ᒞᓐ 3
3
ᒌᓴᔅ ᐁᒄ ᒫᒃ ᓂᑯᑏᒪᔅ
1ᒌ ᐃᐦᑖᐤ ᓈᐯᐤ ᓂᑯᑏᒪᔅ ᐁ ᐃᔑᓂᐦᑳᓱᑦ, ᕓᕆᓰ ᒌ ᐃᑕᐴ ᑲᔦ ᐁᐅᑯᓐ ᐊᓐ ᐯᔭᒄ ᑳ ᓃᑳᓂᔥᑯᐙᑦ ᒎᐗ ᐄᓅᐦ᙮ 2ᐯᔭᒀᐤ ᒫᒃ ᐁ ᑎᐱᔅᑳᔨᒡ ᒌ ᓂᑐᐙᐸᒣᐤ ᒌᓴᔅ ᐁᒄ ᑳ ᐃᑖᑦ, ᒋᔅᒋᓄᐦᐊᒫᒉᓲ, ᒋᒋᔅᒉᔨᒥᑎᓈᓐ ᒋᔭ ᒋᔅᒋᓄᐦᐊᒫᒉᓲ ᐁ ᒌ ᐯᒋ ᐃᑎᔕᐦᐆᔅᒃ ᒋᔐᒪᓂᑑ᙮ ᐌᔥ ᓇᒧᐃ ᐊᐌᓐ ᒋᑲ ᒌ ᐃᐦᑑᑕᒻ ᐊᓂᔫ ᒫᒥᔥᑳᒡ ᐃᐦᑐᐎᓐ ᒋᔭ ᑳ ᐃᐦᑑᑕᒪᓐ ᐁᑳ ᐐᒋᐦᐄᑯᑌ ᒋᔐᒪᓂᑑ᙮
ᐁ ᓂᑐᐌᔨᐦᑖᑯᐦᒡ ᒦᓐ ᒉᒌ ᐱᒫᑎᓰᑦ ᐊᐌᓐ
3ᒌᓴᔅ ᑳ ᐃᑖᑦ, ᑯᐃᔅᒄ ᒋᐐᐦᑕᒫᑎᓐ, ᓇᒧᐃ ᐊᐌᓐ ᒋᑲ ᒌ ᐙᐸᐦᑕᒧᐌᐤ ᒋᔐᒪᓂᑑ ᐅᒋᔐᐅᒋᒫᐎᓂᔫ ᐹᑎᔥ ᒦᓐ ᐱᒫᑎᓰᑌ᙮
4ᐁᒄ ᓂᑯᑏᒪᔅ ᑳ ᐃᑖᑦ, ᑖᓂᑌ ᒦᓐ ᒉᒌ ᐅᐦᒋ ᐱᒫᑎᓰᑦ ᐊᐌᓐ ᔖᔥ ᐁ ᒌᔑ ᓂᐦᑖᐅᒋᑦ᙮ ᓇᒧᐃ ᒦᓐ ᒋᑲ ᒌ ᐲᐦᒉᐌᐤ ᐅᑳᐐᐦ ᐅᔅᐸᔮᔨᐦᒡ ᒦᓐ ᒉᒌ ᐱᒫᑎᓰᑦ᙮
5ᒌᓴᔅ ᑳ ᐃᑖᑦ, ᑯᐃᔅᒄ ᒋᐐᐦᑕᒫᑎᓐ, ᓇᒧᐃ ᐊᐌᓐ ᒋᑲ ᒌ ᐲᐦᒉᐤ ᒋᔐᒪᓂᑑ ᐅᒋᔐᐅᒋᒫᐎᓃᐦᒡ ᐹᑎᔥ ᓂᐲᐦᒡ ᑲᔦ ᐊᐦᒑᐦᑯᐎᓂᐦᒡ ᐅᐦᒋ ᐱᒫᑎᓰᑌ 6ᒥᓯᐌ ᒋᓃᒋᐦᐄᑯᓅᒡ ᐁ ᐃᐦᑖᑣᐤ ᒋᒌ ᐅᐦᒋ ᐊᔮᓈᓅ ᐆ ᐎᔮᔅ ᐱᒫᑎᓰᐎᓐ᙮ ᒥᒄ ᒫᒃ ᑳ ᐸᔦᐦᒋᓰᑦ ᐊᐦᒑᐦᒄ ᐁ ᐃᐦᑖᑦ ᐅᐦᒋ ᐁᑯᑦ ᐌᐦᒋ ᐊᔮᔨᐦᒄ ᐊᐦᒑᐦᒄ ᐱᒫᑎᓰᐎᓐ᙮ 7ᐁᑳᐐ ᒫᒥᔥᑳᑌᔨᐦᑕᒥᐦᐄᒄ ᐆ ᐁ ᐃᑎᑖᓐ ᐁ ᓂᑐᐌᔨᐦᑖᑯᓯᔨᓐ ᒦᓐ ᒉᒌ ᐱᒫᑎᓯᔨᓐ᙮ 8ᐁ ᔫᑎᐦᒡ, ᒥᒄ ᐊᓂᑌ ᐙ ᐃᔒᐌᒡ ᐁᑯᑌ ᐁ ᐃᔒᐌᒡ᙮ ᐯᐦᑖᑯᓐ ᐁ ᔫᑎᐦᒡ ᓇᒧᐃ ᒥᒄ ᒋᔅᒉᔨᐦᑖᑯᓐ ᑖᓂᑌ ᓂᐦᐋᐤ ᐌᐦᒋᐸᔨᐦᒡ ᑲᔦ ᑖᓂᑌ ᐁ ᐃᔅᐸᔨᐦᒡ ᐊᓐ ᐁ ᔫᑎᐦᒡ᙮ ᐁᑯᓐ ᒫᒃ ᒬᐦᒡ ᐁ ᐃᔑᓈᑯᓯᑦ ᑳ ᐸᔦᐦᒋᓰᑦ ᐊᐦᒑᐦᒄ, ᓇᒧᐃ ᒋᒋᔅᒉᔨᒫᓅ ᐊᐌᔫ ᒦᓐ ᒉ ᒥᔮᑦ ᐱᒫᑎᓰᐎᓂᔫ᙮
9ᓂᑯᑏᒪᔅ ᒫᒃ ᒌ ᐃᑌᐤ, ᑖᓂᑌ ᒫᒃ ᒉᒌ ᐅᐦᒋ ᐃᔅᐸᔨᐦᒡ ᐆ᙮
10ᐁᒄ ᒌᓴᔅ ᑳ ᐃᑖᑦ, ᒋᔭ ᐁᐅᒄ ᐯᔭᒄ ᑳ ᒋᔅᑌᔨᒫᑲᓅᑦ ᒋᔅᑯᑕᒫᒉᓲ ᐅᑕᐦ ᐃᔅᕋᐁᓕᐦᒡ, ᔮᐸᒡ ᐋ ᓇᒧᐃ ᒋᓂᓯᑐᐦᑑᓐ ᐆ ᑳ ᐃᑗᔮᓐ᙮ 11ᑯᐃᔅᒄ ᒋᐐᐦᑕᒫᑎᓐ᙮ ᓂᑖᔨᒨᑌᓈᓐ ᑖᓐ ᐁ ᐃᔑ ᒋᔅᒉᔨᐦᑕᒫᐦᒡ ᑲᔦ ᑖᓐ ᑳ ᐃᔑ ᐙᐸᐦᑕᒫᐦᒡ ᓇᒧᐃ ᒫᒃ ᔮᐸᒡ ᐙᒋᐯᔭᒄ ᒋᐐ ᑖᐺᐦᑑᓈᓐ᙮ 12ᓇᒧᐃ ᒋᑖᐺᐦᑑᓈᐙᐤ ᐁ ᐐᐦᑕᒫᑕᑯᒡ ᑖᓐ ᐁ ᐃᔅᐸᔨᐦᒡ ᐅᑕᐦ ᐊᔅᒌᐦᒡ᙮ ᑖᓂᑌ ᒫᒃ ᒉᒌ ᐅᐦᒋ ᑖᐺᐦᑕᒣᒄ ᐐᐦᑕᒫᑕᑯᒉ ᑖᓐ ᐁ ᐃᑌᔨᐦᑖᑯᐦᒡ ᐊᓂᑌ ᑭᐦᒋᑮᔑᑯᐦᒡ᙮ 13ᓇᒧᐃ ᒫᒃ ᐊᐌᓐ ᐅᐦᒋ ᐅᐦᐱᔅᑳᐤ ᑭᐦᒋᑮᔑᑯᐦᒡ ᐃᔑ ᒥᒄ ᐄᓅ ᐅᑯᓯᓴ ᑭᐦᒋᑮᔑᑯᐦᒡ ᑳ ᐅᐦᑐᐦᑌᔨᒡ᙮
