Yohana 7
7
Yezu ni babandaaye
1Lwanyuma lw'ebyo, Yezu wakyeendakakho mu Galilaaya, ne walekha khukana khukyenda mu Yuda ta, khulwekhuba abe Bayudaaya bakhalile kamakyesi ke khumwiira. 2#Lev 23.34; Maka 16.13Ne kamayiiya ke Bayudaaya ke Tsiwema nga kali ambi khukhwoola, 3babandaaye ba Yezu bamuloma bari, “N'urure ano utsye i Yuda, nio baleekelwa boowo b'eyo nabo babone kimilimo kyoowo kyeesi ukhola. 4Khulwekhuba mbaawo ukholela shishiindu shoosi mu khwibisa, ate nga akana shimanyikhe mu lubuula ta. N'uba nga ukhola bibiindu bino, ni wiyokesanise isi shiibala.” 5Khulwekhuba ni bayaaya beewe babeene si baamufukiililamo ta.
6Aryo kila Yezu abaloma ari, “Isaawa yase inyene ishiili khukhwoola ta, ne inywe mwambaasa muri isaawa yoosi iba niyo inyene iyo. 7Shiibala seshinyala shababiiyila inywe ta. Ne shayimbiiyila ise khulwekhuba ise nokesanisa ndi kimilimo kyasho kili kimibi. 8Inywe mwabeene ni muniine mutsye khu mayiiya. Ise s'inaniinayo ari ta. Khulwekhuba isaawa yase inyene ishiili khwoola ta.” 9Aryo n'amala khubaboolela ibyo, umweene warama i Galilaaya.
Yezu nga ali khu mayiiya ke Tsiwema
10Lwanyumakho babandaaye ba Yezu ni baamala khuniina baatsya khu mayiiya, naye aryo watsya yenyene, akhuba mu lubuula ta, ne mu shimoonyo busa.
11Bayudaaya bamuweentsa khu mayiiya nga bareebana bari, “Umusaani uwatsana ali waheena?” 12Abawo khukhwimoonyelesa khukali mu baandu, nga balala baloma bari, “Ali umuundu umulayi,” ne babaandi bari, “Taawe, akosaasakosaasa babaandu.” 13Ne alekha khubawo umuundu uloma lubuula ta, khulwe khuurya Bayudaaya.
14Ne kamayiiya ni kaaba koolile shinakari, Yezu waniina mu Lisaayilo Likhulu, wananikha khuleekela. 15Bayudaaya beyaanga nga baloma bari, “Umusaani yuno buleekele buno abufuna aryeena, ate nga ashiili khufunakho khusoma ta?”
16Yezu wabeelamo ari: “Khuleekela khuno si khuli khukhwase ta, ne khuli khwoyo uwandumana. 17Umuundu yeesi n'akana khukhola byeesi Wele akana, alimanya oba nga khuleekela khwase khuno khwama isi Wele, namwe oba nga ise inganikha khulwe bunyala bubwase samweene. 18Uyo ukanikha khulwe bunyala bubweewe umweene, aba ewentsela shiriifwa umweene. Ne uyo uweetsa shiriifwa sh'oyo uwamurumana, aba uwa ŋali, nalundi s'abamo ni bubwonaki ta. 19Musa s'abawa inywe kamakaambila? Ne mbaawo namutweela khus'inywe ukawamba ta. Khulwashiina mukhakakho khukhuntsira?”
20Wanamundu wamwiilamo ari, “Iwe ulikho kimisaambwa! Naanu ukana khukhwiira?”
21Yezu wabilamo ari: “Inakhola kumulimo mutweela nanywe mwiyange. 22#Lev 12.3 Rak 17.10Musa niye uwabawa shilomo she khukhwinjila imbalu (ne akhaba nga yaama isi baakuuka, akhuba isi Musa ta), ne inywe musheba umuundu akhaba ni khu shifukhu sha Sabato. 23#Yoh 5.9Noola musheba umwaana imbalu khu Sabato, nio kamakaambila ka Musa kalekhe khukhwonakisibwa ta, khulwashiina muukhalalila ise bari khulwekhuba nawonesele umuundu khu Sabato? 24Mukhakhalatsaka kumusaango nga mwiima khu biindu bye khu ngaaki byeesi mubona ni tsimoni ta, ne ni mube ba ŋali mu khukhala kumusaango.”
Yezu niye Kristu
25Mu mbuka nyene iyo, balala khu baandu be mu Yerusalemu bareeba bari, “Uyuno s'ali niye umuundu esi baweentsa khukhwiira? 26Ne bona ali ano akanikha lubuula nga mbaawo sheesi bamukholakho ta. Inyala khuuba iri bawuli ilala bamanyile nga niye Kristu? 27Ne ifwe kwamanya isi umusaani yuno ama. Kristu n'aliitsa, mbaawo ulimanya isi ama ta.”
