LUKE 11
11
Lalpa haamteina
1Huleh hichi ahung hi a, mun khata a haamtei laiin, a haamtei zohin a nungjuite khat in a kawmah, Lalpa, John in a nungjuite a hilh bangin haamtei daan hung hilh in, a chi a. 2Ama’n a kawmvah, Na haamtei chiangun, Ka Pa uh vaan a um, Na min kizahtaat heh. Na gam hung tung heh. Na deihzawng vaan a, a kibawl bangin, lei ah zong kibawl heh. 3Ka nikhat neehkhop uh an ni chinin hungpia in. 4Ka sualnate uh hung ngaidam in; kei un zong ka leibate uh photmah ka ngaihdam jiahun; Heemna ah hung puiluut sinla, gilou lah apat hung hunkhe zaw in, chi un, a chi hi.
Haamtei kuhkal diing thu a tehkhinna
5Huleh ama’n a kawmvah, Na lahva koiaha in lawm khat nei henla, jan khang laiin a kawma va chiahin, Lawm, tanghou beu thum hung thunglaahsah in; 6Ajiahchu ka lawm khat khualzin ka kawmah a hung a, a ma a lui diing bangmah ka nei sih, chi henla; 7Huleh ama’n innsung patin dawngin, Hung subuai sin; kot khaah ahita a, huleh ka tate zong ka kawmah lupna ah a ihmuta uh; hung thouin ka hung pe thei sih, ana chi leh, 8Ka hung hilh ahi, a lawm ahihjiaha va thouin va pe sih mah zongleh a nget teitei jiahin thouin a deih jahjah a va pe diing hi. 9Ka hung hilh ahi, Ngen un, ahung kipe diing; hawl un, na mu diing uh; huleh kiu un, ahung kihonsah diing hi. 10Ajiahchu a ngen photin a tang va; a hawl photin a mu va; huleh a kiu phot chu a kihonsah diing hi. 11Na lahva pa hite koi aha a tapa in tanghou ngen leh kuan suang a pe diai? ahihlouhleh nga ngen leh nga luang in guul a pe diai mah? 12Ahihlouhleh aahtui ngen leh mom-ai a pe diai mah? 13Huchia nanguh migilou in bawn na tate uh sil hoih piah na taang na heet uleh, na Pa uh vaan a umin a ngentute kawmah Hagau Siangthou naah piah mahmah lou diing ahiai mah? a chi hi.
Beelzebul jala dawite nohdoh a Jesu kingohna
14Huleh ama’n dawi haamthei lou khat a nohdoh a; Huleh hichi ahi a, dawi a pawt phetin haamthei lou chu ahung haamta a; huchi'n mipi’n limdang a sa mahmah uh. 15Hizongleh a lahva khenkhat in, Dawi maangpa Beelzebul jala dawite a nohdoh ahi, a chi va. 16A dangte’n lah amah ze-etna’n vaan apat a chiamchihna a ngen va. 17Hizongleh ama’n a ngaihtuah uh he in a kawmvah, Gam amah leh amah kidou photmah a mangthai veu hi; huleh innsung khat zong a kidou leh a puuh veu hi. 18Setan zong amah leh amah kidou taleh bangchi'n a gam a ding thei diai? Beelzebul jala dawite nohdoh ahi na hung chi ngal va. 19Huleh ke’n Beelzebul jala dawite nohdoh ka hihleh na tapateun koi jala nohdoh ahi viai? hujiahin amahuh chu nanguh hung vaihawmsah diingte ahi uh. 20Hizongleh ke’n Pathian khut zung vanga dawite ka nohdoh leh Pathian gam na kawmvah ahung tung tahzetta ahi. 21Mi haatin hiam leh thal tawi a, a inn a veen chiangin a thuampuate a bit hi. 22Hizongleh amah sanga haatzaw khat a hung a, ahung zoh chiangin a kimuanna gaalthuam zousiah a laahsah a, huleh a thuampo laahsahte chu a hawmjah veu hi. 23Koipouh ka lama panglou chu ahung dou ahi a; huleh koipouh ahung laahkhawmpih lou chu a thehjah ahi.
Polam kisiamhoih phattuam louh jia
24Dawi niin chu mi sunga kipan a pawtkhiahin khawlna diing hawlin gam gaw mun bangah a vaah lehleh a; huleh a mu sih a; Ka pawtna inn mah ah ka chiah kiit mai diing, a chi a. 25Huleh hutah ahung tun leh phiat sianga jep hoihin a muta a. 26Huin a chiah a, amah sanga gilou zaw dawi dang sagih ahung pui a, a sungah a luut va, a teengta uh; huleh hupa umdan nunung chu ama a sangin ahung se zosemta hi, a chi a. 27Huleh hichi ahung hi a, hi thute a soi laiin mipi lah apat numei koi ahakhat ahung kikoudoh a, a kawmah, Nang hung kipaaina gil a hampha hi, huleh na nawi teepte toh, a chi a. 28Hizongleh ama’n chu, Ahi, himahleh Pathian thu ja a juite a hampha zaw uh, a chi a.
