Mbombo sa Vasungʼhua 13
13
ɄSavʉli nʉ Balinaba vikwɨmɨkua mʉ mbombo ja Ngʉlʉve
1Mʉ kɨpʉgha ɨkya vɨtɨki ɨkya kʉ Antiokia mwevalyale avavɨli na vavʉlanɨsi. Avaanhu avuo vaale ve ava: ʉBalinaba, ʉSimioni jʉno akatambʉlwagha Nigeli,#13:1 Nigeli: Kwekʉti ʉmuunhu ʉntiitu. ʉLukio ʉghwa kʉ Kileene, ʉSavʉli nʉ Manaeni jʉno akasʉngilue lʉmo nʉ ntwa ʉHelode ʉAntipa. 2Ɨkɨghono kɨmonga, avaanhu ava ye vikufuunya kwa Mʉtwa ʉNgʉlʉve na kuvʉhɨɨla kulia mʉlwa kufuunya,#13:2 Kuvʉhɨɨla kulia mʉlwa kufuunya: Ɨmba kʉ Vʉghanʉle vwa Masio aMahesia. ʉMhepo ʉMwɨmɨke akavavʉʉla akati, “Mʉmbaghʉlɨle ʉBalinaba nʉ Savʉli kuuti vavombaghe ɨmbombo jɨno nɨvakemeliile.” 3Neke ye vifunyile na kuvʉhɨɨla kulia mʉlwa kufuunya, vakavɨɨka amavoko ghaave pa veene kʉkʉvafuunya, vakavatavʉla valʉtaghe.
ɄBalinaba nʉ Savʉli vipʉlɨsia kʉ Kipulo
4ɄBalinaba nʉ Savʉli ye vasungʼhilue nʉ Mhepo ʉMwɨmɨke, vakalʉta kʉ lɨkaaja ɨlya Seleukia. Ʉkuo vakapanda ɨngalava#13:4 Ɨngalava: Ɨmba ɨlɨsio Ngalava kʉ Vʉghanʉle vwa Masio aMahesia. kulʉta kʉ lɨkaaja ɨlya Salami mʉ ɨɨsi ɨja Kipulo, jɨno jaale pakate pa nyanja. 5Ye vafikile mʉ Salami, vakava vipʉlɨsia ɨlɨsio lya Ngʉlʉve mʉ masinagogi agha Vayahudi. Ʉnsiki ʉghuo valyale lʉmo nʉ Yohani ʉMalɨka ʉntangɨli ghwave.
6Vakaghenda mʉ ɨɨsi jooni ɨja Kipulo, kuhanga vakafika mʉ lɨkaaja ɨlya Pafo. Ʉkuo vakatangʼhana nʉ Mʉyahudi jʉmonga ʉmhavi, kange mʼbɨli ghwa vʉdesi. Ʉmuunhu ʉjuo akatambʉlwagha Bali-Yesu.#13:6 Bali-Yesu: Mʉ njovele ɨja Kɨalamu kwekʉti ʉmwana ghwa Yoshua. 7Ʉjʉ alyale ntangɨli ghwa Seligio Paulo, ʉmʼbaha ʉghwa kɨghavo ɨkya Kipulo. Ʉmʼbaha ʉjuo alyale nʉ lʉhala lwinga. ɄSeligio akankemeela ʉBalinaba nʉ Savʉli valʉte kwa mwene, akavavʉʉla kuuti ilonda apʉlɨke ɨlɨsio lya Ngʉlʉve. 8Neke ʉmhavi jʉla ʉBali-Yesu ɨlɨtavua lyake kʉ Kɨyunaani ghwe Elima, akaghela kʉkʉnsigha ʉBalinaba nʉ Savʉli, na kʉkʉmʼbʉʉla ʉmʼbaha ʉjuo kuuti, aleke kukwʉpɨla imbʉlanɨsio na kʉkʉmwɨtɨka ʉKɨlɨsite.
9Pepano ʉSavʉli,#13:9 ɄSavʉli: Ɨlɨ lɨtavua lya Kɨyahudi, kʉ Kɨlooma viiti, Paulo. jʉno ɨlɨtavua ɨlɨngɨ akatambʉlwagha Paulo, akalongosivua nʉ Mhepo ʉMwɨmɨke, akamʉlola fiijo ʉmhavi jʉla akati, 10“Ʉve ʉlɨ mwana ghwa Setano, ʉlɨ mʉlʉgʉ ghwa sooni sino sa kyangʼhaani pamaaso gha Ngʉlʉve! Ʉmemile ʉvʉdesi nʉ vʉsʉfu ʉvwa kʉsyanga avaanhu. Kɨki naghuvʉhɨɨla kukwandʉla isɨla ingolofu isa Mʉtwa ʉNgʉlʉve? 11Lɨno, ʉlʉkwegho lwa Mʉtwa ʉNgʉlʉve lʉkʉkwisila, ghuuva mʼbofu amaaso, naghʉkʉlwagha ʉlʉmuli lwa lɨjʉva kʉ nsiki ghʉmonga.” Nakalɨngi ʉlʉtuuka nɨ ngʼhiisi fikankupikila ʉElima kʉ maaso, akava mʼbofu. Apuo akatengʉla kusyʉtasyʉta ilonda ʉmuunhu ʉghwa kʉnkolelela na kʉkʉmʉlongosia. 12Ʉmʼbaha jʉla ye asivwene sino sivombiike, akamwɨtɨka ʉMʉtwa ʉYesu. Akava idegha kyongo imbʉlanɨsio vwɨmɨla ʉMʉtwa.
