Mbombo sa Vasungʼhua 15
15
Avasungʼhua vikongʼhaana kʉ Yelusalemu
1Kʉ Antiokia ʉkuo vakiisa avaanhu vamonga kuhʉma kʉ Yudea. Vakatengʉla kuvʉlanɨsia avɨtɨki viiti, “Nave namuvombelua ɨkɨvʉngo ɨkya kʉdumula ɨngola ɨja kɨdɨɨmi#15:1 Ɨkɨvʉngo ɨkya kʉdumula ɨngola ɨja kɨdɨɨmi: Ɨmba ɨlɨsio Kɨvʉngo ɨkya kʉdumula ɨngola ɨja kɨdɨɨmi kʉ Vʉghanʉle vwa Masio aMahesia. ndavʉle silʉngɨka indaghɨlo isa Moose, namʉngakave ʉvʉpoki.” 2ɄPaulo nʉ Balinaba navakɨtɨngʼhana na vaanhu vala, pe vakatengʉla kukanɨngʼhana navo kyongo. Pambele avɨtɨki ava kʉ Antiokia vakalamʉla kuuti, ʉPaulo nʉ Balinaba palɨkɨmo na vɨtɨki vamonga mʉ veene, valʉte kʉ Yelusalemu, vapʉlɨngʼhane na vasungʼhua na valoleleli va kɨpʉgha ɨkya vɨtɨki, vwɨmɨla ɨmhola ɨjio.
3Pepano ʉPaulo na vajaake vakasungʼhua kʉ Yelusalemu. Ye vilʉta, vakakilila kʉ Foinike na kʉ Samalia, vikwoleka vʉle avaanhu vano naVayahudi vamwɨtiike ʉYesu. Ɨmhola ɨjio jɨkavahovosia kyongo avɨtɨki vooni. 4Ye vafikile kʉ Yelusalemu, avasungʼhua palɨkɨmo na valoleleli va kɨpʉgha ɨkya vɨtɨki, vakamwʉpɨla ʉPaulo nʉ Balinaba palɨkɨmo na vɨtɨki avange. ɄPaulo nʉ Balinaba vakavavʉʉla sooni sino ʉNgʉlʉve avombile kukilila aveene. 5Neke avɨtɨki vamonga vano valyale va kɨpʉgha ɨkya Vafalisayi vakɨɨma vakati, “Avaanhu vano naVayahudi ndalʉve ndaani, vavombelwaghe ɨkɨvʉngo ɨkya kʉdumula ɨngola ɨja kɨdɨɨmi kuuti, vaave ndavʉle aVayahudi na kʉkʉvalaghɨla kuuti, vavɨngɨlɨlaghe indaghɨlo isa Moose.”
6Pe avasungʼhua na valoleleli vakakongʼhaana kuuti vavɨɨke vʉnono ɨmhola ɨjio. 7Ye vajovile ʉnsiki ntali, ʉPeteli akɨɨma akati, “Vanyalʉkolo vango, ʉmue mʉkagwile kuuti ʉnsiki ghʉmonga ghʉno ghʉlyakilile,#Mbombo sa Vasungʼhua 10:1–11:18 ʉNgʉlʉve alyasalwile ʉne kuhʉma pakate palyʉmue, kuuti nɨpʉlɨsyaghe ɨMhola ɨNofu kʉ vano naVayahudi kuuti vapʉlɨke na kʉkʉmwɨtɨka ʉYesu Kɨlɨsite. 8ɄNgʉlʉve jʉno akagwile amoojo gha vaanhu, ahʉfisie kuuti avʉpiile voope vano naVayahudi, vwɨmɨla kʉkʉvapeela ʉMhepo ʉMwɨmɨke ndavʉle alyatʉpeliile ʉsue. 9Avavombiile aveene ndavʉle atʉvombiile ʉsue twe Vayahudi, ʉlwakʉva avavalisie amoojo ghaave vwɨmɨla kʉkʉmwɨtɨka ʉMʉtwa ʉYesu. 10Lɨno, kɨki mʉkʉmʉghela ʉNgʉlʉve, kʉkʉvatwɨka avavɨngɨlɨli avajiitu ʉnsigho ʉghwa kʉvɨngɨlɨla indaghɨlo, sino avakʉʉlʉ viitu nambe jʉsue tʉkunilue kuvɨngɨlɨla? 11Looli ʉsue tukwɨtɨka kuuti, tukava ʉvʉpoki mʉ lʉsʉngʉ lwa Mʉtwa ʉYesu ndavʉle aveene.”
12Pe avaanhu vooni vano valyale pala vakajika kɨmihe, vikʉmpʉlɨkɨsia ʉBalinaba nʉ Paulo pano vikwoleka vʉle ʉNgʉlʉve avombile ifidegho ni fivalɨlo kukilila aveene kʉ vaanhu vano naVayahudi. 13Ye vamalile kujova, ʉYakovo akati, “Vanyalʉkolo vango, mʉpʉlɨkɨsie! 14ɄSimoni#15:14 ɄSimoni: Ɨlɨtavua ɨlɨngɨ akatambʉlwagha Peteli. Ɨmba akadebe aka lekelalʉbale. atʉvʉlile vʉle ʉNgʉlʉve alyavavombiile avaanhu vano naVayahudi ʉnsiki ghʉno ghʉlyakilile, akavasalʉla vamonga mʉ veene vaave vaanhu vaake. 15Isio sikwɨtɨngʼhana na sino silembilue mʉ fitabu ifya vavɨli kuuti,
16‘ɄMʉtwa ʉNgʉlʉve alyajovile akati,
“Ye sivombiike isio,
niligomoka kujenga kange ɨnyumba ɨja Davɨdi
jɨno jɨghwile.
Kyaninosia vʉpia jɨno jɨkahemʉngʼhiine,
na kʉkʉjɨmia.
17Pepano avaanhu avange vooni,
avaanhu vano naVayahudi vano nɨvakemelile
kuuti vaave vango,
vilikʉmʉlonda ʉMʉtwa ʉNgʉlʉve.”#Amosi 9:11-12
Fye enendɨɨkɨ ijova ʉMʉtwa ʉNgʉlʉve,
18jʉno ahʉfisie isi kuhʉma mʼbʉkʉʉlʉ.’ ”
19ɄYakovo akafijovagha akatisagha, “Lɨno, ʉne nivona kuuti, tʉleke kʉkʉvakatasia avaanhu vano naVayahudi, vano vamwɨtiike ʉNgʉlʉve. 20Looli, tʉvalembele ɨkalata kuuti navangavisaghe vavwafu, valekaghe kulia inyama sino vatekiile kʉ mangʉlʉve, inyama isa fikanu fino vabudile vʉbunga, nambe kunyua ɨdanda.#Valeevi 17:10-14 21Ʉlwakʉva kuhʉma mʼbʉkʉʉlʉ, aVayahudi vipʉlɨka indaghɨlo isa Moose vʉle sipʉlɨsɨvua mʉ makaaja ghooni na kukwɨmbua mʉ masinagogi ifighono fyoni ifya Sabati.”
Ɨkalata kʉ vɨtɨki vano naVayahudi
22Pepano avasungʼhua na valoleleli nɨ kɨpʉgha kyoni ɨkya vɨtɨki vakalamʉla kʉkʉvasalʉla avaanhu vamonga mʉ veene, kuuti vavasuungʼhe kʉ Antiokia palɨkɨmo nʉ Paulo nʉ Balinaba. Pe vakavasalʉla avaanhu vavɨlɨ vano valyale valongosi mʉ kɨpʉgha ɨkya vɨtɨki, jʉmonga alyale ghwe Yuuda, ɨlɨtavua ɨlɨngɨ ghwe Balisaba, ʉjʉnge alyale ghwe Siila. 23Pe vakavasuungʼha nɨ kalata jɨno jɨlembilue ndɨɨkɨ,
“Ʉsue twe vasungʼhua, na valoleleli va kɨpʉgha ɨkya vɨtɨki, tʉkʉvahʉngɨla ʉmue mwe vɨtɨki vajiitu, mwe vano namʉlɨ Vayahudi mwe vano mʉlɨ kʉ Antiokia, kʉ Silia na kʉ Kilikia. 24Tʉpʉliike kuuti, avaanhu vamonga kuhʉma mʉ kɨpʉgha kiitu, vakisile kʉkʉvavʉʉla imhola isa kʉvagasia na kʉkʉvasofia. Avaanhu avuo natʉkavasungʼhile ʉsue. 25Lɨno, vwɨmɨla ɨmhola ɨjio, twɨtɨngʼhiine kusalʉla avaanhu vamonga na kʉkʉvasuungʼha kʉlyʉmue. Avaanhu avuo vikwisa kʉlyʉmue palɨkɨmo na vaghanɨke viitu ʉBalinaba nʉ Paulo. 26Avaghanɨke viitu avuo vitavwile kʉkʉmʼbombela ʉMʉtwa ghwitu ʉYesu Kɨlɨsite, nambe kʉʉve kwe kʉfua.
27Lɨno, avaanhu vano tʉvasungʼhile kʉlyʉmue, ghwe Yuuda nʉ Siila. Avuo vikʉvavʉʉla sino tʉvalembiile. 28ɄMhepo ʉMwɨmɨke nusue tʉkeliile kuuti, tʉleke kʉkʉvatwɨka ʉnsigho ʉghʉnge pa isi sino mʉnoghiile kuvɨngɨlɨla: 29Namʉngalisaghe inyama sino vatekiile kʉ mangʉlʉve, nambe ɨdanda nambe inyama isa fikanu fino vabudile vʉbunga, kange namʉngavisaghe vavwafu. Nave mʉkʉsileka isio, apuo muuva muvomba vʉnofu. Hongela! Tutangʼhanagha!”
30ɄPaulo na vajaake ye vahwesinie na vano vavasungʼhile, vakavʉʉka vilʉta kʉ Antiokia. Ʉkuo vakakongʼhania ɨkɨpʉgha ɨkya vɨtɨki, vakavapeela ɨkalata jɨla. 31Avɨtɨki vala ye vɨmbilue ɨkalata jɨla, vakahovoka na kukangala amoojo ghaave. 32ɄYuuda nʉ Siila vano valyale vavɨli, vakavavʉʉla avɨtɨki amasio minga agha kʉvatanga na kʉkʉvakangasia mʉ lwɨtɨko. 33Ye vikalile kʉla ifighono ndafilɨngi, avɨtɨki ava kʉ Antiokia vakavatavʉla kuuti, valʉtaghe nʉ lʉtengaano kugomoka kʉ vano vakavasungʼhile. 34Neke ʉSiila akavona lʉnofu kujigha kʉ Antiokia, looli ʉYuuda akagomoka mwene kʉ Yelusalemu.#15:34 Akadebe aka namwekale mʉ fitabu fimonga ifikʉʉlʉ. 35ɄPaulo nʉ Balinaba vakajigha kʉ Antiokia, palɨkɨmo na vange vinga, vakavʉlanɨsyagha na kupʉlɨsia ɨlɨsio lya Mʉtwa ʉYesu.
ɄPaulo nʉ Balinaba vilekana
36Ye fikilile ifighono fidebe, ʉPaulo akamʼbʉʉla ʉBalinaba akati, “Tʉgomoke mʉ makaaja ghooni muno tʉkapʉlisie ɨlɨsio lya Mʉtwa ʉYesu, tʉkavalole avɨtɨki kuuti vighendelela ndaani.” 37ɄBalinaba akɨtɨka, neke akalondagha valʉte palɨkɨmo nʉ Yohani jʉno akatambʉlwagha Malɨka. 38Neke ʉPaulo akakaana kulʉta palɨkɨmo nʉ Malɨka, ʉlwakʉva ʉlʉtasi alyavalekile kʉ Pamfilia, akavʉhɨɨla kuvomba ɨmbombo palɨkɨmo na veene. 39Apuo ʉPaulo nʉ Balinaba vakakanɨngʼhana kyongo kuhanga kulekana. Pe ʉBalinaba akantoola ʉMalɨka, vakapanda ɨngalava kulʉta kʉ Kipulo. 40Neke ʉPaulo akantoola ʉSiila. Ye akyale pivʉʉka, avɨtɨki avajaake ava pala vakansʉmɨla kuuti, ʉMʉtwa ampelaghe ʉlʉsʉngʉ lwake. 41Pe akavʉʉka pala, akava ikila mʉ kɨghavo ɨkya Silia nɨ kya Kilikia, ikangasia ifipʉgha ifya vɨtɨki.
Actualmente seleccionado:
Mbombo sa Vasungʼhua 15: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.