Luk 22
22
Judàs byɨmə əbaʼlə Yesò
1Ando kətsi kəghoʼkə a və nzhɨ kəbayn kə məka kèn nə̀ fəshɨ̀ŋ fə tsu, mboʼsə̀ vì a və ndzàŋ nə̀ məzaʼsə̀, 2Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ Nyìngòŋ nkəŋ jisə ə nyeʼtə zhwi Yesò kò ndiʼi la viʼi a kɨ byèʼ ando vəwenə fàynə viʼi. 3A zhʉ a ghèn Satan kwen a tyɨm Judàs a və ndzàŋ nə̀ Iskalìyòt a ndiʼi wu muʼ fa ntìntìn ndzɨ̀mtə̀sə bàm Yesò shìʼsə njʉ̀sə̀ bò, 4ghə̀ mù lù dyʉ̀ yen tʉtʉ vəpfèm və ngə̀ŋ Nyìngòŋ bènə̀ tʉtʉ viʼi a və ntsɨ̀ŋ ngə̀ŋ Nyìngòŋ vəwenə mù tisə jì a ghə̀ a baʼlə Yesò a vəwenə. 5Vəwenə ndiʼ nə̀ saŋlə ghoʼo ghə̀ ə ghʉ̀ wenə̀ vəwenə la vəwenə a ku ko a wen. 6Judàs byɨmə kənyʉ̀ a kènkə bè mù zìtə̀ sə kəŋə jisə a ghə̀ a nè la və ghaʼ Yesò kò ndiʼ la nòyn viʼi diʼ.
Yesò baʼtə̀ əzhɨ fozhɨvə məzaʼsə wenə ndzɨ̀mtə̀sə bàm wen
7Kətsi kə mù vì a və ndiʼi shyə byi njɨ̀ məzaʼsə tsu, 8Yesò mù tɨm Bità wenə Joyn gaʼa la “ghə̀ŋ dyʉ̀ ə shɨ̀tə̀ fozhɨvə məzaʼasə vəghəŋ zhɨ.” 9Vəwenə bwènsə̀ bèm a wen la “wu kəŋ la yès dyʉ̀ shɨ̀tə̀ fe?” 10Ghə̀ bwènsə̀ gàʼ à vəwenə la “Ghə̀ŋ zhʉtə a!, zhʉ a ghə̀ŋ kwenli a Jelusalèm, ghə̀ŋ a yen wìʼ a ghə̀ byèʼè ntòyn a mù, ghə̀ŋ dzɨ̀mtə wen ə dyʉ̀ kwen a ngə̀ŋ a ghə̀ a kwen tsu; 11ə bèm à ti ngə̀ŋ ayì la ndìʼsə̀ bèm la tyì ngə̀ŋ viʼi ghayn yì ye a ghə̀ a zhɨ fozhɨvə məzaʼasə tsu wenə̀ ndzɨ̀mtə̀sə bàm wen lo? 12Ghə̀ a dìʼ tyì ngə̀ŋ kàŋ ghoʼo à ghə̀ŋ mu və shɨ̀tə̀li ghʉ fo tsèm tsu. Ghə̀ŋ dyʉ̀ mbì ə shɨ̀tə̀ fozhɨvə vəghəŋ tsu.” 13Vəwenə dyʉ̀ yen nyʉ̀ vyi no tsèm tò ando Yesò yì gàʼ à vəwenə. Vəwenə mù shɨ̀tə̀ fozhɨvə məzaʼasə vyi tsu. 14Ando zhʉ nkwʉʼʉ̀ Yesò zhɨ fozhɨvə məzaʼsə̀, ghə̀ mù ŋwʉʼʉ a nse sə zhɨ wenə̀ viʼi ntɨm sə wen. 15Yesò bè mù gàʼ à vəwenə la “Ma yi lutə sù kəŋ əzhɨ fozhɨvə məzaʼasə venə vəghəŋ mimbu sə zìtə̀ ə yenə ngəʼ. 16Mà shə̀ʼtə̀ à ghə̀ŋ la ma ko lu be zhɨ fozhɨvə venə əzaʼa fa tʉʼ a soʼo fòyn Nyìngòŋ lu vì ə kwʉʼ.” 17Ghə̀ bè mù lyɨ̀ ndoŋ ku kəzòŋ a Nyìngòŋ ə gàʼ la “Ghə̀ŋ ghaʼ ə nyʉ fa tsu no ghə̀ŋ vətsèm; 18byìʼè mà shə̀ʼtə̀ à ghə̀ŋ la əzì fa layn ma ko be lu nyʉ məlyʉ̀ʼ əzaʼa fa kətsi a soʼo fòyn Nyìngòŋ lə vì kwʉʼ.” 19Ghə̀ bè lyɨ̀ kə̀bayn ə ku kəzòŋ a Nyìngòŋ ə byəʼlə ə gə̀tə̀ a vəwenə gaʼà la “kènkə diʼi wenə ghomə a və ku byìʼì ghə̀ŋ, ghə̀ŋ ne nè kènkə kwòʼtə̀ mò.” 20Zhʉ a vəwenə myetə̀li zhɨ, ghə̀ bè gisə̀ lyɨ̀ ndoŋ yi bè ku kəzòŋ à Nyìngòŋ ə ku a vəwenə gaʼà la “Ndoŋ ghèn diʼ ndoŋ məkàyn mə mfimə̀ a Nyìngòŋ chiʼtə nə̀ mənlyuŋ mwomə a chʉtə byìʼì ghə̀ŋ; 21Ghə̀ŋ zhʉtə a, wìʼ a ghə̀ baʼlə mo, zhɨ yo wen a kəshi a shə̀. 22Wàyn wìʼ ne a pfʉ ando Nyìngòŋ yi ghʉ alì ngəʼ byɨ ne ndiʼ a wìʼ a ghə̀ baʼlə wen.” 23Vəwenə mù zìtə̀ sə bèmə̀ à vəwenə ntìntìn əkɨ wìʼ a ghə̀ a nè kənyʉ̀ a kènkə.
Kəgumə byiʼ wìʼ a ghə̀ a ndiʼ kətʉ
24Vəwenə bè zìtə̀ sə gùmə̀ à vəwenə a ntìntìn byìʼì wìʼ a ghə̀ ndiʼ kətʉ. 25Yesò gàʼ à vəwenə la “Təfòyn tə təloʼ tə mbi kiʼ adyòʼ zəʼtə̀ viʼi vəwenə alì kəŋ la və ndzàŋ vəwenə nə̀ ngyàmtə̀sə viʼi,” 26kə ko diʼ ndiʼ alì a ghə̀ŋ a ntìntìn byìʼè wu to a ghə̀ŋ ntìntìn diʼi bòŋsə diʼ tò nə̀ wu tyetə, kətʉ diʼ ndiʼ tò nə̀ wù shyèʼ. 27Kətʉ kə diʼ wìʼ a ghə̀ ŋwʉʼ a kəchiʼ zhɨ tò zhɨ mu à diʼ wìʼ a ghə̀ chòsə̀ fozhɨvə à wen lo,? A diʼ wìʼ yì a ghə̀ zhɨ tò zhɨ lì, alì ma diʼ a ghə̀ŋ a ntìntìn a nə̀ wìʼ a ghə̀ chòsə̀ fozhɨvə. 28“Ghə̀ŋ diʼ viʼi a ghə̀ŋ ghaʼli tətyɨm təŋtə ə sə diʼ vəghəŋ a mò tyì ngəʼsə. 29Ando tìʼ ghom nkuli soʼ fòyn a mò, a diʼ ndə̀ŋndəŋ jì a ma ku soʼ ayi a ghə̀ŋ, 30ndi ghə̀ŋ zhɨ bè nyʉ a mò kəchiʼ a mò soʼ fòyn, ghə̀ŋ be ne ŋwʉʼʉ a foyn ngwàʼsə Islel shìsə njʉ̀sə̀ bò.”
Yesò yen la Bità ne tyenə wen
31Yesò mù dzàŋ Simon, la “Simon, Simon, Satan bèmə̀li əlyɨ̀ ghə̀ŋ ə səŋtə ghə̀ŋ tò nə̀ kə̀bayn, 32alì ma jɨ̀məli a wù la kə byɨmə wù a fəŋ mè. Zhʉ a wù bwènsə̀li vi a mò wu tomsə vəlèmə̀ vyə”. 33Simon bwènsə̀ gàʼ à Yesò la “Bobo ma ghʉli la ma dyʉ̀ a mfɨŋ ə be pfʉ tò yowù.” 34Yesò bwènsə̀ gàʼ à Bità la “Ma shə̀ʼtə̀ a wu a Bità la mimbu nkə̀ʼ ne sə toŋ layn mu wù tyenli mò a ghayn la a taʼ.” 35Ghə̀ mù bè gàʼ à vəwenə la “A ndiʼ a tʉʼ a ma ntɨm ə ghə̀ŋ kèn nə̀ fəbònə fə we ko kò kəmbò kò gwʉsə, ghə̀ŋ be gholi kəfo?” Vəwenə bwènsə̀ gàʼ la “Yès nko gho no kəfo.” 36Ghə̀ mù gàʼ à vəwenə la, “luwèn wìʼ a ghə̀ kiʼi ko kò kəmbò, ghə̀ lyɨ̀. Wìʼ a ghə̀ ko kiʼ nyì, ghə̀ baʼlə dàlə wen ə zen. 37Ma gàʼ à ghə̀ŋ alə̀ la kənyʉ̀ a və nyoʼo li a ŋwàʼlə̀ Nyìngòŋ la ‘Və nghʉ wen a kənyʉ̀ kə mùʼ wenə̀ viʼi nè nyʉ̀ byɨvə.’ Diʼi lyɨ̀ kəshi a mò luwèn, byìʼì la nyʉ̀ tsèm a və nyoʼo byìʼì mò sə̀ lyɨ̀ kəshi luwèn.” 38Ndzɨ̀mtə̀ bàm wen tsen mù bwènsə̀ gàʼ à wen la “Bobo yèn a, yès kiʼi nyisə̀ bò a shə̀.” Ghə̀ gàʼ à vəwenə la, “ghə̀ŋ kye alì.”
Yesò jɨ̀m a kwi pfen Olìf
39Yesò lu ə kuʼ a pfèn Olìf ando ghə̀ tə nè, ndzɨ̀mtə̀sə bàm wen sə boʼsə wen. 40A ndiʼ a zhʉ a vəwenə zaʼa kəshi ayì ghə̀ gaʼa vəwenə la “ghə̀ŋ jɨ̀m la kə mwòmsə̀ a vì a ghə̀ŋ.” 41Ando ghə̀ gàʼ alì, ghə̀ lù fa vəwenə a mbyɨ̀ jèʼ tò kəghaf a və zì və temə nguʼ ghə̀ dyʉ̀ zaʼa, gwʉ̀ʼtə alwi wen a nse ə jɨ̀m la 42“Tìʼ, a zhʉ a wu kòŋə wu shi ndoŋ ngəʼ ghèn fa mò, alì ne tò kyikə a wu kòŋə ka ne kyikə a ma kòŋə̀.” 43Ntsɨŋ ngə̀ŋ Nyìngòŋ shiʼi a wen fa kàŋ, ə ku kədyòʼ a wen. 44Yesò kwòʼtə̀ byìʼì zaf a ghə̀ ne a zhʉ,ghə̀ jɨ̀m nə̀ tyɨmə wenə no tsèm kəzhʉʼsə kə̀ sə shiʼi fa wenə wèn diʼ to nə̀ mənlyuŋ chomə a nse. 45Ando ghə̀ myètə̀ jɨ̀m ghə̀ lù bwènə̀ dyʉ̀ a kəshi a ndzɨ̀mtə̀sə bàm wen ndiʼ tsu ə yèn vəwenə mu kusə shinsə nèli vəwenə sə bʉnə̀. 46Ghə̀ bèm a vəwenə la “Ghə̀ŋ bʉnə̀ byìʼì ghò? Ghə̀ŋ lu ə jɨ̀m ndì nè la kə mwòmsə̀ a vì ghə̀ŋ.”
Jì a və ghaʼ Yesò
47Ando Yesò mbu gàʼà a sətsèn Judàs wu muʼ fa ntyìntyìn ndzɨ̀mtə̀sə bàm wen shisə njʉ̀sə̀ bò sə̀ tensə vì nə̀ nòynə viʼi. Judàs mù vìtə̀ boʼsə Yesò ə sə̀ kəŋ jì bwamtə wen, 48alì Yesò gàʼ la “Judàs, wu bwamtə mò wàyn wìʼ ə baʼlə?” 49A ndiʼ a zhʉ a ndzɨ̀mtə̀sə bàm Yesò nyenə kənyʉ̀ a kə a fʉ̀, vəwenə bèm a wen la “Bobo yes sòyn nə̀ nyì shisə?” 50Wù muʼ fa ntyìntyìn ndzɨ̀mtə̀ sə bàm Yesò koʼ tyin kətiʼitiʼi kə kwoŋ to ghə̀ kə wù shyèʼ kətʉ kə tʉtʉ vəpfèm və Nyìngòŋ. 51Yesò gàʼ la “kə kwʉʼli,”ghə̀ mù kùmsə kətiʼitiʼi kə wìʼ a kyi ə chʉʼ wen. 52Yesò mù bèm à tʉtʉ vəpfèm və Nyìngòŋ nə̀ tʉtʉ viʼi ntsɨ̀ŋsə ngə̀ŋ Nyìngòŋ bènə̀ və chəʼ vətsenvə a və nvì əghaʼ wen la “Ghə̀ŋ vì nə̀ nyisə, nə̀ mbàŋsə əvì ghaʼ mo sə ma diʼ tsoŋ ale? 53A ndiʼ a tʉʼ a ma ndiʼi vəghəŋ a tyì ngə̀ŋ Nyìngòŋ kò ghə̀ŋ lə ghaʼa mo; alì ghèn diʼ zhʉ a Satan tì nfɨnə̀ soʼo tsu.”
Bità mo Yesò
54Viʼi a vyi mù ghaʼ Yesò lu nə̀ wen, ə̀ dyʉ̀ nə̀ wen a ngə̀ŋ kətʉ kə tʉtʉ vəpfèm və Nyìngòŋ, Bità dzɨ̀mtə̀ nò fa kəghaf. 55Vəwenə vì zaʼa tsu, ə disə̀ zhiʼ a kətyìntyìn kə fətin fə soʼ nsoʼ ə sə zosə, Bità vì ŋwʉʼ a vəwenə a ntyìntyìn. 56Ando ghə̀ ŋwʉʼli, kəlwàŋ kəzhiʼ kə bàŋ a wenə a kəʼ, wàyn wùwì shyèʼ tsen yenə wen ə̀ gàʼ la “Wìʼ ghèn tə ndiʼ wenə wen.” 57Ali Bità tensə ə gàʼ la “luwàyn, ma ko kɨ wìʼ a ghèn.” 58Zhʉ ko təmə dyʉ̀tə̀, wu tsen yenə wen bè gàʼ la “Nkàyntə wù diʼ wu muʼ fa vəwenə ntyìntyìn.” Ali Bità bwènsə̀ gàʼ la “Ma ko diʼ wìʼ fa vəwenə a tikəbəŋ.” 59A bè sə laʼtə, wulɨm tsen bè kùmtə̀ la “nəmwèʼè nəmwèʼè wìʼ ghèn tə ndiʼ wenə̀ wen byiʼè ghə̀ diʼ wu ntə̀ʼ Galìlì.” 60Bità bè bwènsə̀ gàʼ la “Mà ko kɨ kənyʉ̀ a wù gàʼ kə wenkə a tikəbəŋ.” Ando ghə̀ mbu gàʼ tò fa zhʉ nkə̀ʼ bè toŋ, 61Bobo kaʼsə kyi Bità tò fəchìʼ, Bità mù kwòʼtə̀ gaʼa a Bobo ngaʼli a wen la “Mibu nkə̀ʼ nè sə toŋ layn mu wu moli mò a ghan a to” 62Ghə̀ mù fʉ̀ a kəbəŋ dì no nəmwèʼè nəmwèʼè.
Və sə chəʼə Yesò bè ghòmə̀ wen
63Viʼi a və nghaʼa Yesò bè mù sə chəʼə wen bè ghòmə wen, 64Vəwenə bè kwìʼ ashɨ wen ə bèm a wen la “Shə̀ʼtə la a ghòm ndò wù lo?” 65Vəwenə bè sə telə wen gàʼà ngwaʼ à nyʉ̀ byɨvə a wen.
Və vi nə̀ Yesò a kəbòʼ kə nsoʼ
66Ando tʉʼ nlaynə vəchəʼ nə̀ tʉtʉ vəpfèm ngə̀ŋ Nyìngòŋ bènə̀ ndìʼsə̀sə təsoʼ tsèntə, və lyɨ̀ Yesò vì nə̀ wen a vəwenə ashɨ. 67Vəwenə gàʼ la “Shə̀ʼtə a yes, la a diʼi Klistò yi lo?” Yesò bwènsə̀ gàʼ la “Ma sə tsen shə̀ʼtə̀ tə̀ shyə̀ʼtə̀ a ghə̀ŋ kò ghə̀ŋ a byɨmə, 68ma bè bèm tə kənyʉ̀ a ghə̀ŋ kò ghə̀ŋ a bwènsə̀, 69alì əlù fa luwen ədyʉ̀ nə̀ mbì, və a ŋwʉʼsə Wàyn Wìʼ a shyə kwoŋ to ghə̀ Nyìngòŋ ti a ghə̀ kiʼi adyòʼ tsèm.” 70Vəwenə vətsèm mù bwènsə̀ bèm la “Wù mù diʼ Wàyn Nyìngòŋ yi mu?” Ghə̀ bwènsə̀ gaʼa vəwenə la “Nkàyntə̀ ghə̀ŋ gàʼ ali la ma diʼ wen.” 71Vəwenə bè mù gàʼ la “Vəghəŋ kəŋ be zhʉ fa chʉ̀ ndò, vəghəŋ vətsèm zhʉli fa wen chʉ̀.”
Actualmente seleccionado:
Luk 22: bbkDBLnt
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión