Mbombo sa Vasungʼhua 16
16
ɄPaulo nʉ Siila vikʉntoola ʉTimoti
1ɄPaulo nʉ Siila vakalʉta kʉ Delibe, pambele vakafika kʉ Lisitila. Ʉkuo kwealyale ʉmʼbɨngɨlɨli jʉmonga jʉno akatambʉlwagha Timoti. Ʉngʼina ghwa Timoti alyale Mʉyahudi, kange alyale ɨkʉmwɨtɨka ʉYesu, ʉviise alyale Mʉyunaani. 2ɄTimoti akajovwagha vʉnofu na vɨtɨki avajaake ava kʉ Lisitila na kʉ Ikonio vwɨmɨla amaghendele ghaake amanono. 3Neke ʉPaulo akalondagha ʉTimoti avisaghe lʉmo nʉ mwene kʉno ilʉta, pe akamʼbombela ɨkɨvʉngo ɨkya Vayahudi ɨkya kʉdumulua ɨngola ɨja kɨdɨɨmi, kʉkʉvahovosia aVayahudi vooni vano vakikalagha imbale isio. Alyavombile ʉluo, ʉlwakʉva aVayahudi avuo valyakagwile kuuti, ʉviise ghwa Timoti alyale Mʉyunaani.#16:3 Ʉviise ghwa Timoti alyale Mʉyunaani: Ɨmhola ɨjɨ jihʉfia kuuti ʉTimoti naalyale Mʉyahudi, kwekʉti naalyavombilue ɨkɨvʉngo ɨkya kʉdumula ɨngola ɨja kɨdɨɨmi. Mʉ ʉluo aVayahudi navaale vikʉmwʉpɨla kuhanga avombelue ɨkɨvʉngo ɨkio. 4Pepano ʉPaulo na vajaake, vakava vilʉta mʉ makaaja minga vikʉvavʉʉla avɨtɨki sino avasungʼhua na valoleleli kʉ Yelusalemu, valaghiile kuuti vagadɨlɨlaghe. 5Avɨtɨki vakava vifikangala mʉ lwɨtɨko, na vange vinga vakava vikwongelela jaatu kʉkʉmwɨtɨka ʉYesu.
ɄPaulo sikʉmwisila inyivonelo
6ɄPaulo na vajaake vakakanua nʉ Mhepo ʉMwɨmɨke kupʉlɨsia imhola isa Mʉtwa ʉYesu mʉ kɨghavo ɨkya Asia. Pe vakakilila mʉ ɨɨsi ɨja Fuligia nɨ ja Galatia. 7Ye vafikile mʉ mhaka ɨja ɨɨsi ɨja Misia, vakalondagha kukwingila mʉ kɨghavo ɨkya Bitinia, neke ʉMhepo ghwa Yesu akavakaana kukwingila mʉ kɨghavo ɨkio. 8Pe vakakilila mʉ Misia, vakalʉta mʉ lɨkaaja ɨlya Tuloa. 9Neke ɨkɨghono ɨkio pakɨlo, ʉPaulo sikamwisila inyivonelo. Mʉ nyivonelo isio, akamwagha ʉmuunhu jʉmonga kuhʉma mʉ kɨghavo ɨkya Makedonia ɨmile pavʉlongolo pa mwene ɨkʉnsʉʉma iiti, “Ʉlovoke, ghwise kʉ Makedonia ʉtʉtange.” 10ɄPaulo ye asivwene inyivonelo isio, tʉkakagʉla kuuti, ʉNgʉlʉve atʉkemelile kupʉlɨsia kʉla ɨMhola ɨNofu. Pe tʉkilɨngʼhania ngʼhaningʼhaani kulʉta kʉ Makedonia.
ɄLidia ɨkʉmwɨtɨka ʉYesu
11Pe tʉkavʉʉka kʉ Tuloa nɨ ngalava, tʉkafika mʉ ɨɨsi ɨja Samotilake jɨno jɨlyale pakate pa nyanja. Ɨkɨghono ɨkya vʉvɨlɨ tʉkafikyʉlagha, tʉkafika mʉ lɨkaaja ɨlya Neapoli. 12Kuhʉma apuo tʉkaghenda tʉkafika mʉ lɨkaaja ɨlya Filipi. Ɨlɨkaaja ɨlio lɨlyale lɨtambʉlɨke mʉ makaaja ghooni ghano ghalyale mʉ kɨghavo ɨkya Makedonia. Ɨlɨkaaja ɨlio aValooma vakatemagha na kukukala. Mʉ lɨkaaja ɨlio tʉkikalile ifighono fidebe. 13Ɨkɨghono ɨkya Sabati tʉkavʉʉka mʉ lɨkaaja lɨla, tʉkalʉta piipi nɨ kɨkogha kɨmonga, kʉno tʉkahʉvɨlagha kuuti ndepoonu tʉkʉpaagha pamonga, pano avaanhu vikongʼhaana kukufuunya kwa Ngʉlʉve. Ye tʉpaghile, tʉkikala, tʉkatengʉla kujova na vakɨjʉʉva vano valyakongʼhanile pala. 14Mʉ vakɨjʉʉva vala vano valyale vikʉtʉpʉlɨkɨsia, mwealyale ʉmʉkɨjʉʉva jʉmonga jʉno akatambʉlwagha Lidia. Ʉmʉkɨjʉʉva ʉjuo alyale mhʉma mʉ lɨkaaja ɨlya Tuatila, naalyale Mʉyahudi neke alyɨtiike kuvɨngɨlɨla ʉlwɨtɨko ʉlwa Kɨyahudi. Ʉmuunhu ʉjuo akaghʉsyagha amenda amalangali ghano ghaale gha ndalama nyinga. Neke ʉPaulo ye apʉlisie ɨMhola ɨNofu, ʉMʉtwa ʉYesu akadindula ʉmwojo ʉghwa mʉkɨjʉʉva jʉla, akɨtɨka ɨmhola ɨjio. 15Pepano ʉmwene na vaanhu vooni ava mʉ nyumba jaake vakofughua. Pe akati, “Nave muvona kuuti nɨmwɨtiike ʉMʉtwa mʉ vwakyangʼhaani, mwise mukale mʉ nyumba jango.” Akasimilisia, tʉkalʉta.
ɄPaulo nʉ Siila vidindilua mʉ ndinde
16Ɨkɨghono kɨmonga ye tulʉta pano avaanhu vakifunyilagha kwa Ngʉlʉve, tʉkatangʼhana nʉ mhɨnja jʉmonga ʉnkami jʉno alyale nɨ lɨpepo ɨlɨlamafu. Ɨlɨpepo ɨlio lɨkampeleliile kuuva ni ngʉfu isa kʉlaghʉla. Vwɨmɨla ɨmbombo jaake ɨja kʉlaghʉla, avatwa vaake vakʉpɨlagha indalama nyinga. 17Ʉmhɨnja ʉjuo akava ɨkʉmʼbɨngɨlɨla ʉPaulo nusue, kʉmo ijova fiijo iiti, “Avaanhu ava, vavombi va Ngʉlʉve ʉMʼbaha ghwa fyoni. Vipʉlɨsia kʉlyʉmue ɨsɨla ɨja vʉpoki.” 18Ʉmhɨnja ʉjuo akava ijova amasio aghuo ifighono finga. Ɨkɨghono kɨmonga, ʉPaulo akakalala kyongo, akasyetʉka na kʉkʉlɨdalɨkɨla ɨlɨpepo ɨlɨlamafu akati, “Nɨkʉkʉvʉʉla mʉ lɨtavua lya Yesu Kɨlɨsite, hʉma mwa mhɨnja ʉjʉ!” Pala pala ɨlɨpepo lɨla lɨkahʉma.
19Avatwa va mhɨnja jʉla ye vavwene kuuti, ɨsɨla ɨja kʉkavɨla indalama jɨnangiike, vakankola ʉPaulo nʉ Siila vakavalulunja kuhanga kufika kʉ mpuulo, kʉ vavaha va lɨkaaja. 20Pe vakavavʉʉla avavaha vala vano vaale vahɨghi vakati, “Avaanhu ava Vayahudi, kange vipela amabaatu mʉ lɨkaaja liitu. 21Vivʉlanɨsia inyiiho saave sino ʉsue twe Valooma tʉkanilue kʉkʉsɨtɨka nambe kʉkʉsivɨngɨlɨla.”
22Ɨlɨpʉgha lya vaanhu lɨkɨɨma palɨkɨmo na kʉkʉmwalʉkɨla ʉPaulo nʉ Siila, neke avahɨghi vala, vakavafuula amenda ʉPaulo nʉ Siila na kulamʉla kuuti, vakopue ni ngʼhwegho. 23Ye vakopilue fiijo, vakadindilua mʉ ndinde. Pe avahɨghi vala vakamʉlaghɨla ʉmʉloleleli ghwa ndinde kuuti avalolelelaghe vʉnofu. 24Ʉmʉloleleli jʉla ye apʉliike ʉlʉlaghɨlo lʉla, akavavɨɨka mʉ kyʉmba ɨkya kʉkate fiijo na kʉkʉvakʉngɨlɨsia mʉ mabavo.
ɄPaulo nʉ Siila vihʉma mʉ ndinde
25Mʉ kɨlo nkate, ʉPaulo nʉ Siila vakava vikufuunya na kukwɨmba inyɨmbo isa kʉmʉghinia ʉNgʉlʉve, neke avakʉngua avange vakava vikʉvapʉlɨkɨsia. 26Nakalɨngi ɨkɨsenyeena ɨkɨvaha kɨkahʉmɨla, ɨndinde nalʉ lwalo lwake fikasukanɨka, amalyango ghooni ghakadinduka, nasi nyololo sooni sino vakavakʉngiile avakʉngua sikadumuka. 27Ʉmʉloleleli ghwa ndinde akasisimuka, akavona amalyango gha ndinde madindule. Apuo pe akatoola ɨbamba jaake ilonda kukubuda, ʉlwakʉva akasaghagha kuuti avakʉngua vakɨmbiile. 28Neke ʉPaulo akajova fiijo akati, “Nʉngibudaghe! Ʉsue tweni mwetʉle muno!”
29Pe ʉmʉloleleli jʉla akasʉʉma avavombi vamʉletele itaala. Ye valetile, akingila lʉvɨlo mʉ ndinde na kughua pa maghʉlʉ gha Paulo nʉ Siila kʉmo itetema. 30Pe akavahʉmia kʉnji, akavaposia akati, “Vatwa vango, nilondua nɨvombe kɨki neke nɨkave ʉvʉpoki?” 31Vakamwamʉla vakati, “Ʉmwɨtɨke ʉMʉtwa ʉYesu, ʉmwene ɨkʉkʉpoka ʉve palɨkɨmo na vaanhu vooni ava mʉ nyumba jaako.” 32Pe vakamʼbʉlanɨsia ɨlɨsio lya Mʉtwa palɨkɨmo na vaanhu vooni ava mʉ nyumba jaake. 33Ʉnsiki ghʉla ghʉla ʉghwa pakɨlo, akavatoola na kʉkʉvasuka ifikoongʼo fyave. Pe akofughua ʉmwene palɨkɨmo na vaanhu vooni ava mʉ nyumba jaake. 34Pepano akavatwala kʉ nyumba jaake na kʉkʉvapeela ɨkyakʉlia, akava nʉ lʉkeelo ʉlʉkome, ʉlwakʉva amwɨtiike ʉNgʉlʉve palɨkɨmo na vooni ava mʉ nyumba jaake.
35Ɨkɨghono ɨkya vʉvɨlɨ palwakɨlo, avahɨghi vakavasuungʼha avasikali kwa mʉloleleli ghwa ndinde vajove kuuti, “Mʉvadindulile avaanhu vala valʉtaghe.” 36Ʉmʉloleleli jʉla akamʼbʉʉla ʉPaulo ɨmhola ɨjio akati, “Avahɨghi vasungʼhile ɨmhola kuuti nɨvadindulile mʉlʉtaghe. Lɨno mʉhʉme, mʉlʉtaghe nʉ lʉtengaano.” 37Neke ʉPaulo akavamʉla avaanhu vala akati, “Vakatʉtovile pamaaso gha vaanhu vooni kɨsila kʉtʉhɨgha, palɨkɨmo na kuuti ʉsue tʉlɨ Valooma#16:37 Vakatʉtovile pamaaso gha vaanhu vooni kɨsila kʉtʉhɨgha, palɨkɨmo na kuuti ʉsue tʉlɨ Valooma: Indaghɨlo isa Valooma nasikɨtɨkɨsyagha kʉkʉnkʉnga nambe kʉkʉntova ʉnkʉngua ʉMʉlooma kɨsila kʉmpʉlɨkɨsia. va kyangʼhaani, kange vakatʉdindiile mʉ ndinde, lɨno kɨki vilonda pikʉtʉhʉmia kɨsyefu? Nalʉnoghiile nambe padebe! Lulondua viise vavuo kʉkʉtʉhʉmia.” 38Avasikali vakagomoka kʉkʉvavʉʉla avahɨghi amasio ghala, voope ye vapʉliike kuuti ʉPaulo nʉ Siila Valooma, vakoghopa, 39vakalʉta kʉkʉvapelepesia kuuti vavasaghɨle. Pe vakavahʉmia na kʉkʉvasʉʉma kuuti vavʉʉke mʉ lɨkaaja lɨla. 40ɄPaulo nʉ Siila ye vahʉmile mʉ ndinde, vakalʉta kʉ kaaja ja Lidia. Ʉkuo vakatangʼhana na vɨtɨki avajanave, pe vakavakangasia amoojo ghaave, vakavʉʉka vilʉta.
Actualmente seleccionado:
Mbombo sa Vasungʼhua 16: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.