LUCAS 19
19
Si Jesus kag si Zaqueo
1Si Jesus nagsulud kag nagalatas sa Jerico. 2Kag may isa ka tawo nga ginhingalanan si Zaqueo; sia puno nga manugsukot sang buhis, kag manggaranon sia. 3Kag nagtinguha sia sa pagtan-aw kon sin-o si Jesus, apang indi makasarang bangud sang kadam-an, kay putut sia. 4Gani nagdalagan sia sa unhan kag nagsaka sa sicomoro sa pagtan-aw sa iya, kay maagi sia sa sadtong dalan. 5Kag sang nag-abut si Jesus sa duug, nagtangla sia kag nagsiling sa iya, “Zaqueo, dalidali kag magpanaug; kay karon nga adlaw kinahanglan ako magdayon sa imo balay.” 6Gani nagdalidali sia kag nagpanaug, kag nagbaton sa iya sing malipayon. 7Kag sang nakita nila ini, sila tanan nagkumud, “Nagsulud sia sa pagdayon sa tawong makasasala.” 8Kag si Zaqueo nagtindug kag nagsiling sa Ginoo, “Yari karon, Ginoo, ang katunga sang akon pagkabutang ginahatag ko sa mga imol; kag kon may nalimbong ako sa bisan kay sin-o nga tawo, ginauli ko sing apat ka pilo.” 9Kag si Jesus nagsiling sa iya, “Karon nag-abut ang kaluwasan sa sining panimalay, sanglit kay sia man anak ni Abraham. 10Kay ang Anak sang tawo nagkari sa pagpangita kag sa pagluwas sang nadula.#Mat. 18:11.”
Ang Paanggid nahanungud sa Napulo ka Mina
(Mat. 25:14-30)
11Sang nagapamati sila sining mga butang, nagpadayon sia sa pagpamolong sing paanggid, bangud nga malapit sia sa Jerusalem, kag bangud nga naghunahuna sila nga ang ginharian sang Dios magapahayag sa gilayon. 12Busa nagsiling sia, “Ang isa ka tawo nga dungganon nagkadto sa malayong duta sa pagbaton sing ginharian kag ugaling magabalik. 13Gintawag niya ang napulo sang iya mga ulipon, kag ginhatagan sila sing napulo ka mina,#19:13 Isa ka mina mga P.40. kag nagsiling sa ila, ‘Patikanga ninyo ini tubtub nga mag-abut ako.’ 14Apang ang iya mga kasimanwa nagdumut sa iya kag nagpaapas sa iya sing mga manugpangatubang, nga nagasiling, ‘Indi kami buut nga ining tawo maghari sa amon.’ 15Sang nakabalik sia, nga nakabaton sang ginharian, nagsogo sia nga panawgon ining mga ulipon, nga ginhatagan niya sang cuarta, agud nga mahibaloan niya kon pila ang ila nasaplid sa pagpatikang. 16Ang nahauna nag-abut sa iya atubangan, nga nagasiling, ‘Ginoo, ang imo mina nagdaug sing napulo pa ka mina.’ 17Kag nagsiling sia sa iya, ‘Maayo, maayong ulipon! Bangud nga nagmatutum ka sa labing diotay, maggahum ka sa napulo ka banwa.’ 18Kag ang ikaduha nag-abut, nga nagasiling, ‘Ginoo, ang imo mina nagdaug sing lima ka mina.’ 19Kag nagsiling sia sa iya man, ‘Maggahum ka man sa lima ka banwa.’ 20Niyan ang isa nag-abut, nga nagasiling, ‘Ginoo, yari ang imo mina, nga gintago ko nga naputus sa panyo; 21kay nahadluk ako sa imo, bangud nga ikaw tawo nga matig-a; nagakuha ka sang wala mo mabutang, kag nagaani ka sang wala mo masab-ug.’ 22Nagsiling sia sa iya, ‘Sa imo baba hukman ko ikaw, ikaw nga malaut nga ulipon! Nakahibalo ka nga ako tawo nga matig-a, nga nagakuha sang wala ko mabutang kag nagaani sang wala ko masab-ug? 23Niyan ngaa bala wala mo pag-ibutang sa banko ang akon cuarta, kag ako sa akon pag-abut makasukut kuntani nga may saka?’ 24Kag nagsiling sia sa mga nagtindug didto, ‘Kuhaa ninyo sa iya ang mina, kag ihatag sa may napulo ka mina.’ 25(Kag nagsiling sila sa iya, ‘Ginoo, may napulo sia ka mina!’) 26‘Nagasiling ako sa inyo, nga ang tagsatagsa nga may iya hatagan; apang sia nga wala sing iya, bisan pa ang yara sa iya kuhaon sa iya.#Mat. 13:12; Mar. 4:25; Luc. 8:18. 27Apang ining akon mga kaaway, nga indi buut nga ako maghari sa ila, dalha sila diri kag pamatya sila sa akon atubangan.’”
