Ma̱rkut 6
6
Á̱ Lak Yesu mi̱ Na̱za̱ra̱t
(Mat 13:53-58; Luk 4:16-30)
1Yesu si̱ ghwon a̱vwuo a̱kya. A̱ si̱ nat ma̱ a̱keang nggu ka Na̱za̱ra̱t, mman ta̱m nggu na si̱ khwi ngguu. 2A̱wot nang a̱tuk Mam Fwung A̱yahudawa ka nkaat a̱ bai a̱ni, a̱ si̱ nwuo tyiet mami tutu a̱tung A̱yahudawa hu. Á̱niet ma̱ a̱di̱di̱t ku shya̱ a̱ja. A̱wot nang ba̱ mmyiai a̱fufwuo á̱ fwuong gu a̱ni, ku si̱ yet mba kyang a̱ga̱de. Ba̱ si̱ lyip, nyia̱, “A̱ji wa gu mmyiam nkyang nani? Á̱ nang gu mumwang huni neet a̱ji wa? A̱ nyia̱ ni a̱ nyia̱ a̱cha̱chet nkyang a̱ri̱bi̱di nani? 3A̱tyu wuni wa yet a̱tyu shap nkyang wu baa? Nggu wa yet nggwon Ma̱ryamu, a̱ bu yet a̱na̱nyiuk Yakubu, Yosi, Yahuda, ma̱ng Siman baa? Á̱na̱nyiuk á̱nap gu bibya shya̱ a̱ji ma̱ng a̱nzi̱t baa?” A̱wot ba̱ si̱ lak fa̱k gu hu.
4Yesu si̱ nyia̱ ma̱ng a̱mba, “A̱ta̱m a̱kwonu A̱gwaza lyi̱ri̱ng shi a̱yin a̱vwuo bah; si̱ ma̱ a̱keang guu, ma̱ng kwai gu, ma̱ng á̱na̱nyiuk gu.” 5Yesu ku shya̱ nyia̱ nkyang a̱ri̱bi̱di ma̱ a̱di̱di̱t a̱ja bah; ma̱ á̱niet nzwán bya ma̱ a̱da̱dei, nang gu ku saai mba mbwak a̱ si̱ choot baa. 6A̱ si̱ fa̱k a̱ga̱de ba̱t tazwa nwai nwuak a̱chuchuk mba hu!
Yesu Ta̱m A̱yaata̱m Swak ma̱ A̱feang
(Mat 10:5-15; Luk 9:1-6)
7A̱wot Yesu si̱ nwuai a̱ kat a̱bachyuang a̱ka̱keang a̱ tyiet á̱niet ba. A̱ si̱ yorong a̱yaata̱m swak ma̱ a̱feang ba dundung. A̱wot a̱ si̱ ta̱m ba a̱fafaan, a̱ si̱ nang ba tyok tazwa á̱ka̱tuk ntswá.
8A̱ si̱ bu tak ma̱ng a̱mba nyia̱, “Nyi yok kyiak kyang ma̱ a̱chyet nyin ka nang kyayak, kurum, ma̱ng gumaat bah; mi̱ shan a̱chyet ja ma̱nyin ji nyi na ba̱ng. 9Nyi tyia̱ á̱kwatak ywan, a̱wot nyi yok kyiak a̱ta̱swak che sweang nang nyi na shai a̱ni bah.
10“Kuzang a̱li nyi nnwuo, nyi swan a̱ja, si̱ nat a̱tuk ka nyi na nghwon a̱keang a̱kya a̱ni. 11Kuzang a̱keang ka̱ lak san nyin, ba̱ si̱ bu lak fa̱k nyin a̱ni; ki̱ nyi na ghwut a̱ja nyi gbaat mbwuk a̱ti̱tak nyin na, nyi ghwon a̱keang a̱kya. Ku na yet a̱lama ku tak nang A̱gwaza na nnyia̱ mba shi̱ri̱ya mut!”
12Ba̱ si̱ nat á̱ shei a̱lyiat A̱gwaza na nyia̱ á̱niet ba ba̱ ghwon a̱ka̱tuk nyia̱ mba wu, ba̱ khwi A̱gwaza. 13Ba̱ si̱ khai á̱ka̱tuk ntswá ba̱ ghwut ma̱ á̱niet ma̱ a̱di̱di̱t. A̱wot ba̱ si̱ koot á̱niet nzwán ma̱ a̱di̱di̱t a̱myia̱ za̱itun, ba̱ si̱ choot mbaa.
A̱khwu Yoona A̱tyu Nyia̱ Ba̱ptisman
(Mat 14:1-12; Luk 9:7-9)
14A̱wot a̱gwam Hiridut si̱ fa̱k nkhang nkyang a̱ri̱bi̱di nani, mat konyan ku lyen a̱lyoot Yesu ka shansham ba̱t mi̱ kuzang a̱vwuo. Á̱ghyang á̱niet ku kyiak Yesu nyia̱, “Á ngyei Yoona a̱tyu nyia̱ Ba̱ptisman wa doot mi̱ swuan. Huhwa mbyia̱ chet nyian nkyang a̱ga̱de nani nshya̱ ma̱ a̱nggu!”
15A̱wot á̱ghyang á̱niet si̱ nyia̱, “Yesu yet Iliya wa!” Á̱ghyang si̱ bu nyia̱, “Yesu yet a̱tyo a̱nyiung wa mami a̱khwukhwop a̱ta̱m a̱kwonu A̱gwaza neet gbangbang!”
16Nang a̱gwam Hiridut nfa̱k nkhang Yesu na a̱ni, a̱ si̱ nyia̱, “Á ngyei Yoona a̱tyu nyia̱ ba̱ptisman nang n ku ntyia̱ á̱ si̱ tyap a̱pyia̱ nggu ka a̱ni; nggu wa doot ma̱ng swuan ma̱ á̱niet ba̱ ka̱n kwi a̱ni!”
17Mat a̱gwam Hiridut ma̱ a̱pyia̱ nggu ku mi̱ ntyia̱ á̱ si̱ ta̱bat Yoona á̱ tyia̱ mi̱ jaru. A̱ ku nyia̱ a̱nia da̱nian Hiridiyat, nang gu ku bwuo a̱ yet a̱byii̱k nggu wu a̱ni. A̱ ku yet a̱byii̱k a̱na̱nyiuk gu wa nang á̱ ku ngyei Filibut a̱ni. 18Mat Yoona ku ya a̱son mi̱ shei ma̱ng a̱gwam Hiridut nyia̱, “Doká A̱gwaza ji̱ shim a bwuo a̱byii̱k a̱na̱nyiuk ang nang gu ni̱ swuan bah!#6:18 Lyuut cha̱chaat: “A bwuo a̱byii̱k a̱na̱nyiuk ang bah.””
19A̱wot Hiridiyat ku ba̱ng Yoona mi̱ fwuo. A̱ si̱ chat vak gu na nhyat gu a̱ni, a̱ si̱ shya̱ bah. 20Mat a̱gwam Hiridut ku tyong Yoona ba̱t, a̱ si̱ nwuat gu shi. A̱ si̱ chok gu, mat a̱ ku lyen nang gu ngyet a̱tsotswat ma̱ng a̱za̱za̱rak a̱yin wa. Kuzang jen nang a̱gwam Hiridut nfa̱k a̱lyiat Yoona na, fwuo nggu hu ni̱ tyia̱ ma̱ tai za̱m. A̱mgba̱m ma̱ng a̱nia, a̱ ni̱ chat a̱ fwuong a̱lyiat nggu na ma̱ng a̱lyia̱ sai.
21Nang mam byin a̱gwam Hiridut hu nkaat a̱ bai a̱ni, Hiridiya si̱ kin shya̱ a̱wat. A̱gwam Hiridut si̱ yorong a̱cha̱chet á̱niet ma̱ng a̱cha̱chet á̱niet nzwang, ma̱ng á̱niet ba̱ ba̱ng tyok fam a̱byin Ga̱lili hu a̱ni; da̱nian gu ka nyia̱ a̱gwai ma̱ng song.
22Nang nggwon a̱nap Hiridiyat ka nnwuo a̱zwu ka, ka̱ si̱ song song sang nsum ji a̱ni; a̱gwam Hiridut ma̱ng a̱cha̱chet á̱nietchen nggu ba, ba̱ swan dundung ma̱ng a̱nggu a̱ni, si̱ fa̱k nyinyang song ji ba̱t. A̱gwam wu si̱ lyip nggwon neam ka, “Yihwa nang a chat? Lyip mi̱ kyang hu nang a chat a̱ni, n na nang ang huu.”
23A̱ si̱ la̱p a̱ sak ma̱ng shyishyi ma̱ng nggwon neam ka, nyia̱, “Mi̱ kyang nang a chat a̱ni n na nang ang; ku nang n na teang tyok a̱byin nung hu a̱ka̱feang kya!”
24Nggwon neam ka si̱ tyia̱ kwak a̱ ghwut a̱ nat da̱ a̱vwuo a̱yang ka, ka̱ si̱si̱ lyip gu nyia̱, “Mma, yihwa nang n na ndyip?”
A̱yang wu si̱ nyia̱ ma̱ng a̱nka, “Lyip a̱pyia̱ Yoona a̱tyu nyia̱ ba̱ptisman kya.”
25Mi̱ di̱ yong a̱hwa, nggwon neam ka si̱ bu tyia̱ kwak a̱ bwuok ma a̱nggang a̱ nat da̱ a̱vwuo a̱gwam wu. Ka̱ si̱si̱ nyia̱, “N chat a jong nung a̱pyia̱ Yoona a̱tyu nyia̱ ba̱ptisman ma̱ a̱ka̱gba ma̱ninika!”
26Fwuo a̱gwam hu si̱ byian ba̱t. A̱wot da̱ nggu, a̱ si̱ mi̱n dak nggwon neam ka ndyo bah; mat la̱p sak ma̱ng shyishyi ji gu ka̱n nyia̱ a̱zaghyi nka, ma̱ng a̱mgba̱m á̱nietchen nggu ba a̱ni.
27Mi̱ di̱ yong a̱hwa, a̱gwam wu si̱ kam a̱ tak ma̱ng a̱gwak hyaai á̱niet ma a̱gwam, gu naat a̱ tyat a̱pyia̱ Yoona ma̱ninika a̱ bai ndyo. A̱gwak hyaai á̱niet wu si̱ nat, a̱ si̱si̱ tyat a̱pyia̱ Yoona ka mi̱ jaru ji. 28A̱ si̱ bai ma̱ng a̱pyia̱ Yoona ka ma̱ a̱ka̱gba wu. A̱ si̱ jong nggwon neam ka, ka̱ si̱si̱ nwuak a̱yang nka wu, ku tak a̱khwu Yoona ka a̱ni#6:28 Lyuut cha̱chaat: “Ka̱ si̱ nwuak a̱yang nka wu.”.
29Nang mman nta̱m Yoona na nfa̱k nkhang a̱khwu nggu na a̱ni, ba̱ si̱ bai á̱ ba̱ kyiak kpi̱t vam nggu hu. Ba̱ si̱si̱ niat mi̱ kuu niat á̱niet hu.
Yesu Tsuung Á̱niet Chyi Kwop Tsuon
(Mat 14:13-21; Luk 9:10-17; Yon 6:1-14)
30A̱yaata̱m Yesu ba si̱ bwuok á̱ neet da̱ a̱chyet shei A̱sham Nkhang ka, ba̱ si̱ tyong Yesu á̱ keang. A̱wot ba̱ si̱ tak ma̱ng a̱nggu a̱mgba̱m nkyang na ba̱ si̱ nyia̱ ba̱ si̱ bu tyiet a̱ni. 31Á̱niet ma̱ a̱di̱di̱t ku nshya̱ ba̱t. Á̱ghyang naat nang á̱ghyang bwuot, ku si̱ tyia̱ Yesu ma̱ng a̱yaata̱m nggu ba si̱ lyin jen ya kyayak.
A̱wot Yesu si̱ nyia̱ ma̱ng a̱mba, “Yok, zi̱ nat da̱ a̱vwuo ka̱ sang a̱yin a̱ni, zi̱ si̱ swan ma̱nyin zi̱t a̱ja, zi̱ fwung ma̱ a̱da̱dei.”
32Huhwa ba̱ si̱ nwuo kukwon a̱wak hu. Mba ma̱nyin ba, ba̱ si̱ wak á̱ byia̱k á̱ nat da̱ a̱vwuo ka̱ sang a̱yin a̱ni. 33A̱wot nang á̱niet ma̱ a̱di̱di̱t ndi si̱sak ba̱ nvwuot da̱ a̱vwuo a̱kya a̱ni, ba̱ si̱ fi̱k mba. Huhwa ba̱ si̱ ghwut ma̱ a̱ka̱keang á̱ tyong chung ma̱ a̱ti̱tak, ba̱ si̱ kaat Yesu ma̱ng mman ta̱m nggu na á̱ ghwon.
34Nang Yesu mbyia̱k a̱ si̱ chyok mi̱ kukwon a̱wak hu a̱ni, a̱ si̱ li á̱kpa á̱niet. A̱ si̱ fa̱k kunak ba ba̱t, mat ba̱ li nang zón seap ji̱ sang a̱tyu chok a̱ni. Huhwa gu si̱ nwuo tyiet mba nkyang ma̱ a̱di̱di̱t.
35Nang mam hu nnaat a̱ kwa a̱ni, mman ta̱m nggu na si̱ bai da̱ a̱vwuo nggu, ba̱ si̱ nyia̱, “Mam hu shim kwa, a̱wot a̱vwuo kani yet a̱yit kya! 36Ti̱n á̱niet ba ba̱ nat ma̱ a̱cha̱chet ma̱ng a̱bachyuang a̱ka̱keang, ba̱ kwai nkyayak ma̱ á̱pyia̱ mba, ba̱ ya.”
37Yesu si̱ nwuak ba shim nyia̱, “Nyin bya na nang mba kyayak hu, ba̱ ya.”
Ba̱ si̱ nyia̱ ma̱ng a̱nggu, “A chat zi̱ nat zi̱ san ba kyayak, ku na ya nzi̱t kurum nang a̱yin na nyia̱ ta̱m zwát a̱ni̱nai á̱ tan gu a̱ni; zi̱ bai zi̱ ba̱ nang ba, ba̱ yaa?”
38Huhwa Yesu si̱ lyip ba nyia̱, “Nyi byia̱ burodi a̱mang wa? Nyi nat, nyi lii.”
Nang ba̱ nnwuan a̱ni, ba̱ si̱ bai ba̱ si̱ nyia̱ ma̱ng a̱nggu, “Burodi a̱fwuon wa ma̱ng fa̱n feang.”
39A̱jawa Yesu si̱ tak ma̱ng mman ta̱m nggu na, ba̱ tyia̱ á̱niet ba ba̱ swuat di̱ susot ma̱ shyim á̱kwop wu. 40Huhwa á̱niet ba si̱ swuat di̱ susot; á̱ghyang chyi chyi, á̱ghyang nswak fwufwuon.
41Nang Yesu nkyiak burodi a̱fwuon wu mbeang fa̱n feang hu a̱ ba̱ng a̱ni; a̱ si̱ gba̱t á̱ghyi tswazwa, a̱ si̱ gwai A̱gwaza. A̱ si̱ kpa̱ra̱m burodi wu. A̱ si̱ nwuat mman ta̱m nggu na ba̱ ka̱u á̱niet ba. A̱ si̱ bu sam fa̱n feang hu, a̱ si̱ nwuat mba, ba̱ ka̱u. 42A̱mgba̱m á̱niet ba si̱ ya, konyan si̱ swa.
43A̱wot mman ta̱m nggu na si̱ tung á̱kukum burodi ba ma̱ng fa̱n hu ku bwat a̱ni. Ba̱ si̱ tyei tyentyang a̱ka̱cheang swak ma̱ a̱feang. 44A̱mgba̱m a̱tyok ba ba̱ ku ya kyayak hu a̱ni, ba̱ ku yet chyikwop tsuon ja, kang ma̱ng á̱nyiuk ma̱ng mman.