ᑖᓂᑌ ᒉᒌ ᐅᐦᒋ ᐊᔮᑦ ᐊᐌᓐ ᑳᒋᒉ ᐱᒫᑎᓰᐎᓂᔫ
14ᒬᐦᒡ ᐊᓂᔫ ᑳ ᐃᐦᑎᑦ ᐊᓂᔮ ᒧᓯᔅ ᒣᒀᒡ ᐸᒀᑎᔅᑲᒥᑳᐦᒡ ᑳ ᐃᐦᑖᑣᐤ ᑳ ᒋᑲᒧᐦᐋᑦ ᒋᓀᐳᑯᐦᑳᓐ ᒥᔅᑎᑯᐦᒡ ᒥᓯᐌ ᐊᐌᔫ ᒉᒌ ᐙᐸᒫᔨᒡ, ᐁᑯᓐ ᒬᐦᒡ ᒉ ᐃᐦᑑᑐᐙᑲᓄᔨᒡ ᐄᓅ ᐅᑯᓯᓴ᙮ 15ᐁᒄ ᒫᒃ ᒥᓯᐌ ᐊᐌᓐ ᑳ ᑖᐺᔨᒫᑦ ᒉ ᐊᔮᑦ ᑳᒋᒉ ᐱᒫᑎᓰᐎᓂᔫ᙮ 16ᐌᔥ ᒋᔐᒪᓂᑑ ᐁ ᐃᔥᐱᔥ ᒌ ᓵᒋᐦᐋᑦ ᒥᓯᐌ ᐊᐌᔫ ᐅᑕᐦ ᐊᔅᒌᐦᒡ ᒌ ᒦᐌᐤ ᑳ ᐯᔭᑯᔑᔨᒡ ᐅᑯᓯᓴ, ᒥᓯᐌ ᐊᐌᔫᐦ ᑳ ᑖᐺᔨᒫᔨᒡ ᐁᑳ ᒉᒌ ᓂᔔᓈᑎᓯᔨᒡ ᒫᒃ ᒉᒌ ᐊᔮᔨᒡ ᑳᒋᒉ ᐱᒫᑎᓰᐎᓂᔫ᙮ 17ᐌᔥ ᒋᔐᒪᓂᑑ ᒌ ᐯᒋ ᐃᑎᔕᐦᐌᐤ ᐅᑯᓯᓴ ᐅᑕᐦ ᐊᔅᒌᐦᒡ ᒉᒌ ᐱᒫᒋᐦᐋᔨᒡ ᐊᐌᔫᐦ ᓇᒧᐃ ᐐ ᒉᒌ ᐯᒋ ᓂᔔᓈᒋᒫᔨᒡ᙮
18ᐊᓐ ᒫᒃ ᐊᐌᓐ ᒉ ᑖᐺᔨᒫᑴ ᐅᑯᓯᓯᒫᐤᐦ ᓇᒧᐃ ᒋᑲ ᐅᐦᒋ ᓂᔔᓈᒋᒫᑲᓅ, ᐊᓐ ᒫᒃ ᐊᐌᓐ ᐁᑳ ᒉ ᑖᐯᔨᒫᑴ ᔖᔥ ᓂᔔᓈᒋᒫᑲᓅ ᐌᔥ ᓇᒧᐃ ᑖᐺᔨᒣᐤ ᐊᓂᔫ ᒋᔐᒪᓂᑑ ᑳ ᐯᔭᑯᔑᔨᒡ ᐅᑯᓯᔫᐦ᙮ 19ᐙᔥᑌᐎᓐ ᒌ ᐯᒋ ᐸᒋᔥᑎᓈᑲᓅ ᐅᑕᐦ ᐊᔅᒌᐦᒡ ᒥᒄ ᒫᒃ ᐅᔅᑌ ᒌ ᐃᑌᔨᐦᑕᒧᒡ ᐊᐌᓂᒌ ᐗᓂᑎᐱᔅᑯᓰᐎᓂᐦᒡ ᒉᒌ ᐃᔑ ᐱᒫᑎᓰᑣᐤ ᐃᔥᐱᔥ ᐐ ᐙᔥᑌᐎᓂᐦᒡ ᒉᒌ ᐃᔑ ᐱᒫᑎᓰᑣᐤ ᐌᔥ ᒌ ᒪᒑᑎᓯᔫᒡ᙮ ᐁᐅᒄ ᒫᒃ ᐅᔫ ᒉ ᐅᐦᒋ ᐎᔮᔅᑯᓈᑲᓅᑣᐤ᙮ 20ᐊᓐ ᒫᒃ ᐊᐌᓐ ᑳ ᒪᒑᑎᓰᑦ ᐅᐦᑳᑕᒻ ᐊᓂᔫ ᐙᔥᑌᐎᓂᔫ ᓇᒧᐃ ᐐ ᓈᑕᒻ ᐌᔥ ᓇᒧᐃ ᓂᑐᐌᔨᐦᑕᒻ ᒉᒌ ᓅᑯᓂᔨᒡ ᐅᒪᒑᑎᓰᐎᓐ ᐊᓂᑌ ᐁ ᐙᔥᑌᔨᒡ᙮ 21ᒥᒄ ᒫᒃ ᐊᓐ ᐊᐌᓐ ᑖᐺᐎᓂᐦᒡ ᑳ ᐃᔑ ᐱᒫᑎᓰᑦ ᐊᓂᑌ ᐁ ᐙᔥᑌᔨᒡ ᐃᐦᑖᐤ ᐁᒄ ᒫᒃ ᐁ ᓅᑯᓂᔨᒡ ᑖᓐ ᐁ ᐃᔑ ᓇᓂᐦᐄᐦᑐᐙᑦ ᒋᔐᒪᓂᑑ᙮
ᒞᓐ ᓰᑲᐦᐋᐦᑖᒉᐤ ᑳ ᐐᐦᑕᐦᒃ ᒌᓴᔅ ᐁ ᐋᐎᔨᒡ ᙭
22ᐊᓂᑌ ᒎᑎᔭ ᐊᔅᒌᐦᒡ ᒌ ᐃᑐᐦᑌᐤ ᒌᓴᔅ ᐅᒋᔅᒋᓄᐦᐊᒧᐙᑲᓐ ᐁ ᐐᒉᐅᑯᑦ᙮ ᐁᑯᑌ ᐊᓂᑌ ᑳ ᐃᐦᑖᑣᐤ, ᒌᓴᔅ ᒫᒃ ᒌ ᓰᑲᐦᐋᐦᑖᒉᐤ᙮ 23ᑲᔦ ᐎᔭ ᒞᓐ ᒌ ᓰᑲᐦᐋᐦᑖᒉᐤ ᐊᓂᑌ ᐁᓍᓐ, ᓇᒧᐃ ᐙᐦᔫ ᐊᓂᑦ ᐅᐦᒋ ᓭᓕᒥᐦᒡ ᐌᔥ ᓈᔥᒡ ᒌ ᒥᔖᔫ ᓂᐲᔫ ᐊᓂᑌ᙮ ᒨᔥ ᒌ ᓂᑐᐙᐸᒥᑰ ᐊᐌᔫ ᐁ ᓂᑐᐌᔨᐦᑕᒥᔨᒡ ᒉᒌ ᓰᑲᐦᐋᐦᑐᐙᑦ, ᒌ ᓰᑲᐦᐋᐦᑐᐌᐤ ᒫᒃ᙮ 24ᐁᐅᒄ ᐅᔫ ᑳ ᐃᐦᑎᑦ ᒞᓐ ᐁᔥᒄ ᐁᑳ ᐅᐦᒋ ᒫᑯᓈᑲᓅᑦ
25ᐸᔅᒡ ᒫᒃ ᐊᓂᔫᐦ ᒞᓐ ᐅᒋᔅᒋᓄᐦᐊᒧᐙᑲᓐᐦ ᐁᒄ ᒫᒃ ᑯᑕᑲᒡ ᒎᐗ ᐄᓅᒡ ᒌ ᒪᒋᐸᔫᒡ ᐁ ᐋᔨᒨᑕᐦᒀᐤ ᐊᔨᒥᐦᐁᐎᓐ ᐸᔦᐦᒋᐦᐄᐌᐎᓂᔫ᙮ 26ᒌ ᓂᑐᐙᐸᒣᐅᒡ ᒞᓐ ᐁᒄ ᑳ ᐃᑖᑣᐤ, ᒋᔅᒋᓄᐦᐊᒫᒉᓲ, ᐊᓐ ᓈᐯᐤ ᑖᐱᔥᑯᓐ ᑳ ᐃᐦᑖᔦᒄ ᐊᓂᑌ ᐙᐸᓅᑖᐦᒡ ᐊᓐ ᒞᕐᑕᓐ ᓰᐲᐦᒡ, ᐊᓐ ᑳ ᐋᔨᒨᒪᑦ, ᐊᓄᐦᒌᔥ ᑲᔦ ᐎᔭ ᓰᑲᐦᐋᐦᑖᒉᐤ ᑲᔦ ᒥᓯᐌ ᐊᐌᔫᐦ ᓂᑐᐙᐸᒥᑰ᙮
27ᒞᓐ ᒫᒃ ᒌ ᓂᔥᑴᐅᔑᐦᐁᐤ ᐁ ᐃᑖᑦ, ᓇᒧᐃ ᐊᐌᓐ ᒋᑲ ᒌ ᐊᔮᐤ ᒉᒀᔫ ᐹᑎᔥ ᒋᔐᒪᓂᑑ ᐃᑌᔨᒥᑯᑌ ᒉᒌ ᐊᔮᑦ᙮ 28ᒋᔭᐙᐤ ᒫᒃ ᒋᒌ ᐯᐦᑑᓈᐙᐤ ᐆ ᑳ ᐃᑗᔮᓐ, ᓇᒪᔦᐤ ᓂᔭ ᐊᓐ ᙭ ᒥᒄ ᒫᒃ ᓂᒌ ᐯᒋ ᓃᑳᓂᑎᔑᐦᐅᑰᓐ ᓂᔭ ᒉᒌ ᐋᔨᒨᒪᒃ᙮ 29ᒧᔮᒻ ᐅᔅᒋᓈᐯᐙᓐ ᐎᔭ ᑎᐯᔨᒣᐤ ᐊᓂᔫ ᐅᔅᒋᔅᑴᐙᓐ᙮ ᐊᓂᔫ ᒫᒃ ᐅᐐᒉᐙᑲᓐᐦ ᐊᓐ ᐅᔅᒋᓈᐯᐙᓐ, ᐊᓂᔫ ᑳ ᐐᒋᐦᐄᐌᔨᒡ ᐊᔓᐙᐸᒥᑰ ᒉ ᐃᔥᐱᔥ ᑕᑯᔑᓂᑦ ᑲᔦ ᒥᔦᔨᐦᑕᒥᔫ ᐃᔅᑯᑕᒃ ᐱᔦᐦᑖᑯᑦ᙮ ᐁᑯᓐ ᒫᒃ ᒬᐦᒡ ᑲᔦ ᓂᔭ ᐁ ᐃᔥᐱᔥ ᒥᔦᔨᐦᑕᒫᓐ ᔖᔥ ᐁ ᐃᐦᑖᑦ ᐊᓐ ᑳ ᐯᒋ ᐃᑎᔕᐦᐅᑯᑦ ᒋᔐᒪᓂᑑ᙮ 30ᐃᑌᔨᐦᑖᑯᓂᔫ ᒫᒃ ᐎᔭ ᐁᑎᑑ ᒉᒌ ᐊᑎ ᒋᔅᑌᔨᒫᑲᓅᑦ ᐁᒄ ᓂᔭ ᐌᑖᒡ ᐁᑳ ᒉᒌ ᐃᔥᐱᔥ ᒋᔅᑌᔨᒥᑯᔮᓐ᙮
ᐊᓐ ᑭᐦᒋᑮᔑᑯᐦᒡ ᑳ ᐅᐦᒌᑦ
31ᐌᔥ ᐊᓐ ᐃᔥᐱᒥᐦᒡ ᑳ ᐅᐦᑐᐦᑌᑦ ᐁᐅᒄ ᐊᓐ ᒫᐅᒡ ᐁ ᐃᔅᐯᔨᐦᑖᑯᓯᑦ᙮ ᐊᓐ ᐊᔅᒌᐦᒡ ᑳ ᐅᐦᒌᑦ, ᐊᔅᒌᐦᒡ ᐃᔑ ᐱᒫᑎᓯᔫ, ᑲᔦ ᐊᔅᒌᔫ ᐋᔨᒨᑕᒻ᙮ ᐊᓐ ᐊᐌᓐ ᑭᐦᒋᑮᔑᑯᐦᒡ ᑳ ᐅᐦᒌᑦ ᐎᔭ ᒫᐅᒡ ᐃᔅᐯᔨᐦᑖᑯᓲ᙮ 32ᐐᐦᑕᒻ ᑖᓐ ᑳ ᐃᔑ ᐙᐸᐦᑕᐦᒃ ᑲᔦ ᑖᓐ ᑳ ᐃᔑ ᐯᐦᑕᐦᒃ ᐊᓂᑌ ᑭᐦᒋᑮᔑᑯᐦᒡ ᒥᒄ ᒫᒃ ᓇᒧᐃ ᐊᐌᔫᐦ ᑖᐺᐦᑖᑰ᙮ 33ᐊᓐ ᐊᐌᓐ ᑳ ᐅᑎᓇᒧᐙᑦ ᑖᓐ ᐁ ᐃᑗᔨᒡ ᐁᑯᑦ ᐁ ᓅᑯᓂᔨᒡ ᐁ ᑖᐺᐦᑕᐦᒃ ᒋᔐᒪᓂᑑᐦ ᐁ ᑖᐺᐅᒉᔨᐦᑖᑯᓯᔨᒡ᙮ 34ᐊᓐ ᑳ ᐯᒋ ᐃᑎᔕᐦᐅᑯᑦ ᒋᔐᒪᓂᑑ ᐃᑌᐤ ᑖᓐ ᐁ ᐃᔑ ᒦᑯᑦ ᒋᔐᒪᓂᑑᐦ ᒉᒌ ᐃᑗᑦ ᑲᔦ ᒥᑐᓐ ᑌᑲᔥ ᐲᐦᒋᔥᑳᑰ ᒋᔐᒪᓂᑑ ᐅᑕᐦᒑᐦᑯᔫᐦ᙮ 35ᐅᐦᑖᐐᒫᐤ ᓵᒋᐦᐁᐤ ᐅᑯᓯᓯᒫᐤ᙮ ᒌ ᒥᔦᐤ ᒥᓯᐌ ᒉᒀᔫ ᒉᒌ ᐐᔓᐙᑕᒥᔨᒡ᙮ 36ᐊᓐ ᒫᒃ ᐊᐌᓐ ᑳ ᑖᐺᔨᒫᑦ ᐅᑯᓯᓯᒫᐤ ᐊᔮᐤ ᑳᒋᒉ ᐱᒫᑎᓰᐎᓂᔫ, ᐁᒄ ᐊᓐ ᐊᐌᓐ ᐁᑳ ᑳ ᓇᓂᐦᐄᐦᑐᐙᑦ ᐅᑯᓯᓯᒫᐤ ᓇᒧᐃ ᒋᑲ ᐅᐦᒋ ᐊᔮᐤ ᑳᒋᒉ ᐱᒫᑎᓰᐎᓂᔫ᙮ ᒋᔐᒪᓂᑑ ᐅᑖᐦᑯᔪᐌᓱᐎᓂᔫ ᒋᑲ ᒫᐦᑕᑯᔥᑳᑰ᙮
Actualmente seleccionado:
ᒞᓐ 3: JBCNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Wycliffe Bible Translators, Inc. and Canadian Bible Society, 2001.