Marku 14
14
Yesu le sat pyam ra ma tu
1Hau htang i ni lai jang, lai-law e poi e Mun-chi a baw muk poi je be. Hau hkun hkin-jawng a-gi pe e mau-sau ka sara pe Yang le hka-su-kut mwi jup-yu lwi, waw sat pyam ra hkyaw haw taw akaw.
2Ngut-kaw-lang yang maw gë, “Mung byu pe a ka-byawng law shang ga, poi kut u le a ngut shang ga,” ga lwi, tai kaw e.
Mari gë Yesu u-lum htaw ma htsu shaw-gyun bi e
3Ahkwi Yesu gë, Behtani dum ma mang-gam dap e Simun yum ma zang-zaw ni le, mi-we ra yu ja hpau e Nardu jet baw e lu-hpyu gawm chung le lwi, hau le lang hkywi lwi, Yang u-lum htaw ma shaw-gyun bi e.
4Hau mu lwi, ra wam gë, wu nik-yaw bum kaw lwi, “Shi nam ngaw htsu le hai mu a-ha-a-gaw kut pyam le hta?
5Hau nam ngawn htsu le, sum shaw chap e ung lwi, a-shaw-a-wi bang le waw gam bi ra ngut le,” ga lwi, shi-da-da tai lum kaw e.
6Hau mu lwi Yesu gë, “Hau mi-we-zaw le ni ni shang ga. Nung maw hai mu yang le shi-tsang ni akaw hta? Yang gë, Ngaw le ge a-mu kut taw le.
7Myung bang nung maw e yi-shë ra-ha n ni lwi, nung maw aw e ra jung za yang maw le hka nam le a-kyu waw kut kaw-lang, Ngaw gë, nung maw e yi-shë ra-ha waw ni ni ra a ngut.
8Yang gë, waw kut e myaw kut be. Myup yum ra ma-tu yang gë, Nga gung le hë but hi be.
9Nung maw le Ngaw teng teng tai e gë, hau kabu gara dang-lu le mi-dam htaw ma jaw-waw hkang maw ma nyaw maw ni le, yang e masat dut ni ra ma-tu, yang kut taw e a-mu hkai-shit bakaw ra,” ga lwi, tai e.
Yuda Yesu le ap pyam e
10Hau hkun lagyaw ra htse i yu ma e Yuda Iskarut gë, Yesu le hkin-jawng a-gi pe law ma ap bi ra ma-tu, yang maw jang shut htaw e-law e.
11Yang maw hau hkyaw le waw gyaw le, kabu bum kaw lwi, yang le ngun bi ra hkam yu kaw e. Hau mu lwi Yang le hka-su-kut waw ap bi ra, ge-ang e hkyaw mit haw ni le.
Lai-law poi zaw jang le haw le
12Ahkwi hau lai-law hking-ga le sat kaw e, mun-chi a baw muk poi sang-hë ni le, Yesu lagyaw pe gë, “Hau lai-law e poi Nang zaw ra, hka jaw-waw ma Nang e ma-tu e lajang ra Nang aw taw le lu?” ga lwi, Yang-le mi kaw e.
13Hau hkun Yang e lagyawi yu le Yang nang-kat lwi, “Hau wa shut e-law ke. I-jam au-bung wa su e nung nik hwi ra. Yang jang chang lwi,
14Yang hka ma wang kaw-lang, hau yum e yum-sing le, ‘Nga e lagyaw wi e re-ha, hau lai-law e poi le Ngaw zaw ra, Nga bëng gawk hka-ma jaw le,’ ga lwi, Sara mi nang-kat e, ngu ke.”
15“Hau hkun hen taw e a-htaw gawk maw yang nung nik le shit ra ngut le. Hau ma i-nung ma-tu hen taw lang ke,” ga lwi, tai kat e.
16Hau lagyaw nik htaw law lwi, wa hkau hpyang wang law le, Yang tai e ra jung za myang kaw e mu lwi, hau lai-law e poi hen taw kaw e.