Yesu Chong tazwa A̱sa̱khwot
(Mat 14:22-33; Yon 6:15-21)
45Mi̱ di̱ yong a̱hwa, Yesu si̱ tyia̱ mman ta̱m nggu na si̱ nwuo mi̱ kukwon a̱wak; ba̱ si̱ wak á̱ byia̱k á̱ khwat a̱son gu á̱ nat a̱keang Ba̱tsaida a̱ma̱nyi a̱gba̱ndang jok ka. Nggu meang, a̱ si̱ byiat á̱kpa á̱niet ka saak, ba̱ si̱ nkat. 46Nang gu mbyiat ba sak ba̱ si̱ nkat a̱ni, a̱ si̱ nat a̱ si̱ nyeak tsok gu ka naai A̱gwaza a̱ja.
47Jenshyung si̱ nyia̱, nang kukwon a̱wak hu shya̱ ma̱ a̱ka̱wa̱tyia̱ a̱gba̱ndang jok wu, nang Yesu meang ni̱ shya̱ ma̱nyin nggu di̱ tsok ji. 48Nang Yesu ndi mman ta̱m nggu na nshya̱ di̱ swuo a̱bung di̱ luk kukwon a̱wak hu a̱ni, mat wun hu ku hyap mi̱ chet ba̱t a̱zaghyi mba a̱ bwuot ma̱ng a̱mba lilyim; di̱n jen a̱ja nang tswam tsat ja mi̱ shong a̱tson, nang gu chong tazwa a̱sa̱khwot ka a̱ chobai ma̱ng a̱mba, Yesu neet a̱ na swak kpa̱mkpaan ma̱ng a̱mba. 49Nang ba̱ ndi gu chong tazwa a̱sa̱khwot ka a̱ni, ba̱ si̱ ngyei a̱tyu nshyit wa! Ba̱ si̱ koot nkun. 50Mat a̱mgba̱m ba ba̱ ku li ngguu, ba̱ si̱ ya̱dyuut.
Mi̱ di̱ yong a̱hwa, Yesu si̱ lyiat a̱ si̱ tyia̱ mba gba̱gbak nyia̱, “Nyi gbang a̱lyia̱! Nung gwa! Nyi yok fa̱k a̱wun bah!”
51A̱ si̱ nwuo kukwon a̱wak hu ma̱ng a̱mba. Wun hu si̱ kin gyong. Mman ta̱m nggu na si̱ tyia̱ ma̱ tai ba̱t. 52Mat ba̱ ku fi̱k a̱ri̱bi̱di burodi wu bah, mat ba̱ ku ntyia̱ fwuo ba̱ lyen bah.
Yesu Choot Á̱niet Nzwan mi̱ Fam a̱byin Ja̱ni̱sa̱ra̱t
(Mat 14:34-36)
53Nang Yesu ma̱ng mman nta̱m nggu na mbyia̱k a̱gba̱ndang jok Ga̱lili wu á̱ tyak a̱ni, ba̱ si̱ tat fam a̱byin Ja̱ni̱sa̱ra̱t. Ba̱ si̱ la̱p kukwon a̱wak hu a̱ja. 54Mi̱ di̱ yong a̱hwa, nang ba̱ nghwut mi̱ kukwon a̱wak hu a̱ni, á̱niet ba si̱ kin fi̱k nang Yesu wa.
55Huhwa ba̱ si̱ tyong chung á̱ neet koji mi̱ fam a̱byin a̱hwa. Ba̱ si̱ kwok á̱niet nzwán ma̱ a̱yaagbaat myian mba ba á̱ chong ndyo da̱ a̱vwuo Yesu, mi̱ kuzang a̱vwuo nang ba̱ nfa̱k gu nshya̱ a̱ni.
56A̱wot kuzang a̱vwuo nang Yesu nnwuo a̱ni; a̱cha̱chet a̱ka̱keang, a̱chyuang, ma̱ng kuzang a̱vwuo, á̱niet ba ni̱ kwok á̱niet nzwán ba mi̱ a̱yaagbaat myian mba ba, á̱ chong dyo a̱zanu tungga. A̱wot ba̱ ni̱ naai ngguu, gu ghwon ba̱ byiam ku ma̱ a̱ta̱m a̱toot nggu ka. A̱wot a̱mgba̱m á̱niet ba̱ byiam gu a̱ni, si̱ choot!
Actualmente seleccionado:
Ma̱rkut 6: TyapNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.