GENESIS 3
3
Diosta Adanwan Eva mana kasusqanmanta
1Tayta Diospa purunpi llapallan animalkuna unanchasqanmantam culebra aswan sacre karqa. Culebram warmita nirqa:
—Diosqariki nisurqankichik: “Huertapi llapa sachakunapa ruruntaqa amam mikunkichikchu” nispam ¿aw?
2Chaymi warmiñataq culebrata nirqa:
—Huertapi sachakunapa ruruntaqa mikunikum. 3Ichaqa Diosmi nirqa: “Huertapa chawpinpi sachapa ruruntaqa amam mikunkichikchu nitaqmi llachpankichikpaschu, mana chayqa wañuruwaqchikmi” nispa.
4Chaymi warmita culebra nirqa:
—Manapunim wañunkichikchu. 5Diosmi yachan, maypacham mikuruspaqa ñawikichik kicharikuruptinmi kikin Dios hinaña allin kaqtapas hinaspa mana allin kaqtapas yachaqña rikurirunkichik —nispa.
6Chaymi warmi qawarqa mikunapaq allin sacha kasqanta, qawarqataqmi sumaqllaña kasqantapas chaynataq yachay haypanapaq munayllapaqña kasqantapas chaymi rurunta pallaruspa mikururqa. Qosanmanpas qoykuptinmi paypas mikururqa. 7Hinaptinmi iskayninkupa ñawinku kicharikururqa chaymi mana pachayoq kasqankuta qawakuykuspanku higospa rapinta sirarqaku pachakunankupaq.
8Huertapa chawpinpi wayrarimuptinmi Tayta Diospa purisqanta uyarirurqaku chaymi warmi-qari huerta sachakunapa ukunpi Tayta Diosmanta pakakururqaku. 9Hinaptinmi runata Tayta Dios qayarqa:
—¿Maypitaq kachkanki? —nispa.
10Chaymi payñataq nirqa:
—Huertapim uyarirurqani purisqaykita chaymi mana pachayoq kaspay mancharikuspa pakakururqani —nispa.
11Hinaptinmi Dios nirqa:
—¿Pitaq willasurqanki mana pachayoq kasqaykita? ¿Icha “Amam mikunkichu” nisqay sachapa ruruntachu mikururqanki? —nispa.
12Chaymi runañataq nirqa:
—Compañawananpaq kay warmi qowasqaykim qoykuwarqa chay sachapa rurunta hinaptinmi mikururqani —nispa.
13Chaymantam warmita Tayta Dios nirqa:
—¿Imatataq kayta rurarunki? —nispa.
Hinaptinmi warmiñataq nirqa:
—Culebram engañaruwarqa chaymi mikururqani —nispa.
14Hinaptinmi Tayta Dios nirqa culebrata:
Chay rurasqaykiraykum
llapallan animalkunamanta ñakasqa kanki.
¡Qasqonpam purinki, ñutu allpatataqmi
kawsanayki punchawkama mikunki!
15¡Warmitawan qamtam cheqninachisqayki,
cheqninachisaqtaqmi miraynikitawan miraynintapas!
Mirayninmi umaykita chamchasunki,
qamñataqmi talonninpi kachunki.
16Warmitañataqmi nirqa:
Wiksayakuptikim ñakariykunata yapasqayki.
Nanaywanmi wawaykikunata wachakunki,
chaywanpas qosaykitam munaypaq-munanki,
hina paytaqmi qamtaqa kamachisunki.
17Adantañataqmi nirqa:
Warmikipa nisusqaykita kasukuspam
“Amam mikunkichu” nisqay ruruta mikurunki.
Qampa rurasqaykiraykum allpa ñakasqa kanqa.
Kawsanaykikama llamkaspam allpamanta wiñaqta mikunki.
18Kichkakuna, cardoskunam allpamanta wiñamunqa.
Mikunaykipaqmi purunpi wiñaqkuna kanqa.
19Allpaman kutiykunaykikamam
sinchita llamkaspa mikunaykita tarinki.
Allpamanta horqosqam kanki.
Allpallam kanki,
allpallamantaqmi tikrakunki.
20Chaymantam warminta runa suticharqa #Hebreo simipi Eva ninanqa rikchakun “kawsay” niq palabramanmi.Evawan, payqa llapallan kawsaq runakunapa maman kasqanrayku. 21Chaymi Adanpaqwan warminpaq Tayta Dios qaramanta pachata ruraspan paykunata pachachirqa. 22Tayta Diosmi nirqa:
—Runaqa ñoqanchik hina Allin kaqtapas hinaspa mana allin kaqtapas yachaqñam rikurirun. Chaynaqa yanqañataqmi kawsay qokuq sachapa ruruntapas pallaruspa mikurunman hinaspa wiñaypaq kawsaqña karunman —nispa.
23Chaymi runata Tayta Dios Eden Huertamanta horqomurqa chakrapi llamkananpaq allpamanta rurasqa kasqanrayku. 24Runata hawaman qarqoruspanñataqmi Eden Huertapa intipa qespimunan lawpi churarqa querubin sutiyoq angelkunata. Paykunaqa karqa ruparichkaq espadayoqkamam chaynapi kawsay qokuq sachaman riq ñanta waqaychanankupaq.
Actualmente seleccionado:
GENESIS 3: QUEAYA87
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión