LUKE 7
7
Sepaih zahoutu suahpa suhdamna
1Huleh mipite jah a, a thusoi zousiah a zoh nungin Kapernaum khua ah a luut a; 2Huleh sepaih zahoutu koi ahakhat suaah deihtah chu damlou in a si dehdeh a. 3Huleh ama’n Jesu tanchin a jah tahin, a kawma hunga, a suaahpa hung sudam diing a ngen diingin Juda upate a kawmah a sawl a. 4Huleh amahun Jesu kawm a va tun un, Amah chu hi sil na bawlsahtaah ahi, 5Ajiahchu ama’n ka nam uh a ngaina a, huleh ka kikhopna inn uh zong ahung bawlsah hi, chi'n hoihtahin a ngen va. 6Huin Jesu chu amahuh toh a hungta a. Huleh inn apat gamla lou ahung geiin, hu sepaih zahoutu in a kawmah a lawmte a sawl a, Lalpa, kisugim nuam dah mai in; ajiahchu ka innsung na luutna taah ahi sih hi; 7Hujiahin kei zong na kawma hung taah in ka kingai sih hi, hizongleh a thu in soi lechin ka suaahpa chu a dam mai diing hi, 8Ajiahchu kei zong mi thunuaia um ka hi a, ka nuaiah sepaihte a um a, khat kawma, Chiah in, ka chihleh a chiah a; huleh a dang kawma, Hung in, ka chihleh a hung a; huleh ka suaahpa kawma, Hi bawl in, ka chih leh a bawl jel hi, chi'n. 9Jesu’n hi thute a jah in, amah chu limdang a sa mahmah a, a kinunghei a, mipi amah juite kawmah, Na kawmvah ka soi ahi, Israelte laha zong hichi bang lawma ginna lian ka mukha sih hi, a chi a. 10Huleh hu a misawlte chu inn lamah a chiah kiit va, suaah damloupa chu damin a muta uhi.
Nain khua a meithainu tapa kaihthohna
11Huleh hunungin hichi ahung hi a, amah chu Nain kichi khua khat ah a chiah a; huleh a nungjuite tamtah leh mipi tampi mahmahin a jui va. 12Huleh khopi kotkhaah kawm ahung tunin ngai in, misi khat ahung zawngdoh va, a nu tapa neihsun ahi a, amahnu chu meithai ahi a; huleh hu khua a mipi tampi a kawmah a um uh; 13Huleh Lalpa’n amahnu a muh tahin a hehpih mahmah a, huchi'n a kawmah, Kap sin, a chi a. 14Huin a hung a, a laang chu a khoih a; huleh a zawngtute chu a dingta uh; Huin ama’n, tangval, thou in, ka hung chi ahi, a chi a. 15Huleh hu misi chu ahung toudoh a, ahung haamta hi; huin ama’n amah chu a nu kawmah a pekheta hi. 16Huin mi zousiah ahung lauta va, Pathian a paahtawi va; I lahah zawlnei loupitah ahung suaahta; huleh Pathian in a mite ahung vehta ahi, chih. 17Huleh hi a tungtaang thu chu Judia gam pumpi leh a kiimvel gam zousiah ah a thangsuaahta hi.
Baptistu John in a nungjuite Jesu kawma a sawlna
18Huleh John nungjuite’n hi thu zousiah amah a hilh va. 19Huin John in a nungjuite laha mi nih a kou a, Jesu kawmah a sawl a, Ahung diingpa chu na hiai mah? ahihlouhleh midang hungaih nalai diing ka hi viai mah? chi'n. 20Hute chu Bang diinga ahung tunun, Baptistu John in, Ahung diingpa chu na hiai mah? ahihlouhleh midang hungaih nalai diing ka hi viai mah? chi a na kawma ahung sawl ka hi uh, a chi va. 21Huleh hulai ngei in ama’n mi tampi, damloute, hiveite, huleh dawimatte a sudam a; huleh mittaw tampite mit a suhvaahsah a. 22Huleh Jesu’n a dawng a, a kawmvah, Chiahta unla, na sil muh uleh na jahte u’chu John va hilh un; bangchi banga mittawte mit hung vaahta a, keengbaite ahung paitheita a, miphaahte ahung siangthouta a, bilngongte’n ahung ja theita a, misite kaihthoh in a umta a, huleh tagahte kawmah tanchinpha soi in a umta, chih. 23Huleh koipouh ka tunga lunghih louhna mu lou chu a hampha hi, a chi a. 24Huleh John misawlte a pai nungun ama’n mipite kawmah John tungtaang thu a soi panta a, Bang en diinga gamdai a chiahdoh na hi viai? sialluang huih muutliing maw? 25Ahihlouhleh bang en diing a chiahdoh na hi viai? Puannem silh maw? Ngai un, puan loupi silh leh mi nuamsate chu kumpipate inn ah ahi a um uh. 26Ahihlouhleh bangpen en diing a chiahdoh na hi viai? zawlnei maw? Ahi, ka hung chi ahi, zawlnei sanga loupizaw ahi. 27Ngai in ka thangkou na ma ah ka sawl a, ama’n na ma ah na lampi a siam diing, chia a tanchin kigial chu amah ahi. 28Numei hin lahah Baptistu John sanga loupizaw zawlnei a um sih; hizongleh Pathian gam a neupen zong amah sangin a loupizaw hi, chih ka hung hilh ahi, a chi a. 29Huleh a thu ja zousiah leh siahdongte’n chu John baptisma tang in, Pathian siam a tan uhi. 30Hizongleh Pharisaite leh daanhetute’n chu a kawma baptisma tang louin Pathian in amahuh diing a, a lemguatsah chu a nualta uhi. 31Huin Lalpa’n, Tulai khang thahte bang toh ka tehkhinta diai? huleh bang tobang ahi viai? 32Amah u’chu naupang dawlmun a tou a, khat leh khat kikoutuah a, Theile ka hung muutsah va, na laam sih va; ka hung kah uh lelah na kap tuan sih uh, kichite bang ahi uhi. 33Bang jiahin ahiai i chih leh Baptistu John chu an lah nelou, uain lah dawn louin ahung a, huleh nangun amah chu dawipaai ahi, na chi uh. 34Huleh mihing Tapa chu ne leh dawnin a hung a, huleh nangun, Endih vua, an haipa, uain haipa, siahdongtute leh misualte lawmpa, na chi jel uh. 35Hizongleh pilna chu a tate zousiah in siam a tan uhi, a chi hi.
Jesu keeng thaunuhna leh sumba nihte tehkhinthu
36Huleh Pharisaite laha khat in amah toh an neehkhawm a ut a. Huin amah chu Pharisaipa inn ah a luut a, ankuang ah a touta a. 37Huleh ngai in, hu khua a um numei sual khat in Jesu Pharisaipa inn ah an ne in a tou chih a heetin Alabastar bawmin thau gimtui ahung tawi a, 38A nungah a keeng bulah kapkawmin a ding a, a keengphaangte chu a mittui in a sukawt a, a sam in a siaah a, huleh a keengpeh a tawp a, thau gimtui a nuh hi. 39Huleh Pharisai amah koupa’n hikhu a muh in a lungsim in, Hipa zawlnei ahihleh hi a khoihnu koi ahiai, huleh bangchi bang mi ahiai chih he leh kilawma, amah lah misual ahi ngal a, a chi a. 40Huin Jesu’n a dawng a a kawmah, Simon, na kawmah soinuam khat ka nei hi, a chi a; Huin ama’n, Houtupa soita’n, a chi a. 41Sum thunglaahsahtu koi ahakhat in leibatu nih a nei a; khat in makhai ja ngaa a ba a, huleh khat in sawmngaa. 42Huleh a ditna diing a neih louh tahun a nih un a ngaidam tuaahta hi. Hujiahin, hung hilh in, a lahva koi zaw in amah a lungsiat naah zaw diai? a chi a. 43Simon in a dawng a, A ngaihdam tam zawpa’n hi diingin ka ngaihtuah, a chi a. Huin ama’n a kawmah, Na chi dih hi, a chi a. 44Huleh ama’n numeinu lam a nga a, Simon kawmah, Hi numeinu na mu ei? Na innsungah ka hung luut a, nang ka keeng silna diing tui na hung pe sih hi; hizongleh amahnu’n chu a mittui in ka keengpeh a sil a, a sam in a siaah hi. 45Nang chu tawp zong na hung tawp sih a; hizongleh hi numeinu’n chu ka hung luut a kipanin ka keengpehte tawp a khawl nai sih hi. 46Nang chu ka lu sathau na hung nuh sih a; hizongleh hi numei in chu ka keengpehte thau gimtui ahung nuh hi. 47Hujiahin ka hung hilh ahi, a sualna tampi chu ngaihdam ahita hi; a lungsiat naah mahmah jiahin; hizongleh tawm ngaihdamnate’n a lungsiat tawm uhi, a chi a. 48Huin ama’n numeinu kawmah, Na sualte ngaihdam ahita hi, a chi a. 49Huleh amah toh ankuang a toukhawmte’n a lungsim un, Sualnate zong ngaidam, hipa hi kua ahiai, a chi va. 50Huin ama’n numeinu kawmah, Na ginna in ahung hundamta hi; hamuangtahin chiahta in, a chi hi.
Actualmente seleccionado:
LUKE 7: SIMTBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.