LUCAS 9
9
Ang Tulumanon sang Napulog Duha
(Mat. 10:5-15; Mar. 6:7-13)
1Kag gintawag niya sing tingub ang napulog duha kag ginhatagan sila sing gahum kag pagbulut-an sa tanan nga yawa kag sa pag-ayo sang mga balatian, 2kag ginpadala niya sila sa pagwali sang ginharian sang Dios kag sa pag-ayo sang mga masakiton. 3Kag nagsiling sia sa ila,#Luc. 10:4-11. “Dili kamo magdala sing bisan ano sa inyo panlakatan, bisan sungkud, bisan balalonan, bisan tinapay, bisan cuarta; kag dili magdala sing duha ka bayo. 4Kag bisan diin nga balay kamo magsulud, dayon kamo didto, kag maghalin kamo gikan didto. 5Kag bisan diin nga indi sila magbaton sa inyo, sa paghalin ninyo sadtong banwa taktaka ang yab-ok sa inyo mga tiil nga pagpamatuud batok sa ila.#Binu. 13:51.” 6Kag naghalin sila kag nagkadto sa tanan nga minoro, nga nagawali sang maayong balita kag nagapang-ayo sa bisan diin.
Ang Pagkapatay ni Juan Bautista
(Mat. 14:1-12; Mar. 6:14-29)
7Karon si Herodes nga tetrarca nakabati sang tanan nga nahimo, kag nalibogan sia sing daku, bangud nga ginsiling sang iban nga si Juan nabanhaw, 8sang iban nga si Elias nagpahayag, kag sang iban nga ang isa sang dumaan nga mga manalagna nabanhaw.#Mat. 16:14; Mar. 8:28; Luc. 9:19. 9Si Herodes nagsiling, “Ginpugutan ko si Juan; apang sin-o bala ini nga nahanungud sa iya akon ginapamatian ang subong nga mga butang?” Kag nagtinguha sia sa pagpakigkita sa iya.
Ang Pagpakaon sang Lima ka Libo
(Mat. 14:13-21; Mar. 6:30-44; Juan 6:1-14)
10Sang sila nakabalik ang mga pinadala nag-asoy kay Jesus kon ano ang ila nahimo. Kag gindala niya sila kag naglikaw sila sing pahain sa banwa nga gintawag Betsaida. 11Sang nakahibalo ang mga kadam-an sini, nagsonod sila sa iya; kag ginbaton niya sila kag nagpamolong sa ila sang ginharian sang Dios, kag ginpang-ayo niya ang mga may kinahanglan nga ayohon. 12Karon nagsugud sa paghingapus ang adlaw; kag ang napulog duha nagpalapit kag nagsiling sa iya, “Papaulia ang kadam-an, agud nga magkadto sila sa mga minoro kag sa kaumhan sa palibut, kag magdayon kag magpangita sing pagkaon; kay yari kita diri sa duug nga baw-ing.” 13Apang nagsiling sia sa ila, “Hatagi ninyo sila sing pagkaon.” Nagsabat sila, “Wala na kita sing iban kondi lima ka tinapay kag duha ka isda—luwas kon magkadto kami kag magbakal sing pagkaon sa sini tanan nga katawohan.” 14Kay mga lima ka libo ka tawo sila. Kag nagsiling sia sa iya mga gintoton-an, “Palingkora ninyo sila sing mga hinut-ong, nga mga tagkinalim-an.” 15Kag ginhimo nila ini, kag ginpalingkod sila tanan. 16Kag ginkuha niya ang lima ka tinapay kag ang duha ka isda kag sang nagahangad sa langit, ginpakamaayo niya ini kag gintipiktipik, kag ginhatag sa mga gintoton-an nga ibutang sa atubangan sang kadam-an. 17Kag nagkaon sila kag nabusug ang tanan. Kag gintipon nila ang nabilin, napulog duha ka alat sang mga tinipik.
Ang Pagtu-ad ni Pedro
(Mat. 16:13-23; Mar. 8:27-33)
18Karon nahanabu nga sang nagapangamuyo sia sing pahain ang mga gintoton-an kaupud niya; kag nagpamangkot sia sa ila, “Sin-o bala ako sa ginsiling sang katawohan?” 19Kag sila nagsabat, “Si Juan Bautista; apang ang iban nagsiling, si Elias; kag ang iban, nga ang isa sang dumaan nga mga manalagna nabanhaw.”#Mat. 14:1-2; Mar. 6:14-15; Luc. 9:7-8. 20Kag nagpamangkot sia sa ila, “Apang sin-o bala ako sa inyo?” Kag si Pedro nagsabat, “Ang Cristo sang Dios.”#Juan 6:68-69. 21Apang nagtugon sia sa ila kag nagsogo nga indi magsugid sini sa bisan kay sin-ong tawo, 22nga nagasiling, “Ang Anak sang tawo kinahanglan mag-antus sing madamung butang, kag isikway sang mga tigulang kag puno nga mga sacerdote kag mga escriba, kag patyon, kag sa ikatlong adlaw mabanhaw.”
