nambe kʉkʉmʉleka ʉMwɨmɨke ghwako kuuti avole.
28Ʉsonile isɨla isa vwʉmi.
Kange ghulikʉmheela ʉlʉkeelo,
pano niliiva palɨkɨmo nuuve.’#Sabuli 16:8-11 ”
29ɄPeteli akavavʉʉla kange akati, “Vanyalʉkolo vango, nilonda nɨvavʉʉle kɨsila kʉfisa kuuti, ʉnkʉʉlʉ ghwitu ʉDavɨdi alyafwile, akasyɨlua, najɨ mbiipa jaake pwejɨlɨ palyʉsue apa nambe lɨno. 30ɄDavɨdi alyakagwile kuuti, ʉNgʉlʉve alyajɨghile kʉkʉmwɨmɨka jʉmonga kuhʉma mʉ kɨsina kyake kuuva ntwa, pa vʉtwa vwake.#Sabuli 132:11 Kange alyale mʼbɨli, 31alyasivwene sino silihʉmɨla, fye nambe akajova isa kʉsyʉka ʉKɨlɨsite kuuti, ʉNgʉlʉve naangamʉleke kʉvʉfue, nambe ʉmʼbɨlɨ ghwake naghʉlyavolile. 32ɄNgʉlʉve akansyʉsisie ʉYesu ʉjuo, na jʉsue tweni tʉlɨ volesi va mhola ɨjɨ. 33ɄNgʉlʉve akantosia ʉYesu kuuti ateme palɨkɨmo nʉ mwene,#2:33 Ateme palɨkɨmo nʉ mwene: Mʉ Kɨyunaani lɨlembilue, kukukala kʉ lʉvoko lwake ʉlwa kʉndio. akampeela ʉMhepo ʉMwɨmɨke. Pe ʉYesu atʉletiile ʉsue ʉMhepo ʉMwɨmɨke, jʉno ʉNgʉlʉve alyalaghile kʉkʉtʉpeela. ɄMhepo ʉjuo ghwe jʉno avombile isi sino mʉkʉsivona lɨno na kʉkʉsipʉlɨka. 34ɄDavɨdi jʉjuo naalyatoghile kʉkyanya, looli alyajovile kuuti,
‘ɄMʉtwa ʉNgʉlʉve akamʼbʉʉla ʉMʉtwa ghwango,
“Ʉʉve nʉ vʉtavʉlɨlua palɨkɨmo nuune,
35kuhanga nɨkʉtange ʉvaleme avalʉgʉ vaako,
ʉvateme.” ’ ”#2:35 Kuhanga nɨkʉtange ʉvaleme avalʉgʉ vaako, ʉvateme: Mʉ Kɨyunaani lɨlembilue, kuhanga nɨvavɨɨke avalʉgʉ vaako paasi pa maghʉlʉ ghaako.#Sabuli 110:1
36ɄPeteli akava ifijova iiti, “Lɨno, aVaisilaeli vooni vakagʉlaghe vʉnofu kuuti, ʉYesu ʉjuo jʉno ʉmue mʉkankomeliile pa kɨkovekano, ʉNgʉlʉve amʼbɨkile kuuva ghwe Mʉtwa, kange ghwe Kɨlɨsite.”#2:36 Kɨlɨsite: Lɨtavua mʉ njovele ɨja Kɨyunaani, mʉ Kɨebulania viiti, Mesiya, amatavua agha kwekʉti, jʉno apakilue amafuta (ɨmikue). Ɨmba kʉ Vʉghanʉle vwa Masio aMahesia.
37Avaanhu vala ye vapʉliike amasio aghuo, ghakavakola mʉ moojo ghaave. Vakamposia ʉPeteli na vasungʼhua avange vakati, “Vanyalʉkolo viitu, lɨno tʉvombe kɨki?” 38ɄPeteli akavamʉla akati, “Nʉjʉnge alataghe inyɨvi saake, na kukwofughua mʉ lɨtavua ɨlya Yesu Kɨlɨsite, neke apyanɨlue inyɨvi saake, pe mukwʉpɨla ʉMhepo ʉMwɨmɨke. 39Ʉlwakʉva ʉNgʉlʉve alyalaghile kʉkʉvapeela ʉMhepo ʉMwɨmɨke. Alyalaghile kʉkʉvapeela ʉmue na vaana viinu na vaanhu vooni vano valɨ kʉ vʉtali, kwekʉti ʉmuunhu ghweni jʉno ʉNgʉlʉve ʉMʉtwa ghwitu ɨkʉnkemeela.”
40ɄPeteli akava ifikʉvavʉʉla avaanhu vala amasio aghange minga agha kʉvapavɨla akatisagha, “Mʉnsʉʉme ʉNgʉlʉve avapoke, kuuti mʉleke kutipulua palɨkɨmo na vaanhu ava kɨsina ɨkɨ ɨkɨhosi.” 41Ɨkɨghono ɨkio avaanhu vano valyʉpiile ɨmhola ɨjio, vakofughua. Avaanhu imbilima itatu ndɨɨkɨ vakongelela mʉ kɨpʉgha ɨkya vɨtɨki. 42Avɨtɨki vooni vakakongʼhanagha palɨkɨmo, vakavɨngɨlɨlagha imbʉlanɨsio isa vasungʼhua, kange vakahangagha ʉnkate#2:42 Vakahangagha ʉnkate: Ʉnsiki ʉghuo ghwe ghʉno vakalisagha palɨkɨmo ɨkyakʉlia ni fyɨmɨke fya Mʉtwa. na kukufuunya.
Ʉvʉhangɨlanɨsi vwa vɨtɨki
43Avaanhu vooni vakava vikʉmwoghopa ʉNgʉlʉve, ʉlwakʉva avasungʼhua vakavombagha ifidegho ni fivalɨlo finga. 44Avaanhu vooni vano valyamwɨtiike ʉYesu, valyale kɨɨnu kɨmo, kange nʉjʉnge kɨno alɨ nakyo, vakahangagha. 45Vakaghʉsyagha ifiinu fyave, neke indalama vakaghavanagha kulɨngʼhana nʉ vʉfumbue vwa muunhu. 46Ifighono fyoni vakakongʼhanagha mʉ nyumba ɨnyɨmɨke ɨja kufunyila,#2:46 Nyumba ɨnyɨmɨke ɨja kufunyila: Ɨmba kʉ Vʉghanʉle vwa Masio aMahesia. kange vakahangɨlanɨlagha palɨkɨmo mʉ nyumba saave. Vakavombagha ʉluo nʉ lʉkeelo nʉ mwojo ʉmʼbalafu. 47Vakamʉghiniagha ʉNgʉlʉve, nava vaanhu vooni vakavahovokelagha. Ifighono fyoni ʉMʉtwa ʉYesu akavapokagha avaanhu, ɨkɨpʉgha ɨkya vɨtɨki kɨkongelelagha.
Actualmente seleccionado:
Mbombo sa Vasungʼhua 2: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.