LUKE 9
9
Sawlleh sawmlenihte natohna
1Huzohin ama’n a nungjui sawmlenihte a koukhawm a, dawi zousiah tunga silbawltheihna leh thuneihna, huleh natnate suhdamtheihna a pia a. 2Amah u’chu Pathian gam thu soi diing leh damloute sudam diingin a sawlkheta hi. 3Huleh ama’n a kawmvah, Na zinna diingun chiang aha, sakhau aha, tanghou aha, sum aha bangmah keng sih un; puannaah zong thuaah nih nei sih un. 4Na luutna inn vah tungden unla, huleh hua kipanin kipankhia un. 5Huleh ahung kipaahpih lou photmah chu hu khopia kipan a na chiahdoh chiangun amahuh heetsahna diingin na keengpeeh va leivui tatkhia un, a chi a. 6Huin a chiahta va, tanchinpha soi kawm leh mun china mite sudam in akhua akhua ah a chiahta uhi.
Herod lungjinna
7Huchi'n kumpipa Herod in a silbawl zousiah ana za a; a lungjingta a, ajiahchu khenkhat in John ahung hing kiit ahita a chi va. 8Khenkhat in, Elijah ahung kilaah ahita, a chi va, huleh midangte’n, Malai zawlneite khat hung thou kiit ahita a chi uh. 9Huleh Herod in, John laha lu tanta ing a; hizongleh hichilawma a thu ka jah hi koi ahitai? a chi a. Huchi'n amah chu muh a utta hi.
Mipi saang ngaa vaahna
10Huleh sawllehte’n a hung kiit un a silbawl zousiah uh amah a hilh va. Huin Jesu’n amahuh a pui a, Bethsaida kichi khopi a gamgaw mun khatah a chiahtuampih a. 11Mipite’n huchu a heet tahun amah a juita va; huleh ama’n amahuh ana kipaahpih a, a kawmvah Pathian gam thu a hilh a, suhdam ngaite a sudam hi. 12Huleh ni tumkuan ahung hihin sawmlenihte chu a hung va, a kawmah, I kimvela khopi leh khoneute a chiah a giahna leh neeh diing hawl diingin mipite sawlkhia in; ajiahchu hi-ah gamgaw mun a um i hi, a chi va, 13Hizongleh ama’n a kawmvah, Nangun a neeh diinguh pia un, a chi a. Amahun, Mipi hizaat zoujai neeh diing i va leisah louhleh tanghou ngaa leh nga nih chauh loungal bangmah i nei sih uh, a chi va. 14Ajiahchu amahuh mi saang ngaa vel ahi uh. Huin ama’n a nungjuite kawmah, Sawmngaa jelin a honhon in tousah un, a chi a. 15Huleh amahun hichi’n a bawl va, a bawnun a tousahta va. 16Huin ama’n hu tanghou ngaate leh nga nihte chu a la a, vaanlam entouin a vangpiah a, a balkeeh a, a nungjuite kawmah mipite ma a lui diingin a pia a. 17Huleh a ne va, a vah chiatta uh; huleh a khawnmawh uh a neng bawm sawmlenih a luaahdim uhi.
Peter in Khrist a phuanna
18Huleh hichi ahung hi a, amah ngena a haamtei laiin a nungjuite a kawmah a um va; ama’n a kawmvah, Mipite’n kei koi ahi ahung chi viai? chi'n a dong a. 19Amahun a dawng va, Baptistu John ahi, ahung chi uh; hizongleh khenkhat in, Elijah ahi ahung chi va, huleh a dangte’n, zawlnei malai ate laha khat hung thou kiit ahi, ahung chi uh, a chi va. 20Ama’n a kawmvah, Ahihleh nangun koi ka hi na hung chi viai? a chi a. Peter in a dawng a, Pathian Khrist chu, a chi a. 21Huleh ama’n hu thu chu koimah hilh lou diingin amahuh a khapta hi,
Jesu’n a sih diing leh a thohkiitna diing a soilawhna
22Mihing Tapa’n chu sil tampi a thuaah ngei diing ahi a; upate leh siampu lalte leh lehkhagialtute deih louhin a um diing a, thahin a um diing, huleh ni thum ni’n kaihthohin a um diing ahi, chi in. 23Huleh ama’n a bawnva kawmah, Mi koipouh in ahung juih nuam inchu amah le amah kimumangtop in, nichinin a kros pua in hung jui heh. 24Ajiahchu koipouh a hinna humbit ut in a taan diing a; hizongleh keimah jiaha a hinna taan in a humbit diing hi. 25Bang jiahin ahiai i chih leh mi’n khovel a pum in nei henla, amah kisumang in, ahihlouhleh paihmang in umta leh amah diingin bang a phatuam diai? 26Ajiahchu keimah leh ka thute zumpih chu mihing Tapa’n a loupina toh, a Pa loupina toh, angel siangthoute loupina a ahung chiangin amah chu a zumpih diing hi. 27Hizongleh thutah ka hung hilh ahi, hi a dingte khenkhat, Pathian gam a muh masiah uh sihna chiam lou diing a um uh, a chi hi.