Ang Pagpas-an sang Kaugalingon nga Cruz
(Mat. 16:24-28; Mar. 8:34–9:1)
23Kag nagsiling sia sa tanan, “Kon sin-ong tawo buut magsonod sa akon, magdumili sia sang iya kaugalingon kag magpas-an sang iya cruz adlawadlaw kag magsonod sa akon.#Mat. 10:38; Luc. 14:27. 24Kay ang bisan sin-o nga buut magluwas sang iya kabuhi madula niya ini; apang ang bisan sin-o nga madulaan sang iya kabuhi bangud sa akon, maluwas niya ini.#Mat. 10:39; Luc. 17:33; Juan 12:25. 25Kay ano bala ang mapulus sang tawo kon maangkon niya ang bug-os nga kalibutan kag madula ukon mawala ang iya kaugalingon? 26Kay ang bisan sin-o nga magkahuya sa akon kag sang akon mga polong, magakahuya sa iya ang Anak sang tawo kon magkari sia sa iya kaugalingon nga himaya kag sa himaya sang Amay kag sang balaan nga mga manugtunda. 27Apang nagasugid ako sa inyo sang kamatooran, may iban sang mga nagatindug diri nga indi nga mas-a makatilaw sang kamatayon tubtub nga makita nila ang ginharian sang Dios.
Ang Pagbalhin sang Dagway
(Mat. 17:1-8; Mar. 9:2-8)
28Karon sang may mga walo ka adlaw sa tapus sining mga polong gin-upud niya si Pedro kag si Juan kag si Santiago, kag nagtaklad sa bukid sa pagpangamuyo,#2 Ped. 1:17-18. 29Kag sang nagapangamuyo sia, ang dagway sang iya nawung nabalhin, kag ang iya panapton nagputi kag nagsilaw. 30Kag yari karon, may duha ka tawo nga nagpakighambal sa iya, nga amo si Moises kag si Elias, 31nga nagpakita sa himaya kag naghambal sang iya pagtaliwan, nga madali na lang niya matuman sa Jerusalem. 32Karon si Pedro kag ang mga kaupud niya ginpuyat sa katuyo apang nagamata, kag nakita nila ang iya himaya kag ang duha ka tawo nga nagtindug kaupud niya. 33Kag sang nagataliwan sila sa iya, si Pedro nagsiling kay Jesus, “Magtotoon, maayo sa aton nga diri kita; mahimo kita sing tatlo ka payag, isa sa imo kag isa kay Moises kag isa kay Elias”—nga wala makahibalo sang iya ginsiling. 34Sang nagsiling sia sini, nag-abut ang panganud kag naglikup sa ila; kag hinadlukan sila sang nagsulud sila sa panganud. 35Kag naggowa ang tingug sa panganud, nga nagasiling, “Ini Anak ko, akon, Pinili;#Isa. 42:1; Mat. 3:17; 12:18; Mar. 1:11; Luc. 3:22. magpamati kamo sa iya!” 36Kag sang nakahambal na ang tingug, isa na lang si Jesus. Kag naghipus sila kag wala magpanugid bisan kay sin-o nga tawo sa sadtong mga adlaw sang bisan ano nga ila nakita.
Si Jesus Nagaayo sang Bata nga Kuyapon
(Mat. 17:14-21; Mar. 9:14-29)
37Sa adlaw nga madason, sang nagdolhog sila sa bukid, ginsugata sia sang daku nga kadam-an. 38Kag yari karon, isa ka tawo sa kadam-an nagsinggit, “Manunudlo, ginapakilooy ko sa imo tan-awa ang akon anak nga lalaki, kay sia akon anak nga bugtong; 39kag yari karon, isa ka espiritu nagadakup sa iya, kag sa hinali nagasinggit sia; ginapakibang niya sia sa bagay nga nagabula sia, kag halus magbiya sa iya tubtub nga makusokuso sia sing tama. 40Kag nagpakilooy ako sa imo mga gintoton-an sa pagsobol sini, apang indi sila makasarang.” 41Si Jesus nagsabat, “O kaliwatan nga dimatinoohon kag balingag, tubtub san-o pa bala magaupud ako sa inyo kag magabatas sa inyo? Dalha diri ang imo anak.” 42Sang nagapalapit pa sia, ginpukan sia sang yawa kag ginpakibang sia sing tama. Apang ginsabdong ni Jesus ang espiritu nga dimatinlo, kag gin-ayo ang bata, kag gin-uli sia sa iya amay. 43Kag sila tanan natingala sang pagkahalangdon sang Dios.
