Yohana 3
3
Inganikha iya Yezu ni Nikodemusi
1Abawo umuraangilisi mutweela, nga bamulaanga bari Nikodemusi, nga ali mu lituuli lye Bafarisaayo nalundi umuraangilisi mu Bayudaaya. 2Shiilo shitweela wetsa isi Yezu, wamuloma ari, “Umuleekeli, khwamanya khuri iwe umuleekeli uwarumaniwa ni Wele. Khulwekhuba mbaawo umuundu unyala khukhola bye kamakaanga byeesi iwe ukhola bino ta, khurusakho nga Wele ali ni naye.”
3Yezu wamwiilamo ari, “Ilala, ilala, ikhuloma ndi umuundu n'akhasaalibwa kumulundi kwe khaabili ta, s'anyala khubona Buyiinga bwa Wele ta.”
4Nikodemusi wamureeba ari, “Umuundu umukhulu anyala aryeena khusaalikha lundi? Anyala khukhwiilayo munda ya maayi weewe nio wasaalikha kumulundi kwe khabili?”
5Yezu wamwiilamo ari, “Ilala ikhuboolela mu ŋali ndi, akhali nga umuundu wasaalikhile khubirira mu meetsi n'Umwoyo, s'anyala wenjila mu Buyiinga bwa Wele ta. 6Shishisaalikha khukhwaama mu mibili kye babaandu, shiba shili ni kumubili nga umuundu, ne shishisaalikha khubirira mu Mwoyo, shiba nga imbewo. 7Shikhakhwiyangisa ta nga ise n'ikhulomele iwe ndi, ‘Buli mutweela akhiile khusaalikha bushaakha.’ 8Imbewo iwuutsa nga itsya buli osi esi ikanile. Akhaba nga uwulila likono lyayo, ne s'umanya esi ilikho yaama, namwe esi ilikho itsya ta. Nasho shili shitweela busa ni n'oyo yeesi usaalikha nga abirira mu Mwoyo.”
9Nikodemusi wareeeba ari, “Isho shinyalikha shiryeena?”
10Yezu wamukobolamo ari, “Ilala, iwe uli umuleekeli mu Isiraeli, ne s'umanya bibiindu bino ta? 11Ikhuwandalasila ilala ndi, ifwe khukanikha khu biindu byeesi khumanyile. Nalundi khuboola khu byeesi khwabona. Ne mbaawo namutweela khusiinywe ufukiilila burume bweefwe ta. 12#Makh 9.16,17Ne isi mushilobela khufukiilila nga nakanikhile isi muli khu bye mu shiibala, munyala muryeena mwafukiilila ni kane imbaboolele khu biindu bye mwikulu? 13#Baru 3.29Mbaawo uwaniinakho mwikulu ta, khurusakho uyo uweekha khukhwaama mwikulu, nga niye Umwaana w'Omuundu.
14 #
Bala 21.9; Makh 16.5-7 “Nga Musa mu mubiimbi n'asuunga angaaki indemu isi babuumba busa, ni musaambo niyo ndweela Umwaana w'Omuundu naye alisuungibwa angaaki. 15Nio buli mutweela yeesi umufukiililamo abe ni bulamu bubukhawawo ta.
16“Ne lwekhuba Wele akana naabi shiibala, kila awanayo umwaana weewe natweela yenyene, ari nio buli mundu yeesi umufukiililamo alekhe khuhela ta, ne abe ni bulamu bubukhawawo ta. 17Lwekhuba Wele s'arumana Umwaana weewe mu shiibala khukhalila shiibala kumusaango ta, ne akhali ndi arumana Umwaana weewe ari awonese shiibala. 18Uyo yeesi ufukiilila mu Mwana mbaawo ulimukhalila kumusaango ta; ne uyo yeesi ukhafukiilila mu Mwana ta, baamala khaale khumukhalila kumusaango. Lwekhuba siwafukiilila mu lisiina ly'Omwana wa Wele ta.
19“Shishamilakho kumusaango shili shiri: ikhaba nga buwaanga bwayitsa mu shiibala, babaandu bayokesanisa bari bakana shishiilima khuminyisa buwaanga. Khulwekhuba bikholwa byabwe bili bye bubwonaki. 20Abo boosi babakhola bye bubwonaki si bakana buwaanga ta, nalundi babiiyila buwaanga, khulwekhuba si bakana bye bubwonaki byabwe byamanyikhana ta. 21Ne uyo ukhola bya ŋali, etsa isi buwaanga, nio byeesi akhola bibonekhele ilala biri byeesi akhola bili ibyo byeesi Wele akana.”
Yezu ni Yohana Umubatisa
22Lwanyuma lwe'byo, Yezu watsya ni baleekelwa beewe mu shisiintsa she Yuda. Wamenya ibweene iyo, nga abatisa. 23Ne Yohana naye yaba ali i Ayenoni, shishiili ambi ni Salimu, nga abatisa, khulwekhuba shiifwo isho shabamo kameetsi kamakali. Babaandu bakali bamutsyayo, wababatisa. 24#Mat 14.3; Mrk 6.17; Luk 3.19,20Abweene awo abe bashiili khuwamba Yohana khumura mu mapuusu ta.
25Nga bali awo, khukhaandisana khwabalukhwawo, nga batweela khu baleekelwa ba Yohana bakhaandisana n'Umuyudaaya. Abe balikho bakhaandisana khu bye khukhwipyeluusa. 26Kila batsya isi Yohana bamuloma bari, “Umuleekeli, umuundu uwatsana isi waba ni naye shanjelekha sha Yorudaani, uyo isi wakanikhakho, naye ana ari alikho abatisa. Nalundi babaandu boosi balikho batsya isi niye.”
27Yohana wabelamo ari, “Mbaawo umuundu yeesi unyala khuuba ni shishiindu ta, akhali nga bashimuweele khukhwaama mwikulu. 28#Yoh 1.20Inywe mwabeene muli bajulisi baase, nga ni naloma ndi, ise s'indi niye Kristu ta. Ise narumanibwa khumwinyoowa ibweeni weewe. 29Umusaani ukhweele, aba niye umwene uw'omweha. Ne umusaale w'oyo ukhweele ekhoya naabi, n'ema ambi warekeeresa likono lyooyo ukhweele. Nashiryo ari kumwikhoyo kwase kuli kumwitsufu. 30Niye akha khukhwiloosela, ne ise naakha khukhwikhilila.”
Uyo uwama Mwikulu
31Uyo uwama mwikulu aba ali angaaki a buli shiindu; ne uyo uwama mu shiibala aba uwe mu shiibala, nalundi akanikha khu bye mu shiibala. Ne uyo uwama mwikulu aba ali angaaki a buli shiindu. 32Niye akanikha khu byeesi abona nalundi byeesi awulila, ne she khukhwiyaangisa, mbaawo ufukiilisa byeesi aloma ta. 33Ne uyo ufukiilisa khuboola khweewe, aba awandalasa ari Wele ali uwa ŋali. 34Khulwekhuba uyo isi Wele arumana, akanikha bilomo bya Wele, ni Wele amuwa Umwoyo weewe mu bwitsufu. 35#Mat 11.27; Luk 10.22Paapa akana umwaana weewe, nalundi wamuwambisa bibiindu byoosi. 36Uyo ufukiilila mu mwana ali ni bulamu bubukhawawo ta. Ne uyo ukharekeeresa byeesi Umwaana aloma ta, s'alifuna bulamu ta. Khurusakho ndi, alirama mu shitaambiso shishaama isi Wele.
Actualmente seleccionado:
Yohana 3: LCE
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Lumasaaba Catholic Bible © The Bible Society of Uganda, 2017.