Luk 13
13
Ghə̀ŋ kwitə fa ghə̀ŋ nyʉ̀ byɨvə
1A ndiʼ a zhʉ ayì, viʼi vətsen və gàʼà Yesò kùmə̀ viʼi Galìlì vətsenvə a Balèt nlù zhwilə ə fɨŋ mənlyuŋ mə vəwenə nə̀ fo kəku a vəwenə ando vəwenə mò Nyìngòŋ. 2Yesò bwènsə̀ bèm à vəwenə la, “Ghə̀ŋ kwòʼtə̀ la ngəʼ ghèn nkwetə viʼi Galìlì na venə fambwo vəwenə ndiʼ viʼi nè nyʉ̀ byɨvə chò vətsen və mu? 3Mà shə̀ʼtə̀ à ghə̀ŋ la kə ko diʼ ali no fa mpfen, ghə̀ŋ faŋ kè kwitə tətyɨm təŋtə fa nyʉ̀ byɨvə, ghə̀ŋ vətsèm lù lè tò ndə̀ŋndəŋ. 4Ghə̀ŋ be kwòʼtə̀ kənyʉ̀ kì a kə nlù fʉ̀ nə̀ viʼi Silom vyi njʉ̀sə̀ fwomə. Ngə̀ŋ nguʼsə yi a vəwenə nlù sə bwomə, ghə̀ dyef kuʼ no alə̀, nlù fəŋ ə zhwilə vəwenə no vətsèm. Ghə̀ŋ kwòʼtə̀ la vəwenə nlù nè mbyɨsə sə chò sə viʼi no vətsèm a və ndiʼi a Jelusalèm mu? 5Kə ko diʼ ali no fa mpfen, alì mà gàʼà ghə̀ŋ la, ghə̀ŋ sətsèn faŋ kè kwitə tətyɨm təŋtə fa ghə̀ŋ nyʉ̀ byɨvə, ghə̀ŋ vətsèm be lə̀ lè tò ndə̀ŋndəŋ.”
Ngàyn kəbvèm a fə nko nkumə ashɨ
6Yesò mù mò ngàyn ghèn à vəwenə la, “Wùtsen nkiʼi fəkoʼ fə kəbvèm a ghə̀ wàyn a wen sɨm. Ghə̀ nlu dyʉ̀ tò məzhʉ tsèm ə lye la fə kumə ashɨ lo, alì kò ghə̀ lə n-yenə ashɨ tsu no fa mpfen. 7Ghə̀ mù gàʼà wù ə shyèʼ sɨm wen la, ‘A shi ngʉʼsə taʼ a ma vì to vì a tyi fəkòʼ ashə̀ alì kenla mà yenə no shɨ à yi kətʉ. Bvàʼà mòʼ a nsè. Byiʼi gho a fə byɨsə kəshi kə nsè ken kə tò kədyàŋ a?’ 8Wù shyèʼ sɨm ayì bwènsə̀ la, ‘Tìʼ, be ghʉsə fə wen fə tò alì a ngwʉʼ ghèn, mà jʉʼʉ̀ kaʼ nə̀ tyi yi ə wye fəmbvaŋ tsu. 9Ashi sətsèn kumə tsu a ngwʉʼ fi mu kə li boŋli, à sətsèn fə faŋ kè kumə, və mu bvaʼà maʼà.’”
Yesò chʉʼ wùwì a ghə̀ ŋàŋlə tò nse a kətsi kəzhʉtəkə və Jus
10A ndiʼ a kətsi kəzhʉtə kə kətsen kə Yesò kwen a ngə̀ŋ ntsentə sə dìʼsə viʼi tsu. 11Wùwì tsen ndiʼ tsu a ghə̀ nkiʼi kəzhwì mu kə neli ghə̀ sə kwaʼa tyì ngʉʼsə njʉ̀sə̀ fwomə, ghə̀ gɨməli faŋ kò ndiʼ la ghə̀ zì ghə̀ jèʼ ati ati. 12-13Andìʼ a zhʉ a Yesò n-yenə wen, ghə̀ dzàŋ wen, ghə̀ fʉ̀ vì. Ghə̀ gàʼà wen la, “Wùwì, wù toli fa wu a kwaʼa mbò.” Yesò naʼsə̀ kəvu kə wen ə kùm wen, tò a zhʉ ayì, ghə̀ tɨmə sə jèʼè dyʉ̀ tò ati ati kuʼsə dyʉ̀ nə̀ Nyìngòŋ.