Meelkihendangna
28Huleh hichi ahung hi a, hite a soi nung ni giat diing bangin ama’n Peter leh, John leh, Jakob a pui a, taang ah haamtei diingin a chiah a. 29Huleh a haamtei laiin a meel umdan chu ahung dangta a, a puansilhte chu a vaam a, a teselsulta a. 30Huleh ngai in, mi nih amah toh a kihou va, hute chu Mosi leh Elijah ahi uh. 31Amah u’chu loupina a hung kilaahin Jerusalem khua a, a sihna suhkim diing thu a soi va. 32Hizongleh Peter leh a kawma umte chu a ihmut uh a suaah mahmah a; huleh ahung halh tahun Jesu loupina leh a kawma diing mi nihte a muta uh. 33Huleh hichi ahung hi a, a kawma kipan a paikhiah un, Peter in Jesu kawmah, Houtupa, eiuh diingin hitah a um a hoih hi; bawh thum i lam diing a, nanga di’n khat, Mosi a di’n khat, huleh Elijah a di’n khat, a chi a; bang ahiai a soi zong he louin. 34Huchia a soi laiin meilum ahung kai a, amahuh ahung khuh a; huleh meilum laha, a luut phetun a lauta uh. 35Huleh meilum laha kipanin aw ahung suaah a, Hi ka Tapa deihtah ahi, A thu ngai un, chi'n. 36Huleh aw a daih tahin Jesu chauh a muta va. Huleh a sip vengveng va, hulaiin a sil muhte uh koimah a hilh sil uhi.
Naupang dawiniin mat suhdamna
37Huleh hichi ahung hi a, a jingni a taanga kipan a hungsuh un mipi nasatahin amah ana lamtuah va. 38Huleh, ngai in, mipi lah apat mi khat hung kikou in, Houtupa, ka hung ngen ahi, ka tapa en in; ka tapa neihsun ahi ngal a. 39Ngai in, hagau khat in a man a, thakhat khat in a kikoudoh a; huleh chilphuan bo khopin a bawl gimveu a, naahpihtaha susidup in a nuseveu hi. 40Na nungjuite kawmah delhdoh diingin ka ngen a; a delhdoh thei sih uhi, a chi a. 41Jesu’n a dawng a, Ginna bei leh khang thah hilhlahte aw, na kawmva bangtan um a hung thuaahsiam diing ka hiai? Na tapa hi-ah hung pui in, a chi a. 42Huleh amah chu ahung pailai dawiin a supuuh a, a bawlgim hi. Huin Jesu’n dawiniin chu a tai a, naupang chu a sudam a, a pa kawmah a peta hi.
Jesu’n a sih diing a soilawhna nihveina.
43Huleh a bawnun Pathian silbawltheihna loupi chu limdang a sa mahmah va. Hizongleh mi chinin Jesu silbawl zousiah limdang a sah laiun ama’n a nungjuite kawmah. 44Hi thu kisoite na bil sungvah luut heh; ajiahchu mihing Tapa chu mite khuta matsah a um diing ahi, a chi a. 45Hizongleh amahun hi a thusoi chu a hesiam sih va; a heet louh diing va iim ahihjiahin; huleh a thusoi chu amah a dong ngam sih uhi.
Kingaihngiam tungtaang thuhilhna
46Huin a lahva koi ahiai lianpen diing chi'n kinialna ahung neita va. 47Jesu’n a lungtang va a ngaihtuah uh a he a, naupang khat a pui a, a kawmah a umsah a, 48A kawmvah, Koipouh ka mina hi naupang kipaahpih chu kei hung kipaahpih ahi; huleh kei hung kipaahpih chu ahung sawlpa kipaahpih ahi; na bawnva laha neupen chu a lianpen diing hi, a chi a. 49Huleh John in a dawng a, Houtupa, mi khat na mina dawite nohdoh ka mu va; ka hung juihna vah a tel louh jiahin ka khapta uhi, a chi a. 50Jesu’n a kawmah, Amah chu khap sil un; ajiahchu ei hung dou lou phot chu ei lama pang ahi, a chi hi.
Jesu Jerusalem zuana a chiahtouhna leh Samaria mite siam louhna
51Huleh hichi ahung hi a, puitouh a, a um diing hun a tunin Jerusalem khua a chiah diingin a maai a ngat tinten a, 52A ma ah mi a sawl masa a, huchi'n amahuh chu na chiahin amah diing a guatsa diama na koih diingin Samaria mite khua khatah a luut va. 53Huleh amahun Jerusalem kholama chiah diing banga a meel a lat jiahin amah ana kipaahpih sih va; 54A nungjuite Jakob leh John in hi a heetun, Lalpa, Elijah bawl bangin amahuh kaang mang diingin vaan a kipanin mei koukhe lei hoih na sa diai? a chi va. 55Hizongleh amah chu a kihei a, amahuh a tai a, Bangchibang lungsim po mi na hih uh kihe lou na hi uh, 56Ajiahchu mihing Tapa hi mite hinna suse diing a hung hilouin, hundam diingin ahung ahi zaw, a chi a. Huin khodang ah a chiahta uhi.
Nungjui a panna diing etkhiahna
57Huleh hichi ahung hi a, lampi a, a chiah laiun mi khat in a kawmah, Lalpa na chiahna photah ka hung jui diing, a chi a. 58Jesu’n a kawmah, Sialte’n kua a nei a, tungleeng vate’n zong bu a nei uh; hizongleh mihing Tapa’n a lu ngahna diing zong a nei sih, a chi a. 59Huleh ama’n midang khat kawmah, Hung juiin, a chi a. Hizongleh ama’n, Lalpa, ka pa hung va vuisah masa photin, a chi a. 60Jesu’n a kawmah, Misi in a misi uh kivui u’heh; hizongleh nang chu chiah inla, Pathian gam thu va soi in, a chi a. 61Huleh midang khat in zong, Lalpa, ka hung jui diing; hizongleh ka inn a mite kamphain hung va hasah masa photin, a chi a. 62Jesu’n a kawmah, Mi koipouh laangkawn tujing a nunglam en chu Pathian gam mi hitaah ahi sih, a chi hi.
Actualmente seleccionado:
LUKE 9: SIMTBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.