ɄPaulo nʉ Balinaba vipʉlɨsia kʉ Antiokia ɨja kʉ Pisidia
13Pe ʉPaulo na vajaake vakapanda ɨngalava kuhʉma mʉ lɨkaaja ɨlya Pafo, kulʉta kʉ Pelige, mʉ kɨghavo ɨkya Pamfilia. Neke ye vafikile kʉ Pelige, ʉYohani ʉMalɨka akavaleka ʉkuo, akagomoka kʉ Yelusalemu. 14ɄBalinaba nʉ Paulo vakavʉʉka kʉ Pelige vakaghenda kufika mʉ lɨkaaja ɨlya Antiokia, lɨno lɨlyale piipi nɨ ɨɨsi ɨja Pisidia. Ɨkɨghono ɨkya Sabati#13:14 Sabati: Ɨmba kʉ Vʉghanʉle vwa Masio aMahesia. ye kɨfikile, vakingila mʉ sinagogi, vakikala. 15Pe ghakɨmbua aMalembe aMɨmɨke kuhʉma mʉ kɨtabu kya Ndaghɨlo sa Moose na mʉ malembe agha vavɨli. Ye ghɨmbilue, avavaha ava sinagogi jɨla vakansuungʼha ʉmuunhu kwa Paulo nʉ Balinaba avavʉʉle kuuti, “Vanyalʉkolo, nave mʉlɨ nɨ lɨsio ɨlya kʉvakangasia avaanhu ava, mʉjove.”
16Pepano, ʉPaulo akɨɨma, akinula ʉlʉvoko lwake kuuti vampʉlɨkɨsie, akajova akati, “Mwe Vaisilaeli na jʉmue mwe vange mwe vano mʉkʉmwoghopa ʉNgʉlʉve, mʉmhʉlɨkɨsie! 17ɄNgʉlʉve ghwitu twe Vaisilaeli ghwe mwene alyavasalwile avakʉʉlʉ viitu. Ye valɨ kʉ vʉgheesi kʉ ɨɨsi ɨja Misili, ʉNgʉlʉve akavatanga vakoloka, kɨkava kɨsina kɨvaha. Pambele mʉ ngʉfu saake imbaha akavalongosia kuhʉma mʉ ɨɨsi jɨla. 18Akigudile vwɨmɨla sino vakavombagha aVaisilaeli amaaka fijigho fine ndɨɨkɨ ye valɨ kʉ lʉkʉve. 19Akavatipula avaanhu ava fisina lekelalʉbale vano vakikalagha mʉ ɨɨsi ɨja Kanaani na kʉkʉvapeela aVaisilaeli ɨɨsi ɨjio kuuva vʉhaasi vwave. 20Isi sooni silyavombiike mʉ maaka filʉndo fine ni fijigho fihaano ndɨɨkɨ.
“Pambele ʉNgʉlʉve akavapeela avalamʉli ava kʉvalongosia, kuhanga kufika ʉnsiki ye ilongosia ʉmʼbɨli ʉSamueli. 21Ye ilongosia ʉSamueli, aVaisilaeli vakava vilonda kuuva nʉ ntwa. ɄNgʉlʉve akavapeela ʉSavʉli ʉmwana ghwa Kishi, ʉghwa kɨkolo kya Benyamini. Ʉjuo akava ntwa ghwave amaaka fijigho fine. 22ɄNgʉlʉve ye amʼbʉsisie ʉSavʉli, akamwɨmɨka ʉDavɨdi kuuva ntwa ghwave. Akamʉghinia ʉDavɨdi akati, ‘Nɨmʼbwene ʉDavɨdi ʉmwana ghwa Yese, ihovosia ʉmwojo ghwango, kange ghwe jʉno ivombagha sooni sino nilonda sivombeke.’#1 Samueli 13:14; Sabuli 89:20
23“Kuhʉma mʉ kɨkolo ɨkya ntwa ʉDavɨdi mwe muno ʉNgʉlʉve akavaletiile aVaisilaeli ʉMpoki ʉYesu, ndavʉle alyavalaghile. 24ɄYesu ye akyale kutengʉla ɨmbombo jaake, ʉYohani alyalongwile kupʉlɨsia kʉ Vaisilaeli vooni kuuti, valataghe inyɨvi saave na kukwofughua. 25ɄYohani ye alɨ mʉ vʉsililo vwa mbombo jaake, akavaposyagha avaanhu akatisagha, ‘Ʉmue musaagha kuuti ʉne neene Kɨlɨsite? Jeeje, ʉne naneene. Pʉlɨkɨsia, ʉmwene ikwisa kʉmbele kʉlyʉne, na jʉʉne nanɨnoghiile nambe kuuva mʼbanda ghwa kʉhʉdʉla ʉtʉkova twa filatu fyake.’
26“Vanyalʉkolo vango, ʉmue mwe va kɨsina kya Abulahamu, na jʉmue mwe vange mwe vano mʉkʉmwoghopa ʉNgʉlʉve, imhola isi isa vʉpoki, ʉNgʉlʉve atʉletiile ʉsue. 27Ʉlwakʉva avaanhu vano vikukala mʉ Yelusalemu, palɨkɨmo na vavaha vaave, navakankagwile ʉYesu, kuuti ghwe Mpoki. Kange, navakaghatangʼhinie amalembe gha vavɨli ghano ghɨmbwagha ifighono fyoni ifya Sabati. Vakamhɨgha ʉYesu kuuti abudue. Mʉ ʉluo, vakava vavombile sino sajovwagha mʉ malembe gha vavɨli kuuti silivombeka. 28Nambe navakalwaghile lʉmonga ʉlwa kʉmhɨgha kuuti abudue, aveene vakansʉʉma ʉPilato amhɨghe kuuti abudue. 29Ye vavombile sooni sino silyalembilue vwɨmɨla ʉYesu, vakamwisia pa kɨkovekano, vakamʼbɨɨka mʉ mbiipa. 30Looli ʉNgʉlʉve akansyʉsia kuhʉma kʉ vafue. 31Pe ʉYesu mʉ fighono finga akihʉfyagha kʉ vaanhu vano valyale lʉmo nʉ mwene,#13:31 Vano valyale lʉmo nʉ mwene: Ava ve vano valyale lʉmo nʉ Yesu ye akyale pifua. kuhʉma kʉ Galilaya kulʉta kʉ Yelusalemu. Avuo ve volesi va mhola jaake mʉ kɨsina kiitu twe Vaisilaeli. 32Na jʉsue tupʉlɨsia kʉlyʉmue ɨMhola ɨNofu jɨno ʉNgʉlʉve alyavalaghile avakʉʉlʉ viitu. 33ƗMhola ɨjio jɨno alyavalaghile, avombile kʉlyʉsue twe vanyeenya vaave vwɨmɨla kʉkʉnsyʉsia ʉYesu, ndavʉle lɨlembilue mʉ Sabuli ɨja vʉvɨlɨ kuuti,
‘Ʉve ʉlɨ Mwanango,
ʉne ʉmʉsyʉghʉ nɨlɨ Vaaso.’#Sabuli 2:7
34“ɄNgʉlʉve alyansyʉsisie ʉYesu kuhʉma kʉ vafue kuuti aleke pifua kange, ndavʉle alyajovile kuuti,
‘Nɨlyajɨghile kʉkʉmpeela ʉDavɨdi inyifuunyo inyɨmɨke,
kyangʼhaani inyifuunyo isio se sino nɨkʉvafuunya ʉmue.’#Yesaya 55:3
35“Ɨlɨsio ɨlio lɨlembilue mʉ Sabuli ɨjɨngɨ kuuti,
‘Nʉngamʉleke ʉMwɨmɨke ghwako kuuti avole.’#Sabuli 16:10 ”
36ɄPaulo akafijovagha akatisagha, “ɄDavɨdi ye avombile isa vughane vwa Ngʉlʉve mʉ kɨsina kyake, akafua. Vakansyɨla kʉ mbiipa isa vakʉʉlʉ vaake, ʉmʼbɨlɨ ghwake ghʉkavola. 37Looli jʉno ʉNgʉlʉve alyansyʉsisie, ʉmʼbɨlɨ ghwake naghʉkavola.
38“Lɨno vanyalʉkolo vango, nilonda mʉkagʉle kuuti vwɨmɨla ʉYesu ʉjuo, mupʉlɨsɨvua kupyanɨlua inyɨvi siinu. 39Ʉmuunhu ghweni jʉno ɨkʉmwɨtɨka ʉYesu ipyanɨlua inyɨvi saake sooni. Ʉluo lwe lʉno avaanhu vakakunilue kukwʉpɨla vwɨmɨla kuvɨngɨlɨla indaghɨlo isa Moose. 40Lɨno, mʉlolaghe vʉnono kuuti sileke kʉkʉvaagha sino silyalembilue mʉ fitabu ifya vavɨli kuuti,
41‘Pʉlɨkɨsia mwe vanya mbedo,
mʉdeghe, mʉfue.
Ʉlwakʉva sino nivomba mʉ fighono fiinu,
nambe ʉmuunhu avavʉʉle ndaani,
namʉngɨtɨke nambe padebe.’#Habakuki 1:5 ”
42ɄPaulo nʉ Balinaba ye vihʉma mʉ sinagogi, avaanhu vakavasʉʉma kuuti, vagomokaghe kange ɨSabati jɨno jikwisa, neke vaghendelele kujova imhola isio. 43Avaanhu ye vapalasiine vivuja, aVayahudi vinga na vano naVayahudi vano vakavɨngɨlɨlagha ʉlwɨtɨko ʉlwa Kɨyahudi, vakamʼbɨngɨlɨla ʉPaulo nʉ Balinaba. Avasungʼhua avuo vakajovagha navo kʉkʉvakangasia kuuti, vaghendelelaghe kuhʉvɨɨla ʉlʉsʉngʉ lwa Ngʉlʉve.
44Ɨkɨghono ɨkɨngɨ ɨkya Sabati ye kɨfikile, avaanhu vinga, ndepoonu ghwiti lɨkahʉmile ɨlɨkaaja lyoni ɨlya Antiokia, vakakongʼhaana kupʉlɨkɨsia ɨlɨsio lya Mʉtwa ʉNgʉlʉve.#13:44 Ɨlɨsio lya Mʉtwa ʉNgʉlʉve: Avange vaghanwile ndɨɨkɨ, Ɨlɨsio lya Mʉtwa. 45Neke avavaha va Vayahudi ye vikʉlyagha ɨlɨpʉgha lɨla, vakamema ɨkɨvini. Pe vakatengʉla kʉkʉmʉligha ʉPaulo na kukania amasio ghano ajovagha. 46Neke ʉPaulo nʉ Balinaba vakavamʉla kɨsila vwoghofi vakati, “Lʉkanoghiile ɨlɨsio lya Ngʉlʉve taasi lɨpʉlɨsɨvue kʉlyʉmue mwe Vayahudi. Neke ʉlwakʉva mʉkanile, na kukuvona kuuti, namʉnoghiile kuuva nʉ vwʉmi ʉvwa kʉvʉsila kʉsila, tʉkʉvaleka. Lɨno, tulʉta kʉ vaanhu vano naVayahudi, 47ʉlwakʉva ʉMʉtwa alyatʉlaghiile ʉsue kuuti,
‘Nɨkʉvɨkile ʉve kuuva lʉmuli kʉ vaanhu vano naVayahudi,
kuuti ʉtwale ʉvʉpoki kʉ vaanhu vooni mʉ ɨɨsi sooni.’#13:47 Ʉtwale ʉvʉpoki kʉ vaanhu vooni mʉ ɨɨsi sooni: Mʉ kɨtabu ɨkya mʼbɨli ʉYesaya, amasio agha ghijova vwɨmɨla ʉYesu (Yesaya 49:6). Neke mʉ kɨtabu ɨkɨ, amasio agha ghijova vwɨmɨla vano vipʉlɨsia ɨlɨsio lya Ngʉlʉve.”
48Avaanhu vano naVayahudi ye vapʉliike amasio aghuo, vakahovoka, vakalɨghinia ɨlɨsio lya Mʉtwa ʉYesu. Avaanhu vooni vano ʉNgʉlʉve akavasalwile kuuti vakave ʉvwʉmi ʉvwa kʉvʉsila kʉsila, vakamwɨtɨka ʉMʉtwa.
49Ɨlɨsio lya Mʉtwa lɨkava lifikwɨla mʉ ɨɨsi jɨla jooni. 50Neke aVayahudi vamonga vakavafunda avavaha va lɨkaaja lɨla na vakɨjʉʉva avoghopua vano naVayahudi vano vakavɨngɨlɨlagha ʉlwɨtɨko ʉlwa Kɨyahudi. Neke voope vakavahonga avaanhu kʉkʉmpumusia ʉPaulo nʉ Balinaba na kʉkʉvadaga mʉ lɨkaaja lyave. 51Pepano ʉPaulo nʉ Balinaba vakakungʼuuna ʉlʉngʼhʉnde mʉ maghʉlʉ ghaave kʉkʉvapavɨla, pe vakalʉta kʉ lɨkaaja ɨlya Ikonio. 52Looli avavɨngɨlɨli va Yesu mʉ lɨkaaja ɨlya Antiokia valyale nʉ lʉkeelo ʉlʉkome, kange vakalongosivwagha nʉ Mhepo ʉMwɨmɨke.
Actualmente seleccionado:
Mbombo sa Vasungʼhua 13: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.