Luka 24
24
Khulamukha khwa Yezu
(Mat 28.1-10; Mrk 16.18; Yoh 20.1-10)
1Awo khu Sabiti, shifukhu shishinyoowa mu wiiki, nga bushiili kumutikhinyi mu mamilimili naabi, bakhasi ibo beetsa khu ŋani nga bareera bibiwunya bulayi byeesi baaŋoonaŋoona. 2Baryo banyoola nga libaale lyayilingisiwile khukhwaama khu ŋani. 3Ne ni benjilamo, balekha khunyoolamo kumulaambo kw'Omukasya Yezu ta. 4Baryo ni baaba nga bashilaliila lweesho, bona, basaani babili bemikha ambi ni nabo, nga bakwaarire tsingubo tsitsimwekhamwekha.
5Mu khurya khukali, bakhasi ibo benama, balolelela asi. Ne basaani babaloma bari: “Lwashiina muweentsela umulamu mu bafu? 6#Mat 16.21; 17.22,23; 20.18,19; Mrk 8.31; 9.31; 10.33,34; Luk 9.22; 18.31-33S'ali ano ta, ne walamukhile. Ni mukhebulile sheesi abaalomela nga ashiili mu Galilaaya 7ari, ‘Umwaana w'Omuundu shimwakhila khuwebwayo mu mikhono kye babaandu baboonaki atsaangililwe khu musalaba, ni khu shifukhu she khataru alamukhe khukhwaama mu bafu.’ ” 8Baryo bakhasi bashebulila bilomo byeewe.
9Ne ni baakobola khukhwaama khu ŋani, baboolela ibo liikhumi na mutweela ni babaandu boosi ibyo byoosi byeesi baabona. 10Ni bakhasi ibo baaba nibo Mariya Magadalena, Yohanina, ni Mariya maayi wa Yakobo, ni bakhasi babaandi atweela, nibo bababoolela baarume bino byoosi. 11Ne isi baarume bilomo ibyo byafwana nga bikhalimo ta, nashiryo balekha khubifukiilila ta. 12Ne Petero wenyukha watiikhula indimo, watsya khu ŋani, wenamamwo, weshengamwo ne walekha khubonamwo shishiindu shoosi ta, akhali tsingubo tseesi bamusiikhamo tsonyene. Aryo wakobolayo ingo, nga eyaanga, lweebyo bibyaba byakholekhile.
Babili nga batsya Emausi
(Mrk 16.12-13)
13Khu shifukhu sheenesho, babili khu baleekelwa ba Yezu baaba batsya khu shaalo shitweela, lisiina lyasho Emausi; nga shoolesa tsi kilomita nga liikhumi na ndweela khukhwaama i Yerusalemu. 14Nibo baaba bakanikha bonyene na bonyene khu biindu byoosi bibyaba byabelewo. 15Ne ni baaba nga bakanikha, lundi nga bareebana khu biindu bino, Yezu umweene wesyeenda isi bali, wakyeenda ni nabo. 16Ne nibo tsimoni tsaawe tsawambiwa lukhaleesi, balekha khumwofwaasa buulayi ta.
17Aryo kila Yezu abareeba ari, “Bilomo shiina bino byeesi mureebana nga mukyenda?”
Nibo bemikha nga kumutaambo kwabawambile. 18Mutweela khu nibo ulaangiwa bari Kuleopa, welamo ari, “Iwe wenyene niye umukyeni mu Yerusalemu ukhamanyile bibiindu bino bibibelewo mu bifukhu bino?”
19Naye Yezu wabareeba ari, “Bindu shiina?”
Nabo bamwiilamo bari, “Bibiindu bibiwaamba khu Yezu uwe Nazareti, uwaba Umuŋoosi uwe kamaani mu byeesi akholatsaka ni byeesi akanikhatsaka mu moni tsa Wele, ni mu moni tse babaandu boosi. 20Basaayi bakhulu ni bawuli beefwe bamuwanayo khukhalilwa kumusaango kwe khuufwa, bamutsaangilila khu musalaba. 21Ne ifwe khwaba khwayiyikina khuri niye uliwonesa Isiraeli. Ni n'ebyo nga bishiili biryo, shino nisho shifukhu she khataru khukhwaama bino byoosi ni bibelewo. 22Nalundi batweela khu bakhasi be weefwe bakhwiyaangisile, ni bawuunile khu ŋani kumutikhinyi mu mamilimili, 23balekha khunyoolayo kumulaambo kwa Yezu ta. Bakoboole bakhuboolela bari, baboone khubonekhelwa nga bamalayika bababoolela bari, Yezu ali umulamu. 24Nga bishiili biryo, batweela khu basheefwe batsiile khu ŋani banyoola nga esi bakhasi balomele, ne niye si bamunyoolele ta.”
25Ulwo Yezu wabaloma ari, “Inywe nga muli basilu! Naluundi kimyoyo kyeenywe si kifukiilila wangu ibyo byeesi baŋoosi bakukuula khaale ta!. 26Kristu si shimwakhila khutaambisibwa bibiindu bino byoosi, nio anyalise khukhwinjila mu shiriifwa sheewe ta?” 27Yezu wabasontsoola ibyo bibyakanikhibwa khu niye mu byaronebwa bikhosefu, nga anyoowela khu Musa, ni baŋoosi boosi.
28Ni baaba nga boolele ambi ni shishaalo mweesi baaba batsya, Yezu wafwaana nga abe wuutsya khwilooselayo. 29Ne nibo bamwikontselela bari arame ni nabo nga baloma bari, “N'urame ni nafwe, bona antsye bulikho bwilabula, ni inyaanga yamalile khuukwa.” Aryo wenjila, warama ni nabo.
30Ne n'aba nga wekhaale ni nabo ashikabilo, wabukula kumukaati, wakuloombela ikhabi, wakumenyulamo, wakubakabila. 31Ulwo tsimoni tsaawe tsabimbukha, bamwofwasa, n'endi wabakoraanakho. 32Lwanyuma bareebana bonyene bari, “Kimyoyo kyeefwe sikibeele kyokhelela nga kumulilo, niye n'abeele nga akhukanikhayo khu ntsila, nga akhusontsoola ifwe bibyaronebwa bikhosefu?”
33Lubaluba benyukha belayo i Yerusalemu, ibweeneyo banyoola baleekelwa liikhumi na mutweela, ni babaandu babaandi atweela ni nabo, nga babusaane atweela, 34nga baloma bari, “Ilala Umukasya walamukhile, abonekheele ni Simoni!” 35Ne basaani babili bano nabo babasontsoola bibibelewo khu ntsila, nalundi ni saambo yeesi bamwofwasile nga amenyulamo kumukaati.
Yezu abonekhela Baleekelwa beewe
(Mat 28.16-20; Mrk 16.14-18; Yoh 20.19-23; Bur 1.6-8)
36Ne ni baaba nga bashikanikha bino, Yezu umweene wemikha akari waabwe, wabaloma ari, “Lukoosi lube ni nanywe.”
37Nabo barakikha khuryaryamukha, nga barya bari baboone shisimu. 38Aryo wabaloma ari, “Shiina shibariisa? Shiina kila mwikanakana mu myoyo kyeenywe? 39Ni mubone bibyaaba byase, ni bikyele byase, ise niye Umweene. Ni mumambekho mubone. Shisimu si shili ni kumubili namwe ni kamakuumba ta, nga ni mubona ise ndi nabyo.”
40Aryo n'amala khuloma isho, wabokesa bibyaaba ni bikyele byeewe. 41Ne ni baaba nga bashiili khushifukiilisa ta lwe kumwikhoyo kumukali ni khukhwilaliila, wabareeba ari, “Ne muliwo ni khekhuulya ano?” 42Bamuwa shisiintsa she nyeeni intsoshe. 43Washakaanila, washilya nga boosi babona.
44Lwanyuma wabaloma ari, “Bino nibyo bilomo bibyeene byeesi nababoolela nga ishiili atweela ni nanywe ndi, shakhila byoosi khukhwoolelesebwa mu byaronebwa khusiise; mu makaambila ka Musa, ni mu bilomo bye baŋoosi ni mu Zabuli.”
45Aryo wabimbula kamakyesi kaawe khumanya bibyaronebwa bikhosefu; 46wabaloma ari, “Shino nisho shisharonebwa shiri: Kristu akha khutaambisibwa, ni khulamukha mu bafu khu shifukhu she khataru, 47nalundi ni khukhwibiiyisa ni khukhwiyakhilwa khwe bibyonako byaakha biboolelwe mu manaambo koosi mu lisiina lyeewe, ni khunyoowela mu Yerusalemu. 48Inywe muli bajulisi beebyo byoosi. 49#Bur 1.4Ne ise samweene intsya khubakaanisa shiwaanwa sheesi Paapa abalomela. Ne mwakha murame mu shiriimba khukhwoolesa nga mwakwaarisiwile ni kamaani khukhwaama angaaki.”
Yezu aniinisibwa mwikulu
(Mrk 16.19-20; Bur 1.9-11)
50 #
Bur 1.9-11
Lwanyuma nga Yezu wabayilile ibulafu, waboolesa ambi ni Besaniya, wenyusa kamakhono keewe, wabawa tsikhabi. 51#Sir 50.20Ne n'aba nga ashibawa tsikhabi, wabarurakho wayilibwa mwikulu. 52Nabo bamwisaaya, baryo bakobolayo i Yerusalemu nga bali ni kumwikhoyo kumukali naabi. 53Baryo baabatsaka mu Lisaayilo Likhulu buli busheele, nga babuyila Wele.
Actualmente seleccionado:
Luka 24: LCE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Lumasaaba Catholic Bible © The Bible Society of Uganda, 2017.