28Ne Yezu n'aba nga ashileekela mu Lisaayilo Likhulu, walomela angaaki lukali ari, “Ilala mwayimanya ise? Ni esi naama mwamanyayo? Ise sinayitsa khu lwase samweene ta. Ise nayitsa khu lwooyo uli uwa ŋali, uwandumana ise. Inywe simwamumanya ta. 29Ne ise namumanya, khulwekhuba naama is'ali, nalundi niye uwandumana ise.”
30Lwanyuma lwa bino bakhakakho khumuwamba, ne mbaawo namutweela uwamutiilakho kumukhono ta, khulwekhuba abe isaawa yeewe inyene yaba ishiili khukhwoola ta. 31Akhaba nga byaba biryo, ne bakali khu lituuli lye babaandu bamufukiilila, nga baloma bari, “Kristu n'aliitsa, alikhola bubonelo bukali khufuura umusaani yuno bwakhola?”
Bafarisaayo barumana basilikhale khuwamba Yezu
32Bafarisaayo bawulila babaandu nga bekuta khu biindu bibiwaamba khu Yezu. Baryo Bafarisaayo tsana ni Basaayi bakhulu barumana basilikhale be Lisaayilo Likhulu, bari bamuwaambe. 33Ne Yezu waloma ari, “Indi ni nanywe imbuka yino injeekhe, ne lwanyuma intsye isi uyo uwandumana. 34Mulimbeetsa ne si mulinyoola ta, ni isi ndiba simunyala mwetsayo ta.” 35Lwanyuma Bayudaaya baloma bonyene na bonyene bari, “Umusaani uyu akana khuutsya ena isi khukhanyala khwamunyoolela ta? Manya akana khuutsya mu Bayudaaya babasalanila mu Buyonaani, atsye aleekele Bayonaani? 36Amanyisile shiina ni lomo isi alomele ari, ‘Mulimbeetsa ni si mulinyoola ta,’ lundi ari, ‘Isi ise intsya simunyala mwetsayo ta.’ ”
Tsintsitsi tsye kameetsi kakareera bulamu
37 #
Lev 23.36
Khu shifukhu shishimaliilisayo she kamayiiya, lundi nga nisho shishifuura bukhulu, Yezu wiima walangilila ari, “Noola umuundu yeesi bulesa bumulya, ni etse isi ise ndi anywe. 38#Ezek 47.1; Zek 14.8Nga bibyaronebwa bikhosefu ni biloma biri, ‘Buli mundu ufukiilila mus'iise, tsintsitsi tsye kameetsi tsilirurukukha khukhwaama mu mwoyo kweewe.’ ” 39Shino Yezu ashiloma nga amanyisa Umwoyo uyo, esi abo babamufukiilisamo baaba batsya khufuna, khulwekhuba Yezu aba ashiili khwisibwamo shiriifwa ta.
Babaandu bawukhanamo
40Batweela khu baandu be mwituuli ni bawulila bilomo bino, baloma bari, “Ilala umusaani yuno ali umuŋoosi.”
41Babandi baloma bari, “Uyuno Kristu,” ne babaandi bari, “Kristu anyala aryeena khukhwaama mu Galilaaya? 42#2 Sam 7.12; Miik 5.2Bibyaronebwa bikhosefu sibiloma biri, Kristu alyaama munda iya Daudi, mu Betelehemu, shiriimba mweesi Daudi amenyatsaka?” 43Baryo babaandu bawukhanamo khulwa Yezu. 44Babandi khu nibo bakana bamuwaambe, ne alekha khubawo uwakhakakho khumuwamba ta.
Khulekha khufukiilila khwe baraangilisi be Bayudaaya
45Lwanyuma basilikhale be Lisaayilo belayo isi basaayi bakhulu, ni Bafarisaayo bababarumana. Basaayi bakhulu ni Bafarisaayo bareeba basilikhale bari, “Khulwashiina mukhamureerire ano?”
46Basilikhale babeelamo bari, “Mbaawo umuundu na mutweela uwakanikhatsakakho nga umusaani uyu n'akanikha ta!”
47Bafarisaayo bareeba basilikhale bari, “Ni nanywe umusaani uyu wababorosile? 48Mwabonakho na mutweela khu baraangilisi, namwe khu Bafarisaayo umufukiilila? 49Ne khu lituuli lino, abo babakhamanya kamakaambila ka Musa ta, bali ni shitsubo khukhwaama isi Wele.”
50 #
Yoh 3.1,2 Ne mutweela uwe mu lituuli lyaabwe, ulaangibwa Nikodemusi, uwaba abe watsyakho khaale isi Yezu, wareeba ari, 51“Kamakaambila keefwe kafukiilisa khukhalila umuundu kumusaango, nga ashiili khunyoowa khukhwiwotsakho, ni khuumanya shiina sheesi akholile ta?”
52Bamukobolamo bari, “Ni nawe wama i Galilaaya? N'usome mu byaronebwa bikhosefu, uwentselese, kane ubone nga mbaawo umuŋoosi uwama i Galilaaya ta.” 53Baryo buli mundu welayo ingo weewe.
Actualmente seleccionado:
Yohana 7: LCE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Lumasaaba Catholic Bible © The Bible Society of Uganda, 2017.