Ang Madaugon nga Pagsulud sa Jerusalem
(Mat. 21:1-11; Mar. 11:1-11; Juan 12:12-19)
28Kag sang nakapamolong sia sini, nag-una sia, nga nagapakadto sa Jerusalem. 29Sang naghinamput sia sa Betfage kag sa Betania, sa bukid nga ginatawag Olivo, nagpadala sia sang duha sang iya mga gintoton-an, 30nga nagasiling, “Kadto kamo sa minoro nga yara sa atubang, diin sa inyo pagsulud makita ninyo ang polyino nga nahigot, nga wala pa gid masakyi sing tawo; hubara ini kag dalha diri. 31Kon sin-o ang magpamangkot sa inyo, ‘Ngaa bala ginahubad ninyo ini?’ magsiling kamo sa iya sing subong, ‘Ang Ginoo may kinahanglan sini.’” 32Gani ang mga ginpadala nagkadto kag nakita nila sono sa nasiling niya sa ila. 33Kag sang nagahubad sila sang polyino, ang mga tag-iya sini nagsiling sa ila, “Ngaa bala ginahubad ninyo ang polyino?” 34Kag nagsabat sila, “Ang Ginoo may kinahanglan sini.” 35Kag gindala nila ini kay Jesus, kag ginhampilo nila ang ila mga panapton sa polyino kag ginpasakyan kay Jesus. 36Kag sang nagasakay sia, naghumlad sila sang ila mga panapton sa dalanon. 37Sang nagahinamput sia, sa kunsaran sang Bukid sang mga Olivo, ang bug-os nga kadam-an sang mga gintoton-an nagsugud sa pagkalipay kag pagdayaw sa Dios sa mabaskug nga tingug bangud sang tanan nga gamhanan nga buhat nga ila nakita, 38nga nagasiling, “Dayawon ang Hari nga nagakari sa ngalan sang Ginoo!#Sal. 118:26. Paghidait sa langit kag himaya sa kahitaasan!” 39Kag ang iban sang mga Fariseo sa kadam-an nagsiling sa iya, “Manunudlo, sabdonga ang imo mga gintoton-an.” 40Nagsabat sia, “Nagasiling ako sa inyo, kon ini sila maghipus, ang mga bato gid magasinggit.”
41Kag sang naghinamput sia kag nakita niya ang banwa naghibi sia sa sini, 42nga nagasiling, “Kon ikaw kuntani nakahibalo sa sining adlaw sang mga butang nga nahanungud sa paghidait! Apang karon nalipdan sila sa imo mga mata. 43Kay magaabut sa imo ang mga adlaw, nga likupan ka sang imo mga kaaway sing talotog kag libutan ka, kag ipiton ka sa tagsa ka luyo, 44kag was-agon ka sa duta, kag ang imo mga anak sa sulud nimo, kag wala sila sing ibilin sa imo nga isa ka bato nga nasampaw sa isa; bangud nga wala mo pagkilalaha ang tion sang pagduaw sa imo.”
Ang Pagtinlo sang Templo
(Mat. 21:12-17; Mar. 11:15-19; Juan 2:13-22)
45Kag nagsulud sia sa templo kag nagsugud sa pagpanobol sang nagbaligya, 46nga nagasiling sa ila, “Nasulat na, ‘Ang akon balay manginbalay nga palangamuyoan’;#Isa. 56:7. apang ginhimo ninyo ini nga lungib sang mga buyong.#Jer. 7:11.”
47Kag nagpanudlo sia adlawadlaw sa templo.#Luc. 21:37. Ang puno nga mga sacerdote kag ang mga escriba kag ang pangolo nga mga tawo sang banwa nagtinguha sa paglaglag sa iya; 48apang wala sila sing nakita nga ila mahimo; kay ang katawohan nga tanan nawili sa iya polong.
Actualmente seleccionado:
LUCAS 19: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society