Jona chiamchihna
29Huleh mipi ahung kikhop khawm laiun, ama’n a kawmvah, Tulai khang thahte chu khang giloutah ahi uh; chiamchihna a hawl va; hizongleh zawlnei Jona chiamchihna loungal chiamchihna dang piah ahi sih diing uh. 30Ajiahchu Jona Ninevi khua a mite diing a chiamchihna ahih bangin mihing tapa zong tulai khang thahte diingin chiamchihna ahi diing. 31Simlam kumpinu chu vaihawmni chiangin tulai khang thahte toh ahung thou diing a, siamlouh a tangsah diing hi; ajiahchu Solomon pilna ngaikhe diingin kawlmonga kipan ahung hi; ngai un, Solomon sanga loupizaw hi-ah a um hi. 32Nineveh khua a mite chu vaihawmni chiangin tulai khang thahte toh a thou diing va, siamlouh a tangsah diing uh; ajiahchu Jona thusoi jiahin amahun a sual a kisiih uh; ngai un, Jona sanga loupizaw hi-ah a um hi.
Thaumei apata thuhilhna
33Mi koimah in thaumei a vaah chiangin beemkawm kalah a koih ngei sih, huleh loh nuaiah zong a koih ngei sih; ahung luutte’n a vaah a muhtheihna na diingin thaumei koihna ah a koih zaw hi. 34Tahsa vaahna chu mit ahi, hujiahin na mit a chiim chiangin na tahsa zong a bawnin a vaah suaah hi, hizongleh na mit a hoih louh chian na tahsa zong a mial veu hi. 35Hujiahin na sunga vaah um chu mial ahih louhna diingin pilvaangin. 36Hujiahin na tahsa a pumpia a vaah a, a mialna mun a um louhleh thaumei vaahtahin ahung taanvaah bangin a vaahsuaah veu diing, a chi hi.
Jesu’n Pharisaite leh Lehkhagialte a demna
37Huleh a thusoi laiin Pharisai koi ahakhat in a kawma an ne diingin amah a chial a; huin a luut a, an ne diingin a touta a. 38Hu Pharisaipa’n an neeh ma a khut a sil louh a muh in limdang a sa mahmah a. 39Lalpa’n a kawmah, Nanguh Pharisaite’n nou leh kuang polam na silsiang ngei va; hizongleh na sunglam u’chu leepguuhna leh giitlouhna in a dim hi. 40Nanguh mingol haw, a polam siamtu’n a sunglam zong siam lou ahiai mah? 41Hizongleh na sil neihte uh migentheite kawmah pezaw un; huleh ngai un, sil zousiah nanguh diingin a siang hi. 42Hizongleh Pharisaite, na tunguh a gih hi! ajiahchu nangun pudinate, pardite, huleh haichi zousiah sawma khat na pia va, vaihawmna dih leh Pathian lungsiatna na thudon sih uh; hite ahi na bawl diing uh, a dangte bawllou tuan louin. 43Nanguh Pharisaite, na tunguh a gih hi! ajiahchu nangun kikhopna inn ah touna hoihpen pente leh dawlmuna mi’n chibai ahung buuh diing na deih uh. 44Nanguh lehkhagialtu leh Pharisai lepchiahte haw, na tunguh a gih hi! ajiahchu nangun hi haankhuuh, mi’n haan ahihlam he loua a tung a a va pai veunate bang na hi uh, a chi a. 45Huin daanhe mite laha khat in a dawng a, a kawmah, Houtupa, hichibanga na thusoi in kei u’zong hung tai na hi, a chi a. 46Ama’n, Nanguh daanhe mite zong na tunguh a gih hi! ajiahchu nangun vangih puaah hah tahtah mi na pat va, nangun lah hu vangihte na khut zung khat un zong na khoih nuam sih uh. 47Na tunguh a gih hi! ajiahchu nangun zawlneite haan na lam va, amah u’lah na pulepate uh thah ahi. 48Na pulepate uh silbawl a hoih hi chi'n na heetpih tahzet uhi; ajiahchu amahun amahuh a na that va, nangun a haan uh na lamsah uhi. 49Hujiahin Pathian pilna in zong, A kawmvah zawlneite leh sawllehte ka sawl diing a, a lahva khenkhat a na that diing va, khenkhat a suduhdah diing uh; 50Khovel siam chiila kipana kisuah zawlnei zousiah sisan phu chu tulai khang thahte tungah a kila thei diing hi, 51Abel sisan kisuah apat maitaam leh Pathian biahinn kikala si Zakaria sisan tanin; a chi hi chihtahzetin ka hung hilh ahi, hi Phuba chu tulai khang thahte tungah a kila diing hi. 52Nanguh daan he mite na tunguh a gih hi! ajiahchu nangun pilna chabi na lamang va, nang u’lah na luut sih va, mi a luut diingte lah na khaam veu uhi, a chi a. 53Huleh ama’n hi thute a soi laiin lehkhagialtute leh Pharisaite’n amah chu thu tampi soisah tum in hahphinin a phin panta va; 54Siamlouh a tansah theihna diingun a haamkhialna mat tum in a taang zing uhi.
Actualmente seleccionado:
LUKE 11: SIMTBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.