Si Jesus Nagatagna Liwat sang Iya Kamatayon
(Mat. 17:22-23; Mar. 9:30-32)
Apang sang natingala ang tanan sang tanan nga butang nga nahimo niya, nagsiling sia sa iya mga gintoton-an, 44“Ipaturuk ining mga polong sa inyo mga idulungug; kay ang Anak sang tawo itugyan sa mga kamut sang mga tawo.” 45Apang wala nila mahangpi ining pinamolong, kag nalikman ini sa ila, agud nga indi nila mahantupan; kag nahadluk sila sa pagpamangkot sa iya nahanungud sining pinamolong.
Sin-o Bala ang Labing Daku?
(Mat. 18:1-4; Mar. 9:33-37)
46Kag nahanabu ang pagbinaisay sa tunga nila kon sin-o ang labing daku sa ila.#Luc. 22:24. 47Apang sang si Jesus nakahantup sang painoino sang ila mga tagiposoon, nagkuha sia sing diotay nga bata kag ginbutang sia sa iya luyo, 48kag nagsiling sa ila, “Ang bisan sin-o nga magbaton sining diotay nga bata sa akon ngalan nagabaton sa akon, kag ang bisan sin-o nga nagabaton sa akon nagabaton sa nagpadala sa akon;#Mat. 10:40; Luc. 10:16; Juan 13:20. kay ang labing diotay sa inyo tanan among daku.”
Ang Indi Batok sa Inyo Apin sa Inyo
(Mar. 9:38-41)
49Si Juan nagsabat, “Magtotoon, nakita namon ang isa nga nagasobol sang mga yawa sa imo ngalan, kag gindumilian namon sia, bangud nga wala sia nagaupud sa amon.” 50Apang si Jesus nagsiling sa iya, “Dili sia pagdumilii; kay ang indi batok sa inyo apin sa inyo.”
Si Jesus Nagasabdong kay Santiago kag kay Juan
51Sang malapit na ang mga adlaw nga bayawon sia, ginpadolong niya sing mapag-on ang iya nawung pa Jerusalem. Kag nagpadala sia sing mga manugbalita sa una niya, 52nga naglakat sila kag nagsulud sa minoro sang mga taga-Samaria, sa pag-aman sa iya; 53apang ang katawohan wala magbaton sa iya, bangud nga ang iya nawung nagapadolong pa Jerusalem. 54Kag sang nakita ini sang iya mga gintoton-an nga si Santiago kag si Juan, nagsiling sila, “Ginoo, buut mo bala nga magsogo kami nga manaug ang kalayo gikan sa langit kag sonogon sila#2 Hari 1:9-16. [subong sang ginhimo ni Elias]?” 55Apang nagliso sia kag nagsabdong sa ila [kag nagsiling, “Wala kamo makahibalo kon sa anong espiritu kamo; kay ang Anak sang tawo wala magkari sa paglaglag sang kabuhi sang mga tawo kondi sa pagluwas sa ila.”] 56Kag nagkadto sila sa isa pa ka minoro.
Ang mga Nanginsomolonod Kunta ni Jesus
(Mat. 8:18-22)
57Kag sang nagalakat sila sa dalan, may tawong nagsiling sa iya, “Masonod ako sa imo bisan diin ka makadto.” 58Kag si Jesus nagsiling sa iya, “Ang talonon nga mga ido may mga lungib, kag ang mga pispis sa langit may mga haponan; apang ang Anak sang tawo wala gid sing olonlan sang iya olo.” 59Sia nagsiling sa isa man, “Sonod ka sa akon.” Apang nagsiling sia, “Ginoo, tuguti ako anay sa pagkadto kag sa paglubung sang akon amay.” 60Apang nagsabat sia sa iya, “Baya-i ang mga patay sa paglubung sang ila kaugalingon nga mga patay; apang lakat ka kag ibantala ang ginharian sang Dios.” 61Ang isa man nagsiling, “Masonod ako sa imo, Ginoo; apang tuguti ako anay sa pagpaalam sa mga yara sa akon balay.”#1 Hari 19:20. 62Apang si Jesus nagsabat sa iya, “Walay tawo nga nagakaput sa arado kag nagabalikid nga takus sa ginharian sang Dios.”
Actualmente seleccionado:
LUCAS 9: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society