GENESIS 7
7
Ang Anaw
1Niyan ang Ginoo nagsiling kay Noe, “Sulud ka kag ang bug-os mo nga panimalay sa arca, kay nakita ko ikaw nga matarung sa atubangan ko sa sini nga kaliwatan. 2Gikan sa tagsa ka sapat nga matinlo magkuha ka sing tagpitopito, lalaki kag iya babayi; kag sa kasapatan nga indi matinlo duha, lalaki kag iya babayi; 3sa kapispisan man sang kahanginan, tagpitopito, solog kag munga, sa pagbuhi sang ila kaliwat sa kadaygan sang bug-os nga duta. 4Kay pito pa ka adlaw kag paulanon ko sa duta sing kap-atan ka adlaw kag kap-atan ka gab-i; kag laglagon ko gikan sa kadaygan sang duta ang tagsa ka buhi nga butang nga nahimo ko.” 5Kag ginhimo ni Noe sono sa tanan nga ginsogo sang Ginoo sa iya.
6Si Noe anum ka gatus ka tuig sang pag-anaw sang mga tubig sa ibabaw sang duta. 7Kag si Noe nagsulud sa arca#Mat. 24:38-39; Luc. 17:27. kag ang iya mga anak nga lalaki kag ang iya asawa kag ang mga asawa sang iya mga anak upud sa iya, bangud sang mga tubig sang anaw. 8Gikan sa kasapatan nga matinlo, kag sa kasapatan nga indi matinlo, kag sa kapispisan, kag sa tagsa ka butang nga nagasaug sa duta, 9may nagsulud sing tagduhaduha sa arca kay Noe, lalaki kag babayi, sono sa ginsogo sang Dios kay Noe. 10Kag sa tapus ang pito ka adlaw ang mga tubig sang anaw yara sa ibabaw sang duta.
11Sa ikan-um ka gatus nga tuig sang kabuhi ni Noe, sa ikaduhang bulan, sa ikapulog pito nga adlaw sang bulan, sa amo gid nga adlaw nabulwang ang tanan nga mga tuburan sang daku nga kadadalman, kag ang mga talambuan sang langit nabuksan.#2 Ped. 3:6. 12Kag may ulan sa ibabaw sang duta sa kap-atan ka adlaw kag kap-atan ka gab-i. 13Sa amo gid nga adlaw nagsulud sa arca si Noe kag si Sem kag si Ham kag si Jafet, ang mga anak nga lalaki ni Noe, kag ang asawa ni Noe kag ang tatlo ka asawa sang iya mga anak upud sa ila, 14sila kag ang tagsa ka sapat sono sa iya sari, kag ang tanan nga kahayupan sono sa ila mga sari, kag ang tagsa ka butang nga nagasaug sa duta sono sa iya sari, kag ang tagsa ka pispis sono sa iya sari, tagsa ka pispis sang tagsa ka sari. 15Nagsulud sila upud kay Noe sa arca, tagduhaduha sang tanan nga unud nga may ginhawa sang kabuhi. 16Kag ang mga nagsulud, lalaki kag babayi sang tanan nga unud, nagsulud sono sa ginsogo sang Dios sa iya; kag gintakpan sang Ginoo sia.
17Ang anaw kap-atan ka adlaw sa ibabaw sang duta; kag nagtaas ang mga tubig, kag nagpalutaw sang arca, kag nabayaw ini sa duta. 18Naglambas ang mga tubig kag nagtaas sing tama sa ibabaw sang duta; kag naglutaw ang arca sa nawung sang mga tubig. 19Kag naglambas ang mga tubig sing lakas gid sa ibabaw sang duta sa bagay nga linapawan ang tanan nga mga bukid nga mataas nga yara sa idalum sang bug-os nga langit; 20napulo kag lima ka maniko pa ibabaw ang paglambas sang mga tubig kag linapawan ang mga bukid. 21Kag napatay ang tanan nga unud nga nagahulag sa duta, ang kapispisan, ang kahayupan, ang kasapatan, ang tagsa ka butang nga nagasaug sa duta, kag ang tagsa ka tawo; 22ang tagsa ka butang sa mamala nga duta nga sa iya mga ilong may ginhawa sang espiritu sang kabuhi napatay. 23Ginlaglag niya ang tagsa ka buhi nga butang nga yara sa kadaygan sang duta, ang tawo kag ang kahayupan kag ang mga butang nga nagasaug kag kapispisan sang kahanginan; ginlaglag sila sa duta. Si Noe lamang ang nabilin, kag sila nga kaupud niya sa arca. 24Kag naglambas ang mga tubig sa ibabaw sang duta sing isa ka gatus kag kalim-an ka adlaw.
Actualmente seleccionado:
GENESIS 7: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society