Yesu le ap-pyam ra hkyaw nyaw maw bi e
17Ahkwi mau-chut shum le, hau lagyaw ra htse i yu e ra-ha Yang je le e.
18Yang maw zang-zaw zung taw hkun, Yesu gë, “Ngaw nung maw le teng teng tai kyaw kaw le, Ngaw e ra-ha zaw ni e, nung maw jang ma ra yu gë, Ngaw le rau ung pyam he, ga e.”
19Yang maw yu gë, gyaw yawn lwi, yu e ra yu, “Ngaw ngut taw le lu?” ga lwi, Yang le mi baw e.
20Yang gë, “Hau ra htse i yu ma lawm e Ngaw e hkaw ma law ra-ha lap su, hau yu ngut le.
21Ka taw be e ra jung za, hau byu-yang-zaw gë, law bura. Ngut-kaw-lang hau byu-yang-zaw le ap pyam su jang a-dam jaw ra ngut le. Hau byu a hku taw le gë, yang ma-tu je ge taw ra,” ga lwi, yang maw le tai e.
Yesu e min zang zaw e li
22Yang maw zang-zaw ni le. Yang muk yu lwi, shiman bi mu, a-jap-jap kut lwi, yang maw le bi u-jang, “Yu ke! hau gë, Nga e gung ngut le,” ga tai e.
23Gawm le dum yu lwi, hkya-awn yau jang yang maw le bi lwi, yang maw lung-lang hau mai shu kaw e.
24Yang maw le Yang tai e gë, “Hau gë, byu myaw myaw bang e ma-tu shaw pyam bi e hau dang sadi e seng e Nga swi ngut le.
25Nung maw le Ngaw teng teng tai kaw le, Karai Kasang mung ma tsë-bi sik waw shu ra bwi-ni je shaw, shi tsë-bi nwi e shi ma ra ling lang, dum shu ra a ngut,” ga e.
26Hau htang shikawn hkya-awn yau jang, yang maw gë, tsan-lun bum shut htaw law kaw e.
Yesu gë, Petru yang le nyap pyam ra hkyaw sang hë le tai bi e
27Han hkun Yesu yang maw le tai e gë, “Nung maw lung-lang mit-ling-bat kaw ra Hka-su-mu-ga-le, ‘sau zung su le Ngaw bat sa lwi, sau pe byaw-byu bakaw ra,’ ga lwi, ka taw be.
28Ngut-kaw-lang, ngaw dum taw law htang le, Galile mung ma Ngaw nung maw hë ma e-law lang ra,” ga tai e.
29Hau hkun Petru gë, “Lung-lang bang lang, mit-ling-bat byu kaw-lang, ngaw a lawm ra,” ga lwi, Yang le tai e.
30Yesu jau gë, “Nang le Ngaw teng teng tai kyaw le, hku-min lang, waw i hkun a tun shi le, nang Ngaw le sum ling nyap-pyam ra,” ge e.
31Petru jau gë, “Nang e ra-ha shi kaw-lang, ngaw Nang le a nyap pyam ra,” ga lwi, ja ja tai e. Yang maw lung-lang bang hau e ra jung za chang tai kaw e.
Yesu Getsemane sun ma a-kyu dung e
32Getsemane ga e jaw-waw shut yang maw je e kaw lwi, Yang gë, “Ngaw a-kyu dung ni le, nung maw shi ma ni lang ke,” ga lwi, Yang e lagyaw pe le tai e.
33Hau hkun Petru, Yaku, Yawhan pe le, Yang e ra-ha wut shwi yu mu. Yang e i-mit mak-law le e, mit-wi-nik-hkik ja hwi lwi,
34“Nga e i-mit shi shaw mit-yawn maw hwi taw le, shi ma ni ni lwi, ma-ja ni lang ke,” ga lwi, tai taw e.
35Hau hkun hau mai Yang ra zwi lai e-law lwi, mi-gung ngawm gawp u-jang, hau yam e Yang jang mai waw law lai le gë, law lai pyam ra, ga lwi, dung le.
