Mbombo sa Vasungʼhua 11
11
ɄPeteli ikwoleka sino ʉNgʉlʉve avombile kʉ vano naVayahudi
1Avasungʼhua na vɨtɨki avange vano valyale mʉ kɨghavo ɨkya Yudea, valyapʉliike kuuti avaanhu vano naVayahudi voope vʉpiile ɨlɨsio lya Ngʉlʉve. 2Neke ʉPeteli ye agomwike kʉ Yelusalemu, aVayahudi vano vakamwɨtiike ʉYesu Kɨlɨsite neke vakavɨngɨlɨlagha ɨkɨvʉngo kyave ɨkya kʉdumula ɨngola ɨja kɨdɨɨmi,#11:2 Ɨkɨvʉngo kyave ɨkya kʉdumula ɨngola ɨja kɨdɨɨmi: Ɨmba ɨlɨsio Kɨvʉngo ɨkya kʉdumula ɨngola ɨja kɨdɨɨmi kʉ Vʉghanʉle vwa Masio aMahesia. na kusimilisia kuuti, avaanhu vano naVayahudi vavombelue ɨkɨvʉngo ɨkio, vakatengʉla kʉkʉmpɨɨka 3viiti, “Kɨki ghwava ghukwingila mʉ nyumba isa vaanhu vano naVayahudi na kulia navo?”#11:3 Kulia navo: Indaghɨlo isa Vayahudi nasikɨtɨkɨsyagha ʉMʉyahudi kuhanga ɨkyakʉlia nʉ muunhu jʉno naMʉyahudi, ʉlwakʉva kuhanga lʉkahʉfyagha kuuti, avaanhu avuo valɨ kɨmanyaani.
4Pe ʉPeteli akatengʉla kʉkʉvapangɨla sooni ndavʉle silyahʉmiile akati, 5“Ɨkɨghono kɨmonga, nɨkaale mʉ lɨkaaja ɨlya Yopa nikufuunya. Ye nikufuunya, lʉkambonekela lʉmonga, nɨkakyagha ɨkɨɨnu hwene mwenda nkome, ghukwika kuhʉma kʉkyanya ghʉkolilue imbale saake ine, kɨkafika palyʉne. 6Nɨkalola vʉnono mʉnkate, nɨkafyagha ifikanu ifidɨmua ni fya mʉ lɨsoli ifinya maghʉlʉ ghane, ni fikanu fino fighenda vwafula ni njuni. 7Pe nɨkapʉlɨka ɨlɨsio lɨkʉmbʉʉla liiti, ‘Peteli ɨma, ʉhɨnje ʉlie.’ 8Neke ʉne nɨkamʉla nɨkati, ‘Jeeje! Mʉtwa, nanɨghelile lʉsiku kutwala mʉ mʉlomo ɨkɨɨnu kɨno mwiko kulia nambe ɨkɨlamafu.’ 9Ɨlɨsio lɨla lɨkapʉlɨkɨka kange kuhʉma kʉkyanya liiti, ‘Ifiinu fino ʉNgʉlʉve afivalisie, nʉngatisaghe filamafu.’ 10Ʉluo lʉkavombeka katatu, pe ifiinu fyoni fila fikakwesua kugomoka kʉkyanya.
11“Ʉnsiki ghʉla ghʉla avaanhu vatatu vano vakasungʼhilue kʉlyʉne kuhʉma mʉ lɨkaaja ɨlya Kaisalia, vakafika pa nyumba jɨno nikalagha. 12ɄMhepo ʉMwɨmɨke akambʉʉla kuuti, nɨlʉtaghe navo kɨsila kuuva ni nganighani. Pepano nɨkavʉʉka palɨkɨmo na vɨtɨki avajango ava, ntanda, kulʉta kʉ Kaisalia. Ye tʉfikile kʉla, tʉkingila mʉ nyumba ɨja Kolinelio. 13ɄKolinelio akatʉpangɨla vʉle ʉnyamhola amʼbonekiile ɨmile mʉ nyumba jaake na kʉkʉmʼbʉʉla kuuti, ‘Ʉvasuungʼhe avaanhu kʉ Yopa, vakankemeele ʉmuunhu jʉmonga itambʉlua Simoni, ɨlɨtavua ɨlɨngɨ ghwe Peteli. 14Ʉmwene alɨ nɨ mhola ɨja kʉkʉvʉʉla ʉve. Neke vwɨmɨla ɨmhola ɨjio ghukwʉpɨla ʉvʉpoki palɨkɨmo na vaanhu va mʉ nyumba jaako.’
