JUAN 7
7
Jesús tabernákulu fyestachow
1Key keykunapitanam, Jesús purerqan Galileyachow; manam munarqantsu Judeachow purita, judyukuna wanutsita munayaptin. 2Yeykareykamorqannam judyukunapa tabernákulu fyestankuna. 3Wawqinkunanam niyarqan: —Keypita yarqiy i Judeata ewkiy, disípuliykikunapis ruranqeykita rikáyanampaq. 4Pipis reqishqa keyta munarqa manam imatapis pakeyllapa rurantsu. Keykunata rurarqa, rikátsikiy munduman.
5Wawqinkunapis manam kreyiyarqantsu peyman.
6Tseynam Jesús nerqan: —Óra manaran chámunraqtsu, qamkunapa tyempikikunaqa listum. 7Qamkunataqa mundu manam pwedintsu chikiyashinikita; noqataqa chikimanmi, noqa peykunapa mana alli rureyninkunata willakuptiy. 8Qamkuna eywayey fyestaman; noqaqa manaran eywaraqtsu tsey fyestaman, manaran óra chámunraqtsu.
9Keyta niriyarninnam keydakorqan Galileyachow. 10Wawqinkuna ewkuyashqanchownam, peypis fyestaman eywarqan ratakipanowlla. 11I judyukunanam ashiyarqan fyestachow, i niyarqan: —¿Meychowtaq keykan taqey?
12Atskaq nunakunam búllakurkuyarqan peypaq tapunakur, jukninkunanam niyarqan: “Allápa allim”; wakinkunanam niyarqan: “Manam, sinowqa pweblutam engañan.” 13Peru manam meyqan parlakuyarqantsu peypaq nunakuna wiyey, judyukunata mantsarnin.
14Pullan fyestanam Jesús eywarqan templuman, i yachatsikurqan. 15Almirakuyarqan judyukuna nishpa: —¿Imanowpataq key yachan, mana estudyashqa keykar?
16Jesús yaskirnin nerqan: —Yachatsikiyniqa manam noqapatsu, sinowqa taqey kachamaqnípam. 17Dyospa muneynin rureyta munaq kaqqa, reqinqam Dyospa yachatsikiynin kanqanta, ó noqa kikiyllapita parlanqáta. 18Pipis kikinllapita parlaq kaqqa, kikimpa sumeynintam ashin; peru kachaqninpa sumeyninta asheqqa, keymi rasonpaqa, peychowqa manam kantsu mana alli rurey. 19¿Manaku Moyses leyta qoyáshorqeyki, ni meyqeykipis kumpliyankitsu leyta? ¿Imanirtaq wanutsimeyta munayanki?
20Yaskiyarqan atskaq i niyarqan: —Demoniyuyoqmi kanki; ¿pitaq wanutsita munashunki?
21Jesusnam yaskirnin nerqan: —Juk rureyta rurarqó, i llapeyki almirakuyanki. 22Rasonpam, Moyses qoyáshorqeyki sirkunsisyonta (manam Moysespa kaptintsu, sinowqa teytakunapam), i jamakiy junaqchow sirkunsidáyanki nunata. 23Nunatsun chaskenqa sirkunsisyonta jamakiy junaqchow, Moysespa leynin mana jarushqa kanampaq, ¿piñakuyanki noqa juk nunata jamakiy junaqchow paqweypa kachakátsishqa kaptiku? 24Ama jusgayeytsu rikáyanqeykimannowllaqa, sinowqa jusgayey alli fisyuwan.
¿Jesusku Kristu?
25Tseymi Jerusalenpita wakin kaqkuna niyarqan: —¿Key manaku wanutsiyanampaq ashiyanqan? 26¡Rikáyey, llapan nunakunachowmi parlan, i ni imata niyantsu! ¿Rasonpatsuraq reqiyarqon mandakoqkuna key Kristu kanqanta? 27Keytaqa reqintsikmi meypita kanqanta; Kristu shamuptenqa, manam pí musyanqatsu meypita kashqanta.