36Yang gë, “Aba, Wa e, lung-lang le Nang waw kut le. Shi gawm le Nga jang mai law lai pyam bi ra. Ngut-kaw-lang, Nga e i-mit a ngut, Nang e i-mit za ngut shang ga,” ga lwi, dung e.
37Ahkwi Yang dum law le, yang maw yup ngawn ni kaw e le law myang e ngut lwi, “Petru le, Simun e, nang yup ngawn ni le lu? Ra yam za lang, a waw ma-ja shirang lu?
38Gum lau e a ja shang ga, a-kyu dung ma-ja ni ke. We-ni gë, dawng ni le, gung-shaw lum wum a baw,” ga lwi, tai e.
39Yang dum e lwi, hë ma dang le pu dung e.
40Dum tau law Je, yang maw myaw-ji yup mwi e yan-mai, yang maw ru yup-ngawn ni kaw e le, Yang myang lwi; Yang le hka-su ngu tu ra yang maw a se kaw.
41Sum ling bat tau law le, “Nung maw gë, ru yup-ngawn, naw-yu shi ke! Ge be. Yam je be. Wu ke! Han byu-yang-zaw gë, yu-bak dap bang e law ma ap-pyam e hwi bura.
42Taw ke! E-law shang. Wu ke! Ngaw le ap pyam ra su gë, jang le be,” ga lwi, yang maw le tai e.
Yesu le jup-yu e
43Yang dang ru tai ni a-shi le lang, lagyaw ra htse i yu ma lawm e Yuda e, hkin-jawng a-gi pe, mau-sau ka sara pe, a-gi su wun pe jang ma, sham e hkawn chung e shiwa-hpung yang e ra-ha je le kaw e.
44Yang le ap pyam ra su yu gë, “Ngaw pup e su gë, hau yu ngut taw le. Yang le jup-yu lwi, sa-di e shwi law ke,” ga lwi, yang maw le se ra hkaw dawng shit taw be.
45Hau mu lwi, je e hkun-jang, yang Yesu jang hkye kut e-law mu, “Ra-bai e,” ga lwi, Yang le pup e.
46Hau hkun yang maw gë, Yang le she lwi, jup-yu kaw e.
47Ngut-kaw-lang, nam ma yap ni e bang jang ma ra yu, shap she lwi, hkin jawng a-gi e jun le zan lwi, yang e naw-hpyaw bit byu e.
48Yesu jau gë, “Nung maw gë, chang-dau da-mya le jup-yu ra su Ngaw le jup yu ra, sham, hkawn, e mu lwi, htaw le kaw lu?
49Hau su kut nyaw maw ni u-jang, naw-ku jawng ma Ngaw ni wi nung maw e ra-ha ni kaw-lang, nung maw Ngaw le a jup yu kaw. Shi jau gë, jum mau sau dik law ra yan-mai dut law be,” ga lwi, yang maw le tai e.
50Hau hkun, lagyaw wi lung-lang gë, Yang le pyam taw lwi, hpang-law byu kaw e.
51I-ram ra yu, gung chin ma ji-me za gang lwi e, Yang htang chang lwi, hau bang yang le jup-yu kaw e.
52Yang jau gë, hau ji-me le hkyut pyam taw lwi, gung chin hpang byu law be.
Hkin-jawng a-gi wa maw e ra-ha mu, yang le sak-se haw kaw e
53Hau hkun yang maw gë, Yesu le hkin-jawng a-gi wa maw jang shut shwi law kaw lwi, hkin-jawng a-gi pe, a-gi su-wun pe e mau-sau ka e sara pe lung-lang Yang jang zu-hpung le kaw e.
54Petru jau gë, hkin-jawng a-gi maw e wang-hkau je shaw, we we ma Yang jang chang lwi, dwi-nang-zaw-shang wi e ra-ha zung u-jang, mi gang ni e.