14Alì kətʉ kə ngə̀ŋ ntsentə a kyì sə fwisə tin fambwo Yesò nchʉʼ wìʼ a kətsi kəzhʉ̀tə kə vəwenə mù gàʼ à viʼi la, “Mətsi mə shyèʼ diʼi ntʉfə a woŋ mpfen, ghə̀ŋ a kətsi kəzhʉ̀tə kə.”
15Bobo bwènsə̀ gàʼ la, “Ghə̀ŋ viʼi kə wamə venə! Wìʼ diʼ à ghə̀ŋ a ntìntìn a ghə̀ lù a kətsi kəzhʉ̀tə kə, ghə̀ ghʉsə ke zas nyàm wen fa mbàyn ə dyʉ̀ nə̀ wen ku mu à wen a? 16Ghə̀ŋ yen wùwì ghèn a ghə̀ lù fa ngwaʼa ngə̀ŋ Ablaham mu Satan kwìʼli ghaŋtə̀ wen ke zaytə wen a kətsi kəzhʉ̀tə kə a?” 17Ando ghə̀ ngàʼà alì viʼi kəbàyn wen no vətsèm sə dìʼi. Nghoʼo viʼi tsu sə saŋlə kùmə̀ nyʉ̀ kàynə vyi və tsèm a ghə̀ nè.
Ngàynsə kùmə̀ fòyn Nyìngòŋ
(Mat 13.31-32; Mak 4.30-32)
18Yesò ə mù bèm à vəwenə la, “Soʼ fòyn Nyìngòŋ diʼ tò nə̀ ghò? Mà lè zì mà shəʼ wen ghə̀ no nə̀ gho? 19Ghə̀ diʼ tò nə̀ fəshɨtə ngwàʼà fəkòʼ fə tsenfə a və dzàŋ nə̀ mostàd a wìʼ wè fə lù kwi kuʼ sə diʼ fəkòʼ, mənyin mù sə̀ vì bwòmə təlòʼ tə̀ vəwenə a yì tətam.”
(Mat 13.33)
20Yesò bè bwènsə̀ bèm la, “Mà le zì ma be shəʼ soʼ foyn Nyìngòŋ no nə̀ ghò? 21Ghə̀ diʼ tò nə̀ fəshɨ̀ŋ fə məkalə̀ a wùwì tsen fɨŋ a kəbayn kəbvʉ kə no kə gho sə fɨŋə əzaʼa fa zhʉ a kəbayn a kɨ no kə tsèm a kuʼmə.”