28Tseynam Jesús, templuchow yachatsikurnin, qaparipa nerqan: —Noqataqa reqiyamankim, i musyayankim meypita kanqáta; manam shamushqa ká kikiyllapitatsu, peru kachamaqniyqa tseqeypam, peyta qamkuna manam reqiyankitsu. 29Noqaqa reqiymi, peypitam ká, i peymi kachamashqa.
30Tseynam tsarita munayarqan; peru manam meyqan tsariyarqantsu, manaraq óran chámushqa kaptin. 31Shuyni nunakunapita atskaqmi kreyiyarqan peyman, i niyarqan: “Kristu, shamorqa, ¿keypita mas señalkunatatsuraq ruranqa?”
32Farisewkunanam wiyayarqan, nunakuna peyta penqapar rimayanqanta key kosaskunapita; apun saserdotikuna i farisewkunanam kachayarqan alwasilkunata presu tsariyanampaq. 33Tseynam Jesús nerqan: —Ichikllanam qamkunawan karishaq, kachamaqnímannam eywakushaq. 34Ashiyámankim, i manam tariyámankitsu; i noqa kanqáman, manam qamkuna shamiyta pwediyankitsu.
35Tseynam judyukuna kikinkunapura ninakuyarqan: —¿Meytaraq eywanqa key mana tarinapaq? ¿Griegukunachow witsikashqakunamantsuraq eywanqa, i yachatsenqa griegukunatatsuraq? 36¿Ima ninantaq key nenqan: “Ashiyamankim, i manam tariyamankitsu; noqa kanqáman, manam qamkuna shamiyta pwediyankitsu”?
37Jatun fyesta usheynam, Jesús sharkur qaparipa, nerqan: —Pipis yakunaqqa, shamutsun noqaman i uputsun. 38Noqaman kreyeqqa, Eskritúrakuna nenqannow, rurinpitam kaweykaq yaku eywanqa mayukunanow.
39Keyta nerqan peyman kreyeqkuna Espirituta chaskiyanampaq kaqta; manaran shamorqanraqtsu Espiritu Santu, manaraq Jesús glorifikashqa kaptin.
40Tseynam shuyni nunakunapita wakinkuna, keykunata wiyarir, niyarqan: “¡Keyqa rasonpam profeta!” 41Wakinnam niyarqan: “Keyqa Kristum.” Wakinkaqkunanam niyarqan: “¿Galileyapitatsuraq shamunman Kristu? 42¿Eskritúra manaku nin Dabidpa kastanpita, Belempa tunanpita, Dabid kanqanpita, shamonqa Kristuqa?” 43Tseynam nunakuna liryakurkuyarqan peypaqreykur. 44Peykunapita wakinkunanam tsarita munayarqan; peru manam meyqan tsarerqantsu.
Mandakoqkuna kontrayan Jesusta
45Alwasilkunanam shayámorqan apun saserdotikunaman i farisewkunamam; i keykunanam niyarqan: —¿Imanirtaq apayámorqonkitsu?
46Alwasilkunanam yaskiyarqan: —¡Manam imeypis pí parlashqatsu key nunanowqa!
47Tseynam farisewkuna yaskiyarqan: —¿Qamkunapis engañasqaku kayarqonki? 48¿Akasu kreyiyashqaku meyqan mandakoqkunapis, o farisewkunapis peyman? 49Key ley mana musyaq nunaqa, maldítum.
50Nikodemunam nerqan, ampipa peyman shamoq, peypis karqan peykunapita jukninmi: 51—¿Leynintsik juk nunata akásu jusganku manaraq puntata wiyarir, i ruranqankunata musyarikur?
52Yaskirnam niyarqan: —¿Qampis Galilewku kanki? Musyey i rikey galileyapeqqa imeypis manam profeta shárishqatsu.
Adulteryuchow illaqpita tarishqa warmi
53Wayinkunatanam ewkuyarqan.
Actualmente seleccionado:
JUAN 7: QUEAN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Quechua Ancash New Testament © Peruvian Bible Society, 1992.