Génesis 8
8
Jatun musphay para thañin
1Diosqa Noemanta, jinallataj jatun barcopi kasharqanku, chay animalkunamantapis khuyarikorqa. Chayrayku pay kay pachaman wayrachimorqa, yakutaj ch'akiyta qallarerqa. 2Jallp'aj sonqonmanta t'ojyamoj yakoqa manaña jutumorqachu. Jinallataj janajmanta jich'akamoj yakupis sayarqa. Chayrayku para thañerqa. 3Yakoqa jallp'a patamanta pisimanta pisi ch'akerqa. Pachaj phishqa chunkayoj p'unchayninman jinataj astawan pisiyarqa. 4Chantá qanchis kaj killapi, chunka qanchisniyoj p'unchayta, jatun barcoqa Ararat sutiyoj orqo pataman tiyaykorqa. 5Yakutaj pisimanta pisi ch'akipushallarqapuni. Chayrayku chunka kaj killa qallariyta aswan jatuchaj kaj orqokuna ñapis rikhurerqankuña.
6Chaymanta tawa chunka p'unchayninman jina, Noé jatun barcopi ruwasqan ventananta kicharerqa. 7Chantá uj qharqañata kacharerqa. Qharqañataj kay pachapi yaku ch'akinankama kaynejta, jaqaynejta phawaspa karqa. 8Chaymanta Noeqa uj urpitañataj kacharerqa, jallp'a rikhurerqañachus manarajchus, chayta yachananpaj. 9Urpirí mayman tiyaykunanpaj mana tarispa, jatun barcoman kutimporqa, imaraykuchus jallp'aqa yakuwan p'ampasqallaraj kasharqa. Chayrayku Noeqa ventanamanta jawaman makinta orqhorqa. Urpi makinman tiyaykojtintaj, arcaman apaykorqa.
10Chantá Noé qanchis p'unchaytawan suyarqaraj, chaymantataj ujtawan urpita kacharillarqataj. 11Ch'isiyaykushajtinña, urpeqa uj olivo laqhe achurisqa Noeman kutimporqa. Ajinamanta Noé yaku ch'akishasqantaña yacharqa. 12Chaymanta Noeqa qanchis p'unchaytawanraj suyarqa. Chantá urpita ujtawan kacharillarqataj, urpirí manaña kutimporqachu.
13Noé 601 watayojña kashajtin, wata qallariy killamanta, killa qallariy p'unchayta kay pachapi yaku tukuynin ch'akiporqa. Chantá Noé barcoj qhatanta qhataraspa, jallp'a ch'akiña kasqanta rikorqa. 14Iskay kaj killamanta, iskay chunka qanchisniyoj p'unchayninman jallp'aqa sumaj ch'akiñapuni karqa.
15Chantá Diosqa Noeta nerqa: 16Qanwan, warmiykiwan, churiykikunawan, chantá ñojch'aykikunawan ima barcomanta llojsiychej. 17Jinallataj qanwan khuska kashaj animalkunatapis kacharillayña: Phawajkunata, uywakunata, pampata qhatatakuspa purejkunata ima, paykuna miraspa, kay pachaman junt'anankupaj, nispa.
18Ajinata Noeqa jatun barcomanta llojserqa warminwan, churinkunawan, ñojch'ankunawan ima. 19Jinallataj uywakuna, k'ita animalkuna, pampata qhatatakuspa purejkuna, phawajkuna ima tukuynin llojserqanku. 20Chantá Noeqa Tata Diosta yupaychananpaj uj altarta ruwarqa. Chaypitaj ñak'aspa, chantá q'olachispa ima Diosman jaywarqa, llimphupaj qhawasqa tukuy animalmanta, tukuy phawajmanta ima. 21Q'olachispa jaywanaj q'aparisqanqa Tata Diospaj ima munay karqa. Chayrayku Dios nerqa: Noqaqa runaj juchanrayku kay pachata manaña ujtawan maldicisajchu. Runa wawamantapacha mana allinta ruwanallapipuni yuyan chaypis, manaña noqa tukuy kawsajta tukuchisajchu, kunan imaynatachus tukucherqani, jinataqa.
22Kay pacha kanankamaqa
chajra tarpuna, chajra poqoyta oqharina kallanqapuni.
Kallanqataj q'oñi mit'a, chiri mit'a,
q'omer mit'a, ch'aki mit'a,
chantá p'unchay, tutapis, nispa.
Ajinata Tata Dios nerqa.
Actualmente seleccionado:
Génesis 8: DQPC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Revisión Biblia Quechua Boliviano © Sociedad Bíblica Boliviana, 2017.