55Hau hkun hau hkin-jawng a-gi pe su-wun hpung ban-shaw gë, Yesu le waw sat pyam shaw sak-se haw ni kaw lang, a myang kaw.
56Hka-su-mu-ga-le, byu myaw myaw wa Yang hkyaw mau e sak-se hkam kaw-lang, yang maw e sak-se dang a hwi lum kaw e.
57Hau hkun ra wam taw lwi, Yang e hkyaw mau e sak-se hkam u-jang,
58“Shi yu gë, law e sai e shi naw-ku jawng le Ngaw hpyaw pyam lwi, sum ni gyaw ma, law e a ngut e za, gaw-tu le dum waw sai ra, ga lwi, Yang tai e dang le nga maw waw gyaw be,” ga kaw e.
59Ngut-kaw-lang yang maw e sak-se dang gë, ja a hkyum kaw.
60Hau hkun hkin-jawng a-gi maw gë, gung gung ma taw yap lwi, “Nang ra hkun lang a tu lu? yang maw Nang e hkyaw hka-su ga sak-se hkam akaw hta?” ga lwi, Yesu le mi e.
61Yang jau gë, tsëk za ni lwi, ra hkun le a tu. Dum hkin-jawng a-gi maw gë, “Hkya-awn waw e su e Yang-zaw ea e Hkristu gë, Nang ngut ni le lu?” ga lwi, Yang le mi e.
62Yesu gë, “Ngaw ngut taw le. Hau mai gaw tu, hau byu-yang-zaw gë, hpung wup e law yaw ma zung taw lwi, mau-hkung ma mut-mau pe e je le e le, nung maw myang kaw ra,” ga, tai e.
63Hau mu lwi, hkin-jawng a-gi maw wa gë, yang e me-bu le lang-che u-jang, “I-nung hai sak-se ra a-shi hta?”
64“Hau lu-mu dang le nung maw waw gyaw bakaw. Nung maw hai su ngam taw akaw hta?” ga e. Yang shi ging e su ngut taw le, ga lwi, yang maw lung-lang daw-dan kaw e.
65Hau htaw ma ra wam gë, Yang le saw-gan-bye gyun le e, Yang e myaw-dawng le ngawp pyam bi mu, Yang le nu lwi, “Mi-htoi dang tai a!” ga lwi, Yang le tai kaw e. Dwi-nang-zaw-shang wi le law wa e Yang le nu kaw e.
Petru nyap pyam e
66Petru jau gë, a-aw yam ma wang-hkau shut ni e hkun, hkin-jawng a-gi e lang-jang mi-we-zaw ra yu je le lwi,
67Petru mi gang ni e le myang jang, yang le byu-wu lwi, “Nang le Yesu ga e Nazaret byu e ra-ha ni taw le,” ga e.
68Yang yu gë, nyap pyam le e, “Nang tai e dang le ngaw a se law, a bun law,” ga e. Hau htang, kyam zan shut yang htaw e byu law jang, waw tun be.
69Hau lang-jang mi-we-zaw yang le dum myang jang, ling-hkyu yap taw bang le, “Shi yu le yang maw jang lawm ni e,” ga e.
70Yang jau gë, dum nyap pyam e. Hau htang hka myang a myang shi le, ling-hkyu yap ni e bang gë, “Ge ge wa nang yang maw jang lawm ni taw le. Hka-su-mu-ga-le, Galile byu le nang ngut taw le,” ga lwi, Petru le tai kaw e.
71Hau mn lwi yang gë, ning e dang e, “Nung maw tai e su le ngaw a se,” ga lwi, dagam e.
72Hau hkun-jang waw i hkun tun be. Hau mu lwi, Petru gë, “Waw i hkun a tun shi le nang Ngaw le sum ling nyap pyam bura,” ga lwi, Yesu yang le tai e dang le bun ni le e. Hau le mit bun u-jang, ngau ni le.
Actualmente seleccionado:
Marku 14: ATB1951
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© British and Foreign Bible Society 1951