GENESIS 11
11
Ang Torre sang Babel
1Karon ang bug-os nga duta isa sing hambal kag isa sing polong. 2Kag sang sila nagpanlakatan sa sidlangan, nakakita sila sing isa ka kapatagan sa duta sang Sinar kag nagpuyo sila didto. 3Kag nagsinilingay sila, “Kari, maghimo kita sing tisa, kag pagbahon sila sing maayo.” Kag may tisa sila nga salili sang bato, kag asfalto nga sa galagala. 4Niyan nagsiling sila, “Kari, magtukud kita sing isa ka banwa, kag isa ka torre nga ang iya ukbung maglambut sa mga langit, kag maghimo kita sa aton sing ngalan, basi mag-alaplaag kita sa bug-os nga kadaygan sang duta.” 5Kag nagkunsad ang Ginoo sa pagtan-aw sang banwa kag sang torre, nga gintukud sang mga anak sang mga tawo. 6Kag ang Ginoo nagsiling, “Yari karon, sila isa ka katawohan, kag sila tanan may isa ka hambal; kag amo ini ang pamuno lamang sang ila himoon; kag karon wala sing bisan ano nga makapugung sa ila sang ila ginatuyo nga himoon. 7Kari, magkunsad kita, kag gumonon naton didto ang ila hambal, agud nga indi sila maghangpanay sa ila hambal.” 8Gani ginpaaplaag sila sang Ginoo gikan didto sa kadaygan sang bug-os nga duta, kag ginbayaan nila ang pagtukud sang banwa. 9Busa gintawag ang ngalan sini Babel, bangud nga didto gingumon sang Ginoo ang hambal sang bug-os nga duta; kag gikan didto ginpaaplaag sila sang Ginoo sa kadaygan sang bug-os nga duta.
Ang mga Kaliwatan ni Sem
(1 Cron. 1:24-27)
10Ini sila amo ang mga kaliwatan ni Sem. Sang si Sem isa ka gatus ka tuig, nangin-amay ni Arfaxad duha ka tuig sa tapus ang anaw; 11kag sa tapus natawo si Arfaxad si Sem nagkabuhi sing lima ka gatus ka tuig, kag nangin-amay sang mga anak nga lalaki kag mga anak nga babayi.
12Sang si Arfaxad nagkabuhi sing katloan kag lima ka tuig, nangin-amay ni Sela; 13kag sa tapus natawo si Sela si Arfaxad nagkabuhi sing apat ka gatus kag tatlo ka tuig, kag nangin-amay sang mga anak nga lalaki kag sang mga anak nga babayi.
14Sang nagkabuhi si Sela sing katloan ka tuig, nangin-amay ni Heber; 15kag sa tapus natawo si Heber si Sela nagkabuhi sing apat ka gatus kag tatlo ka tuig, kag nangin-amay sang mga anak nga lalaki kag mga anak nga babayi.
16Sang nagkabuhi si Heber sing katloan kag apat ka tuig, nangin-amay ni Peleg; 17kag sa tapus natawo si Peleg si Heber nagkabuhi sing apat ka gatus kag katloan ka tuig, kag nangin-amay sang mga anak nga lalaki kag mga anak nga babayi.
18Sang nagkabuhi si Peleg sing katloan ka tuig, nangin-amay ni Reu; 19kag sa tapus natawo si Reu si Peleg nagkabuhi sing duha ka gatus kag siam ka tuig, kag nangin-amay sang mga anak nga lalaki kag mga anak nga babayi.
20Sang si Reu nagkabuhi sing katloan kag duha ka tuig, nangin-amay ni Serug; 21kag sa tapus natawo si Serug si Reu nagkabuhi sing duha ka gatus kag pito ka tuig, kag nangin-amay sang mga anak nga lalaki kag mga anak nga babayi.
22Sang nagkabuhi si Serug sing katloan ka tuig, nangin-amay ni Nahor; 23kag sa tapus natawo si Nahor si Serug nagkabuhi sing duha ka gatus ka tuig, kag nangin-amay sang mga anak nga lalaki kag mga anak nga babayi.
24Sang nagkabuhi si Nahor sing duha ka pulo kag siam ka tuig, nangin-amay ni Tera; 25kag sa tapus natawo si Tera si Nahor nagkabuhi sing isa ka gatus kag napulo kag siam ka tuig, kag nangin-amay sang mga anak nga lalaki kag mga anak nga babayi.
26Sang nagkabuhi si Tera sing kapitoan ka tuig, nangin-amay ni Abram, ni Nahor, kag ni Haran.
Ang mga Kaliwatan ni Tera
27Karon amo ini sila ang mga kaliwatan ni Tera. Si Tera amay ni Abram, ni Nahor, kag ni Haran; kag si Haran amay ni Lot. 28Si Haran napatay sing una sa iya amay nga si Tera sa duta nga iya natawohan, sa Ur sang mga Caldeanhon. 29Kag nagpangasawa si Abram kag si Nahor: ang ngalan sang asawa ni Abram si Sarai, kag ang ngalan sang asawa ni Nahor; si Milca, ang anak ni Haran nga amay ni Milca kag ni Isca. 30Karon si Sarai baw-as; wala sia sing anak.
31Ginkuha ni Tera si Abram nga iya anak kag si Lot nga anak ni Haran, anak sang iya anak, kag si Sarai nga iya umagad, asawa ni Abram nga iya anak, kag naghalin sila sing tingub sa Ur sang mga Caldeanhon sa pagkadto sa duta sang Canaan; apang sang nag-abut sila sa Haran, nagpuyo didto. 32Ang kaadlawan ni Tera duha ka gatus kag lima ka tuig; kag si Tera napatay sa Haran.
Actualmente seleccionado:
GENESIS 11: ABHIL82
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ang Biblia ©1982 Philippine Bible Society