15“Ʉne ye nitengʉla kujova navo, nakalɨngi ʉMhepo ʉMwɨmɨke akavisila avaanhu vala ndavʉle akatwisile ʉsue ʉlʉtasi. 16Pe nɨkakʉmbʉka sino ʉMʉtwa ʉYesu alyatʉvʉlile kuuti, ‘ɄYohani avofughagha avaanhu na malenga, looli ʉmue ʉNgʉlʉve ɨkʉvofugha nʉ Mhepo ʉMwɨmɨke.’ 17Nave ʉNgʉlʉve avapeliile voope avaanhu vano naVayahudi, ɨkɨpelua kɨla kɨla kɨno akatʉpeliile ʉsue ye tʉmwɨtiike ʉMʉtwa ʉYesu Kɨlɨsite, lɨno ʉne neene veeni nɨghele kʉkʉnsigha ʉNgʉlʉve?”
18AVayahudi avɨtɨki vala ye vapʉliike isio, sikavakola. Vakamʉghinia ʉNgʉlʉve vakati, “ɄNgʉlʉve avapeliile na vano naVayahudi ɨsɨla ɨja kʉlaata inyɨvi saave kuuti vakave ʉvwʉmi!”
Ɨkɨpʉgha ɨkya vɨtɨki kʉ Antiokia
19ɄSitefani ye abudilue, avɨtɨki vinga mʉ Yudea valyakɨmbiile imhumuko, vakapalasana, vakalʉta kʉ Foinike, kʉ Kipulo na mʉ lɨkaaja ɨlya Antiokia. Ʉkuo kwoni vakapʉlɨsyagha ɨmhola ɨja Mʉtwa ʉYesu kʉ Vayahudi veene. 20Neke vamonga mʉ vano valyakɨmbiile valyahʉmile kʉ Kipulo na kʉ Kileene. Avaanhu avuo ye vafikile kʉ Antiokia, vakatengʉla kupʉlɨsia ɨMhola ɨNofu ɨja Mʉtwa ʉYesu kʉ vaanhu vano naVayahudi. 21Ingʉfu sa Mʉtwa ʉNgʉlʉve silyale palɨkɨmo na vɨtɨki avuo, avaanhu vinga vakamwɨtɨka na kʉkʉmʼbɨngɨlɨla ʉMʉtwa ʉYesu.
22Avɨtɨki ava kʉ Yelusalemu ye vapʉliike isio, vakansuungʼha ʉBalinaba kʉ Antiokia. 23Ye afikile ʉkuo na kuvona vʉle ʉNgʉlʉve avasʉngʉkiile avaanhu vala, akahovoka fiijo. Akava ɨkʉvakangasia vooni kuuti, vajighaghe vikʉmʼbɨngɨlɨla ʉMʉtwa na moojo ghaave ghooni. 24ɄBalinaba alyale muunhu nnofu, akalongosivwagha nʉ Mhepo ʉMwɨmɨke, kange alyale nʉ lwɨtɨko ʉlwa kyangʼhaani. Avaanhu vinga vakongelelagha kʉkʉmwɨtɨka ʉMʉtwa ʉYesu.
25Pambele ʉBalinaba akalʉta kʉ lɨkaaja ɨlya Taliso kʉkʉmʉlonda ʉSavʉli. 26Ye amwaghile, akiisa naghwo kʉ Antiokia. Pe vakikala apuo ʉmwaka ghwoni. Vakakongʼhanagha palɨkɨmo nɨ kɨpʉgha kya vɨtɨki na kuvʉlanɨsia avaanhu vinga imhola isa Yesu. Kʉ Antiokia ʉkuo kwe kʉno avaanhu valyatengwile kʉkʉvatambʉla avavɨngɨlɨli va Yesu kuuti Vakɨlɨsite.
27Mʉ fighono ifio avavɨli vamonga kuhʉma kʉ Yelusalemu vakalʉtile kʉ Antiokia. 28Jʉmonga mʉ vavɨli avuo, akatambʉlwagha Agabo. Ʉmuunhu ʉjʉ akɨɨma, akavɨla mʉ ngʉfu isa Mhepo ʉMwɨmɨke kuuti, ɨnjala ɨmbaha jilighua mʉ ɨɨsi nyinga. Ɨnjala ɨjio jɨlyaghwile ye atemile ʉKaisali ʉKilaudio.#11:28 ɄKaisali ʉKilaudio: Ɨmba ɨlɨsio Kaisali kʉ Vʉghanʉle vwa Masio aMahesia. 29Vwɨmɨla ɨmhola ɨjio, avavɨngɨlɨli vala ava kʉ Antiokia vakalamʉla kuuti, nʉjʉnge asangʉlaghe mʉ fino alɨ nafyo, neke vavatange avɨtɨki ava kʉ Yudea. 30Pe vakasangʉla, vakampeela ʉBalinaba nʉ Savʉli, kuuti vatwale kʉ valoleleli va kɨpʉgha ɨkya vɨtɨki kʉ Yelusalemu.
Actualmente seleccionado:
Mbombo sa Vasungʼhua 11: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.