A lu kwen ndo a kəshi kə fòyn Nyìngòŋ
(Mat 7.13-14, 21-23)
22Yesò mù sə chò dyʉ̀ a Jelusalèm, fa ntə̀ʼ a ntə̀ʼ, ziʼi dyʉ̀ nə̀ viʼi. 23Wùtsen bèm à wen la, “Bobo, viʼi vyì a və lu bwoŋsə li və diʼ tò və tyetə mu?” Yesò bwènsə̀ gàʼ à vəwenə la, 24“Ghə̀ŋ mwòmsə no nə̀ kədyòʼ ə cho fa chʉ ngə̀ŋ a ghə̀ faʼsə ə kwen a kəshi kə fòyn Nyìngòŋ. Ghə̀ŋ kɨ la viʼi no və ghoʼo lu nkəŋ kwen fa tsu ali kə to ghoʼo vəwenə. 25Zhʉ lu kwʉʼ, ti ngə̀ŋ lu shwìn chʉ̀ ngə̀ŋ, ghə̀ŋ tɨmə ə fàŋ a kəbəŋ ə kùmtə̀, gàʼ à la, ‘Bobo, boʼo chʉ̀ ngə̀ŋ à yès,’ Ghə̀ bwènsə̀ gàʼ à ghə̀ŋ la, ‘Ma ko kɨ kəshi a ghə̀ŋ lu fa tsu.’ 26Ghə̀ŋ mu zìtə̀ ə gàʼ à la, ‘Vəghəŋ nzhɨ nyʉ a mùʼù, wu bè diʼsə à yes a ntə̀ʼsə.’ 27Alì ghə̀ bè gàʼ tò la, ‘Ma gàʼ à ghə̀ŋ nəmwèʼè la, ma ko kɨ kəshi a ghə̀ŋ lù fa tsu. Ghə̀ŋ lu fà mò a chʉ̀ ngə̀ŋ, ghə̀ŋ viʼi nè nyʉ̀ byɨvə venə!’ 28Ghə̀ŋ lu yen Ablaham nə̀ Izìk nə̀ Jàkob bènə̀ nshə̀ʼtə̀ sə ghoʼkə sə no sətsèm a kəshi kə fòyn Nyìngòŋ ghə̀ŋ mu lyuŋlə dì, be pfiʼi asoŋ ghəŋə mù və shwinəli chʉ̀ ghə̀ŋ ə màʼà ghə̀ŋ a kəbəŋ. 29Viʼi lu nfʉ̀ vi fa təshə̀ tə mbyì tèn no tətsèm ə ŋwʉʼʉ a kəshi kə zhɨkə a kəshi kə fòyn Nyìngòŋ. 30Ma sə gàʼà a ghə̀ŋ la, à lu ndiʼ a tʉʼ ayì, viʼi vyì a vəwenə diʼì a bàm luwen, lu ndiʼ a mbì, ə vyi a və diʼ a mbì luwen, lu ndiʼ a bàm.”
Yesò sə kusə nshinsə à viʼi Jelusalèm
(Mat 23.37-39)
31Tò a zhʉ ayì, viʼi Falàsi vətsen və vi yen Yesò ə gàʼ à wen la, “Wù diʼi lù fa shə̀ ə dyʉ̀ a kəshi kə kədyàŋ byiʼ ando fòyn Helòd sə kəŋ ne zhwi wù.”
32Ghə̀ gàʼ à vəwenə la, “Ghə̀ŋ dyʉ̀ ə shə̀ʼtə̀ à fənsòŋnə̀ a fifə la, ‘Mà dzɨ̀mə̀ zhwì byɨvə bè chʉʼ viʼi layn əkuʼ zaʼa fa boʼòngə̀ŋ. A lu ndiʼ a mətsi taʼ, mà mu myètə shwèʼè ghomə.’” 33Yesò bè mù gàʼ à viʼi la, “Ando diʼ alə̀, ma diʼi dyʉ̀ tò nə̀ mbì layn nə̀ boʼòngə̀ŋ, bènə̀ boʼòngə̀ŋ tsen yi, ndi zaʼa a Jelusalèm byiʼ ando və diʼi zhwi nshə̀ʼtə̀ ghoʼo tò Jelusalèm.
34“Wome, ghə̀ŋ viʼi Jelusalèm ghə̀ŋ zhwilə nshə̀ʼtə̀sə ghoʼkə sə, temlə zhwilə viʼi ntɨm vyi a Nyìngòŋ ntɨmə a ghə̀ŋ! Ma mwòmsəli tò a ghayn a ghayn əpfʉ̀tə ghə̀ŋ ando mpfi mbvʉ lə pfʉ̀tə vunə wen tyi təvò, ali kò ghə̀ŋ lə moʼtə la ma ne! 35Luwen Nyìngòŋ kyəməli ntə̀ʼ ghə̀ŋ. Ma gàʼ à ghə̀ŋ la ghə̀ŋ ko be lu yen mò, bwen la kətsi ne vì a ghə̀ŋ ne gàʼ la, ‘Nyìngòŋ bwaʼsə wen yi a ghə̀ vi a zhìʼ Bobo.’”
Actualmente seleccionado:
Luk 13: bbkDBLnt
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión