Yohana 8
8
Umukhasi isi bawamba nga ayeyana
1Nga buli mutweela welileyo ingo weewe, Yezu watsya khu lukiingi lululaangibwa Zeyituni. 2Khu shifukhu shishelakho nga antsye ashiili mamilimili, Yezu welayo mu Lisaayilo Likhulu. Babaandu boosi beetsa is'ali, naye wekhala asi warakikha khu baleekela. 3Baroni be Kamakaambila ka Musa atweela ni Bafarisaayo beetsa nga bareera umukhasi, isi bawamba nga akhola bye buyeyani. Bamwiimisa akari mu baandu, 4kila bareeba Yezu bari, “Umuleekeli, umukhasi yuno bamuwambiile khu bweene nga alikho akhola bye buyeyani. 5#Lev 20.10; Maka 22.22-24Khulondekhana ni kamakaambila keefwe, Musa akhulakila ari bakhasi nga bano bari khwakha khubakhupa kamabaale baafwa. Ne iwe shino ushilomakho uri shiina?” 6Baloma shino nga bakhakilisa Yezu busa, bari nio bamisilekho ilomo iye khumuwabila isi baawuli. Ne Yezu wenama asi warona ni lulwaala lweewe. 7#Sus 1.34Ne ni beloosela khumutsuntsumilisa, wakangamukha wabaloma ari, “Khayo uyo yeesi khus'inywe ukhaakholatsakakho shishonako ta, abe niye umukiboole khumukhupa libaale.” 8Yezu wenama lundi, warona khwiloba ni lulwala lweewe. 9Babaandu ni bawulila shino, barakikha khumolokha busa mbola sha mutweela tweela, khurakikha ni babafuura bukhulu. Khukhwolisa Yezu n'aarama yenyene n'umukhasi nga ashimikha ibweeni weewe. 10Kila Yezu akangamukha, wareeba umukhasi ari, “Batsana bali ena? Mbaawo ukhukhaliile kumusaango ta?”
11Umukhasi welamo ari, “Umukasya, imbaawo ta.”
Yezu wamuloma ari, “Ni nase s'ikhukhalila kumusaango ta. N'utsye, ne ukhelakho wonaka lundi ta.”
Yezu niye buwaanga bwe shiibala
12 #
Makh 7.26; Mat 5.14; Yoh 9.5 Lwanyuma Yezu walomela babaandu ari, “Ise niye buwaanga bwe shiibala. Umuundu yeesi uwunondelela ise, aliba ni buwaanga bubureera bulamu, nalundi s'alikyendela mu shiilima ta.”
13 #
Yoh 5.31
Bafarisaayo bamulomela bari, “Ari ulikho wiruuya wamweene khu bwoowo. Byeesi uloma si bili bya ŋali ta.”
14Yezu wabelamo ari, “Abe nakhaba nga nikanikha khu samweene, byeesi inoma bili bya ŋali. Khulwekhuba samweene namanya esi naama, nalundi esi indikho ntsya. Ne inywe simwamanya esi naama namwe esi indikho intsya taawe. 15Inywe mukhala kumusaango khulondekhana ni intsibirisa iye babaandu. Ne ise s'ikhalila umuundu yeesi kumusaango ta. 16Ne akhaba nga nakhalile kumusaango, khukhalawo khwase khuba khwa ŋali, khulwekhuba ise s'ikhalawo senyene ta, imba ndi ni Paapa uwandumana ise. 17#Maka 19.15Ni mu makaambila keenywe sharonebwa shiri nga bujulisi bwe babaandu babili bwawambakaane, shokesana shiri byeesi bakanikha bili bya ŋali. 18Ise samweene nikanikhakho, ni Paapa uyo uwanduma naye akanikha bibimaambakho.”
19Kila bamureeba bari, “Paapa woowo ali waheena?”
Yezu wabelamo ari, “Inywe simwayiimanya ise ta. Ni Paapa wase naye simwamumanya ta. Muba nga mumwamanya ise, khali ni Paapa naye mwamumanya.”
20Bilomo bino Yezu abilomela ambi n'isanduukhu iye libikhilo lye Lisaayilo Likhulu, nga alikho aleekela babaandu. Ne s'abawo na mutweela uwakana khumuwamba ari bamubowe ta, khulwekhuba abe isaawa yeewe ishiili khukhwoola ta.
Isi indikho intsya, simunyala mwetsayo ta
21Lwanyuma Yezu wabaloma luundi ari, “Ise ikhaatsye. Mulimeentsa ne si mulinyoola taawe. Mukhaafiile mu byonako byenywe. Isi ise ndi khuutsya, inywe simunyala mweetsayo ta.”
22Kila Bayudaaya bereeba bari, “Shiina kila aloma ari, ‘Isi ise ndi khuutsya, inywe simunyala mwetsayo ta?’ Ali khuutsya khukhwiyira namwe, amanyisa shiina?”
23Wabelamo ari, “Inywe muli khu shiibala asi, ne ise naama mu ngaaki. Inywe muli be mu shiibala muno, ne ise s'indi uwe mu shiibala muno ta. 24Shino shishikilile nabalomela ndi mulifwiila mu byonako byeenywe. Mu ŋali mulifwiila mu byonako byeenywe, akhali nga mwafukiiliile muri, ‘Ise niye uli nga n'indi.’ ” 25Bamureeba bari, “Ne iwe naanu?”
Naye Yezu wabelamo ari, “Ise ndi nga ni mbalomeele khukhwaama makiboole. 26Ise ndi ni bibiindu bikali bye khubakanikhakho, nalundi ndi ni bikali bibikila nabakhalila kumusaango. Ne shonyene ndi uwandumana ise, umweene ali uwe bwa ŋali. Ni nase imboolela babaandu be mu shiibala ibyo byeesi nawulila khukhwaama khu niye.”
27Ne babaandu si baamanya bari Yezu aba alikho akanikha khu bya Paapa weewe ta.
28Yezu wababoolela ari, “Ni mulimala khusuunga Umwaana w'Omuundu, abweene awo mulimanya muri ise niye umweene uyo. Nalundi mulishimanya muri imbaawo sheesi ikhola mu bunyala bwase ta. Ne akhali inoma ibyo byeesi Paapa andekeela khuloma. 29Uyo uwandumana ise ali ni nase. Shiwayindekha senyene ta, khulwekhuba buli busheele ise ikhola bibimwikhoyesa niye.”
30Babaandu bakali babawulila Yezu nga aloma bibiindu bino, bamufukiililamo.
Bwaŋali bulibakangulula khuuba be lukoosi
31Abweene awo Yezu walomela Bayudaaya babamufukiililamo ari, “Singa mulondelela khuleekela khwase, ilala kane mube baleekelwa baase, 32ni nanywe mulimanya bwa ŋali. Ni bwa ŋali ubwo bulibakangulula inywe mube bakangulule.”
33 #
Mat 3.9; Luk 3.8 Bamukobolamo bari, “Ifwe khuli babetsukhulu ba Ibulayimu. Sikhwabatsakakho bakulwa b'omundu yeesi ta. Ari ukhulomela uryeena uri khuliba baakangulule khukhwaama mu bubowe?”
34Yezu wabelamo ari, “Ilala, imbaboolela mu ŋali ndi, buli mundu yeesi ukhola shishonako, aba umukulwa uwe shishonako. 35Umukulwa s'amenya mungo biilo ni biilo ta. Ne umwaana uwe mu ntsu amenya mungo biilo ni biilo. 36Ne nashiryo, noola umwaana abakangulula inywe khuuba balekhuule, mulibeela ilala bakangulule. 37Namanyile nga muli babetsukhulu ba Ibulayimu, ne muweentsa khukhuntsira ise, khulwekhuba simufukiilisa byeesi ise indeekela ta. 38Ise inganikha khu byeesi Paapa wase amala khukhuntsokesanisa. Ne inywe mukhola byeesi paapa wenywe amala khubaboolela.”
39Bamukobolamo bari, “Ibulayimu niye paapa weefwe.”
Yezu naye wabeelamo ari, “Muba mumuuli babaana ba Ibulayimu, khali mukhola buraambi nibwo butweela nga bweesi Ibulayimu akhola. 40Ne nga ni shibonekha, muweentsa khukhuntsira ise, ate ise ndi umuundu ubaboolela bya ŋali byeesi nawulila khukhwaama isi Wele. Ibulayimu s'akholakho shishiindu nga inywe sheesi mukhola shino ta. 41Inywe mulikho mukhola sheesi paapa wenywe amala khukhola.”
Balomela Yezu bari, “Ifwe sikhwasaalikha khukhwaama mu buyeyani ta. Wele umweene niye Paapa wefwe.”
42Yezu wabakobolamo ari, “Iba nga Wele niye Paapa wenywe umweene, khali mungana ise. Khulwekhuba ise naama isi Wele, bona ari indi ano. Ise shineetsa khulwe bunyala bubwase samweene ta, ne khurusakho ndi Wele andumana. 43Khulwa shiina kila mukharekeeresa mwamanya byeesi ise inoma? Shishireera shino shiri ndi simunyala mwekhalilikha mwarekeeresa burume bwase ta. 44#Makh 1.13; 2.24Inywe muli babaana ba Sitaani! Uyo niye paapa wenywe, nalundi mukana khuumenya khulondekhana ni sheesi paapa wenywe akana. Khukhwaama makiboole, paapa wenywe ali umwiiri, nalundi s'akana bwa ŋali ta. Khulwekhuba paapa wenywe s'alimo bwa ŋali ta. N'aloma bye bubeeyi aba wakholile shishiindu shishiili shiisaalikhana isi niye. Khulwekhuba niye ali umubeeyi, nalundi ali paapawe uwe bubeeyi. 45Shishikila mwalekha khukhufukiilila ise, bari khulwekhuba ise inganikha bya ŋali. 46Naanu khus'inywe unyala wantsuntsumilisa ise ari indi ni shishonako? Ne noola inoma bya ŋali, khulwashiina mukhabifukiilila? 47Umuundu uwama isi Wele arekeeresa bilomo bya Wele. Ne ilomo ikila inywe mwalekha khurekeeresa ta, ili ndi si muli ba Wele ta.”
Yezu ni Ibulayimu
48Bayudaaya baloma bari, “Ifwe sikhubeele batuufu khuloma khuri uli Umusamariya, nalundi ulikho shisaambwa?”
49Yezu wabelamo ari, “Ise s'indikho shisaambwa ta. Ise niisamo Paapa wase shiriifwa. Ne inywe muumbirisamo ise tsimoni. 50Ise s'imeentsa shiriifwa shishase ta. Ne iliwo ushiweentsa, nalundi niye ukhala kimisaango. 51Ilala, ilala imbaboolela ndi, umuundu yeesi uwamba shilomo shase, s'alifwa ta.”
52Kila Bayudaaya baloma bari, “Ari khwashihandalasile nga ulikho shisaambwa! Ibulayimu wafwa, ni baŋoosi nabo baafwa, ne iwe ari uloma uri umuundu yeesi uwamba shilomo shoowo s'alifwa ta? 53Kuuka weefwe Ibulayimu wafwa. Wambaasa uri iwe umufuura niye? Ni baŋoosi nabo baafwa. Iwe wilaanga khuuba naanu?”
54Yezu waloma ari, “Iba nga bari nifumisa samweene, khukhwifumisa khwase khali khwandibeele khwa busa; ne Paapa wase niye uwufumisa ise. Niye mutweela isi inywe muloma muri ali Wele weenywe. 55Inywe simwamumanya ta, ne ise namumanya. Imba nga ulomile ndi sinamumanya ta, khali nase imbeele umubeeyi, nga inywe ni muli babeeyi. Ne ise namumanya nalundi intsiililila khu byeesi aloma. 56Kuuka wenywe Ibulayimu ekhoya khubona ari abona bifukhu bye khukhwiitsa khwase. Ilala abibona, nalundi wekhoya.”
57Bayudaaya bamuloma bari, “Iwe ushiili khwoolesa ni kimiiko kye bukhulu kamakhumi karaano ta, unyala uryeena waloma uri wabona khu Ibulayimu?”
58Yezu wiloosela ari, “Ilala, ilala imbaboolela ndi, Ibulayimu nga ashiili khusaalikha ta, ise nga indiwo.”
59Ni abweene awo babukula kamabaale bari bamukhupe, ne Yezu webisa, warura mu Lisaayilo Likhulu, watsya.
Actualmente seleccionado:
Yohana 8: LCE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Lumasaaba Catholic Bible © The Bible Society of Uganda, 2017.